ꞌLuuka 1
1
Terethiinit cĩ ꞌBuuk cĩ ꞌLuuka
1Mẽẽlĩg eeta ꞌcĩg ĩttĩmanit gẽrrẽẽt ngaatĩ ẽhẽẽdĩ thooꞌthiok baag adĩman Nyekuci hõrggẽẽnaa cĩnaac. 2Ĩĩn thooꞌthioha baag ẽhẽẽd nẽẽg ko, nyeemuꞌnya baag aduhaakeet ngagĩĩt eeta baag ĩcĩnĩt hẽbẽrẽẽnnĩĩ cĩggĩĩng dẽẽdẽ. 3Nĩngĩtĩ harrĩĩpanĩ naa buúk nyeemuꞌnya iccig jurrung, hiꞌthianaanĩ ũꞌngeeca. Ĩnõõ ꞌyioko ꞌcĩ haĩ hũnũaahii nganiit buúk jurrung ko makayyioohit Theovilo, 4hanũaakii naa nganiit thooꞌthiok iccig, haini hátĩ gaa nii buúk jurrung thooꞌthiok baag allimanoothikii nganiita.
Udukia ꞌtirriaanĩtĩ cĩ Yõaannẽ Batitta
5Baa ĩĩn Ẽrõõdẽ#1:5 Ẽrõõdẽ: Ĩĩn ciee habu Ẽrõõdẽ Cobbi baa adiim aruk Yeesu baa nga arrittiaa thõng. Tigiil thõõth cĩnnĩ ꞌBuuhaa cĩ Maatteeo 2:1-8; ꞌLuuka 1:5. Urutaa baa adaahĩ nẽẽnĩ, ikia ĩĩ ngeerĩnĩ Ẽrõõdẽ Antipa habu, baa aggameek Yõaannẽ Yeesu baattithimo. Tigiil thõõth cĩnnĩ ꞌBuuhaa cĩ Maatteeo 14:1; Maarko 6:14; ꞌLuuka 3:1; Dtiicanĩ cĩg ꞌThooyyiahu 4:27. Ma baa urutaa cĩ Ẽrõõdẽ Antipa, ikia aau habuui umwaa ꞌcĩ haĩ Ẽrõõdẽ Agirippa, ngeertĩ loholeec cĩ Ẽrõõdẽ Cobbi. Tigiil thõõth cĩnnĩ ꞌBuuhaa cĩ Dtiicanĩ cĩg ꞌThooyyiahu 12:1-13:1. habu cĩ ꞌJudeea, baa aaĩ paadĩrĩ#1:5 Paadĩr: Eetinii cĩg Ĩꞌthĩraẽlĩ, ĩĩn paadĩrĩ eet ꞌcĩ aku habuccieetaa cĩ ꞌLeevi nẽ ĩnõõnnõ ꞌcĩ ĩbbõõr ꞌgaarrieenit halaangatõõ cĩ ꞌCieeth cĩ Nyekuci. ꞌcĩ haĩ ꞌThakaria cĩ habuccieet cĩ paadĩrꞌnya cĩg Abija. Baa haĩ ngaa cĩ ꞌThakaria Eliꞌthẽbẽta. Aku Eliꞌthẽbẽta hattũũgaa cĩ Arõõnẽ. 6Nẽ baa ĩĩn ꞌThakaria hĩ Eliꞌthẽbẽta eet ꞌcĩg abũnnaa gẽrrẽẽt muumaa cĩ Nyekuci, baa aꞌthũũnnĩ nẽẽg tilooinit hĩ nyattalliook cĩg Makayyiooktak jurrung. 7Nẽẽthĩ, ammũdeek hinnia baa aitiõõ Eliꞌthẽbẽta lohollia tõõ nẽ tarĩ, baa atahaanyito nẽẽg ꞌrammaattĩg buúk.
