Luka 22
22
Bakpane Benengu Bása Lili Ka Badu Yesu
1Uwi údu ka Yudaƒuɔ badi Bodobodo Ɔni Néteƒu Limeyi bɔdi na limeyi lɛni baalɔ Kukpi Lili Bɔvia Limeyi lɛlɔ. 2Nsu ka Katɔti bakpane benengu ku ɔda bubo ala batinane baayia bekyuli bammɔ ɔsu ni, bátaawia ulu ɔni lɛlɔ na basia badu Yesu na bɔbɛ kemmo.
Yuda Ɔ́tuna Ka Ɔkya Yesu Kakya
3Amu na Satan úduo Yuda ɔni baalɔ lɛnɔ banii Iskariot lɛlɔ kemmo. Na ɔdi Yesu batɛyane leevu-inyɔ bammɔ akɔ unwi. 4Anwuɔsu Yuda úsie Katɔti bakpane benengu ku Katɔti kakpakɔ lɛlɔ banune benengu kudɔ. Na bátɛmi básiku ulu ɔni lɛlɔ na ɔdubɔvi asa na beƒie Yesu lɛlɔ. 5Ebiti áda-ma, na básu-nwu ka badubɔƒɔ-nwu kayu kadi. 6Na Yuda lɛnɔ únu kalɔ lɛni. Anwuɔsu úse kalɔ ɔɔwia uwi ɔbuni ɔni lɛlɔ na weti Yesu wakya-ma enu.
Yesu Ɔ́klibi Lɛlɔ Úte Kukpi Lili Bɔvia Limeyi Bɔdi
7Ɔmmɔ kama ni, limeyi lɛni na badu baƒonu bebi bete Kukpi Lili Bɔvia Limeyi líbedu na bodobodo ɔni néteƒu emeyi bɔdi kemmo. 8Na Yesu ɔ́tala Petro ku Yohane ku kenye kamɛni ɔnini, “Bisie na bitáklibi Kukpi Lili Bɔvia adila bise kalɛ na bɔdi.”
9Mmɔ na béye-nwu banini, “Wɛ na aayɔ́ ka bɔklibi-nya buse?”
10Amu na údie kenye ɔnini, “Si biiduo Yerusalem ɔma ɔmmɔ kemmo ni, ɔnana ɔdi ɔdubo-mii bɔsiaku ɔni nti ntu ku ketubui. Bɛsiaku-nwu na bitéduo kaduli kani kemmo na weduo. 11Na bɛsu ɔtɔlati ɔmmɔ bɛnii, ‘Ala ɔtinane ɔnii buye-ɔ bɔnii, “Ɔtɔ ɔmani kemmo na ami ku mina batɛyane bɔdubo Kukpi Lili Bɔvia adila bɔdi?” ’ 12Ɔdubɔtina-mii katu taasia lɛgbanya lɛdi ka báklibi-nwu na bése kuliekɔ bése-nwu kemmo. Bɛklibi adila ammɔ bise mmɔ.”
13Amu na báyu ulu na bésie bátánu lɛla biala pɛpɛɛpɛ aani kalɛ na Yesu ɔ́su-ma. Na báklibi Kukpi Lili Bɔvia adila ammɔ bése mmɔ.
Bádi Blɔti Adila
14Ka uwi ɔmmɔ údu ni, Yesu ku nwuna batalane bésie bétélie kalɔ kalɛ na badi. 15Na ɔ́su-ma ɔnini, “Ɔdi-mi bɔyɔ ɔ́si kukuuku ƒui ka lɛdiku-mii Kukpi Lili Bɔvia adila amɛni asa na libo abi. 16Na mɔɔsu-mii kede kede nnii nsɔ lɛɛɛdubo-nya bɔdi úti útédu uwi ɔni na lɛla lɛni na adila amɛni bɔdi bɔdanku lɛdubɔlɛ na Katɔti lɛga kadikɔ.”
17Ɔmmɔ kama ni, Yesu úti ɔɔƒɛɛ na ɔ́gya Katɔti enu. Na ɔ́su ɔnini, “Bɛƒɔ ɔmɛni na bɛni bite lɛlɔ. 18Mɔɔsu-mii nnii ɔ́si ɔƒɛni úsela ni, nsɔ lɛɛɛdubo ntɛ bɔmɛni udu bɔni amu ntu uwi ɔni na Katɔti lɛga kadikɔ kammɔ kébo.”
19Amu na úti bodobodo ɔdi na ɔ́gya Katɔti enu. Na ɔ́bwɛ-nwu kɔkɛ kɔkɛ na úti úte-ma. Na ɔ́su-ma ɔnini, “Ɔmɛni ndi mina ɔlɔna ɔni na ndubuti lɛkpa lite Katɔti na bina lili. Bɛbla ɔmɛni na biti bitaakali-mi.”
