LUKA 22
22
Okorua kw’obong’ainereria kwa Yudas
(Mat 26:1–5,14–16; Mar 14:1–2,10–11)
1Rituko Rinene ri’Emegati etabekiri memera, rikorokwa Epasaka, rigaika. 2Abakuani abanene na aborokia b’amariko bakarigia enchera y’okomoita, ekiagera nigo bairogete abanto.
3Saitani agasoa Yudas okorokwa Iskariota. Yudas nigo arenge oyomo bwa baria ikomi na babere. 4Akagenda agakwana nabakuani abanene na abatang’ani b’abarendi buna aranyare komobeka ase amaboko abo. 5Bakagoka bakabwatana nere komoa chiropia. 6Agancha, akarigia ribaga akomoruera asebare emeganda etaiyo.
Okwearigania kw’Endagera y’omoerio
(Mat 26:17–19; Mar 14:12–16)
7Rituko ri’Emegati etabekiri memera rigaika, eri’emanwa y’eng’ondi y’Epasaka egwenerete konyenywa. 8Erio Yeso agatoma Petero na Yohana, akabora, “Genda motoroiserie Epasaka, erinde toyerie.”
9Bakamoboria, “Ng’ai origetie toyeroiserie?”
10Akabatebia, “Rora, ekero mwasoire omochie, namoumerane nomosacha obogoretie enyongo ere namache; momotunyane goika enyomba agosoa, 11motebie omonyene enyomba: Omworokia nkoboria are: Ng’ai enyomba y’abageni ere, inyare koriera Epasaka amo naborokigwa baane? 12Omonto oria naborokie akanyomba akanene ka irongo karoisirie; agwo mwariganie.”
13Bakagenda, bakanyora buna abatebetie, bakaarigania Epasaka.
14Erio ensa egachia goika ang’e, agaikaransa amo nabatomwa. 15Akabatebia, “Ninganetie mono mono koria Epasaka eye amo nainwe ritang’ani ntarachandwa, 16ekiagera nabatebirie, tinkoyeria naende goika yaikeranigwe ase oboruoti bwa Nyasae.”
Endagera y’omoerio
(Mat 26:20–30; Mar 14:22–26; 1 Kor 11:23–25)
17Akabogoria egekombe, na ekero airaneirie ng’a mbuya mono, akabora, “Bogoria eke, mwatanane inwe ase inwe; 18naki nabatebirie, korwa bono tinkonywa okwama kw’omosabibu goika oboruoti bwa Nyasae boche.”
19Akabogoria omogati, na ekero airaneirie ng’a mbuya mono, akayosamunyora, akabaa, akabora, “Oyo nomobere one orurwe ase engencho yaino. [Kora iga ase okong’inyora.” 20Naboigo akabogoria egekombe nyuma ase okoria, akabora, “Egekombe eke nokobwatana okoyia ase amanyinga aane, aitekire ase engencho yaino.] 21Korende rigereria, okoboko kwaye ere oyokondua nigo kore amo nainche ase emesa. 22Ekiagera Omwana‐o‐mwanyabanto nkogenda are buna yachigetwe; korende obobe nobwaye omonto oria okomorua!”
23Na barabwo bagachaka koborania barabwo ase barabwo, gose ning’o asebare orakore ring’ana eri.
Obonene bw’ekeene
24Gokaba okoamererania ase egati yabo, gose ning’o asebare obarirwe koba omonene kobua abande. 25Yeso akabatebia, “Abaruoti b’abanto b’ebisaku nigo bakogambera abanto; naende abare nokobua igoro asebare barokwa Abakori Abaya. 26Korende asemore inwe taibo, otatiga oyore omonene oino nabe buna oyore omoke; na ere oyokobatang’ana nabe buna omokoreri abande. 27Inee! Ning’o ore omonene, noyoikaransete ase endagera, gose noyogokorera? Tari ere oyogoikaransa ase endagera? Korende inche nigo inde ase egati yaino buna omobakoreri.
28“Inwe ninwe mwabeire mogendererete amo nainche ase ogoteemwa kwane, 29na inche nabaeire inwe oboruoti buna Tata ang’ete, 30monyare koria na konywa ase emesa yane ase oboruoti bwane, na goikaransa ase ebirogo bi’obonene, na kogambia abanto b’ebisaku ikomi na bibere bi’Abaisraeli.”
Ogokana gwa Petero gokobanwa
(Mat 26:31–35; Mar 14:27–31; Yoh 13:36–38)
31Akabora, “Simion, Simion, rora Saitani nabarigetie abaire anyare kobasoonga buna engano, 32korende nagosabeire, erinde okwegena kwao tikoera, na aye gokwaonchokire, obeke abamino chinguru.”
33Akamotebia, “Omonene nigo inde ang’e kogenda amo naye echela, nonya nase ogokwa.”
34Akabora, “Nagotebirie Petero, rero etuoni etarabuga nonkane ara gatato ng’a tomanyeti.”
35Akababoria, “Inee! Ekero nabatomete motari nebimoya, ne chisaro, na ebikoroto, imwaremeretwe na gento?” Bakamoiraneria, “Yaya”. 36Akabatebia, “Korende bono oyore nekemoya akebogorie, na esaro boigo, na ere oyotari nomoyio o birende aoonie eganchwa yaye, agore oyomo. 37Naki nabatebirie, eriarigetwe ndigwenerete goikeranigwa asende. Ere nigo abareranetigwe amo nabasaria, ekiagera ayarigetwe igoro asende aikeranigwe.”
