Maatteeo 24
24
ꞌThaaninit cĩ ꞌCieeth cĩ Nyekuci
(Tigiil Maarko 13:1-2; ꞌLuuka 21:5-6)
1Ma baa ũtũngeek Yeesu ꞌCieeth cĩ Nyekuci, iita ithithattaak nuyyiooha cĩgĩnnĩg ĩnõõnnõ ꞌgõõl ꞌcĩ ehenytiini ꞌCieeth cĩ Nyekuci hẽllẽẽm gẽrrẽẽt. 2Nẽ ikia ijin Yeesu ĩhõõggõ ĩĩnnĩk, “Acinnu niig ꞌcieethi niccig vẽlẽk, haduhaakuung dĩdĩ, ĩꞌthaanni hatĩ hiittiõõ bẽẽ ꞌcĩ ataadothoothĩk ꞌgõõnĩ tõõ!”
Tilooinit cĩ ꞌcannanõ
(Tigiil Maarko 13:3-13; ꞌLuuka 21:7-19)
3Ma baa urutaa cĩnnĩ, baa nga iccioloongan Yeesu loota ũbũtaa cĩ Muur cĩ Olivi, iita ummuddioothĩk nuyyiooha cĩgĩnnĩg ĩnõõnnõ ẽmmẽn nẽ ijinit ĩĩttĩk, “Adĩmanni hatĩ thõõth ciee hatĩngaan? Ne hatĩ ꞌcĩ ẽtẽrꞌtha aĩ, akuu hatĩ niina, hĩ decciaanĩt cĩ lootu?”
4Ẽdẽcĩ Yeesu aĩ, “Ĩcĩnĩt jurrung nẽ ma haaꞌnyiku eet umwa higgooluung ngagiita. 5Hĩnĩngĩtĩ mẽẽlĩg hatĩ eeta ꞌcĩg au aĩ, ‘Hĩĩnĩ naa Krĩstõ.’ Ĩggõõl hatĩ nẽẽg eet ꞌcĩg mẽẽlĩg. 6Athiknu hatĩ thooꞌthiok cĩg joreenu nẽ ma hiꞌngolinnu. Aluba ꞌthẽk hatĩ hẽlẽggĩ ꞌcĩg aattĩg hoti, nẽẽthĩ nẽẽ hatĩ nga aku decciaanĩtĩ cĩ lootu. 7Aruhõõ hatĩ loonyina hĩ loonyin nẽ urukto habuccieeꞌnya hĩ habuccieeꞌnya. Aku hatĩ nyarõnĩ nẽ õmmõõnnĩ hatĩ hirihidtihi looc loonyinii ꞌcĩg mẽẽlĩg. 8Ma iita ẽdẽẽnyta thooꞌthioha cieegi, agayyiooth ĩĩtõ, ĩĩ ciee ꞌthianaanĩt cĩ thooꞌthiok ꞌcĩg abathĩ gẽrrẽẽt.
9“Aggamiinnu hatĩ nẽ aarrihoothihu baabuuth nẽ uukteu hode aruheennu thõng buúk. Akannannuung hatĩ eeta cĩg loonyin vẽlẽk, hĩnĩngĩtĩ nganĩĩta. 10Waathinniook tĩko, mẽẽlĩg hatĩ eeta ꞌcĩg ũũnnĩk lemiinit, õhõppõõcanõõ nẽ aaburroo nyaagwaana. 11Mẽẽlĩg hatĩ põrõvẽtaaꞌnya ꞌcĩg hõllõngaa ĩĩn dĩdĩ, ꞌcĩg au atalmaanyan eeta. 12Ĩꞌthanothoothĩk hatĩ bathi looc nẽ iittiõõ hõllõngaa ammĩnanõõ eeta ꞌcĩg mẽẽlẽẽgĩ. 13Nẽẽthĩ, ẽẽtĩ ꞌcĩ ẽlẽmma nganĩĩt ĩꞌthõng decciaanĩt cĩ lootu, eelliaa hatĩnĩ. 14Nẽ irrioonni hatĩ nyeemuut ꞌcĩ abũnnaa cĩ habuccieet cĩ Nyekuci loonyini vẽlẽk, hátĩ hĩthĩhĩt eeta vẽlẽk, nẽẽthĩ hatĩ ikia decciaanĩtĩ cĩ lootu.”
