San Juan 18
18
Bedaxxucana Jesús
(Mt. 26:47-56; Mr. 14:43-50; Lc. 22:47-53)
1Dequide unne Jesús iyába nu chi unne-ni nna biríattebe die len ca biꞌini rudheti ca tisa ruleꞌe attu ladu gue lidhá nu te láni Cedrón. Nía nua te ttu lo yu daa ca ya olivo loni. Lheꞌe nua nua utaꞌa Jesús lenie ca biꞌini rudheti ca tisa ruleꞌe. 2Judas nu utene las ná ca nu utticaneha nna anca biasabinna nía, cumu ixe liberu güia leni Jesús ca biꞌini rudheti ca tisa ruleꞌe nía. 3Larcala nna Judas nna bisíntteba lenna ca soldado lhe ca güen sina gue yotuha lhe nía. Ca unnuha udhelha ca bixxudi loha lencana ca fariseo. Lacana nna nujacana espada lhe yaga lhe quinque lhe ca yaga ralha iquicani lhe. 4Tiaca Jesús chiba yue iyába nu sate, nianna biríattebe die guatsee ca unnuha re cana:
—¿Nú reguilale?
5Lacana nna rácana:
—Jesús gue Nazaret.
Jesús re cana:
—Netiba nua.
Len ca unnuha guaba du Judas nu utena Benniha las ná ca unnuha. 6Atti rá Jesús cana: “Netiba nua”, lacana nna beadi gattebacana ubixxi locana lo yu. 7Lee nna bedennaba tise cana attu libe re cana:
—¿Nú reguilale?
Lacana nna bedecabicana rácana:
—Jesús gue Nazaret.
8Jesús re cana attu libe:
—La chiba rpea le: “Netiba nua nna”, gansi neti reguilale nna gualgüelha ca nu seꞌe ni eyyacana ganna.
9Anía uca qui guaxxína tisa nu la laba Jesús unnee, atti re Tata Do Iyyabaaha: “Tata, ni ttu ca benni betelu len neti bittu bedelha.” 10Laniala nna ulea Simón biꞌini láguaba Pedro espada nojabiha lheꞌe xoni, uchúbi naga derechu gue ttu unbiyuu te láni Malco. Unnuha nua ancana nu ribeni sina gue bixxudi xxeni rinnabiaha. 11Jesús re Pedro:
—Bogaꞌa espada-na lheꞌe xoni. Elha disa rute Tata quia len neti nna ¿biaca lä dhielha satea-na?
Uchecana Jesús bedúcane lo bixxudi anca nu lo lá Anás
(Mt. 26:57-58; Mr. 14:53-54; Lc. 22:54)
12Ca soldadoha lencana nu lo guecaniha lhe ca güen sina gue yotuha lhe bedaxxucana Jesús, atti bexxicattebacane. 13Lotteba lo Anás uchecane, cumu unnuha anca tata gue nuila gue Caifás nu anca bixxudi xeni rinnabia la idaha. 14Caifás-ni nua rána ca nu lo gue ca benni Israel, tseeba anca len lacana gatti ttuba benni cuenta gue iyába ca benni.
Pedro bittu ridí roꞌobi anca bienbi Jesús
(Mt. 26:69-70; Mr. 14:66-68; Lc. 22:55-57)
15Simón biꞌini lágua Pedro lenbi attu biꞌini rudheti ca tisa ruleꞌe Jesús denobacabi Benniha. Biꞌiniha nna anca biabinbi bixxudi xxeni rinnabiaha, larcala nna utaꞌababi len Jesús lheꞌeliꞌa gue yoꞌo gue bixxudiha. 16Ttiaca Pedro nna níaba beꞌanbi, roꞌo puertaba dubi. Denuala nna nuarca bequi biꞌini anca biani bixxudiha unne lenbi nuila du ridhali puertaha qui gaꞌa benni, ugüelhana gaꞌa Pedro. 17Nuila du roꞌo puertaha nna unnaba tisana rána Pedro:
—¿Si läba lu lhe ancagualu ttu ca nu rudheti ca tisa ruleꞌe unbiyuu-na?
Labi nna becabibi rábi:
—Dica. Läga anca neti nu rudheti ca tisa ruleꞌe unná.
18De daa idilha nna ca nu ribeni sina gue bixxudiha lencana ca güen sina gue yotuha nna beonttebacana gui, useꞌettebacana gaxxaba roꞌo guiha rotsaꞌacana. Pedro nna níaguaba dubi len ca nua rotsaꞌabi roꞌo teha.
Anás rinnaba tisana Jesús
(Mt. 26:59-66; Mr. 14:55-64; Lc. 22:66-71)
19Bixxudi xeni rinnabiha nna unnaba tisana Jesús gue ca tisa ruleꞌe lhe guetu ca biꞌini rudheti ca tisa ruleꞌe lhe. 20Jesús becabie gueni re na:
—Neti nna aní lo iyába benni unnea, satíaba udúa beleꞌetia ca benni Israel-na atta ritupari lheꞌeliꞌa gue yotu-na lhe lheꞌe ca yoꞌo atta rudhetiri ca tisa gue Tata Do Iyyabaaha lhe. Larcala nna lägabi unne neti ttu bixa atta gatsi. 21¿Biaca neti la rinnaba tisalu? Na unnaba tisa ca nu bienquinna nu ria. Lacana innácana bixa rpea cana. Ca unná yucana bixa ria.
