LUKA 2
2
Okoiborwa kwa Yeso
(Mat 1:18–25)
1Ase amatuko aria, ogochika gokarua ase Kaisari Augusto, ng’a omobaro bw’abanto orikwe ase ense yonsi. 2Oyo noro orenge omobaro bwe ritang’ani origetwe ekero Kurenio arenge gavuna o Siiria. 3Abanto bonsi bakagenda korikwa, kera omonto ase omochie oye. 4Na Yusufu nere akaimoka korwa Galili korwa ase omochie o Nazareti, agatiira kogenda Boyahudi, goika omochie o Daudi, okorokwa Bethlehemu, ekiagera nigo arenge oyo bw’enyomba na eamate ya Daudi, 5erinde arikwe amo na Mariamu, ekiagera omoriereire boko, na Mariamu nigo arenge morito. 6Ekero barenge aroro engaki yaye y’okoibora egaika. 7Akaibora omwana oye omoisia omotangi, akamobekera chianga chi’obwana, akamwareria ase orotuba chiombe chiare koriera, ekiagera batanyorete ribaga ase enyomba y’abageni.
8Ase ense eyio mbarengeo abarisia baikaransete ase ebitii, bakorenda amaicho abo botuko. 9Omomalaika bw’Omonene akabaorokera, obonene bw’Omonene bokababarera; bagasogwa nomoondoko omonge. 10Omomalaika akabatebia, “Timoiroka, ekiagera nabarenteire amang’ana amaya ay’omogoko omonene, orabe ase abanto bonsi, 11naki rero ase omochie o Daudi oiboirwe Omotooria ase engencho yaino, nere Kristo Omonene. 12Na eke nekemanyererio asemore: Namonyore omwana ekeng’werere obekeire chianga chi’obwana, bwareirie ase orotuba.”
13Bwango igo mbarengeo amo nomomalaika oria omoganda o igoro, bagotogia Nyasae, bakobora,
14“Obonene ase Nyasae ore Igoro Mono,
na ase ense omorembe, ase abanto bagweneirwe nere.”
15Ekero abamalaika abwo bachia koimoka kogenda igoro, abarisia baria bagatebania, “Gaki togende goika Bethlehemu, torore ring’ana eri riakorekire, eri Omonene atomanyirie.” 16Bakagenda nomoayerero, bakanyora Mariamu na Yusufu, na omwana oria ekeng’werere bwareirie ase orotuba. 17Bagachia komorora, bakaorokia ring’ana batebetigwe igoro y’omwana oyio. 18Bonsi abaigwete bagakumia ase aria batebetigwe nabarisia. 19Korende Mariamu akagacha amang’ana aya onsi, okoyarengereria ase enkoro yaye. 20Abarisia bakairana, bagotogia Nyasae na komobaka ase amang’ana onsi baigwete, na ayabaroche, buna batebetigwe.
21Rigachia goika rituko ria gatano na gatato, rituko ri’okomosara, akarokwa erieta riaye Yeso, riria riatoretwe nomomalaika ritang’ani atarabogorigwa oborito.
Okoirwa kwa Yeso ase Hekalu
22Na ekero amatuko ’ogwesibia kwabo achia goika, ayachikire ase amachiko a Musa, bakamoira Yerusalemu, bamobeke ase Omonene 23(buna arikire ase amachiko ’Omonene, “Kera omoisia omotangi okoigora enda ya ng’ina narokwe omochenu ase Omonene”), 24barue ekeng’wanso buna yaboretwe ase amachiko ’Omonene, “Amaruma abere, gose amage ’amaruma abere.”