8Ma kõr umwa, baa ammũdeek adticanni lothippiti cĩ paadĩrꞌnyaannu hĩ ꞌThakaria ꞌCieethaa cĩ Nyekuci. 9Nẽ nyattaalaa cĩ paadĩrꞌnyaannu, baa eberriaa ꞌThakaria kõr tĩho ꞌgõõlaa ꞌcĩ aruhi eeta tooto,#1:9 Tooto: Baa gõõng ꞌgõõl ꞌcĩ ẽbẽraanĩ paadĩrꞌnya cĩg ꞌJudeei eet hũũk hidticanoothĩk Nyekuc cieeni. hũũk hĩwaad mõhõõkac ꞌCieethaa cĩ Nyekuci.#1:9 ꞌCieeth cĩ Nyekuci: Baa ĩĩn ꞌCieeth cĩ Nyekuci hõdẽẽthõng ꞌJeruꞌthalẽma, aꞌnyak ꞌcieeth ciee nĩngĩtĩ hõdẽẽthõng ꞌcĩ ĩbbõõrĩkĩ paadĩrꞌnya Nyekuc ꞌgaarrieenit. Baa aaĩ Nyekuci bulẽẽtta ꞌCieethaa cĩnnĩ Ngaatĩ Aꞌngirannii nẽ Ẽllẽẽmĩth Gẽrrẽẽt ko. Paadĩr cobbi dioo ꞌcĩ aduhun Nĩngĩtĩ Aꞌngirannii ho, õkõõĩ biyyi cĩg ꞌgaarrieettak, hátĩ hũũk hũtũngeek Nyekuci ꞌthẽccanẽẽt cĩg eetuk. Tigiil thõõth icci ꞌBuuhaa cĩ Levitiko 16; Ebereei 9. 10Baa nga ĩwaaddi mõhõõkacĩ, baa abĩlĩ lothippiti cobbi gẽrrẽẽt alayyi battaala.
11Ma hĩdĩĩkoothong, uppwaannak aajĩlõ#1:11 Aajĩlẽẽt: Ĩĩn aajĩlẽẽta loriẽẽt ꞌcĩg arũmĩ hĩ Nyekuc hẽẽtahujjieen nẽ aitiõõ ĩhõõggõ eleeti tõõ. Ĩꞌthõõa Nyekuci ĩhõõggõ waathinnioohĩĩ ũgẽẽgĩ hiita haꞌnyaktaak nyeemuut cĩ Nyekuci eet loota nĩnga. cĩ Makayyiookto ꞌThakaria ꞌcieetõõ, hikia hĩbĩl ĩĩcĩ aꞌthiit cobbi cĩ altaarĩ ꞌcĩ ĩwaadini mõhõõkacĩ ho. 12Ma baa acĩn ꞌThakaria aajĩlõ ho, ĩĩ torriak nẽ abarrit gẽrrẽẽt. 13Anneek hinnia aajĩlõ nicciee ĩnõõnnõ, “ꞌThakaria, ma hiꞌngolinnaanĩ! Ĩthĩk Nyekuci laiinit cunni. Aꞌnyaki hatĩ ngaa cunni Eliꞌthẽbẽta nẽ ũtũhũwa loholeec ꞌcĩ maacĩ. Nẽ ma utuhuyyiaa, kateek ꞌthaar ꞌcĩg kaĩ Yõaannẽ. 14Aaꞌnyi hatĩ ꞌtirriaanĩtĩ cĩnnĩ ꞌcammanoothĩk nẽ ꞌthẽk hatĩ accamattoothĩk eeta ꞌcĩg mẽẽlĩg buúk, hĩnĩngĩtĩ ꞌtirriaanĩt cĩnnĩ. 