Maatteeo 25
25
Dtẽẽllẽn ꞌcĩg awantoothĩk buheeci õmmõtõ
1“Kõr niccia, aaĩ hatĩ habuccieet cĩ hẽẽtkujjieen hĩ thõõth ꞌcĩ baa ꞌjiaatĩn umwa, õõĩ buheeci õmmõtõ ꞌlõõmẽẽt cĩg ngõõrrak, hõõt homottio hĩ nyattaraan umwa nyahũũtaawa. 2Baa aggiithi buheeci ꞌcĩg ĩĩn ꞌtur nẽ eggeenyito ꞌtur. 3Ma ho, aꞌnyak hinnia buheeci ꞌcĩg aggiithi ho ngõõrrõ ꞌlõõmẽẽtĩĩ cĩggĩĩng nẽ hõllõngaa õthõhõt ngõrrõ umwa. 4Nẽ aꞌnyahit ꞌcĩg ẽggẽẽnyĩth ho ngõõrrõ cĩ ꞌlõõmẽẽt cĩggĩĩng umwa harajajĩtĩ.
5“Baa hinnia hõllõngaa aku nyattaraan hĩdĩĩkoothong, nĩngĩtĩ adũꞌngĩ buheeci niccieeg vẽlẽk nẽ atagguutho loota. 6Ma baa ẽttẽẽdĩ baalini, ikia ẽggẽrẽny eet umwa ĩĩ, ‘Ikia nyattaraana! Iita ommottio hĩ ĩnõõnnõ!’
7“Nĩngĩtĩ ĩꞌngaannĩ buheeci niccieeg vẽlẽk nẽ ũkũmatteek ꞌlõõmẽẽt cĩggĩĩng. 8Ma nĩngaata, iita ijinit buheeci ꞌcĩg aggiithi ho ꞌgõõnõgĩ ꞌcĩg ẽggẽẽnyĩth ĩĩttĩk, ‘Ĩbbaatteetu ngõõrrõ umwa haarriha ꞌlõõmẽẽtĩĩ cĩggaang.’
9“Ẽdẽcĩ buheeci ꞌcĩg ẽggẽẽnyĩth ko ꞌgõõnõgĩ ꞌcĩg aggiithi ho anneek, ‘Hõllõngaa occa ũũppanneet ngõõrra ciee ngagĩĩt vẽlẽk, õõt utuuyyia umwa hĩ eet ꞌcĩg ũũtẽnĩ.’
10“Ma baa nga õõ nẽẽg dũkaanaa ꞌcĩ õõ ũũtanĩ ngõõrrõ cĩnĩĩng ko, uppwaanna nyattaraana. Nĩngĩtĩ õõkõrĩ buheeci baag ũkũmattoothĩk ko, hĩ nyattaraan õõĩ karramaawaa cĩ nyahũũtaaõ, nĩngĩtĩ aꞌnyũũgẽnĩ hattũũga.
11“Ma baa urutaa cĩnnĩ, oboddia buheeci baag aggiithi ĩĩ baa õõĩ nẽ iita ĩbĩlĩt hattũũga nẽ ũtũvvẽẽcõ nyattaraan ĩĩttĩk, ‘Nyattaraan! ꞌBuuhiheet hattũũg!’
12“Baa Ẽdẽcĩ nyattaraan ĩhõõggõ anneek, ‘Haduhaakuung dĩdĩ, hõllõngaa hagayyuung naa ngagiita.’
13“Nẽẽthĩ hoti ho, aaut dĩkĩĩm, hĩnĩngĩtĩ hõllõngaa agayyu niig kõr hode ꞌthaa ꞌcĩ hatĩ hakuuni naana.