ꞌThẽrẽt ꞌcĩ abathĩ hĩ Nyekuc
(Tigiil Maarko 13:14-23; ꞌLuuka 21:20-24)
15Nẽ õthõõth Yeesu tarĩ ĩĩ, “Aaĩ hatĩ kõrra ꞌcĩ acinnu niig ‘ꞌgii ꞌcĩ abathĩ gẽrrẽẽt ꞌcĩ aꞌnyaha ꞌribban,’#24:15 ꞌGii ꞌcĩ abathĩ gẽrrẽẽt ꞌcĩ aꞌnyaha ꞌribban: Õthõõth Danieele thõõth cĩ altaarĩ cĩ nyekuc ꞌcĩ haĩ ꞌTheu, ꞌcĩ baa aarĩk habuui cĩ ꞌGirihi ꞌcĩ haĩ Antioko Epivaane ꞌCieethaa cĩ Nyekuci ꞌJeruꞌthalẽma haaꞌnyĩk ꞌCieeth hĩĩ ꞌriiring. Baa aku edeeꞌnyia thõõth ciee baa õbõktĩ irkiꞌnyia ĩĩtõ ꞌmiia hõdẽĩ hĩ hẽẽn tõrkõnõn hĩ tũrkĩramma (167) baa nga hittirria Yeesu. Nẽẽthĩ, õthõõth Yeesu ngaati thõõth cĩ ꞌgii umwa ꞌcĩ abathĩ gẽrrẽẽt ꞌcĩ hatĩ aarĩhoothĩk ꞌCieetõõ cĩ Nyekuci ꞌJeruꞌthalẽma. Baa edeeꞌnyia thõõth ciee baa aggam eeta cĩg ꞌRooma ꞌJeruꞌthalẽm nẽ ilibit ꞌCieeth cĩ Nyekuci baa õbõktĩ ĩĩtõ irkiꞌnyia hẽẽn ꞌwec urutaa baa adaahĩ Yeesu nẽ ũrũga tarĩ. Tigiil ꞌBuuk cĩ Danieele 9:27; 11:31; 12:11. abĩlĩ Ngaatĩ Ẽllẽẽmĩth ꞌCieethaa cĩ Nyekuci, hĩ baa aduha põrõvẽtaacĩ Danieele#24:15 Danieele: Baa ĩĩn Danieele põrõvẽtaac ꞌcĩ baa aggammi nẽ ũũhĩ habuui Nabukadaneetharĩ looccaa cĩ Babiloonnia, baa ĩꞌthaan Nabukadaneetharĩ ꞌJeruꞌthalẽm, irkiꞌnyiaannĩĩ ĩbaag ĩĩn ꞌmiiaꞌnya ꞌtur hĩ hẽẽn tũkĩramma (570), baa nga hittirria Yeesu. Tigiil thõõth cĩnnĩ ꞌBuuhaa ꞌcĩ ĩĩn 2 cĩ Habueetu 24-25; hĩ ꞌBuuhaa cĩ Danieele. aĩ, anneek eet ꞌcĩ agiili thõõth icci, thĩĩk jurrung! 16Má aattiyyu niig looccaa cĩ ꞌJudeea korriook nicciag, ivvirit õõt hõrõmẽẽtĩ. 17Má aaĩ õlĩlaa cĩ ꞌcieeth cunni, ma halluuccia hakuu ꞌcieetõõ aĩ ijjia ꞌtiha ꞌgiimwa. 18Má aaĩ manatõõ, ma haini ĩꞌnya hobodooth ĩĩcĩ olu hũũk hittiha cẽrẽm. 