15Hĩnĩngĩtĩ ĩĩn hatĩ nẽẽ eet ꞌcĩ tiiri gẽrrẽẽt hẽbẽrẽẽnnĩĩ cĩg Nyekuc Makayyioohit. Ma haaꞌnyiku hũhũd mẽrtĩ hode viino. Ĩĩn hatĩ nẽẽ eet ꞌcĩ aaĩ Lorii ꞌcĩ Ẽllẽẽmĩth#1:15 Lori ꞌcĩ Ẽllẽẽmĩthĩ: Ĩĩn Lorii ꞌcĩ Ẽllẽẽmĩth, Lori cĩ Nyekuci. Aĩ Yeesu, ĩĩn Nyekuci Maaꞌnyĩ, ne ĩĩ nẽẽ Ngeertĩ Nyekuci. Aĩ thõõth ciee, ĩĩn Maaꞌnyia Nyekuc nẽ ĩĩ Ngeerĩnĩ Yeesu Nyekuc. Nẽ ĩĩ Lorii ꞌcĩ Ẽllẽẽmĩth Nyekuc. Nẽ tarĩ ĩĩtõ Maaꞌnyia hĩ Ngeerĩnĩ hĩ Lori ꞌcĩ Ẽllẽẽmĩth vẽlẽk, Nyekuc Hõdẽẽthõng. Tigiil ꞌBuuk cĩ Yõaannẽ 1:1-18; 8:41-42; Dtiicanĩ cĩg ꞌThooyyiahu 5:3-4. hĩ ĩnõõnnõ nganĩngĩtĩ hatĩ arrittiaanĩ. 16Irrioonĩk hatĩ nẽẽ eet ꞌcĩg mẽẽlĩg looccaa cĩ Ĩꞌthĩraẽlĩ hoboddia hĩ Makayyioohit Nyekuc cĩnĩĩng. 17Uwwattẽẽkĩ hatĩ nẽẽ Makayyioohit loriia hĩ ꞌtirriaana cĩ Eliijja.#1:17 Eliijja: Baa ĩĩn Eliijja põrõvẽtaac cĩ Nyekuci ꞌcĩ baa õkõõĩ Nyekuci hẽẽtahujjieen rũgẽtẽẽt. Tigiil thõõth cĩnnĩ ꞌBuuhaa ꞌcĩ ĩĩn 1 ĩcĩ Habueetu 17-21. Uwwattaa hatĩ nẽẽ hikia haaꞌnyĩk eet hũkũmattoothĩk, nga hikia Makayyioohiti. Aku hatĩ aaꞌnyĩk nẽẽ lõhõlĩ harraaccio hĩ maajihi, hátĩ haauto lõꞌngõõc nẽ irrioonĩk eet ꞌcĩg hõllõngaa athĩknĩ, hĩthĩhĩt ꞌgẽẽnyĩth cĩ eet ꞌcĩg abũnnaa.”
18Ajin hinnia ꞌThakaria aajĩlõ anneek, “Aku occa ꞌthẽk hatĩ thõõth ciee ĩĩn dĩdĩ? Hĩĩtta naag hĩ ngaa caannĩ morwak haaga.”
19Ma ho, ẽdẽc aajĩlõ nicciee ĩnõõnnõ ĩĩnnĩk, “Haĩnna nganĩĩt ꞌGaburẽẽlẽ, dticciannioohit cĩ Nyekuci. Hĩꞌthooyyia naa hikia huduhaahii nganiit nyeemuut ꞌcĩ abũnnaa#1:19 Nyeemuut ꞌcĩ abũnnaa: Õthõõth Nyeemuut ciee Yeesu Krĩstõ baa aku ũũny ꞌthẽccanẽẽt cĩggaac daahĩthaa cĩnnĩ hurucceea nẽ aaꞌnyeet rũgẽt ꞌcĩ aalla ooo. ho. 20Nẽ hĩ ꞌyioko hõllõngaa elemi nii thõõth ꞌcĩ haduhaakii naa ho, iittiõõ hatĩ nii hõllõngaa othoothi ĩꞌthõng kõr ꞌcĩ hatĩ arrittiaanĩ loholeec ꞌcĩ haduha naa ho.”
21Ma baa nga ẽrẽ eeta ꞌThakaria hõbõda ꞌCieethaa cĩ Nyekuci, baa apuppudii nẽẽg aĩ, inni haawua nẽẽ ĩꞌthõng ko. 22Ma baa adukna nẽẽ battaala ho, aꞌnyaman hinnia ngaatĩ õthõõthĩ, nĩngĩtĩ aku õthõõthĩkĩ eet athĩnĩ haaga hĩ ẽẽtĩ ꞌcĩ adĩĩtĩ ĩĩna. Ma nĩngaata noho, agayyiõõthĩ eeta ngaatĩ ĩcĩnĩ nẽẽ ꞌgiimwa ꞌcĩ aku hĩ Nyekuc ꞌCieethaa cĩ Nyekuci.