Dtẽẽllẽn ꞌcĩg awantoothĩk dticcianniook iyyio
(Tigiil ꞌLuuka 19:11-27)
14“Nẽ tarĩ, aaĩ habuccieet cĩ hẽẽtkujjieen hĩ eet ꞌcĩ õkõ hẽẽrõna, ꞌcĩ baa aũ dticcianniook cĩgĩnnĩg nẽ ũtũngẽẽhĩ ijjio cĩgĩnnĩg ĩhõõggõ. 15Baa aaꞌnyĩk nẽẽ dticciannioohit umwa ꞌrabbẽẽt ꞌtalẽnꞌnya#25:15 ꞌTalẽn: Occa adticanni ẽẽtĩ irkiꞌnyia õmmõtõ hĩ ꞌtur nẽ ũdũmanĩ ꞌtalẽn hõdẽẽthõng. ꞌtur nẽ aaꞌnyĩk umwa ꞌtalẽnꞌnya ꞌramma nẽ aaꞌnyĩk umwa ꞌtalẽn hõdẽẽthõng. Eꞌngereek nẽẽ ĩhõõggõ dtiicanĩ ꞌcĩg occa ũũlũ nẽẽgĩ, nĩngĩtĩ õkõõĩ hẽẽrõnaa cĩnnĩ. 16Ikia idticanõõĩ dticciannioohiti baa aggam ꞌtalẽnꞌnya ꞌtur hĩdĩĩkoothong hikia hũmmũda ꞌtalẽnꞌnya ꞌtur tarĩ. 17Nẽ dticciannioohiti baa aggam ꞌtalẽnꞌnya ꞌramma buúk, ũmmũda ũgĩ ꞌramma tarĩ. 18Nẽ dticciannioohiti baa aggam ꞌtalẽn hõdẽẽthõng, ada ꞌlook ꞌthẽẽmĩtõõ nẽ utuguny ꞌtalẽn cĩ makayyioohit cĩnnĩ nĩngaata.
19“Ma baa uruta ꞌrĩng, ikia õbõda makayyioohiti cĩ olu nẽ ijin dticcianniook cĩgĩnnĩg ko ꞌgõõl ꞌcĩ baa adticaniini nẽẽg ꞌrabbẽẽt cĩgĩnnĩg. 20Ikia uduhaak dticciannioohiti baa aggam ꞌtalẽnꞌnya ꞌtur baattĩ olu ĩĩnnĩk, ‘Makayyioohit, baa aaꞌnyaa nii nganĩĩt ꞌtalẽnꞌnya ꞌtur, hikia hĩttoorĩha naa ũgĩ tarĩ ꞌtur.’
21“Ẽdẽcĩ makayyioohiti cĩnnĩ aĩ, ‘Ĩlaallẽ gẽrrẽẽt, ĩĩnĩ nii dticciannioohit ꞌcĩ abũnnaa ꞌcĩ athihi thõõth! Ĩdĩmanuu jurrung ngaatĩ adticaniini ꞌrabbẽẽt ꞌcĩg abadtẽc haaga hĩĩtõ mẽẽlĩg, nẽẽthĩ ꞌyioko, haaꞌnyii hatĩ naa nganiit makaaꞌthĩt ꞌcĩ aggamĩ hẽlẽggĩ ꞌcĩg mẽẽlĩg. Ijjia hiita hotholit hĩ nganĩĩt taliinit caannĩ.
22“Ma nĩngaata, ikia dticciannioohiti baa aaꞌnyĩk makayyioohiti ꞌtalẽnꞌnya ꞌramma nẽ ĩĩnnĩk makayyioohit cĩnnĩ, ‘Makayyioohit, baa aaꞌnyaa nii nganĩĩt ꞌtalẽnꞌnya ꞌramma nẽ ꞌyioko, hĩttoorĩha ũgĩ ꞌramma tarĩ.’
23“Ẽdẽcĩ makayyioohiti tarĩ anneek, ‘Ĩlaallẽ gẽrrẽẽt, ĩĩnĩ nii buúk dticciannioohit ꞌcĩ abũnnaa ꞌcĩ athihi thõõth! Baa adticaniini nii ꞌrabbẽẽt ꞌcĩg abadtẽc haaga hiita hĩĩtõ mẽẽlĩg nẽ ꞌyioko, haaꞌnyii hatĩ naa nganiit makaaꞌthĩt ꞌcĩ aggamĩ hẽlẽggĩ ꞌcĩg mẽẽlĩg. Ijjia hiita hotholit hĩ nganĩĩt taliinit caannĩ!’
