Luka 21
21
Ukpinele Ɔdi Úte Etela Bonwu
1Na kakpakɔ mmɔ ni, Yesu ɔ́talaku anumi na ɔ́nu kalɛ na balakɛne beeti bana etela taabakya kakpakɔ kavumi kemmo. 2Na ɔ́nu lɛnɔ kalɛ na ukpinele ɔwabane ɔdi úti kɔplɛ inyɔ bɔdi úbakya kavumi kammɔ kemmo. 3Na ɔ́su ɔnini, “Mɔɔsu-mii nnii ukpinele ɔwabane ɔmɛni ni, úte lɛla útulo bakladi ƒui. 4Ɔsika bakladi ama ni, lɛla lɛni kani na baayɔ́ na bana lɛkɛ kemmo kani na béte. Nsu uleku ɔmmɔ ku nwuna kɔwaba ni, lɛla lɛni ƒui na nse-nwu na nka wadi ni, ani na úti úte mɛni.”
Yesu Ɔ́su Ka Bekyuli Badubɔbwɛ Katɔti Kakpakɔ
5Uwi ɔmɛni ni, batɛyane badi bakya baatɛmi taasiku Katɔti kakpakɔ lɛlɔ. Na básu kalɛ na kakpakɔ kammɔ kaadia bɔnu ku kalɛ na atabi ammɔ aadia bɔnu ku etela ani na bekyuli béti báklibi Katɔti kakpakɔ kammɔ. Mmɔ na Yesu ɔ́su-ma ɔnini, 6“Ala ani ƒui na bɛɛnu mɛni ni, uwi ɔdi ɔdubo ɔni na lɛtabi lɛdi lɛsɔ lɛɛɛdubo buse nina keliekɔ. Mmomu bekyuli badubo ɔdi biala bugyingya búwi kalɔ.”
Lɛbibo Ku Bekyuli Bukpoku Bɔdubo
7Amu na béye-nwu banini, “Ala ɔtinane, uwi ɔmani na ɔdubɔlɛ lɛni? Na bi na bɔdubuti bɔnu bɔti bɔnii uwi ɔni na ala amɛni alɛ údu?”
8Yesu ɔ́su-ma ɔnini, “Binye kagyumana na ukyuli ɔdi utatɔlɔ-mii. Bekyuli pii bani mɔɔsu banii ami mina kenye na beedie ni, badubo na bábasu banii, ‘Ami na ɔdi,’ na ‘Uwi ɔmmɔ úudu’. Nsu bitasiaku-ma kama. 9Bitayia si biinú kekpo kɔku ku bekyuli lɛlɔ bɔta bunye. Ala amɛni udu adubɔka bɔlɛ, nsu ɔɔɔdi nwuna kalɔ ndi ɔnii kawɔlɔkɔ kéede.”
10Yesu ɔ́sɔ úsie anumi na ɔ́su ɔnini, “Kɔlɔ kɔdubukpoku lɛlɔ, na lɛga kɔdikɔ kɔdubukpoku lɛlɔ. 11Kalɔ bɔkunku kpakplaa bɔdubɔkya. Na kɔka bonwu lɛnɔ kɔdubo bɔkya. Na lɛlɛ lidu lidu lɛnɔ lɛdubɔƒɔ ekpo ekpo ƒui. Na liƒu ala adubo butaalɛ na kayaa.
12“Na asa na ala amɛni adububo abalɛ ni, bekyuli badubo-mii buƒie na bekpoku-mii. Bekyuli badubuti-mii bete na batɛku litemi na Yudaƒuɔ kasalakɔ na bakya-mii ɔtɔ. Na badubo-mii buti buboku baga ku lɛlɔ badine anumi na batɛku-mii litemi na ami ɔsu. 13Na uwi ɔmɛni kemmo geen na ulu ɔ́lɛmi úte-mii ka bɛsu Katɔti litemi buni lɛmmɔ. 14Bɛklibi lɛlɔ bise kalɛ na bilékpoku lɛlɔ na ulu ɔni lɛlɔ na bɛdubuti bidie bina lɛlɔ ɔsu. 15Ɔsika ndubuti kenye ogya etemila ku lɛnunda lite-mii kalɛ na bina bekisine badi balakana bunye bɔsiaku-mii iye batɛmi bedie-mii kudii. 16Bina bawɔne ku banwani bananabi ku bina lɛlɔ bekyuli ku bina bakpana ndubo-mii buti bute. Na badubɔdu bina badi. 17Ukyuli biala ɔdubo-mii bukisi na ami ɔsu. 18Nsu alɔlɔ muedi ulelie ɔdi lɛlɔ. 19Binye kpakplaa, na bɛdubɔkɛ ngba bɔni nsɔ naaadubo bɔsa kudii.