23Ma baa edeccia kõrra cĩ dtiic cĩnnĩ ho, ikia õbõdõõthĩ ĩĩcĩ olu. 24Ma urutaa cĩ thooꞌthiok iccig, ikia aꞌnyahõ ngaa cĩnnĩ Eliꞌthẽbẽta, nĩngĩtĩ aallanĩ halangatõõ nyĩlõhĩ ꞌtur. 25Ma ngaati, ikia atal Eliꞌthẽbẽta ĩĩ, “Ẽẽla Makayyioohiti nganĩĩta. Eteretheeha nẽẽ nganĩĩt bũnnai cĩnnĩ waathinnioohĩĩ cĩg. Ittik nẽẽ ngaaoni gõõng nannĩ nẽ iittiõõ hatĩ eeta hõllõngaa aranna nganĩĩt tarĩ.”
Uduha aajĩlõ ꞌtirriaanĩt cĩ Yeesu
26Ma baa ĩĩtõ nyĩlõhĩ ꞌcĩg aꞌnyahiini Eliꞌthẽbẽta tõrkõnõn, ikia ĩꞌthooĩk Nyekuci aajĩlõ ꞌGaburẽẽlẽ ꞌtaaũnaa cĩ Naaꞌtharẽtĩ looccaa cĩ ꞌGalileea, 27hũũk hũmmũdoothĩk bũhẽẽc ꞌcĩ nga hatagguutho hĩ eet umwa ũdũt ꞌcĩ haĩ Maria. Baa anũõõ Maria hĩ nyahaappan ꞌcĩ haĩ Yothebo#1:27 Yothebo: Baa ĩĩn Yothebo ciee maac cĩ Maria aattĩ Yeesu. Baa hũnũũk, baa aaĩ Yothebo umwaa ꞌcĩ baa ĩĩn ngeertĩ Yakobo ꞌcĩ baa ammĩnan maaꞌnyia gẽrrẽẽt nẽ utuuyyiõõĩ ꞌgotoonoggia hũũk hĩĩ appahaca eetinii cĩg Ijjibi. Tigiil thõõth cĩnnĩ ꞌBuuhaa cĩ ꞌThianaattõ 30-50. cĩ hattũũg cĩ Daavide.#1:27 Daavide: Baa ẽbẽra Nyekuci Daavide hikia hĩĩ habu cĩ Ĩꞌthĩraẽlĩ nẽ uduha ĩĩ, aku hatĩ habuui cobbi lõhõlẽẽnĩĩ cĩg lõhõlĩ cĩgĩnnĩg, hikia haggam looc hĩĩ habu ũdũt. Baa habu tĩho Yeesu Krĩstõ. Tigiil thõõth icci ꞌBuuhaa cĩ Tegellwaanu 132:11-12. Baa arũgĩ Daavide irkiꞌnyia ꞌcĩg occa ũũppan aalib hõdẽĩ, baa nga hittirria Yeesu. Tigiil thõõth cĩnnĩ ꞌBuuhaa ꞌcĩ ĩĩn 1 ĩcĩ Thamueele 16-30; 2 Thamueele 1-24; 1 Habueet 1-2. 28Nĩngĩtĩ õkõõĩ aajĩlõ ꞌGaburẽẽlẽ ĩꞌthõng hõdõlan Maria nẽ ĩꞌtha ĩnõõnnõ ĩĩnnĩk, “Hĩꞌthaayyina loholeec ciee accamanaanni Makayyioohiti ho! Aaĩ Makayyioohiti hĩ nganiita.”
