MARIKO 13
13
Yeso okobana ogotagorwa gwe Hekalu
(Mat 24:1–2; Luk 21:5–6)
1Goika agachia gosoka korwa Hekalu, oyomo bw’aborokigwa baye akamotebia, “Omworokia, rora buna amagena na amaagacho aya are amaya!” 2Yeso akamotebia, “Noroche amaagacho aya amanene? Gee, aiga tirigotigara rigena erimo igoro ase erinde, eritanyare gotagorwa.”
Amabe agochi‐gocha
(Mat 24:3–25; Luk 21:7–24)
3Erio gaikaransire ase egetunwa ki’Emezeituni korigereria Hekalu, Petero, na Yakobo, na Yohana, na Anderea, bakamoboria bobisi, 4“Totebie, aya indi arabe? Ninki ekemanyererio kiaye ekero aya onsi arabe ang’e goikerana?” 5Yeso agachaka kobatebia, “Mwerende, monto onde tabang’aina na kobasiria, 6ekiagera abange nabache ase erieta riane, babore: Inche ninche ere; naraae abange na kobasiria. 7Naende komoraigwe esegi, na ebirage bi’esegi, timoichanigwa, ekiagera bori, aya onsi nabe, ko moerio toracha. 8Naki egesaku nakeimoke korwana negesaku kende, na oboruoti naborwane noboruoti bonde. Emetengecho y’ense nebe chinsemo ne chinsemo, na enchara. Noyio noro omochakano bw’obororo.
9“Mwerende inwe abanyene, ekiagera nababaire ase amatongo, na ase chisinagogi, namoakwe. Naende namoirwe gotenena ase amasio ’abagavuna na ase abaruoti ase engencho yane, koba kirori asebare. 10Naende negwenerete enchili erandigwe ritang’ani ase ebisaku bionsi. 11Ekero bakobaira ase ekina, na kobabeka ase amaboko ’abanto, timochaka gwechanda korengereria ayamorigetie gokwana; korende rinde rionsi moraegwe ase ensa eria, morikwane, ekiagera tari inwe morakwane, korende n’Omoika Omochenu. 12Na momura omwabo omonto narue oyomwabo, erinde aitwe, na ise narue omwana oye; na abana nabaimokere abaibori babo kobaita. 13Nainwe namogechwe nabanto bonsi ase engencho y’erieta riane, korende oyoraremererie goika omoerio, oyio natooreke.
14“Korende komorakorore okogechia kw’ogosaria kogotenena aase atagwenereti, (oyogosoma amanye), erio abare Boyahudi batame gochia ase ebitunwa; 15na ere oyore kerama igoro taika gosoa nyomba ime, gose tasoa kobogoria egento korwa mwaye; 16na ere oyore mogondo tairana nyomba kobogoria eanga yaye. 17Nabe aakong’u ase abare barito na barabwo abakogonkia ase amatuko aria. 18Saba ng’a ogotama kwaino tikoba ekero ki’obokendu, 19ekiagera amatuko aria nebe emechando, buna etana koba korwa omochakano bw’ogotonga oko Nyasae atongete, goika bono, gose tekoba bo naende nonya ng’ake. 20Naende onye Omonene atanachete amatuko aria, anga monto onde bwensi tatooregete, korende ase engencho y’abachore, abachorete, onachire amatuko aria. 21Ekero ekio omonto karabatebie: Rora, oyo nere Kristo, gose: Oria aaria, timwegena, 22ekiagera amakristo ’oborimo, na ababani b’oborimo nabaorokie ebikone na amakumia, banyare gosiria nonya nabachore. 23Korende inwe mwerende! Rora, nakoorire koborokia onsi ritang’ani.
Omoerio bw’ense
(Mat 24:29–31; Luk 21:25–28)
24“Korende amatuko aria, nyuma y’emechando eria, erioba naribekwe omosunte, na omotienyi tokobara, 25ne ching’enang’eni nachigwe korwa igoro, ne chinguru chire igoro nachitengechigwe. 26Erio nario bararore Omwana‐o‐mwanyabanto ogocha ase amare ime amo ne chinguru chinyinge na obonene. 27Erio natome abamalaika baye basangererie abachore baye korwa chinsemo chie chinsinyo inye, na korwa chinsinyo chi’ense goika chinsinyo chia igoro.
Oborendi boganeirie
(Mat 24:32–36,42; Luk 21:29–33)
28“Korwa ase omoko eorokererie omoreng’anio oye. Orosagia rwaye korwachakire koorokia amato aye, mwamanyire ng’a nekero ki’ogoseboka, etoigo ng’ang’e ere. 29Naboigo nainwe, komorarore aya aorokire, momanye ng’a obeire ang’e na gesieri. 30Nekeene nabatebirie: Ekegori eke tikegoeta nonya ng’ake goika aya onsi anyare koba. 31Igoro na ense nabiete, korende amang’ana aane takonyara goeta nonya ng’ake.
32“Korende amang’ana e rituko riria na ensa eria onde tari omanyete, nonya nabamalaika bare igoro, nonya n’Omwana, otatiga Tata. 33Rigereria, renda, saba, ekiagera timomanyeti engaki eria indi eranyare koba. 34Igo enga buna omonto ore kogenda ense eng’ao konya otigire enyomba yaye, oeire abasomba baye okobua, na kera omonto emeremo yaye; agachika omorendi bw’egesieri arende. 35Renda boigo, ekiagera timomanyeti ekero omonene bw’enyomba agochi‐gocha, gose mogoroba, gose mbotuko gati, gose etuoni gekobuga, gose mambia, 36tacha ababosokane, abanyore mwararire. 37Na erio nabatebirie inwe, nabatebirie bonsi: Renda!”
OLD EKEGUSII BIBLE PROTESTANT EDITION
©Bible Society of Kenya, 2020