Gyenesis 40
40
Josef Kyerɛ Ndaduafo Adaaso Ase
1Na ɔbaa dɛ iyinom ekyir no, Egypthen ne nsahyɛfo nye ne paanootofo no foom hɔn wura Egypthen no. 2Na Farao no bo fuuw n’asomfo beenu no, nsahyɛfo panyin no, nye paanootofo panyin no. 3Na ɔdze hɔn koguu efiadze wɔ abrafohen no ne fie, wɔ efiadze beebi mbrɛ Josef da no no mu. 4Na abrafohen no dze hɔn hyɛɛ Josef ne nsa, na ɔsoom hɔn: na wɔkyɛɛr efiadze hɔ mber kakra. 5Na hɔn beenu nyina sosoo daa, anafua da kor a ɔsor obiara ne daa, nye ne nkyerɛasee. 6Na Josef baa hɔn nkyɛn anapa no, obohun hɔn dɛ wɔabombɔm. 7Na obisaa Farao n’asomfo a wɔnye no gu efiadze hɔ no dɛ, ɔyɛ dɛn na ndɛ hom abombɔm dɛm yi? 8Na wɔsee no dɛ, Yɛasoso daa, naaso yennya obi ma ɔnnkyerɛ hɛn ase. Na Josef see hɔn dɛ, Ana nnyɛ Nyankopɔn na ɔma nkyerɛase bi a? Meserɛ hom, hom nka nkyerɛ me. 9Na nsahyɛfo panyin no kaa n’adaaso kyerɛɛ Josef, na ɔsee no dɛ, M’adaaso mu, hwɛ, wenyindua si m’enyim; 10na nkorbata ebiasa wɔ wenyindua no ho: na ɔyɛ dɛ ɔafefɛw, na ɔabɔ nhyiren; na no do nsiansiaw asow wenyinamba a ɔaber: 11na Farao no kɔɔpow kitsa me nsamu, na metsetseew wenyinamba no, na mikyii guu Farao no kɔɔpow mu, na medze kɔɔpow no hyɛɛ Farao ne nsa. 12Na Josef see no dɛ, Ne nkyerɛase nye yi; nkorbata ebiasa no ɔyɛ ndaansa. 13Aka ndaansa ma Farao eyi wo efi ha na ɔama ekedzi wo dzibew bio: na edze Farao no kɔɔpow bɛhyɛ ne nsa, dɛ nkyɛ kan no a eyɛ ne nsahyɛfo no. 14Na sɛ inya beebi si a, ɔno kaa me, na yɛ me ayamuyie, meserɛ wo, na bɔ me dzin kyerɛ Farao, na beyi me fi dan yi mu: 15na owia na wowiaa me wɔ Hebriwfo asaase do: na ha so mennyɛɛ biribiara a ɔsɛ dɛ wɔdze me to efiadze. 16Na aber a paanootofo panyin no hun dɛ nkyerɛase no ye no, ɔsee Josef dɛ, Mo so m’adaaso mu no, muhun dɛ paanoo fufuw nkɛntsɛn ebiasa sisi m’etsifi: 17na kɛntsɛn a odzi sor no adɔkɔdɔkɔdze a wɔto ma Farao nyinara bi wɔ mu; na nnoma ridzi no kɛntsɛn no mu wɔ m’etsifi. 18Na Josef buae na ɔsee dɛ, Ne nkyerɛase nye yi: nkɛntsɛn ebiasa no yɛ ndaansa: 19na aka ndaansa ma Farao eyi wo tsir wɔ wo do, na wɔasɛn wo wɔ dua do ma nnoma edzi wo nam efi wo ho. 20Na ɔbaa dɛ ne ndaansa no a ɔyɛ Farao n’awoda no, ɔtoo pon maa no nkowaa nyinara: na oyii nsahyɛfo panyin no nye paanootofo panyin no fii efiadze dze hɔn baa no nkowaa no enyim. 21Na ɔmaa nsahyɛfo panyin no sanee yɛɛ ne nsahyɛdwuma no bio; na ɔdze kɔɔpow no hyɛɛ Farao ne nsa: 22na paanootofo panyin no dze, ɔsɛɛn no: dɛ mbrɛ Josef kyerɛɛ hɔn ase no ara. 23Naaso nsahyɛfo panyin no annkaa Josef, na no werɛ fiir no.
Mfantse Bible © Bible Society of Ghana, 2011.