29Athĩhĩ Maria thõõth icci noho nẽ ukuleek ꞌjieen ĩĩ, “ꞌThaainit occa gõõng ꞌcĩ aaĩ hutuno ciee?” 30Nĩngĩtĩ aduhaakĩ aajĩlõ ĩnõõnnõ annẽẽkĩ, “Maria, ma hiteelli, accamanaai nganiit Nyekuci, 31aꞌnyaki hatĩ nii nẽ ũtũhũwa loholeec ꞌcĩ maacĩ nẽ hatĩ akateehu ꞌthaar ꞌcĩg haĩ Yeesu.#1:31 Yeesu: ꞌThaara ꞌcĩg haĩ Yeesu ho aĩ, ẽẽlanneet Nyekuci. 32Aku hatĩ ĩĩn nẽẽ eet cobbi gẽrrẽẽt ꞌcĩ hatĩ haĩ, Ngeertĩ Nyekuc ꞌcĩ ĩllõõan vẽlẽk. Aaꞌnyĩk hatĩ Makayyioohiti Nyekuci ĩnõõnnõ hĩĩ habu, hĩ baa maaꞌnyia Daavide. 33Ĩĩn hatĩ nẽẽ habu habuccieetaa cĩ Yakobo#1:33 Yakobo: Baa ĩĩn Yakobo ngeertĩ loholeec cĩ Abũrahamĩ ꞌcĩ baa aꞌnyak lõhõlĩ ꞌcĩg maacĩg õmmõtõ hĩ ꞌramma. Baa ẽgẽẽran Nyekuci ꞌthaar cĩgĩnnĩg nẽ akateek ꞌthaar ꞌcĩg kaĩ Ĩꞌthĩraẽl. Haĩ lõhõlĩ cĩg lõhõlĩ cĩgĩnnĩg lõhõlĩ cĩg Ĩꞌthĩraẽlĩ nẽ korrioohĩĩ baag Yeesu, baa avvĩ eeta ĩhõõggõ anneek eet cĩg ꞌJudeei. Tigiil thõõth cĩnnĩ ꞌBuuhaa cĩ ꞌThianaattõ 25-50. ũdũt. Aitiõõ hatĩ habuccieet cĩnnĩ hõllõngaa edeccia.”
34Ma ho, ijin Maria aajĩlõ ĩĩnnĩk, “Haꞌnyaki occa hatĩ hutuno? Nga hatagguuꞌtha hĩ eet nganĩngĩtĩ harittiaanĩ.”
35Ẽdẽcĩ aajĩlõ ĩnõõnnõ anneek, “Alluucciakii hatĩ Lorii ꞌcĩ Ẽllẽẽmĩth nganiit nẽ ummuti ꞌtirriani cĩ Nyekuc ꞌcĩ ĩllõõan vẽlẽk. Ma urutaa cĩnnĩ, ũũkcaa hatĩ loholeec ꞌcĩ ẽllẽẽmĩth ꞌcĩ hatĩ haĩ Ngeertĩ Nyekuci. 36Aꞌnyahõ ꞌyioko ittioonniohit cunuung Eliꞌthẽbẽta aagõõng arannĩ eeta anneek cõhõlaac. Ĩĩtõ ꞌyioko nyĩlõhĩ ꞌcĩg aꞌnyahiini nẽẽ tõrkõnõn. Tananga atahaany nẽẽ gẽrrẽẽt, õkõ hatĩ aꞌnyak nẽẽ buúk loholeec. 37Hĩnĩngĩtĩ aitiõõ ꞌgii ꞌcĩ aꞌnyaman Nyekuc tõõ.”
38Ma athĩhĩ Maria thõõth icci ho, õthõõth ĩĩ, “Hĩĩnĩ naa dticciannioohit cĩ Makayyiookto, aꞌnyĩĩk haau hĩcĩ aduha nii hataa.” Nĩngĩtĩ õbõdõõꞌthĩ aajĩlõ.
