San Juan 19
19
1Laniala nna beni Pilato mandadu bedaxxucana Jesús qui quincana Benniha. 2Ca soldadoha nna bencana ttu corona len xiqui ya sitsi uluꞌucana iquie, atti begucuttebacane ttu lari xinaa chulha. 3Nianna ubigattebacana atta due rácane:
—¡Xxeni ra lelu, xa nu rinnabia gue ca benni Israel!
Atti ralhittebacana gui loe.
4Pilato nna bederíattebana attu libe lheꞌe yoꞌo lagüiha, nianna rán ca benni Israel:
—Gualgüiarga. Ni na chea nii. Ni udúa na lole attu libe, qui ugüiale nna neti nna tsa läga rattiꞌaya bixa beni unná qui gattina.
5Biríatteba Jesús yuꞌu iquie corona anca len sitsiha, nucue lari xinaa chulhaha lhe. Pilato nna rán cana:
—Ni Benniha du nii.
6Atti biláni ca nu lo gue ca bixxudiha lencana ca güen sina gue yotuha nna uresiꞌattebacana rácana:
—¡Betá na lo ya crusi! ¡Betá na lo ya crusi!
Pilato nna rán cana:
—Naba gualeche na. Lebiꞌiba gualutá na lo ya crusi, cumu neti nna tsa läga rattiꞌaya bixa nu lä anca tsee beni unná.
7Ca benni Israel nna becabicana rácana:
—Riꞌitu nna te ttu ley guetu. Lo ley nna rá: labíaba gatti unná cumu de rána ancana xiꞌini Tata Do Iyyabaaha.
8Atti bienini Pilato rácana anía nna adílaba usinna. 9Betaꞌattebana attu libe lheꞌe yoꞌo lagüiha, nianna rána Jesús:
—¿Ga ladu beaca laslu?
Ttiaca Benniha nna tsaba bittu unnee ecabie gueni. 10Pilato nna ráne:
—¿Neti unní rinnea nna lä recabilu quia? ¿Si bittuba yulu dequi neti nna te derechu quia odiláya lu, o si utáya lu lo ya crusi?
11Laniala nna becabi Jesús re na:
—Ttirca bittuba ben Tata Do Iyyabaaha acalu uxtisi nna läga aca guelu innabialu bixa udhacacana neti. Larcala nna nu betena neti las nálu nna ancarlana nu te tulha gueni atti lu.
12La laniatteba nna udulo Pilato reguila leni gaxasná unna qui odilána Jesús, ttiaca ca benni Israel nna ribesiꞌanicana rácan na:
—¡Lu nna läga ancalu benni do tsee leni César nu rinnabia Roma gansi unná odilálu! ¡Iyába nu runi ancana nu rinnabia nna nu lä raca uyúna Césarba anca nua!
13Dequide bina Pilato nu rá ca nua nna uleattebana Jesús. Lana nna udottebana lo xxila atta ridona runna elha uxtisiha. Atta runna elha uxtisiha nua te láni Atta Yuꞌu Iyya. Leni tisa hebreo nna te láni Gabata. 14La sá nua anca bispri gue laní Pascua. Attiba tu deoba tsiꞌinu (12) Pilato nna rána ca benni Israel:
—¡Ni nu rinnabia gueleha du nii!
15Ttiaca lacana nna uresiꞌattebacana rácana:
—¡Betti unná! ¡Betti unná! ¡Betá unná lo ya crusi!
Pilato nna unnaba tisan cana rán cana:
—¿Si utáya nu rinnabia guele-ni lo ya crusi?
Ca nu lo gue ca bixxudiha nna becabicana rácana:
—Riꞌitu nna suna Césarba anca nu rinnabia guetu.
16Nía uca nna bote Pilatoha Benniha las nácani qui utácane lo ya crusi. Lacana nna bechettebacana Benniha.
Betácana Jesús lo ya crusi
(Mt. 27:32-44; Mr. 15:21-32; Lc. 23:26-43)
17Jesús nujabe ya crusi gueha biríe lheꞌe yiesiha die ttu re atta te láni Bega Iqui Nu Yatti. Leni tisa hebreo nna lána Gólgota. 18Nía betácana Benniha lo ya crusi lenie a chupa ca unbiyuu. Ladu laduba gue ya crusi atta ta Jesús betácana ca unnuha lo ya crusi gue ttuttucana. 19Pilato nna benna mandadu bencana letra lo ttu breta betácana iqui crusi atta ta Benniha. Lo bretaha nna rá: “Jesús gue Nazaret, nu ancana nu rinnabia gue ca benni Israel.” 20Ixeru ca benni quia ca nu Israel belabacana nu rá lo bretaha, cumu gaxxaba roꞌo yiesi Jerusalén nua atta betácana Jesús lo ya crusiha. Letraha nna ancana leni tisa hebreo lhe latín lhe griego lhe. 21Larcala nna ca nu lo gue ca bixxudi gue ca benni Israel nna rácana Pilato:
—Bittu unlu lo breta-na: “Nu rinnabia gue Israel.” Benla loni: “Nu rána dequi lana ancana nu rinnabia gue Israel.”
22Ttiaca Pilato nna becabina rána:
—Nu chi benia nna tsaba chi benia nua.