Yesu Ɔ́su Ka Bekyuli Badubɔbwɛ Yerusalem
20“Si uwi ɔni na bɛ́nu ka bekpone báka bámana Yerusalem ni, bɛdubɔti ka ɔma ɔmmɔ bɔbwɛ uwi údu. 21Uwi ɔmmɔ ni, bekyuli bani ƒui nkya Yudea ni, ɔdi ka bekeli besie abi lɛlɔ. Na bekyuli bani ƒui nkya ɔma bonwu ɔmmɔ kemmo ni, ɔdi ka batɔlɔ. Na bekyuli bani ƒui nkya akpaklɔ ku lɛma lɛni na amadɔ ni, betesie ɔma bonwu ɔmmɔ kemmo. 22Ɔsika uwi ɔmmɔ kemmo ndi kɔtu bɔni emeyi ani nálɛ ka ebo aani kalɛ na Bunweni Kedee Ɔku kemmo etemila átina kalɛ. 23Ɔdubɔyu ɔkplu geen ute beleku bani nda kaƒɔ ku bebi beni bani muute bebi lɛnyi. Lɛbibo bonwu lɛdi lɛdubo kalɔ kamɛni lɛlɔ. Na Katɔti kɔtu bɔni bɔdubo bekyuli bamɛni lɛlɔ. 24Badubo badi bɔdu ku kewii. Na badubo badi buƒie bɔtɔlɔku busienku kɔlɔ bamba lɛlɔ ƒui. Na bekyuli bani naaadi Yudaƒuɔ badubɔdi Yerusalem lɛlɔ úti útédu uwi ɔni na Katɔti ɔ́tunaku-ma.
Ukyuli Ɔyawine Ubi Ɔsɔ Ɔdubo
25“Akɔla ala budie taatina adubo butaalɛ na ɔƒɛ ku kɔbuli ku ayabi anumi. Na kalɔ lɛlɔ bekyuli ƒui badubɔyila lɛnunsia biala. Na bɔyia bonwu bɔdubɔkya bekyuli lɛlɔ kemmo na kalɛ na ɛpu uudie lɛdi na uukpóku lɛlɔ ɔsu. 26Bekyuli badubo butaayila na liƒu ɔsu uwi ɔni na béti benye bagya lɛla lɛni ndubɔlɛku kayawi kemodi kammɔ lɛlɔ. Ɔsika ala ani nkya kayaa asɔ elenye ana kenyekɔ, na lɛla biala ɔbladu ɔvumana. 27Ɔmmɔ kama ni, ami Ukyuli Ɔyawine Ubi ndubɔda lɛlɛ kayaa na kemmo na mina ɔyikun bonwu ku bukeye kemmo. 28Si uwi ɔni na ala amɛni ése kalɔ aalɛ́ ni, bɛklibi lɛlɔ na bitaasia anu, ɔsika bina bɔƒɔ uwi úude.”
Bɛtɛya Ala Bɛsiku Egyii Lɛlɔ
29Amu na Yesu úbo-ma lɛgba lɛdi ɔnini, “Bɛbu kɔdingyii ku egyii abambadi lɛlɔ bɛnu. 30Si bɛ́nu ka evete awɔdi ése kalɔ aalɛ́ ni, bɛgyi bɛnii ketudi kéede. 31Lɛni kani na si bɛ́nu ka ala amɛni aalɛ́ ni, bɛgyi bɛnii Katɔti lɛga kadikɔ kammɔ bubo uwi úudu.
32“Mɔɔsu-mii geen ka ala amɛni ƒui adubɔlɛ asa na bina akɔ badi na mɛni bɛdubɔsa bukpi. 33Katɔ ku kalɔ kadubɔvi, nsu mina etemila anya aaadubo bɔvi kudii.
Ɔdi Ka Binye Kagyumana
34“Bɛnu kaduɛ na bileti bina uwi bilete bɔdi ku bɔni ebiti sɔɔn. Na ɔdi uléteekpoku nwuna lɛlɔ na kayawi kamɛni ala lɛlɔ. Si ɔɔɔdi lɛni ni, limeyi lɛmmɔ lɛdubo-mii buyu bɔtu. 35Na ɔdubɔbla aani kalɛ na kakpagyuɛ keedie ebuo. Na ukyuli biala ulálɛ-nwu kemmo. 36Anwuɔsu binye kagyumana na bitaakpali katɔ uwi biala kalɛ na bɛkɛ ɔyikun na bɛlɛ sɛɛn na ala ani ƒui ndubɔlɛ mɛni kemmo ku kalɛ na bɛkana ami, Ukyuli Ɔyawine Ubi, litemi bɔtɛ kenye bunye.”
37Na emeyi ammɔ kemmo ƒui ni, Yesu úti útaatina bekyuli bammɔ ala na Katɔti kakpakɔ. Na useyi uwi ni, ɔɔtɔlɔ teesie Inɔ Egyii Kɔbi lɛlɔ. 38Na ɔdigyewi biala ni, bekyuli bammɔ baata teesie kakpakɔ teeténu-nwu ala bɔtina.
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.