MARIKO 8
8
Okoragerigwa kw’abanto chilifu inye
(Mat 15:32–39)
1Ase amatuko aria ekero omoganda omonene osangererekanete, na barabwo tibarenge na gento bakoria, Yeso akarangeria aborokigwa baye, akabatebia, 2“Naroreire omoganda amabera, ekiagera abwo babeire amatuko atato baikaransete amo nainche batari na gento bakoria; 3ninsa koa abanto aba ribaga bagende chinsobo nenchara, nabagoye inchera, na abande ase egati yabo ng’are barwete.” 4Aborokigwa baye bakamoiraneria, “Naki omonto aranyare koigotia abanto aba, na aiga nerooro?” 5Akababoria, “Emegati nerenga mobwate?” Bakamoiraneria, “Netano na ebere.” 6Agachika omoganda oikaranse inse, akabogoria emegati eria etano na ebere. Kayesesenirie, akayesamunyora, akaa aborokigwa baye bayetereke, na barabwo bakayeterekera omoganda. 7Igo barenge ne chinswe chinsinini nke igo. Gachisesenirie, akabora, “Nechi baterekere”! 8Bakaria, bakaigota; bagasangereria ebisamunye ebiatigarete, ebitonga bitano na bibere. 9Na barabwo nigo barenge ang’e chilifu inye. 10Akabaa ribaga bagende, na erio bwango akariina obwato amo naborokigwa baye, akagenda chinsemo chia Dalumanuta.
Yeso okwanga koorokia egekone
(Mat 16:1–4; Luk 12:54–56)
11Abafarisai bakaoroka, bagachaka koamererania na Yeso, bakarigia aborokie egekone buna ekemanyererio korwa igoro, bakomoteema. 12Agaichana ase omoika oye, akabora, “Naki ekegori eke gekorigia egekone? Ekeene nabatebirie: Ekegori eke tigekoegwa egekone buna eke.” 13Akabatiga, akariina obwato naende, akamboka ng’umbu.
Yeso ogotogonyera obouko bw’aborokigwa
(Mat 16:5–12)
14Aborokigwa bakeeba koirana emegati; nonya nase obwato tibarenge na gento, otatiga omogati oyomo bwoka. 15Yeso akabachika, akabora, “Rigereria, mwerende nememera y’Abafarisai na ememera ya Herode.” 16Bakaamererania barabwo ase barabwo, bakobora, “Titori nemegati.” 17Yeso akamanya aya, akabatebia, “Naki mokoborania, ekiagera motari nemegati? Timokoinyora gose timekomanya? Chinkoro chiaino nigo chire chinkong’u goika bono? 18More namaiso, ko timori korora? More namato, ko timori koigwa? Gose timoinyoreti? 19Ekero nasamunyorete emegati eria etano nkaa baria chilifu isano, ebitonga mbirenga mwasangererete biichire ebisamunye?” Bakamotebia, “Ikomi na bibere.” 20“Na eria etano na ebere nkaa baria chilifu inye, ebitonga mbirenga mwasangereretie biichire ebisamunye?” Bakamotebia, “Mbitano na bibere.” 21Akabatebia, “Naki motaramanya?”
Yeso okogwenia omonto omouko agwo Bethisaida
22Bagaika Bethisaida. Bakamorentera omonto omouko, bakamosorora amokune. 23Akabwata omouko oria okoboko, akamoira isiko y’agachie, Kamotwereire amate ase amaiso, akabeka amaboko aye igoro asare, akamoboria, “Kwarorire gento?” 24Akarigereria igoro, akabora, “Narorire abanto, ko nigo banga buna emete bakogenda.” 25Erio naende akabeka amaboko aye igoro ase amaiso aye. Omouko oria akarigereria mono, akagwena, akarora ebinto bionsi buya. 26Yeso akamotebia, “Genda bwoo, tosoa nonya nagachie!”
Okoorokia gwa Petero ng’a Yeso nere Kristo
(Mat 16:13–20; Luk 9:18–21)
27Yeso agasoka amo naborokigwa baye, bakagenda ebichie bia Kaisaria Filipi. Ekero baare nchera akaboria aborokigwa baye, “Abanto nigo bakobora ng’a ninche ng’o?” 28Bakamoiraneria, “Yohana Omobatisi; na abande: Elija; na abande: Oyomo ase ababani.” 29Akababoria, “Nainwe nigo mokobora ng’a ninche ng’o?” Petero akamoiraneria, “Aye naye Kristo.” 30Akabakania tibatebia monto amang’ana aye.
Yeso okobana ogokwa na okobokigwa kwaye
(Mat 16:21–23; Luk 9:22)
31Agachaka koborokereria, ng’a negwenerete Omwana‐o‐mwanyabanto anyore ogochandeka ase chinchera chinyinge, na kwangwa nabagaaka na abakuani abanene, na aborokia b’amariko, na goitwa, na nyuma y’amatuko atato naboke. 32Agakwana amang’ana aya maiso marore. Petero akamoira ensemo, agachaka komokania. 33Yeso akeonchora, akarigereria aborokigwa baye, agatogonyera Petero, akabora, “Irana nyuma yane, Saitani, ekiagera tori ase ensemo ya Nyasae, korende nase mwanyabanto.”
Okorangerigwa kw’ogwekeyia omonyene
(Mat 16:24–28; Luk 9:23–27)
34Akarangeria omoganda na aborokigwa baye, akabatebia, “Oyorigetie gontunyana, tiga ekaane ere omonyene, etweke omosalaba oye, antunyane. 35Naki onde bwensi orarigie koegera obogima bwaye, oyio nabosirie; na oyorasirie obogima bwaye ase engencho yane, na ase engencho y’enchili, oyio naboegere. 36Ninki eragwenere omonto konyora ense yonsi, ko asirie omoyo oye? 37Gose inki omonto ararue ribaga ri’omoyo oye? 38Naki oyio oranyare kondorera obosooku inche, na amang’ana aane, ase ekegori eke ki’obotomani na ebibe, Omwana‐o‐mwanyabanto namororere obosooku ere, ekero agocha nobonene bwa Ise amo nabamalaika abachenu.”
OLD EKEGUSII BIBLE PROTESTANT EDITION
©Bible Society of Kenya, 2020