Gyenesis 42
42
Josef No Nuanom Kɔtɔ Eburow Wɔ Egypt
1Afei Jakob tsee dɛ eburow wɔ Egypt, na ɔsee ne mbabanyin no dɛ, ɔyɛ dɛn na hom hwehwɛɛhwɛ hom enyim nkorkor yi? 2#Ndwu 7.12 Na ɔsee dɛ, Hom nhwɛ, matse dɛ eburow wɔ Egypt: hom nkɔ hɔ na hom nkɔtɔ bi wɔ hɔ mbrɛ hɛn; ama yaatsena ase, na yeennwu. 3Na Josef no nuanom du no kɔr Egypt dɛ wɔrokɔtɔ eburow; 4na Josef no nua Benjamin dze, Jakob amma ɔannye no nuanom no annkɔ; na ɔsee dɛ, Bɛyɛ na mbusu bi ato no. 5Na Israel ne mba no foraforaa hɔn a wɔbae no hɔn mu baa atɔ; osiandɛ nna ɔkɔm no esi Keenan asaase do. 6Nna Josef na ɔyɛ asaase no do ambrado; ɔno na ɔtɔn edziban ma asaase no do nkorɔfo nyinara: na Josef no nuanom no bae, na wɔbɔbɔɔ hɔn mu adze maa no dze hɔn enyim bumboom famu. 7Na Josef hun no nuanom no, ohun hɔn, na ɔyɛɛ noho ɔhɔho wɔ hɔn enyim, na ɔnye hɔn kasaa ebufuw do. Obisaa hɔn dɛ, Hom fi hen bae? Na wɔsee dɛ, Yefi Keenan asaase do bɔtɔɔ edziban. 8Na Josef hun no nuanom no, na hɔn dze, woennhu no. 9#Gye 37.5-10 Na Josef kaa daa a ɔsosoo no hɔn ho no, na ɔsee hɔn dɛ, Hom yɛ akwanserafo; asaase yi n’adagyaw na hom bae bɔhwɛe. 10Na wɔsee no dɛ, Dabida, mo wura, na wo nkowaa bae dɛ wɔrobɔtɔ edziban. 11Hɛn nyinara yɛ nyimpa kor mba; yɛyɛ anokwafo, wo nkowaa nnyɛ akwanserafo bi. 12Na ɔsee hɔn dɛ, Dabida, na asaase yi n’adagyaw na hom bae bɔhwɛe. 13Na wɔsee dɛ, Wo nkowaa yɛ enuanom duebien, nyimpa baako mba wɔ Keenan asaase do; na hwɛ, ɔkaekyir no mpo wɔ hɛn egya nkyɛn ndɛ ara, na ɔbaako na onnyi hɔ. 14Na Josef see hɔn dɛ, Iyi ntsi na mekaa kyerɛɛ hom dɛ, Hom yɛ akwanserafo no. 15Dza wɔdze bɔsɔ hom ahwɛ nye yi: dɛ Farao tse ase yi hom nnkefi ha akɔ, gyedɛ hom nua kakraba no aba ha ana. 16Hom nsoma hom mu baako ma ɔnkɛfa hom nua no mbra, na hom dze, wɔdze hom bogu efiadze ama wɔaasɔ hom nsɛm ahwɛ, dɛ nokwar wɔ hom mu anaa: annyɛ dɛm dze a, na ɔno dɛ Farao tse ase yi ampaara hom yɛ akwanserafo. 17Na ɔdze hɔn nyinara koguu efiadze ndaansa. 18Na ne ndaansa no Josef see hɔn dɛ, Hom nyɛ yi, na hom ntsena ase; osiandɛ musuro Nyankopɔn: 19sɛ hom yɛ anokwafo a, ɔno wɔmma wɔnkyekyer hom nuanom mu baako wɔ efiadze mbrɛ hom da yi; na hom dze, hom nkɔ, hom nkɔsoa eburow nkɔ, wɔ hom efiefi kɔm ntsi: 20na wɔnkɛfa hom nua kakraba no mbrɛ me; nna mubohu dɛ hom nsɛm yɛ nokwar, na hom nnkowu. Na wɔyɛɛ dɛm. 21Na wɔsesee hɔnho dɛ, Yedzi hɛn nua no ho fɔ ampaara, dɛ hɛnara yehun n’ahohiahia wɔ aber a ɔrototɔ serɛ hɛn no, na yeenntsie; dɛm ntsi na dɛm ahohiahia yi aba hɛn do yi. 22#Gye 37.21, 22 Na Reuben buaa hɔn dɛ, Mannka annkyerɛ hom dɛ, Mma hom nnyɛ bɔn nntsia abofra no; na hom enntsie? Dɛm ntsi hwɛ, no bɔgyaa na wɔrohwehwɛ yi. 23Nna wonnyim dɛ Josef tse kasa no ase; osiandɛ oyianofo gyina hɔn ntamu. 24Na ɔdaan noho fii hɔn nkyɛn, na okosui; na ɔsanee baa hɔn nkyɛn, na ɔbɛkasaa kyerɛɛ hɔn, na oyii Simeon wɔ hɔn mu, na ɔkyekyeer no wɔ hɔn enyim hɔ.