20Lɛni kani na úti ɔɔƒɛɛ ɔni kemmo na ntɛ buwi úte-ma na adila ammɔ kama na ɔ́su-ma ɔnini, “Ɔɔƒɛɛ ɔmɛni ndi Katɔti bunyimi bɔwɔdi bɔni na úse likpo ku mina ubugya ɔni ndubuwi kalɔ na amii ɔsu. 21Nsu ni, bɛnu bɛti bɛnii ukyuli ɔni ndubuti-mi ute badu ni, ulie ɔɔdiku-mi na kadikɔ mɛni. 22Na ami, Ukyuli Ɔyawine Ubi, ndubo bukpi aani kalɛ na Katɔti ɔ́lɛ ugyii úse. Nsu ni, bɔbuɛ muute ukyuli ɔni makya-mi kakya.” 23Mmɔ na bese kalɔ ku lɛlɔ buye teenu bana akɔ ɔni geen ndubo udu ɔmɛni bɔbla.
Ɔma Ntulo Ƒui Na Batɛyane Akɔ?
24Unyeƒi ɔdi úbeduo batɛyane bammɔ akɔ ɔ́si bana akɔ ɔni baakali banii anwu ntulo ƒui lɛlɔ. 25Mmɔ na Yesu ɔ́su-ma ɔnini, “Bekyuli bani naaadi Yudaƒuɔ ni, bana baga bebo ɔyikun na bana bekyuli lɛlɔ. Na lɛlɔ badine bamɛni bebo lɛnyi lɛni na baayɔ́ ka bekyuli bammɔ bataalɔ-ma lɛni ndi Bekyuli Bakpana. 26Nsu ɔɔɔdi lɛni na ɔlɛka use na bina akɔ. Mmomu ukyuli ɔni ntulo ƒui na bina akɔ ni, ɔlɛka ɔbla lɛlɔ ubliidi ƒui na bakladi akɔ. Na ɔdi ka ɔtɔnkune unwini kabla ɔblane. 27Ɔma ndi ukyuli ɔni ntulo, ukyuli ɔni nlie kalɔ ɔɔdi, munuu ukyuli ɔni néti adila úse-nwu? Use nwaa ka ukyuli ɔni nlie kalɔ ɔɔdi ntulo. Nsu ami nkya-mii akɔ aani ukyuli ɔni mɔɔbla-mii kabla. 28Bíise kayi bɛ́siaku-mi na mina uwi kpakplaa ƒui kemmo. 29Na aani kalɛ na mina Ɔti úte-mi kenyekɔ ka lɛdi bekyuli lɛlɔ ni, lɛni kani na ndubo-mii kenyekɔ kammɔ udu bute. 30Bɛdubɔdi na bɛni na mina adila kadikɔ na mina lɛga kadikɔ. Na bɛdubulie bagaboku lɛlɔ na bɛdi Israel kaba leevu-inyɔ kɔmmɔ lɛlɔ.”
Yesu Ɔ́su Úse Ka Petro Ɔdubuni-nwu
31Mmɔ na Yesu ɔ́su Simon Petro ɔnini, “Simon, Simon! Se atu! Katɔti úte Satan kuƒi ka ɔkɔku-mii ɔnu na ule bani ndia ku bani naaadia ntɛ aani kalɛ umonsene ɔɔƒɛ́ kamu ebi taalɛku ligyɔ kemmo. 32Nsu ni, Simon, lɛ́ɛkpali katɔ na ƒula lili kalɛ na ƒula bɔƒɔtaadi bulayuɛ. Na uwi ɔni na adubunwini ebo-mi kudɔ ni, na akya ƒula banwani ɔkplu.”
33Mmɔ na Petro ɔ́su-nwu ɔnini, “Blɔti, nnye kagyumana ka ami ku awɔ ƒui bɔtɛ ɔtɔ, na bukpi muedi!”
34Amu na Yesu ɔ́su-nwu ɔnini, “Petro, mɔɔsu-ɔ nnii usien ɔmɛni asa na akɔkɔ wete kenye ni, adubɔsu kɔtɛ ƒui ka aaagyi-mi.”
Kavumi Ku Obo Ku Kewii
35Amu na Yesu úye nwuna batɛyane ɔnini, “Uwi ɔdi návi ka lɛ́tala-mii na bɛɛɛda kavumi iye koƒo iye lɛgbanvuo lɛdi ni, bɛ́yaki lɛla lɛdi?”
Amu na bédie kenye banii, “Bútayaki ina lɛlakpa linwi muedi.”
