LUKA 1
1
Ogochakera
1Abanto abange beruete korika ebirage bi’amang’ana aria aikeranetigwe egati yaito. 2Nigo barigete buna abwo barenge abarori korwa omochakano na abakori emeremo be ring’ana batorenteire. 3Naboigo nainche narorire buya, konaikire kwenyorera amang’ana onsi boronge korwa ritang’ani, gokorikera aye Theofilo bw’amasikani, 4erinde onyare komanya oboene bw’amang’ana aria kworokereretigwe.
Obobani bw’okoiborwa kwa Yohana Omobatisi
5Ekero Herode arenge omoruoti o Boyahudi, narenge omokuani oyomo, erieta riaye Zakaria, oyo bw’ensemo y’Abiya. Mokaye nomoiseke bw’ororeria rwa Haroni orenge, erieta riaye Elisabeti. 6Na bonsi babere nabanyene oboronge baare ase obosio bwa Nyasae; nigo bagendererete ase amachiko ne chinchera chionsi chi’Omonene batari na komocha. 7Barabwo tibarenge nomwana, ekiagera Elisabeti nigo arenge omogomba, na barabwo bonsi babere konya bagotire mono.
8Na ekero rika ria Zakaria ri’ogokora emeremo y’obokuani ase obosio bwa Nyasae riarenge, 9kobwatekana nengencho y’obokuani, obomera bokamogwera asoe ase Hekalu y’Omonene asambe ubani. 10Na omoganda bwonsi bw’abanto nigo orenge isiko gosaba ekero ki’ogosamba ubani. 11Zakaria akaorokerwa nomomalaika bw’Omonene, oteneine ensemo ya borio y’egesasimero ki’ogosambera ubani. 12Ere agaichana gachia komorora, na omoondoko okamobwata. 13Korende omomalaika oria akamotebia, “Toiroka, Zakaria, ekiagera ogosaba kwao kwaigurwe, na mokao Elisabeti nakoiborere omwana omoisia, na erieta riaye nomoroke Yohana.
14“Aye nobe nomogoko na ogosasoka,
na abanto abange nabagokere okoiborwa kwaye,
15ekiagera nabe omonene ase obosio bw’Omonene.
Takonywa edivai gose ekenyugwa kegotindia;
ere naichorwe n’Omoika Omochenu,
nonya nkorwa enda ya ng’ina.
16Naonchore abange b’Abaisraeli gocha ase Omonene, Nyasae obo.
17Ere natang’ane bosio bwaye ase omoika ne chinguru chi’Elija,
aonchore chinkoro chi’abaise ase abana babo,
na aonchore abamochi ase obong’aini bw’abanyene oboronge,
abekere ang’e Omonene abanto baroisigwe.”
18Zakaria agatebia omomalaika, “Naki ndakore imanye ayio? Ekiagera inche nomogotu, na mokane nomong’ina.”
19Omomalaika akamoiraneria, “Ninche Gabirieli, ngotenena ase obosio bwa Nyasae; ninche natomwa nkwane naye, ngotebie amang’ana aya amaya. 20Rora, aye nobe rimama, tonyara gokwana goika rituko riria ayio agocha kooroka, ekiagera otegena amang’ana aane; ayio naikeranigwe ekero kiaye.”
21Na abanto baria baganyete Zakaria, bagakumia ase ogotebana kwaye aroro Hekalu ime. 22Goika ekero achia gosoka, tanyara gokwana nabarabwo; bakamanya ng’a nigo arora okorora aria Hekalu ime. Ere nigo arenge kobateberia nokoboko, akagenderera koba rimama. 23Naende amatuko aye ay’ogokora emeremo agachia koera, akagenda bwoye.
24Nyuma y’amatuko aria mokaye Elisabeti akaba morito, akebisa emetienyi etano, ogoteba, 25“Igo nabo Omonene ankoreire ase amatuko aya andigereretie, na konduseria obosooku bwane ase amasio ’abanto.”
Obobani bw’okoiborwa kwa Yeso
26Omotienyi bw’etano nomo omomalaika Gabirieli agatomwa na Nyasae kogenda omochie o Galili, okorokwa Nazareti, 27ase omoiseke omwekungi oriereire boko nomosacha, erieta riaye Yusufu, bw’eamate ya Daudi, na erieta ri’omoiseke oria Mariamu. 28Agacha asare, akabora, “Mbuya ore aye, oyokwaeirwe obuya. Omonene nigo are amo naye.”
29Mariamu agaichana mono ase ring’ana eri, akarota‐rotia omoyo oye ime, “Ngokwania ki oko?” 30Omomalaika akamotebia, “Toiroka Mariamu, ekiagera kwanyorire obuya ase Nyasae. 31Rora, nobe morito, noibore omwana omoisia, nomoroke erieta riaye Yeso.
32“Oyio nabe omonene, narokwe Omwana bw’Oyore Igoro Mono;
na Omonene Nyasae namoe ekerogo ki’obonene gia Daudi sokoro yaye;
33nagambere enyomba ya Yakobo goika kare na kare;
nonya noboruoti bwaye tibokoba nomoerio.”
34Mariamu akaboria omomalaika oria, “Naki rirabe ring’ana eri, ekiagera tindaba nomosacha?”
35Omomalaika akamotebia,
“Omoika Omochenu nogochere,
ne chinguru chiaye Oyore Igoro Mono nachikobekere ekiriri.
Ase ayio, oyoraiborwe narokwe Omochenu, Omwana o Nyasae.