19Abathĩ hatĩ gẽrrẽẽt korriook nicciag, hĩ ngaaĩ ꞌcĩg aꞌnyaki hĩ ꞌcĩg õrõõktĩ lohollia. 20Alayyio gẽrrẽẽt, hátĩ hiittiõõ hõllõngaa airru tagĩĩtha#24:20 Tagĩĩth: Looccaa cĩ Ĩꞌthĩraẽlĩ, aitiõõ tagĩĩthĩ hõllõngaa aduhõõ hĩ tagĩĩth cĩ looc cĩnaac. Tagĩĩthĩ cĩ looc cĩ Ĩꞌthĩraẽlĩ, alalĩ lõõcĩ gẽrrẽẽt nẽ ĩtĩĩl gẽrrẽẽt. Nẽ õkõmĩ gẽrrẽẽt ngaatĩ occa airi eeta nyĩlõhẽẽnnĩĩ cĩg. hode Kõrraa cĩ ꞌYiommaanõ. 21Korriook hatĩ ꞌcĩg ꞌcannan cobbi gẽrrẽẽt tĩko, ꞌcĩ nga haau nganĩngĩtĩ ẽhẽnytaanĩ Nyekuci looc nẽ hõllõngaa hatĩ aku ꞌcannani ꞌcĩ aaĩ hoti tarĩ ũdũt. 22Má hõllõngaa ohodeek Nyekuci korriook tĩko hĩĩtõ huturig, aitiõõ hatĩ ẽẽtĩ ꞌcĩ arũgĩ tõõ. Nẽẽthĩ, hĩnĩngĩtĩ eet ꞌcĩg ẽbẽra nẽẽnĩ, ohodeek hatĩ nẽẽ korriook tĩko hĩĩtõ huturig. 23Waathinnioohĩĩ tĩko, má anneekuung eet umwa, ‘Krĩstõ cieeni!’ Hode, ‘Ĩnõõnnõ caanĩ!’ Ma helemmu ũdũt. 24Hĩnĩngĩtĩ au hatĩ krĩstõꞌnya hĩ põrõvẽtaaꞌnya ꞌcĩg hõllõngaa ĩĩn dĩdĩ nẽ idticanit thooꞌthiok ꞌcĩg ĩnaat eeta gẽrrẽẽt, hĩttĩmanit ngaatĩ ĩggõõlĩ eet ꞌcĩg ẽbẽra Nyekuci buúk. 25Agaac ĩĩtõ heterethuung naa ĩĩcĩ oou ẽlẽk.
26“Nẽẽthĩ, má anneekuung eet umwaa, ‘Aaĩ Krĩstõ horrwatõõ ꞌcĩ õdõhõhĩĩ kak,’ ma hooyyu ĩtĩho! Nẽ má aduha eet umwaa aĩ, ‘Aguꞌthi nẽẽ ngaamwaanĩ,’ ma helemmu ũdũt! 27Aaĩ hatĩ kõrra ꞌcĩ akuuni Ngeertĩ Eeto hĩ bõrõhẽẽcĩ ꞌcĩ ammadĩ, ꞌcĩ aku ĩĩcĩ uruto, acĩn eeta ĩĩcĩ õkõlõõthĩkĩ kõrra vẽlẽk nẽ aaĩ hatĩ kõrra cĩ akuuni Ngeertĩ Eeto noho. 28Alũtĩ hodobwaana ngaatĩ aayyi ꞌgii ꞌcĩ adaaha.”
Kõr ꞌcĩ uppwaannanĩ Ngeertĩ Eeto
(Tigiil Maarko 13:24-27; ꞌLuuka 21:25-28)
29Õbõdẽẽkĩ Yeesu õthõõth aĩ, “Urutaa cĩ korriook cĩg ꞌcannaanak ko,
“ ‘Adaahĩ hatĩ kõrra,
hĩ nyĩlõk.
