San Juan 17
17
Jesús rinnabe len Tata Do Iyyabaaha aca lanie ca biꞌini rudheti ca tisa ruleꞌe
1Dequide unne Jesús iyába unní nna ulhidhatteba loe begüie iyyabaaha, nianna re:
—Tata, nnanna nna chiba bisía ura. Beni qui uleꞌe lo neti xiꞌinlu-ni anca Benni ra xxeni leni, qui anáguaba neti nna unia uleꞌe lolu ancalu Benni ra xxeni leni. 2Lu nna chi benlu aca nu innabia iyá ca benni, qui utea elha nabani gatta ttu dia lii gue iyá ca benni chi betelu len neti lhe. 3Guattaba elha nabani ttu dia lii gue ca benni gansi un biacana lu, lu nna tturbalu dolu gualíga ancalu Dios, un bia guabacana neti, neti nua Jesús Benni anca Cristu udhelhaluha.
4’Neti nna chiba beleꞌe loa yies lo yu-ni lu ancalu Benni ra xxeni leni, chiba uluxatia sina betelu unia lhe. 5Nnanna nna Tata, beni qui eyaca Benni ra xxeni leni lolu attiba anca doa len cuinalu atti bittu yies lo yu-ni chi reha.
6’Ca benni becueelu lheꞌe ca benni seꞌe yies lo yu-ni betelu len neti nna chiba utixxiꞌatia cana nuxa ancalu. Guebalu ancacana, lu nna betelu cana len neti, lacana nna guarudoba cana tisa gue ca tisa guelha. 7Nnanna nna chiba yucana, iyába nu betelu len neti nna guebalu nua, 8cumu utixxiꞌabatia cana ca tisa betelu len neti, lacana nna bedoba nagacani gue nu rá ca tisa guelha. Chiba yucana atta dolhaba biríaya daya, chiguaba güia lecani luba udhelhalu neti lhe.
9’Gue ca unní rinnaba lolu, läga gue ca nu bittu ria lecani lu rinnaba. Rinnaba gue ca nu betelu len neti, cumu guebalu ancacana. 10Iyába nu anca quia nna guebalu nua, nu anca guelu nna quiba nua. Ca unná runcana ruleꞌe lo anca Benni ra xxeni leni.
11’Neti nna lärga dhoa yies lo yu-ni, ttiaca ca unní nna tseꞌerba ca unní yies lo yu-ni. Laca neti nna dedaaya atta dolha, xa Tata do riesi leni nu lä anca tsee, ca benni betelu len neti nna upachi cana leni elha ra xxeni le guelha, qui tseꞌecana acacana ttuba benni attiba riꞌi ancari ttuba Benni. 12Atti doa lencana yies lo yu-ni nna netiba rapa lhe redía lhe ca nu betelu len neti leni elha ra xxeni le guelu. Ni ttucana bittu dia nitti, suna ttuba nu chi gaꞌana tsia nittiha dia nittina, qui guaxxína uca nu chi gaꞌana aca, attiba rá lo ca sitsi guelha.
13’Nnanna nna dedaaba atta dolha. Laca sna doa yies lo yu-ni nna rinnea ria aní, qui edaca lecani itú iqui itú lecani attiba neti redaca lasia itú iqui itú lasia. 14Neti nna chiba utixxiꞌatia cana ca tisa guelha, ttiaca ca benni bittu ria lecani lu seꞌe yies lo yu-ni nna bittu raca uyúcana ca unná cumu de bittu ancacana benni baba yies lo yu-ni, attiba neti bittu anca Benni baba yies lo yu-ni. 15Läga rinnaba lolu cualu cana yies lo yu-ni, rinnababa lolu gapal cana qui bittubi udhacani nu xxegüiha cana. 16Läga anca ca unní benni baba yies lo yu-ni, attiba neti bittu anca Benni baba yies lo yu-ni. 17Beleꞌequinna nu gualí rixxiꞌa ca tisa guelha qui iriescana acacana guelu, cumu ca tisa guelha ancaque nu gualí. 18Attiba udhelhalu neti yies lo yu-ni, aníaguaba idhelha cana tsiacana atta seꞌe ca benni seꞌe yies lo yu-ni. 19De lacana nna la netiba ririesia utea elha nabani quia cuenta guecani, qui anáguaba lacana iriescana acacana guelu, de ria lecani nu gualí.
20’Läga sunru gue ca unní rinnaba lolu, rinnabaguaba gue ca nu tsia lecani neti gansi chi biyienquinna ca tisa quixxiꞌa ca unní. 21Rinnaba lolu qui ttuba eseꞌe iyábacana, attiba lu, xa Tata, ttuba Benni ancalu len neti, neti nna ttuba Benni anca len cuinalu. Anáguaba lacana eyacacana ttuba benni len riꞌi, qui anáchu tsia le ca benni seꞌe yies lo yu-ni, lu udhelhalu neti. 22Neti nna chiba benia qui acacana nu ra xxeni leni, attiba lu benlu anca Benni ra xxeni leni, qui acacana ttuba benni attiba lu len neti ttuba Benni ancari. 23Lu nna dulu len neti. Neti nna dhua len lacana, qui dhacana eꞌeyucana acacana benni seꞌe ttuba. Anía liba nna ttedaani ca benni bittu ria lecani lu, gualíba lu udhelhalu neti, raquinlu guecani attiba raquinlu quia lhe.
24’Ca benni chi betelu len neti, xa Tata, raca lasia tseꞌe guabacana len neti atta dhoa, qui iláquinna nu xxeni ra lasia chi betelu len neti, cumu antisla cue yies lo yu-ni chi raquinlu quia. 25Tata, lu ancalu Benni runi nu raxxína anca lhixxa. Ca benni bittu ria lecani lu seꞌe yies lo yu-ni nna läga anca biaquinna lu, ttiaca neti nna anca biabatia lu. Ca benni seꞌe len neti ni lhe chiba yucana luba udhelhalu neti. 26Chi utixxiꞌatia cana nuxa ancalu, sna quixxiꞌarguabatia cana adí lhe qui anáchu attiba raquinlu quia nna aníaguaba aquin gue loescani, cuinaba neti nna dhoa lheꞌe lastoocani.
© 2021, Wycliffe Bible Translators, Inc. All rights reserved.