36Amu na Yesu ɔ́su-ma ɔnini, “Nsu ɔƒɛni ni, ukyuli ɔni mbo kavumi kadi iye koƒo kɔdi ni, uti ɔda. Na ukyuli ɔni neeebo kewii kadi ni, ɔdi ka uti nwuna awu ɔni na ɔɔkya taasia ɔtɔdi lɛlɔ uye, na usie utéye kewii kadi. 37Na mɔɔsu-mii nnii Bunweni Kedee Ɔku kemmo litemi lɛni mɔɔsu lɛnii, ‘Baka-nwu bákya bekyuli bekpidi akɔ’ ni, ɔlɛka libo-nwu kemmo lɛni na mina lɛlɔ. Ɔsika lɛla lɛni na bénweni básiku-mi lɛlɔ ni, ɔlɛka ubo-nwu kemmo lɛni sɔsɔ.”
38Mmɔ na batɛyane bammɔ básu-nwu banini, “Blɔti, nu! Aanu kuwii inyɔ mɛni!”
Amu na údie kenye ɔnini, “Ɔmmɔ ɔ́bɔ.”
Yesu Ɔ́kpali Katɔ Na Inɔ Egyii Kɔbi Lɛlɔ
39Yesu ɔ́vi ɔ́lɛ ɔma ɔmmɔ kemmo na ɔ́tɔlɔ úsie Inɔ Egyii Kɔbi lɛlɔ aani kalɛ na ɔɔyɔ́ bɔbla. Na batɛyane bammɔ lɛnɔ básiaku-nwu. 40Ka údu likpo lɛmmɔ ni, Yesu ɔ́su nwuna batɛyane ɔnini, “Bitaakpali katɔ kalɛ na bileduo bukpoku taanu kemmo.” 41Amu na ɔ́da-ma úse na ɔ́kpɛ ɔ́lɛ-ma kudɔ úsie sɛsɛɛ na útálɛ akɔnkɔ na ɔ́kpali katɔ. 42Na ɔ́su ɔnini, “Ati, si átuna ni, na aƒɔ lɛbibo ɔɔƒɛɛ ɔmɛni na mina kudɔ. Nsu ni, tabla mina lɛyɔla, mmomu bla ƒula lɛdi.” 43Mmɔ na Katɔti ɔtu ɔdi ɔ́si katɔ ɔ́da ɔ́lɛ-nwu anumi na ɔ́kya-nwu ɔyikun. 44Na ɔ́sɔ ɔ́kpali katɔ úbu kpakplaa ɔni na únu ɔlɛ geen. Na ewulu ani nátuku-nwu ese aani ubugya na eedú teewi kalɔ.
45Ka Yesu ɔ́ta na kesii kani na ɔɔkpali katɔ mmɔ ni, únwini úsie batɛyane bammɔ kudɔ. Na útánu ka batɛ baalɛɛ na kɔnyana kɔni néƒie-ma ɔsu. 46Amu na ɔ́su-ma ɔnini, “Bi ɔsu na bɛtɛ bɛɛlɛɛ? Bɛta na bitaakpali katɔ kalɛ na bileduo bukpoku taanu kemmo.”
Bakpane Benengudi Béƒie Yesu
47Uwi ɔni na Yesu ɔmu unye ɔɔtɛmi ni, bekyuli pii badi bábalɛ-nwu lɛlɔ. Na Yuda ɔni ndi batɛyane leevu-inyɔ bammɔ akɔ unwi ntɔnku-ma. Úsie úbo Yesu kudɔ na ɔ́kya-nwu kɔgbu. 48Nsu Yesu ɔ́su Yuda ɔnini, “Yuda, kɔgbu na ébo aakya ami, Ukyuli Ɔyawine Ubi, na eti-mi akya bekyuli enu kemmo?”
49Uwi ɔni na batɛyane bani nkya mmɔ ku Yesu bánu lɛla lɛni ndubo bɔlɛ ni, béye Yesu banini, “Blɔti, buteebeyi-ma ku bula kuwii?” 50Amu na batɛyane bammɔ akɔ unwi úbeyi ɔkpane unengudi kabla ɔblane kɔdianu kɔtu úkulo.
51Nsu Yesu ɔ́bala-ma ɔnini, “Ɔdi ɔsɔ utabla lɛla lɛdi na ɔmmɔ kama.” Amu na útuku kabla ɔblane ɔmmɔ kɔtu na nwuna kɔtu kɔ́sɔ kúnwini kúbese kalɛ kani na kuse.