Josef No Nuanom San Kɔ Keenan
25Na Josef hyɛɛ dɛ wɔmfa eburow nhyehyɛ hɔn nkotoku amaama, na wɔmfa hɔn nyinara hɔn sika nhyehyɛ hɔn nkotoku mu nkorkor, na wɔmma hɔn kwan mu edziban: na wɔyɛɛ hɔn dɛm. 26Na wɔdze hɔn eburow no soasoaa hɔn nsoasopɔnkɔ, na wosii mu fii hɔ. 27Na hɔn mu baako saan no kotoku dɛ ɔrema n’asoasopɔnkɔ edziban wɔ asoɛe no, ohun dɛ ne sika no hyɛ no kotoku ano. 28Na ɔsee no nuanom no dɛ, Wɔdze me sika asan ama me; hwɛ, ɔhyɛ mo kotoku mu: na hɔn akoma tutui, na wɔdze ahopopo sesee hɔnho dɛ, Ebɛnadze na Nyankopɔn ayɛ hɛn yi? 29Na wɔbaa hɔn egya Jakob hɔ wɔ Keenan asaase do, na wɔbɛkaa dza ɔbaa hɔn do nyinara kyerɛɛ no dɛ, 30banyin no a ɔyɛ asaase no wura no nye hɛn kasaa ebufuw do, na ɔfaa hɛn dɛ yɛyɛ ɔman no ho akwanserafo: 31na yɛsee no dɛ, Yɛyɛ anokwafo; na yɛnnyɛ akwanserafo. 32Yɛyɛ enuanom duebien, egyamba; ɔbaako na onnyi hɔ, na ekumaba no wɔ hɛn egya nkyɛn wɔ Keenan asaase do ndɛ ara. 33Na banyin no, mekyerɛ asaase wura no, see hɛn dɛ, Dza medze bohu dɛ hom yɛ anokwafo nye yi; hom ndan hom nuanom mu baako ngya me nkyɛn, na hom mfa eburow nkɔ, wɔ hom efiefi kɔm ntsi, na hom nkɔ hom kwan: 34na hom nkɛfa hom nua kakraba no mbrɛ me: nna mubohu dɛ hom nnyɛ akwanserafo, na dɛ hom yɛ anokwafo: nna mibeyi hom nua no ama hom, na hom edzi gua wɔ asaase yi do. 35Na ɔbaa dɛ wohuehuee hɔn nkotoku mu eburow no, nna nyimpa biara ne sikaboa wɔ no kotoku mu: na aber a hɔn nye hɔn egya hun hɔn sika mboaba no, hɔn akoma tui. 36Ma hɔn egya Jakob see hɔn dɛ, Emi na hom ama mahwer me mba: Josef nnyi hɔ, na Simeon nnyi hɔ, na hom rebɛfa Benjamin so akɔ: iyi nyinara aba mo do. 37Na Reuben kaa kyerɛɛ n’egya dɛ, Sɛ mammfa no ammbrɛ wo bio a, ku me mbabanyin beenu no: fa no hyɛ me nsa, na medze no bɛbrɛ wo bio. 38Na ɔsee dɛ, Me ba nnkɛnye hom akɔ; osiandɛ no nua ewu, na aka no nko: sɛ mbusu bi ba no do wɔ kwan a wɔnam mu rokɔ no mu a, ɔno hom dze mo gon nam awerɛhow mu bɔkɔ nda mu.
Mfantse Bible © Bible Society of Ghana, 2011.