38Bagateba, “Omonene, rora ntore nemeyio ya birende ebere aa.” Akabatebia, “Nabo aisanire.”
Yeso ore Gethisemane
(Mat 26:36–46; Mar 14:32–42)
39Agasoka, akagenda goika egetunwa ki’Emezeituni, buna engencho yaye yarenge, na aborokigwa baye bakamotunyana. 40Agachia goika aase aria akabatebia, “Saba, erinde timosoa ase ogoteemwa.”
41Ageatanana korwa asebare, ekerengo gi’okoruta rigena, akabeka amaru inse, agasaba, 42ogoteba, “Tata, koranche, onduserie egekombe eke,#22:42 Rora Mat 26–42 korende tari buna ndigetie inche, korende buna origetie aye, bikoreke.” 43Omomalaika akamoorokera korwa, igoro, akamobeka chinguru. 44Na ere ekiagera arenge nomoichano mono, akamenta ogosaba nomokia; ebigeri biaye bikaba buna amatoima ’amanyinga agoiteka inse. 45Agachia koimoka korwa ase ogosaba agachiera aborokigwa baye, akabanyora bararire ase ogoichana. 46Akabatebia, “Inaki mwararire? Boka, mosabe, erinde timosoa ase ogoteemwa.”
Okobwatwa kwa Yeso
(Mat 26:47–56; Mar 14:43–50; Yoh 18:2–11)
47Ekero arenge gokwana, rora, omoganda ogacha, na oria okorokwa Yudas, oyomo bwa baria ikomi na babere, obatang’aine. Ere akamoika Yeso ang’e komonyunyunta. 48Yeso akamotebia, “Yudas, nkomorua ore Omwana‐o‐mwanyabanto ase okomonyunyunta?”
49Na abwo barenge amo nere bagachia korora ayakorigia koba, bakabora, “Omonene, inatorwane nomoyio o birende?” 50Oyomo obo agaaka omosomba bw’omokuani omonene, akamobutora ogoto gw’okorio.
51Yeso akabora, “Tiga tokora igo.” Akamokuna ogoto, akamogwenia. 52Yeso agatebia abakuani abanene, na abanene b’abarendi, na abagaaka, baria bamocherete, “Iga mwachire nemeyio ya birende ne chinungu buna mogochiera omouri. 53Ekero narenge amo nainwe ase Hekalu kera rituko timwaramborete amaboko mombwate, korende bono ensa eye neyaino, ekero omosunte okogamba.”
Petero okomokana Yeso
(Mat 26:57–58,69–75; Mar 14:53–54,66–72; Yoh 18:12–18,25–27)
54Bakamobwata, bakamoira, bakagenda nere nyomba ime ase omokuani omonene. Na Petero akamotunyana korwa nyuma ore egeka. 55Bagachia gouta omorero egati y’egoora, bagaikaransa amo, na Petero agaikaransa ase egati yabo. 56Erio omoiseke oyomo akamorora oikaransete ang’e nomorero, akamobeta amaiso akabora, “Oyo nere igo arenge amo nere.”
57Agakana, akabora, “Omokungu, timomanyeti.”
58Naende ake omonto onde akamorora, akabora, “Aye noyomo obo ore.”
Petero akabora, “Omonto oyo, tai inche.”
59Na nyuma y’ensa eyemo, omonto onde akabetereria mono, akabora, “Ekeene, oyo nigo arenge amo nere, ekiagera nere n’Omogalili.”
60Petero akabora, “Omonto oyo, timanyeti eri ogokwana.”
Erio kegima kagokwana, etuoni ekabuga. 61Omonene akeonchora, akarigereria Petero. Petero akainyora ring’ana ri’Omonene, buna amotebetie, “Rero, ritang’ani etuoni etarabuga nonkane ara gatato.” 62Agasoka isiko, akarera nobororo.
Yeso ogosekererigwa na goakwa
(Mat 26:67–68; Mar 14:65)
63Abanto baria babwatete Yeso, bakamosekereria, na komoaka. 64Bakamotuba amaiso, bakamoboria, “Bana! Ning’o ogoaka?” 65Bakamokwana bobe amang’ana ande amange ay’okomorama.
Yeso ase obosio bw’abakuani abanene
(Mat 26:59–66; Mar 14:55–64; Yoh 18:19–24)
66Ekero bwachia gokia, abagaaka b’abanto, na abakuani abanene, na aborokia b’amariko bagasangererekana amo, bakamorenta ase ekegambero kiabo, bakobora, 67“Onye aye naye Kristo, totebie.”
Korende akabatebia, “Ninsa kobatebia, timokonyara gwancha; 68naende nimbaboria, timokong’iraneria. 69Korende korwa bono Omwana‐o‐mwanyabanto naikaranse ensemo y’okoboko gw’okorio kw’obonene bwa Nyasae.”
70Bakabora bonsi, “Aye naye Omwana o Nyasae.”
Akabatebia, “Inwe mwatebire ng’a ninche ere.”
71Bakabora, “Mborori ki torigetie goetania obo? Naki intwe abanyene twaigure amang’ana korwa ase omonwa oye.”
OLD EKEGUSII BIBLE PROTESTANT EDITION
©Bible Society of Kenya, 2020