Adhukiaa hatĩ mũnyũnya,
nẽ õtõmõ hẽẽtkujjieen.’#Tigiil ꞌBuuk cĩ Iꞌthaia 13:10; 34:4; ꞌJõõẽlĩ 2:10
30“Ma urutaa cĩnnĩ vẽlẽk, edeeꞌnyia hatĩ terethiiniti hẽẽtahujjieen, ꞌcĩ akuuni Ngeertĩ Eeto, hutullẽẽcõ loonyini vẽlẽk cĩg lootu. Edeenyothi hatĩ nẽẽg Ngeertĩ Eeto ngaatĩ alluuccianĩ diiꞌthiohĩĩ cĩg hẽẽtkujjieen, makaaꞌthĩta hĩ bulẽẽttaa cobbi.#Tigiil ꞌBuuk cĩ Danieele 7:13 31Ĩꞌthõ hatĩ nẽẽ aajĩlẽẽt cĩgĩnnĩg hadtahit illieeri cobbi gẽrrẽẽt, huluttia eeta ꞌcĩg ẽbẽra Nyekuci ꞌgoolliohĩĩ ꞌcĩg ꞌrẽẽttĩg loota nĩnga hĩ hẽẽtahujjieen vẽlẽk.
ꞌLimman ꞌcĩ awantoothĩk ꞌmũũnĩc
(Tigiil Maarko 13:28-31; ꞌLuuka 21:29-33)
32“Illimatta thõõth hĩ ꞌmũũnĩc. Ma ũtũrrũũmatta bõllõõha tabanĩ, agayyu ngaatĩ õbõhõõĩ ũrraatĩ. 33Ma icittu thooꞌthiok iccig vẽlẽk, agaac ĩĩtõ õbõhĩ ꞌthaa. 34Haduhaakuung dĩdĩ, hõllõngaa hatĩ adaahĩ eeta cĩg waathinniook niccig, nga hikia thõõth ꞌcĩ haduha naa ho. 35Edecciaa hatĩ hẽẽtkujjieen hĩ looc nẽ thõõth caannĩ ho, aitiõõ hatĩ hõllõngaa edecciaa ũdũt.
Aitiõõ eet ꞌcĩ aga kõr hode ꞌthaa tõõ
(Tigiil Maarko 13:32-37; ꞌLuuka 17:26-30, 34-36)
36“Hiꞌthihi eet ꞌcĩ aga kõr hode ꞌthaa ꞌcĩ hatĩ akuuni thõõth cieeni, tananga aajĩlẽẽta cĩg hẽẽtkujjieen hĩ Ngeertĩ Eeto buúk, hõllõngaa aga thõõth icci, Maaꞌnyĩ dioo ꞌcĩ aga. 37Ma hatĩ õbõda Ngeertĩ Eeto, aattĩg hatĩ eeta hĩ baa waathinniook baag Nõõa.#24:37 Nõõa: Baa arũgĩ Nõõa korrioohĩĩ baag adĩmanĩ eeta thooꞌthiok ꞌcĩg abathĩ gẽrrẽẽt. Baa avva Nyekuci ĩnõõnnõ hẽtẽhẽny haahũl hẽẽlaĩ eet cĩg halang cĩnnĩ hĩ idiꞌngwa ũgĩ. Nĩngĩtĩ acũdaanĩ Nyekuci eet ũgĩ vẽlẽk hĩ idiꞌngwa tawaanaa cobbi. Tigiil thõõth cĩnnĩ ꞌBuuhaa cĩ ꞌThianaattõ 5-9. 38Hĩnĩngĩtĩ baarkit, baa nga huruk Nyekuci eet vẽlẽk tawaana cobbi, baa aduhi eeta nẽ ũhũdĩt mẽrtĩ nẽ ũꞌthũwattõõ, hode aaꞌnyĩk lõhõlĩ cĩggĩĩng hũꞌthũwattĩ, ĩꞌthõng kõr baa adukni Nõõa haahũl cobbi. 39Baa hõllõngaa aga nẽẽg ꞌgii ꞌcĩ hatĩ aku, ĩꞌthõng hikia tawanĩ cobbi hittik eet vẽlẽk. Aaĩ hatĩ noho, kõr ꞌcĩ hatĩ akuuni Ngeertĩ Eeto. 40Akannĩ hatĩ eeta ꞌramma manatõõ, hẽbẽra hatĩ naa hõdẽĩ dioo nẽ hũtũngeeha hõdẽẽthõng. 41ꞌGõõla ꞌcĩ aduhõõ thõng, ereki hatĩ ngaaĩ ꞌramma hirriẽẽtĩ, hẽbẽra hatĩ naa hõdẽĩ nẽ hũtũngeeha umwa.
