LUKA 23
23
Yeso ase obosio bwa Pilato gavuna o Rumi
(Mat 27:1–2,11–14; Mar 15:1–5; Yoh 18:28–38)
1Bakaimoka bonsi, bakaira Yeso ase Pilato. 2Bagachaka komosoera, bakobora, “Twanyorire omonto oyo oonchoire egesaku giaito, otokanirie titoa Kaisari ebango, okobora ng’a ere omonyene nere Kristo omoruoti.”
3Pilato akamoboria, “Naye Omoruoti bw’Abayahudi?”
Akairaneria, “Naboigo. Aye gwatebire.”
4Pilato agatebia abakuani abanene na emeganda, “Inche tindochi bobe bonde ase omonto oyo.” 5Barabwo bakamobetereria, bakabora, “Oburukanirie abanto, okoborokereria ase Boyahudi yonsi, gochakera Galili goika aiga.”
Yeso ase obosio bwa Herode
6Pilato agachia koigwa ring’ana eri, akaboria, “Omonto oyo n’Omogalili?” 7Agachia komanya ng’a nigo are inse ase obogambi bwa Herode, akamotoma gochia ase Herode. Na Herode omonyene nigo arenge Yerusalemu ase amatuko aria. 8Ekero Herode achia korora Yeso akagokigwa mono, ekiagera korwa kare nigo arigetie komorora, ekiagera aigwete chinkuma chiaye, naende nigo asemeretie korora egekone kegokorwa nere. 9Akamoboria amang’ana amange, korende ere tamoiraneria rinde rionsi. 10Abakuani abanene na aborokia b’amariko bagatenena, bakomosoera ne chinguru. 11Herode na abarwani baye bakamochaya, bakamosekereria, bakamobekera chianga chingiya mono, akamoirania ase Pilato. 12Erio Herode na Pilato bakabwatana obwanchi ase rituko riria; naki ritang’ani nigo barenge nobobisa barabwo ase barabwo.
Pilato, na Baraba, na Yeso
(Mat 27:15–26; Mar 15:6–15; Yoh 18:39—19:16)
13Pilato akarangeria amo abakuani abanene, na abagambi, na abanto, 14akabatebia, “Mwandeterete omonto oyo, buna oyobaonchoire abanto; naunirie amang’ana aye ase amasio aino, na tindochi bobe ase omonto oyo ase aria mwamosoerete, 15nonya n’Herode tarochi, ekiagera omoiranirie gocha asetore. Rora, ere takorete gento kemogwenerete akwe. 16Erio konamoakire, nimosibore.” 17Bono igo yamogwenerete kobasiborera omonto oyomo ekero kie rituko rinene.
18Bagaaka eriogi bonsi amo, bakabora, “Morusie oyo, tosiborere Baraba!” 19(Ere nomonto obegetwe ase echela ase engencho y’eriomana riakoregete ase omochie ime, na ase oboiti.) 20Nabo eria kabere Pilato agakwana nabarabwo, akarigia gosibora Yeso. 21Korende barabwo bagaaka eriogi, bakabora, “Mobambe, mobambe!”
22Ere akabatebia eria gatato, “Nase ki? Mbobe ki akorete oyo? Tindochi nonya ne ring’ana erimo asare rigwenerete akwe. Ase igo, nanchire komoaka na komosibora.”
23Korende bakagenderera kobora ase eriogi rinene ng’a goika abambwe. Eriogi riabo rikabua. 24Pilato akanacha amang’ana akoreke buna barigetie. 25Agasibora ere oyobegetwe echela ase eriomana na oboiti, oyobarigetie; akarua Yeso asebare buna ogwancha kwabo kwarenge.
Okobambwa kwa Yeso
(Mat 27:32–44; Mar 15:21–32; Yoh 19:17–27)
26Bagachia komoira, bakabwata Simion Omokurene, oyorenge korwa borabu, bakamotweka omosalaba, ayobogorie nyuma ya Yeso. 27Omoganda bw’abanto okamotunyana, na abakungu baare kweaka‐aka, na komweng’erereria. 28Yeso akabeonchorera, akabora, “Abaiseke ba Yerusalemu, timondeera inche, korende ereere inwe abanyene, na abana baino. 29Naki amatuko nache ekero abanto baratebe: Mbasesenirie abare abagomba, ne chinda chitaiboreti, ne chimbeere chitana kogonkwa! 30Erio nabachake gotebia ebitunwa: Togwere, na ebigoro: Totube. 31Onye bagokora aya ekero omote ore omobese, naki erabe ekero bwomire?”