36Rora, Elisabeti omoamate oo, nere boigo nare noborito bw’omwana omoisia ase obogotu bwaye; na omotienyi oyo noyo bw’etano nomo asare ere oyorogetwe omogomba. 37Naki ing’ana tiriri ritanyarekane ase Nyasae.”
38Mariamu akabora, “Rora, inche nomoiseke omosomba bw’Omonene; abe asende buna ring’ana riao.” Omomalaika akaimoka akarua asare.
Mariamu ogochia gokwania Elisabeti, naende ogotogia Nyasae
39Mariamu akaimoka ase amatuko ayio, akagenda bwango ase ebitunwa goika omochie oyomo o Yuda, 40agasoa nyomba mwa Zakaria, agakwania Elisabeti. 41Ekaba Elisabeti agachia koigwa ogokwania kwa Mariamu, omwana omoke agatuma ase enda yaye ime; Elisabeti agaichorwa n’Omoika Omochenu, 42agaaka eriogi ase chinguru, agakwana, “Gwasesenigwe aye ase abakungu, na oroiboro rw’enda yao rwasesenigwe. 43Ng’ai ring’ana eri riarure, ng’ina Omonene one anchicheire inche? 44Ekiagera rora, eriogi ri’ogokwania kwao riachia gosoa ase amato aane, omwana omoke otuma ase omosasoko ase enda yane ime. 45Nasesenirie oyobwegenete ng’a amang’ana ayio atebigwe n’Omonene naikeranigwe.” 46Mariamu agateba,
“Omoyo one otogirie Omonene,
47omoika one ogokeire Nyasae, Omotooria one,
48ekiagera origereirie obwororo bw’omoiseke omosomba oye.
Naki ekeene, korwa rero ebigori bionsi nabindoke omosesenigwa,
49ekiagera ere oyore ne chinguru onkoreire amanene,
na erieta riaye nerichenu.
50Amabera aye nigo are ase abwo bamoirogete
korwa ebigori goika ebigori.
51Okorire ogokora gwe chinguru,
oserebanirie abaenenu ase ebirengererio bie chinkoro chiabo.
52Okeeirie abanene korwa ase ebirogo biabo bi’obonene,
oimokereirie igoro abaitongo.
53Abare nenchara obaigotirie amaya;
abanyene enibo obaseririe bare namaboko amasa.
54Okonyire Israeli, omosomba oye, ase okoinyora amabera aye,
55buna atebetie chisokoro chiaito, Ibrahimu na oroiboro rwaye, goika kare na kare.”
56Mariamu akamenya nere emetienyi etato, akairana sobo.
Okoiborwa kwa Yohana Omobatisi. Zakaria ogotogia Nyasae
57Kegaika ekero gi’okoibora kwa Elisabeti, akaibora omwana omoisia. 58Abatureti baye na eamate yaye bakaigwa ng’a Omonene omororeire amabera amange, bakagoka amo nere. 59Rituko ria gatano na gatato bakaira omwana komosara, bakarigia bamoroke erieta ria ise, Zakaria, 60korende ng’ina akairaneria, akabora, “Taibo; nigo ararokwe Yohana.”
61Bakamotebia, “Tari nonya noyomo ase eamate yao okorokwa erieta erio.” 62Bakorokia ise ase ogokwana kw’ebimanyererio bi’amaboko, komoboria buna arigetie arokwe.
63Agasaba ebao y’okorika, akarika “Yohana, nario erieta riaye.” Bagakumia bonsi. 64Erio kegima agasiborwa omonwa na oromeme rwaye, agakwana, ogotogia Nyasae. 65Obwoba bogasoa ase abatureti babo bonsi. Amang’ana aya onsi agasarera ase ense yonsi y’ebitunwa bia Boyahudi. 66Na bonsi abayaigwete bakayabeka ase chinkoro chiabo ime, bakabora, “Mwana ki rende arabe oyo?” Naki okoboko kw’Omonene nigo kwarenge amo nere.
67Zakaria ise agaichorwa n’Omoika Omochenu, akabana, okobora,
68“Omonene, Nyasae o Israeli, atogigwe,
ekiagera obacheire abanto baye na kobabooria.
69Naende ototeneneirie Omotooria bw’okobua
ase eamate ya Daudi, omosomba oye.
70Buna atebete korwa omochakano
goetera ase emenwa y’ababani baye abachenu,
71ng’a natotoorigwe korwa ase ababisa baito,
na korwa ase amaboko abo bonsi abatogechete,
72erinde abakorere amabera chisokoro chiaito,
na koinyora okobwatana kwaye ogochenu.
73Emuma eria arierete sokoro yaito Ibrahimu,
74ng’a natoe ribaga ri’okomosasima totari nobwoba,
gatoratoorigwe korwa ase amaboko ’ababisa baito,
75ase obochenu na ase oboronge ase obosio bwaye
amatuko aito onsi.
76Naye, Omwana, norokwe omobani bw’Oyore Igoro Mono,
ekiagera notang’ane ase obosio bw’Omonene.
Oroisie chinchera chiaye,
77omanyie abanto baye ogotooreka
ase okwaberwa kw’ebibe biabo.
78Ase amabera aye Nyasae oito,
ekero amasase a igoro aratochere,
79abarere abamenyete ase omosunte na ase ekiriri ki’amakweri,
na koraa amagoro aito ase enchera y’omorembe.”
80Omwana oria agakina, akamenteka chinguru ase omoika, akaba ase erooro goika rituko riria aorogete ase Abaisraeli.
OLD EKEGUSII BIBLE PROTESTANT EDITION
©Bible Society of Kenya, 2020