Simeoni ogotogia Nyasae
25Rora narengeo omonto Yerusalemu, erieta riaye Simeoni. Oyio nomonto omoronge orenge, osigete Nyasae, oganyete ogosemeria kw’Abaisraeli; na Omoika Omochenu nigo orenge igoro asare. 26Ere nigo aorokereretigwe n’Omoika Omochenu, ng’a takorora amakweri atararora Kristo bw’Omonene. 27Nabo akaraagwa n’Omoika gocha ase Hekalu ime; na ekero abaibori bachia korenta omwana Yeso, bamokorere buna yarenge engencho y’amachiko, 28Simeoni akamonyora, akamoagata ase amaboko aye, agatogia Nyasae, akabora,
29“Omonene, bono otige omosomba oo agende nomorembe,
koreng’ana nering’ana riao.
30Ekiagera amaiso aane arorire ogotooreka kwao,
31oko kwabekire ase amaiso ’abanto bonsi,
32omobaso okomorekera abanto b’Ebisaku,
na obonene bw’abanto bao Abaisraeli.”
33Ise na ng’ina bagakumia ase aria akwanwa igoro asare. 34Simeoni akabasesenia, agatebia Mariamu ng’ina, “Rora, Omwana oyo obekirwe ase okogwa na ogotenena ase abange b’Abaisraeli, abe ekiorokererio kerabe kegokwanwa mamincha, 35erinde ebirengererio bie chinkoro chinyinge biorokigwe. Boigo omoro nokobete omoyo oo.”
Anna
36Narengeo omokungu omobani, Anna, omoiseke o Fanueli, bw’egesaku ki’Asheri. Ere nomong’ina bw’amatuko amange, obete nomosacha oye emiaka etano na ebere nyuma y’okoera kw’oboiseke bwaye. 37Ere nigo arenge omoboraka bw’emiaka emerongo etano na etato na ene, atana korua ase Hekalu ime, korende akaba okweng’ata, na ogosaba, na ogosasima obotuko na omobaso. 38Ase ekero keria ere akaoroka, agatogia Nyasae, agatebia abanto bonsi abarenge baganyete okoboorigwa kwa Yerusalemu amang’ana igoro y’Omwana oria.
Obwana bwa Yeso
39Barabwo bagachia gokoora goikerania onsi koreng’ana namachiko ’Omonene, bakairana Galili goika omochie obo Nazareti. 40Omwana oria agakina, akamenteka chinguru, agaichorwa nobong’aini ne chisemi; na obuya bwa Nyasae bokaba amo nere.
41Nabo abaibori baye barenge kogenda Yerusalemu kera omwaka ase rituko rinene ri’Epasaka. 42Goika agachia koba nemiaka ikomi na ebere, bagatiira kogenda aroro, buna yarenge engencho ye Rituko Rinene. 43Ekero Epasaka yaera, ekero barenge koirana, omwana Yeso agatigara nyuma agwo Yerusalemu, na abaibori baye tibamanya. 44Barabwo bagakaga ng’a nigo are ase omoganda obo, bakagenda orogendo rw’omobaso oyomo, bakamorigia ase eamate yabo na ase abairi. 45Ekero batamonyorete, bakairana Yerusalemu, bakamorigia. 46Nyuma y’amatuko atato bakamonyora Hekalu ime, oikaransete gati ase aborokia, okobaigwa na kobaboria amaborio. 47Na bonsi abamoigwete bagakumia ase okomanya kwaye na okoiraneria kwaye. 48Abaibori baye bagachia komorora bagaichana mono. Ng’ina akamotebia, “Omwana one, naki gwatokorire iga? Rora, iso na inche twarenge gokorigia nomoichano.”
49Akabatebia, “Naki mokondigia? Timomanyeti ng’a nengwenerete koba ase enyomba ya Tata one?” 50Tibamanya ring’ana riria abatebia. 51Agatirimboka amo nabarabwo, agaika Nazareti, akaba nkobaigwera are. Ng’ina akagacha amang’ana aya onsi ase enkoro yaye ime.
52Yeso akamenteka gokina ase obong’aini ne chisemi, na ase omobere, akagwenera Nyasae na mwanyabanto.
OLD EKEGUSII BIBLE PROTESTANT EDITION
©Bible Society of Kenya, 2020