23Dequide betá ca soldadoha Jesús lo ya crusiha nna, bodaxxuttebacana ca xo Benniha bencana ttapa lilaꞌa, ttuttu nua gue ttuttu ca soldadoha. Bodaxxu guabacana lari radi Benniha lhe. Unnuha nna lägabi tiyya roꞌo loes nua, ttuba anca itú nua, desdeba liree axtaba güetsaa yaba nua. 24Ca soldadoha nna rá loescani:
—Bittu ichedari unná. Unbari tu nu uleꞌe lo qui ttedeenri nuxari ralhari unná.
Anía liba nna guaxxína nu rá ca tisa dia lo ca sitsi gue Tata Do Iyyabaaha atta rá: “Ulhaꞌabacana ca xun quia, beguila lecani bencana tu nu beleꞌe lo qui utedaaquinna nuxcana beꞌan lencana lari radiaha lhe.” Aníaba ben ca soldadoha.
25Gaxxaba xana ya crusi atta ta Jesús du nan gue Benniha, xila nan gueha lhe María biꞌini do leni Cleofas lhe María Magdalena lhe. 26Atti biláni Jesús nan gueeha dubi gaxxaba atta du biꞌini rudheti ca tisa ruleꞌe, benni racaxxattanie guebiha, lee nna ráttebe nan gueeha:
—Nana, ni xiꞌinlu du-na.
27Lenla nna re biꞌini rudheti ca tisa guee:
—Ni nan guelu du-na.
Laniatteba nna bechee biꞌiniha nan gue Benniha qui dhobi lheꞌe yoꞌo guebiha.
Aní bedhacacana Jesús atti chi deoba gattie
(Mt. 27:45-56; Mr. 15:33-41; Lc. 23:44-49)
28Dequide nua nna Jesús chiba yuxeabe chiba benie iyába nu gaꞌana unie, qui saxxína aca nu rá lo ca sitsi gue Tata Do Iyyabaaha nna lee nna re:
—Rebisia.
29Nía du ttu canti sa ttittina vinu idí. Ca nu seꞌe nía nna uluꞌuttebacana ttu xunu lheꞌe vinuha qui ibidhana, atti bexxicattebacana unnuha punta ttu iyyaxtila, nianna besigattebacana nua roꞌo Jesús qui iꞌiye nua. 30Dequide bennixxie nua nna ráttebe:
—Ni uluxa iyá nu gaꞌana unia.
Nianna, bedeattatteba iquie, atti uttittebe.
31La sá nna ancana bispri gue Pascua. Ca nu lo gue ca benni Israel nna bittu raca lecani eyaꞌana ca benni yatti lo ya crusi sá redí lecaniha, cumu la sá nna ancana sá laní xeni. Denuala nna unnabacana lo Pilatoha unna mandadu quitsacana ca niꞌa ca benni ta lo ya crusiha qui yuba gatti ca nua qui itúa ca nua nía. 32Ca soldadoha nna güiattebacana guattítsacana niꞌa nu ta lo ya crusi primeroha, anáguaba niꞌa attu nu ta lo ya crusi daca attu ladu gue Jesús. 33Ttiaca atti ubigacana atta ta Jesús, lacana nna biláquinna chiba utti Benniha. Larcala nna bittu utitsacana niꞌa Benniha. 34Ttu ca soldadoha nna begaꞌattebana nu do iyya ttutsi loni dennaha uxtil gue Benniha. Atta utaꞌa nua nna biríatteba inda lhe reni lhe. 35Biꞌini rixxiꞌa unní nna ancabi benni begüia lobi nu uca. Nu gualíba rixxiꞌabi. Labi nna rixxiꞌababi nu anca gualí qui anáchu nna lebiꞌi nna tsia lele. 36Anába uca qui guaxxína nu chi gaꞌana lo ca sitsi gue Tata Do Iyyabaaha atta rá: “Ni ttu sitta gue Benniha bittu quitsacana.” 37Ráguaba attu re lo ca sitsi-na: “Ugüiacana benni begaꞌacana nu do iyya ttutsi loni cuitteha.”
Jesús bigatsie
(Mt. 27:57-61; Mr. 15:42-47; Lc. 23:50-56)
38Dequide lania nna José biꞌini beaca lasibi lheꞌesi Arimatea, unnababi len Pilato ugüelhana echebi cuerpu gue Jesús. José nna sigába ucabi benni bedheti ca tisa beleꞌe Jesús, cumu de usinbi lo ca nu lo gue ca benni Israel. Pilato nna ucaba leni. José nna güiattebabi guaxíbi cuerpu gue Benniha. 39Anáguaba Nicodemo nu güiana ttu lo rela guanne lenna Jesús bisínguana leni attiba rerua (30) kilo nu rure xixxi gue mirra leni aloe. 40José lenbi Nicodemo nna bedaxxucabi cuerpu gue Jesús bottubicabi Benniha lari leni nu rure xixxiha. Benbacabi attiba labiba ca benni Israel runcana gansi chi rucatsicana ttu benni yatti. 41Gaxxaba atta betácana Jesús lo ya crusiha nna te ttu lo yu daa ca ya xixxi lheꞌeni. Lheꞌe nua nna do ttu baa cubi nu bittu chi bigatsi ni ttu benni lheꞌeni. 42Nía becatsicana Jesús, cumu de te baa gaxxa, de chiguaba gaꞌa sá redí le ca benni Israel lhe.
© 2021, Wycliffe Bible Translators, Inc. All rights reserved.