42“Nẽẽthĩ hoti ho, aaut dĩkĩĩm, hĩnĩngĩtĩ hõllõngaa agayyu niig kõr ꞌcĩ hatĩ akuuni Makayyioohiti cunuung. 43Nẽ agaac thõõth icci, má baa haga baattĩ olu ꞌjiaatĩn ꞌcĩ akuuni igorriaahiti, occa baa ẽbẽk õlõ jurrung, hiittiõõ hõllõngaa ĩgõrꞌthĩ. 44Nẽ aaut dĩkĩĩm niig buúk jurrung, hĩnĩngĩtĩ aku hatĩ Ngeertĩ Eeto kõr ꞌcĩ hatĩ hõllõngaa ammuhuneeku ĩnõõnnõ ngaatĩ akuuni.
Dticcianniook ꞌcĩg abũnnaa hĩ ꞌcĩg abathĩ
(Tigiil ꞌLuuka 12:35-48)
45“Nganĩ ꞌcĩ ĩĩn dticciannioohit ꞌcĩ abũnnaa ꞌcĩ ẽggẽẽnyĩth, ꞌcĩ anneek baattĩ olu, bẽẽk õlõ cĩnnĩ nẽ aaꞌnyĩk eet cĩg olu ꞌgẽẽn ꞌthaa ꞌcĩ adiimi nẽẽgĩ? 46Abũnnaa hatĩ hĩ dticciannioohit tĩho ngaatĩ ammũdaakĩ baattĩ olu ĩnõõnnõ adtican dtiic tĩho, kõr ꞌcĩ hatĩ õbõdaanĩ nẽẽnĩ. 47Haduhaakuung dĩdĩ, aaꞌnyĩk hatĩ baattĩ olu dticciannioohit tĩho hẽbẽk ꞌgii vẽlẽk ꞌcĩ aꞌnyak nẽẽ õlõõ cĩnnĩ. 48Má occa hummuk dticciannioohiti ꞌcĩ abathĩ nẽ ĩĩ, ‘Nga baaĩ nẽẽ aayyiaa nganĩĩt baattĩ olu ĩꞌthõng,’ 49nẽ iꞌthianaaĩ uuk dticcianniook ꞌgõõnõgĩ nẽ uduho ẽmmẽn, hũhũdĩt mẽrtĩ hĩ ꞌgõõnõgĩ ꞌcĩg ĩĩn duuttiak. 50Uppwaannak hatĩ baattĩ olu dticciannioohit niccia, kõrraa hĩ ꞌthaawaa ꞌcĩ hõllõngaa aga nẽẽnĩ. 51Aku hatĩ uuk baattĩ olu dticciannioohit niccia ꞌbuth nẽ itiggia ĩnõõnnõ dtiicaa cĩnnĩ, hõõt hũrũmtĩ hĩ oloꞌngiaak, ngaatĩ arruuẽnĩ eeta hadahit nyĩgĩt huciitha.”
© 2017, Wycliffe Bible Translators, Inc., All rights reserved.