Eheronoothĩk Maria Eliꞌthẽbẽta
39Ma waathinniook nicciag noho, ũkũmanoothĩk Maria nẽ ũꞌthũkũc ũũk ĩĩcĩ ꞌtaaũn ꞌcĩ aaĩ muurriõhĩĩ cĩg ꞌJudeea, 40nĩngĩtĩ õkõ adukni halang cĩ ꞌThakaria nẽ ũũk ĩꞌtha Eliꞌthẽbẽta. 41Ma baa athĩhĩ Eliꞌthẽbẽta ꞌThaainit cĩ Maria ho, ĩꞌngõth loholeec hẽẽngatõõ cĩnnĩ nẽ ikia Lorii ꞌcĩ Ẽllẽẽmĩth ꞌthĩnĩtaa cĩnnĩ. 42Ma nĩngaata, othoothĩk Eliꞌthẽbẽta Maria moloohaa cobbi taliitta ĩĩnnĩk, “Aggatanii nganiit Nyekuci hõrggẽẽnaa cĩ ngaainu vẽlẽk nẽ aggatanĩ loholeec ꞌcĩ hatĩ ũũkca nii ho buúk! 43Inni occa gõõng aattĩ hẽhẽẽrõnaaha aattĩ Makayyioohiti caannĩ ho? 44Aa ma hathihi ꞌthaainit cunni ho, ĩꞌngõth nganĩĩt loholeec hẽẽngatõõ taliitta. 45Aggatanni nganiit Makayyioohiti, hĩnĩngĩtĩ elemi nii thõõth ꞌcĩ hatĩ adticanneeki nẽẽ nganiit ko!”
Tẽgẽl cĩ Maria cĩ dĩhĩthẽẽttõ
46Ma nĩngaata, ẽbẽnõ Maria ĩĩ,
“Abuluth nganĩĩt ꞌthĩnĩt Makayyioohit,
47nẽ accamanoothĩk lorii caannĩ, hĩnĩngĩtĩ Nyekuc Ellioohit caannĩ.
48Hĩnĩngĩtĩ aꞌthũũnna nẽẽ nganĩĩt
dticciannioohit cĩnnĩ ꞌcĩ tarbalĩ.
Utuvvuyyiaa hatĩ gõõng eeta irkiꞌnyiaannĩ ĩĩttĩhaa, ngaa ꞌcĩ aggatan Nyekuci.
49Hĩnĩngĩtĩ ĩdĩmaneeha Nyekuci ꞌTirriannioohiti thooꞌthiok ꞌcĩg tiirik gẽrrẽẽt.
Ẽllẽẽmĩth ꞌthaara cĩgĩnnẽẽgĩ.
50Ammaannĩk nẽẽ eet ꞌcĩg iꞌngolli ĩnõõnnõ
irkiꞌnyia hĩ irkiꞌnyia.
51Idtican nẽẽ thooꞌthiok ꞌcĩg ĩllõõan gẽrrẽẽt attiaa cĩnnĩ.
Ĩꞌthaan nẽẽ eet ꞌcĩg athĩngõõnyanĩ.
52Itiggia nẽẽ habuẽẽt ꞌcĩg aĩ hĩĩgĩnna tõrõmĩ, dtaabĩtĩĩ cĩggĩĩng
nẽ irigithieek eet ꞌcĩg tarbalĩg.
53Aaꞌnyĩk nẽẽ eet ꞌcĩg adak magĩthĩ hẽlẽggĩ ꞌcĩg abũnnaa,
nẽ itiggia eet ꞌcĩg aĩ hĩĩgĩnna balliook, hõõt athĩnĩĩ ꞌtẽl.
54Ẽẽl nẽẽ dticciannioohit cĩnnĩ Ĩꞌthĩraẽl
nẽ ummuhunõõthĩ ngaatĩ ammaannĩkĩ nẽẽ
55Abũrahaamõ#1:55 Abũrahaamõ: Baa avvĩ Nyekuci ĩnõõnnõ hũtũngeek eet cĩg halang cĩnnĩ hĩ looc cĩnnĩ nẽ ũnũõõthĩ Nyekuc ĩĩcĩ looc ꞌcĩ ĩĩn ngeju. Baa ikia ĩĩ Abũrahamĩ maaꞌnyĩ eet cĩg ꞌJudeei. Baa arũgĩ nẽẽ irkiꞌnyia 1,800 baa nga hittirria Yeesu. Tigiil thõõth cĩnnĩ ꞌBuuhaa cĩ ꞌThianaattõ 17-26. hĩ lõhõlĩ cĩg lõhõlĩ cĩgĩnnĩg irkiꞌnyia hĩ irkiꞌnyia,
hĩ baa aduhaak nẽẽ hĩbaangĩ cĩggaac.”