52Amu na Yesu ɔ́su bakpane benengu ku kakpakɔ lɛlɔ banune benengu ku kadi benengu bani nébo mmɔ banii bebeƒie-nwu ɔnini, “Bi ɔsu na ɔlɛka biti ligyii ku lɛkɛɛ bibo aani si ɔkantankpine na ndi? 53Lɛ́kya-mii kudɔ na Yudaƒuɔ kakpakɔ limeyi ndi limeyi na bítakya ɔkplu bɛnii biiƒie-mi. Nsu ni, Katɔti néte-mii kuƒi kɔmɛni. Na Satan ɔyikun ɔdi lɛlɔ ɔƒaani.”
Petro Úni Yesu
54Bakpane benengu ku lɛlɔ badine bammɔ béƒie Yesu, na béti-nwu bésienku ɔkpane unengudi kaduli. Na Petro lɛnɔ ɔsiaku-ma na kama kama. 55Bekyuli badi básala ogya ɔdi na kaduli kammɔ kemmo, na Petro lɛnɔ úsie unye ɔɔwaaku-ma. 56Ka beleku kabla bablane bammɔ akɔ unwi ɔ́nu Petro ka ulie mmɔ ni, ɔ́kywɛ-nwu lɛnimi kɔnakunwi na ɔ́su ɔnini, “Ukyuli ɔmɛni lɛnɔ ɔsiaku Yesu.”
57Nsu Petro úni ɔmɛni na ɔ́su ɔnini, “Uleku, lɛɛɛgyi-nwu muedi!”
58Na uwi klukui ɔdi kama ni, ɔnana ɔdi lɛnɔ ɔ́nu Petro ɔ́ti na ɔ́su-nwu ɔnini, “Awɔ lɛnɔ bana akɔ unwi na adi?”
Nsu Petro ɔ́sɔ údie kenye ɔnini, “Ɔnana, ɔɔɔdi ami na ɔdi!”
59Amu na ɔbla aani ɔdɔ unwi bubo kama ni, ɔnana ɔbambadi ɔdi lɛnɔ ɔ́sɔ úbo unye ɔɔsu kpakplaa ɔnii, “Unyeƒi ɔdi biala uuubo ɔmɛni kemmo banii ɔnana ɔmɛni lɛnɔ ɔ́siaku Yesu, ɔsika Galileani na ɔdi!”
60Nsu Petro údie kenye ɔnini, “Ɔnana, lɛɛɛgyi lɛla lɛni na aasu mɛni kula kula!” Kɔnakunwi ni, ɔni na ɔ́mu unye ɔɔtɛmi ni, akɔkɔ úte kenye. 61Mmɔ na Blɔti únwini na ɔ́nu Petro ɔnusɛ. Amu na Petro únyimo ka Blɔti ɔ́su-nwu ɔnini, “Asa na akɔkɔ wete kenye usien ɔmɛni ni, adubɔsu kɔtɛ ƒui ka aaagyi-mi.” 62Mmɔ na Petro ɔ́vi ɔ́lɛ na útéwulo momoomo.
Yudaƒuɔ Bani Mɔɔgyumana Yesu Báma-nwu Na Bébo-nwu
63Bekyuli bani mɔɔgyumana Yesu na mmɔ ni, bákya-nwu lɛlɔ lɛma na bébo-nwu. 64Bényimi-nwu anumi na bébo-nwu, na béye-nwu banini, “Su-bu ukyuli ɔni nébo-ɔ.” 65Na bédumi-nwu na lilu bamba pii lɛnɔ lɛlɔ.
Yesu Unye Litemi Batɛne Anumi
66Uwi ɔni na kadi káda ni, kadi benengu ku Katɔti bakpane benengu ku ɔda bubo ala batinane bábasa lisu. Na béti Yesu béboku bana anumi. 67Amu na kasalakɔ bekyuli bammɔ béye Yesu banini, “Su-bu si awɔ ndi Ukyuli Ɔƒunadi ɔmmɔ.”
Amu na údie kenye ɔnini, “Si ina lɛ́su-mii lɛla lɛdi ni, bɛɛɛdubo bɔƒɔ bɔdi. 68Na si líye-mii litemi lɛdi ni, bɛɛɛdubo kenye budie bɔsu-mi lɛla lɛdi. 69Nsu ɔ́si ɔƒɛni úsela ni, Katɔti ɔdubuse ami, Ukyuli Ɔyawine Ubi, liboku na nwuna kɔdianu.”
70Amu na bana ƒui béye-nwu banini, “Amu ni, Katɔti Ubidi na adi?”
Amu na údie kenye ɔnini, “Amii alati mɔɔsu bɛnii anwu na ndi.”
71Amu na básu banini, “Bɔsɔ buláwia ka ukyuli bamba ɔdi udie kenye kadi na ɔmɛni lɛlɔ. Abu alati búnu ala ani na ɔ́su!”
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.