24“Nẽ ẽẽtĩ baa aaꞌnyĩhoothĩk ꞌtalẽnĩ hõdẽẽthõng, ikia ĩĩnnĩk ‘Makayyioohit, haga naa ĩĩnĩ nii eet ꞌcĩ okomi gẽrrẽẽt, ꞌcĩ ajana haal ngaatĩ nga katõõĩ. 25Baa hiꞌngolli hinnia haini hammanyani mõnõ hatĩ ꞌtalẽn cunni ho thõng, nĩngĩtĩ hõkõ hadaẽẽkĩ ꞌloohatõõ. Eri ꞌtalẽn balunni ho cieeni.’
26“Ẽdẽcĩ makayyioohiti cĩnnĩ ĩnõõnnõ anneek, ‘Nii dticciannioohiti ciee ĩĩnĩ nyamuttioohit abathi ho! Aga nii ngaatĩ hajaniini naa ngaatĩ nga hathacĩ hinyomo nẽ hajanõ ngaatĩ nga hakatõõĩ. 27Nẽẽthĩ hoti ho, occa baa aarihuu ꞌrabbẽẽt cĩgannĩg ꞌbẽẽngĩa, hátĩ ma hõbõda, hũmmũdeeha ittoorri ĩĩtõ mẽẽlĩg.
28“Nẽ ĩĩ baattĩ olu, ‘Aggamta ĩnõõnnõ ꞌtalẽn ꞌcĩ ĩĩn hõdẽẽthõng ko nẽ aanytĩhu dticciannioohit ꞌcĩ aꞌnyak ꞌtalẽnꞌnya õmmõtõ. 29Nẽ eeta vẽlẽk ꞌcĩg adticaniini hẽlẽggĩ baag aanytĩhoothĩk ĩhõõggõ jurrung, ĩttoorothoothĩk hatĩ ũgẽẽgĩ hiita hĩĩtõ mẽẽlĩg gẽrrẽẽt. Nẽ eeta ꞌcĩg hõllõngaa aꞌnyak ꞌgiimwa, aggammiaa hatĩ ꞌgii ꞌcĩ aꞌnyak nẽẽgĩ. 30Nẽẽthĩ ꞌyioko, itiggiayyieek ngejjiaahit icci battaala muguratõõ, ngaatĩ hatĩ arruuẽnĩ nẽ adak nyĩgĩt huciitha.’
Aꞌtha hĩ ẽẽtha
31“Nẽ kõr ꞌcĩ hatĩ akuuni Ngeertĩ Eeto bulẽẽttaa cĩnnĩ hĩ aajĩlẽẽt cĩgĩnnĩg vẽlẽk, iccioloongan hatĩ nẽẽ dtaabawaa cobbi bulẽẽttaa cĩ hẽẽtkujjieen. 32Aluttiaa hatĩ eeta loonyini vẽlẽk hiita hĩ ĩnõõnnõ nẽ hatĩ ẽꞌngẽr nẽẽ eet hĩgõõng ẽꞌngẽr tũhayyioohiti aꞌtha hĩ ẽẽtha. 33Aarĩk hatĩ nẽẽ aꞌtha attiaa cĩnnĩ ĩĩ cobbi nẽ aarĩk ẽẽtha ĩĩcĩ aꞌthiit cĩnnĩ ꞌcĩ hidici.