22Atti rá Jesús anía nna, ttu ca güensina gue yotuha du nía nna uleattebana gui roꞌo Benniha nianna ráne:
—¿Si aná dica ecabilu gue benni anca bixxudi xxeni rinnabia-na?
23Jesús re na:
—Gansi unnea nu lä anca tsee nna gus neti: ¿Bi nu bittu anca tsee unnea? Gansi unneba nu anca tsee nna ¿biacala neti begüeelu?
24Laniala nna unnabia Anás bexxicacana Benniha atti udhelhane lo Caifás nu anca bixxudi xxeni rinnabiaha.
Attu libe bittu ridí roꞌo Pedro anca bienbi Jesús
(Mt. 26:71-75; Mr. 14:69-72; Lc. 22:58-62)
25Pedro nna níaba sna dubabi roꞌo teha rotsaꞌabi. Ca nu seꞌe nía nna rácan bi:
—¿Si läba lu lhe ancalu ttu ca nu rudheti ca tisa ruleꞌe unbiyuu-na?
Labi nna läga uxí roꞌobi, rálabi:
—Dica. Läga anca neti nu rudheti ca tisa ruleꞌe unná.
26Ttu ca nu ribeni sina gue bixxudi xxeni rinnabiha, nu datíana unbiyuu uchú Pedro naganiha nna rán bi:
—Inqui níaba bilátia lu du lenlu unná atta daa ca ya olivuha nna.
27Pedro nna bittu uxí roꞌobi attu libe gansi gualí anca bienbi Jesús. Snaba lania nna uresi berudiha.
Uchecana Jesús guadúcane lo Pilato nu bodú ca nu rinnabia gue Roma
(Mt. 27:1-2, 11-14; Mr. 15:1-5; Lc. 23:1-5)
28Ca nu bedaxxucana Jesús udátteba lencane lheꞌe yoꞌo gue Caifás, dia lencane lheꞌe yoꞌo lagüi atta do nu rinnabia gue Roma. De chi daa tsaniha nna nuarca bitturu utaꞌacana lheꞌe yoꞌo lagüiha cumu lacana racaquinna itsigacana lo Tata Do Iyyabaaha gansi gaꞌacana atta seꞌe ca benni bittu anca benni Israel. Lania nna lärga aca gocana rse gue laní Pascua. 29Larcala nna biría Pilato rán cana:
—¿Bi lo niꞌa gue rudelhiyyale unbiyuu-ni?
30Lacana nna becabicana rácan na:
—Ttirca bittuba beni unní ttu nu lä anca tsee nna läga ita riꞌitu ettetetu unní las nálu.
31Pilato nna rán cana:
—Lebiꞌiba gualeche na, gualuni elha uxtisi gueni attiba rá lo ca ley guele-na.
Lacana nna rácana:
—Riꞌitu nna lägabi gaꞌana uttitu nuxa benni.
32Anía liba nna guaxxína ca tisa unne Jesús gue gaxasná gattie.
33Laniala nna betaꞌa Pilato lheꞌe yoꞌo lagüiha attu libe, atti uxittebana Jesús, nianna rána Benniha:
—¿Si lu ancalu nu rinnabia gue ca benni Israel-ni?
34Jesús becabie re:
—¿Si nu anca guelunni rinnelu aca, nuxaba attu nu subi utixxiꞌenna lu gue nu anca quia aca?
35Pilato nna becabina rána benniha:
—¿Nnari benni Israel neti? Ca benni guelhaba lencana ca nu lo gue ca bixxudi-naba bettelhuꞌucan lu las náya. ¿Bi benlu?
36Jesús becabie re:
—Elha rinnabia quia-ni nna läga ancunni gue yies lo yu-ni. Ttirca ancana gue yies lo yu-ni nna ca benni rudheti ca tisa ruleꞌa-na, bitilhabacana qui bittu bedaxxu ca benni Israel-na neti. Ttiaca elha rinnabia quia-ni nna läga ancunni gue nii.
37Laniala nna rá Pilato Benniha:
—¿Anla lu ancalu nu rinnabia ganna?
Jesús becabie re:
—Luba chi rálu, neti anca nu rinnabia. Denuala nna ulia, delha yies lo yu-ni qui quixxiꞌaya nu anca gualí. Iyába ca nu runi nu anca gualí nna, rudo nagacani gue nu ria.
38Pilato nna ráne:
—¿Bi nua nu anca gualí?
Boquinna iqui ca nu Israel gatti Jesús
(Mt. 27:15-31; Mr. 15:6-20; Lc. 23:13-25)
Dequide atti rá Pilato anía nna biríattebana diana güenne len ca nu lo gue ca benni Israel attu libe, nianna rán ca nua:
—Tsa bittu rattiꞌaya bixa lo niꞌa gue rudelha iyyale unní. 39Lebiꞌi nna labile neti nna rodiláya ttu nu te lisiyya laní Pascua. ¿Si gua rdacale odiláya nu rinnabia guele-ni, lebiꞌi benni Israel?
40Ttiaca iyábacana bedebesiꞌacana attu libe rácana:
—¡Unná bittu! ¡Barrabás na bodilá!
Barrabás-na ancana nu runi ubana.
© 2021, Wycliffe Bible Translators, Inc. All rights reserved.