32Abande babere abasaria bakairwa, baitwe amo nere. 33Bagachia goika aase akorokwa Ekeore, bakamobamba aroro, na baria abasaria, oyomo ensemo y’okoboko gw’okorio, na oyonde ensemo y’okoboko gw’okobee.
34Yeso akabora, “Tata, baabere, ekiagera tibamanyeti eke bagokora.”
Bakagabana chianga chiaye, bagachiakera obomera. 35Abanto bagatenena, bakarigereria. Na barabwo abanyene bakamokorera echeche, bakabora, “Natooretie abande, tiga etoorie ere omonyene, onye oyo nere Kristo o Nyasae, Omochore oye.” 36Abarwani boigo bakamosekereria, bakamochiera, bakamoa chinkama, 37bakabora, “Onye aye naye Omoruoti bw’Abayahudi, etoorie.” 38Igoro asare nkiarengeo ekemanyererio kerikire ase omonwa bw’Ekegiriki, na Ekerumi, na Ekeibirania “OYO NERE OMORUOTI BW’ABAYAHUDI.”
39Oyomo bwa baria abasaria babambetwe akamorama, akabora, “Inee! Tari aye Kristo? Etoorie aye omonyene, naintwe ototoorie.” 40Oyo o kabere akamokania, akabora, “Aye tori komoiroka nonya Nyasae, aye kore ase ekina keria keria? 41Intwe ekeene mboronge; ekiagera twaeirwe eng’eria ya boronge y’ogokora gwaito, korende oyo takoreti gento kende kebe.” 42Erio agatebia Yeso, “Yeso, ong’inyore ekero ogocha ase oboruoti bwao!”
43Yeso akamotebia, “Ekeene nagotebirie: Rero nobe amo nainche Paradiso.”
Ogokwa kwa Yeso
(Mat 27:45–56; Mar 15:33–41; Yoh 19:28–30)
44Bono nigo chiarenge ang’e chinsa isano nemo, omosunte okaba igoro ase ense yonsi goika chinsa kianda, 45ekero omobaso orimire. Na egetambaa gi’okonacha Hekalu kegatandoka gati‐gati. 46Yeso akarera ase eriogi rinene, akabora, “Tata, ase amaboko ao nabekire omoika one!”
Nyuma gakwanire aya agatweka mo. 47Omotang’ani bw’abarwani rigana agachia korora aya, agatogia Nyasae, akabora, “Ekeene, omonto oyo nigo arenge omonyene oboronge.” 48Naende emeganda yonsi, abasangererekanete korora aya, kobachia korora ayakoreka, bakairana chinka chiabo, bakweaka ebikuba. 49Abasani baye bonsi na abakungu abamotunyanete korwa Galili, bagatenenera are, bakarora ayio.
Ogotindekwa kwa Yeso
(Mat 27:57–61; Mar 15:42–47; Yoh 19:38–42)
50Rora, narengeo omonto oyomo, erieta riaye Yusufu, omonto bw’Arimathaya, omochie o Boyahudi, ere nomonto bw’ekegambero kiabo, omonto omuya, naende omoronge. 51Ere tanchete amang’ana abo, nonya nogokora kwabo, nigo aganyete oboruoti bwa Nyasae. 52Omonto oyo agachiera Pilato, akamosaba aegwe omobere o Yeso. 53Akayoikia, akayoboyia egetambaa ki’egatani, akayobeka ase oboina bwabaachetwe ase egetare, aase monto onde atana kobekwa. 54Nigo riarenge rituko ri’Okwearigania, na Esabato egachaka gosoa. 55Abakungu abachete amo nere korwa Galili, nigo batunyanete korwa nyuma, bakarigereria oboina na buna omobere oye bwareretigwe. 56Bakairana, bakaroisia amanukato na amaguta e rimisu rigiya.
Ne rituko ri’Esabato bagatimoka buna yachigetwe.
OLD EKEGUSII BIBLE PROTESTANT EDITION
©Bible Society of Kenya, 2020