34“Nẽ hatĩ uduhaak habuui eet ꞌcĩg aattĩg ĩĩcĩ aꞌthiit cĩnnĩ cobbi ĩĩnnĩk, ‘Iita niig ꞌcĩg aggatanuung Baaba ẽlẽk ko, iita uduhunit habuccieet baa ũkũmaneek Nyekuci baa ꞌthianaattaa cĩ tehenyiinit cĩ lootu. 35Hĩnĩngĩtĩ baa adaka nganĩĩt magĩthĩ nẽ aanytaangu ꞌgẽẽn ꞌcĩ hadahi, baa aamma kõrra nẽ aanytaangu maam ꞌcĩg hahudi, baa hĩĩnĩ tahanit nẽ utuvvuyyiaangu õlõõ cunuung. 36Baa haaĩ arriẽẽn nẽ aanytaangu ceremwa hitihimo, baa hommoori nẽ aꞌthũũnnaangu, baa haaĩ baabuuthatõõ, au acĩnnaangu.’
37“Ẽdẽcĩ hatĩ eeta ꞌcĩg abũnnaa ĩnõõnnõ anneek, ‘Makayyioohit, nĩngaan baa ꞌcĩ hacinni nganiit adaki magĩthĩ nẽ haanyti ꞌgẽẽn ko, hode aammi kõrra nẽ haanyti maam ꞌcĩg ahudi ho? 38Nĩngaan nooyyia baa ꞌcĩ hacinni naag nganiit ĩĩnnĩ tahanit nẽ hiita haanyti nĩngĩtĩ aayyi ho, hode adiimi ceremwa nẽ haanyti ceremwa ho? 39Nĩngaan baa ꞌcĩ hacinni naag nganiit ommoori, hode aaĩ baabuutha nẽ hiita hicitti ho?’
40“Ẽdẽcĩ hatĩ habuui aĩ, ‘Haduhaakuung dĩdĩ, ꞌgii ꞌcĩ baa adticaneeku niig ꞌgotoonoga hĩ ngoonoga iccig hõllõngaa aallak eeta ho, adticaneekaangu nganĩĩta.’
41“Nẽ aduhaak hatĩ habuui eet ꞌcĩg aattĩg ĩĩcĩ aꞌthiit cĩnnĩ ꞌcĩ hidici ho anneek, ‘Ammanyattĩ hĩ nganĩĩta, niig eeta ꞌcĩg ĩccĩĩttothoothihu ꞌgwoo ꞌcĩ aalla ooo, baa ẽhẽnytaak habu cĩ loriẽẽt ꞌcĩg abathĩ hĩ aajĩlẽẽt cĩgĩnnĩg. 42Hĩnĩngĩtĩ baa adaka magĩthĩ nẽ hõllõngaa aaꞌnyaangu ꞌgẽẽn. Baa aamma kõrra nẽ hõllõngaa aaꞌnyaangu maam ꞌcĩg hahudi. 43Baa hĩĩnĩ tahanit nẽ hõllõngaa aaꞌnyaangu nĩngĩtĩ haayyi õlõõ cunuung. Baa haaĩ arriẽẽn nẽ hõllõngaa aaꞌnyaangu ceremwa ꞌcĩg hahimiti. Baa hommoori nẽ haau baabuutha nẽ hõllõngaa au acĩnnaangu buúk.’
44“Ẽdẽcĩ hatĩ nẽẽg ĩnõõnnõ anneek, ‘Makayyioohit nĩngaan baa ꞌcĩ hacinni naag nganiit adaki magĩthĩ hode aammi kõrra hode ĩĩnĩ tahanit hode aaĩ arriẽẽn hode ommoori hode aaĩ baabuutha nẽ hõllõngaa heelli ho?’
45“Ẽdẽcĩ hatĩ nẽẽ aĩ, ‘Haduhaakuung dĩdĩ, ꞌgii ꞌcĩ baa hõllõngaa adticaneeku niig ꞌgotoonoga hĩ ngoonoga iccig hõllõngaa aallak eeta ho, hõllõngaa adticaneekaangu nganĩĩta.’
46“Nẽ hatĩ õõt nẽẽg ukẽẽttaa cĩ ꞌgwoo ꞌcĩ aalla ooo, nẽẽthĩ, eeta ꞌcĩg abũnnaa, õõ hatĩ nẽẽg rũgẽtaa ꞌcĩ aalla ooo.”
© 2017, Wycliffe Bible Translators, Inc., All rights reserved.