56Baa arũmĩ Maria hĩ Eliꞌthẽbẽta nyĩlõhĩ iyyio nĩngĩtĩ õbõdõõꞌthĩ õlõ.
Ittirria Yõaannẽ Batitta
57Ma baa ũttũbattoothĩk waathinniooha ꞌcĩg okolliaanĩ Eliꞌthẽbẽta, ikia ũtũhũwa nẽẽ loholeec ꞌcĩ maacĩ. 58Ma athĩhĩ ittioonnioha hĩ eet ꞌcĩg õbõhõõ hĩ ĩnõõnnõ ngaatĩ ammaannĩkĩ Makayyioohiti ĩnõõnnõ ho, iita accamattoothĩk nẽẽg vẽlẽk gẽrrẽẽt.
59Ma baa aꞌnyak loholeec waathinniook turkiyyio, iita etteedito eeta ẽlẽ#1:59 ꞌTeedinit cĩ ẽlẽ cĩ eet ꞌcĩ maacĩ: Baa aduhaak Nyekuci Abũrahaamõ anneek ꞌtẽẽda rucci cĩg eleeti cĩg eet ꞌcĩg maacĩg lõhõlẽẽnĩĩ ꞌcĩg maacĩg urutaa cĩ waathinniook turkiyyio, ĩnõõ ꞌcĩ ẽttẽẽdĩ nẽẽ eleeti cĩg lõhõlĩ ꞌcĩg maacĩg, hátĩ hiita hĩĩtõ lõhõlĩ cĩg Nyekuci. ꞌBuuk cĩ ꞌThianaattõ 17:10-14. cĩnnĩ nẽ idiimito akattieek ꞌthaar cĩg maacõnĩ ꞌThakaria. 60Ẽdẽcĩ hinnia ngaannia aĩ, “Haĩ ꞌthaar cĩgĩnnĩg Yõaannẽ.”
61Attacan tarĩ eeta aĩ, “Aitiõõ eet umwaa ittioonniohĩĩ cugguung ꞌcĩ aꞌnyak ꞌthaar nicciaag tõõ.” 62Nĩngĩtĩ õthõõthĩkĩ nẽẽg ꞌThakaria athĩnĩ, huduha ꞌthaar ꞌcĩg occa akannoothĩk loholeec. 63Ma ho, ijin ꞌThakaria ĩhõõggõ haanytĩk ĩnõõnnõ waraga, nĩngĩtĩ ẽhẽẽdĩkĩ waragaawa aĩ, “Haĩ ꞌthaar cĩg loholeecak Yõaannẽ.” Baa anyamũũtana eet thõõth ꞌcĩ õõkõrõõnĩ ꞌthaara ꞌcĩg aduha ngaannia hĩ maaꞌnyĩ ho gẽrrẽẽt. 64Ma ꞌthẽk nĩngaata noho, iꞌthianaaĩ ꞌThakaria õthõõth lõꞌngõõc, nĩngĩtĩ adĩkꞌthĩ Nyekuc.
65Baa adhirriaangan thõõth ciee eet ꞌcĩg õbõhõõ hĩ õlõ cĩnnĩ gẽrrẽẽt nẽ baa athithan eeta thõõth icci looccaa cĩ ꞌJudeea hũtũrũũr. 66Baa ꞌthẽk ĩnaat eeta ꞌcĩg athĩhĩ thõõth icci gẽrrẽẽt aĩ, “Loholeec occa hatĩ ꞌcĩ aku ĩĩn ne ciee hõlõ?” Baa ajinõõ eeta noho, hĩnĩngĩtĩ aga nẽẽg ngaatĩ aayyi Makayyioohiti hĩ ĩnõõnnõ.
Tẽgẽl cĩ ꞌThakaria
67Ma ho, aaꞌnyĩk Lorii ꞌcĩ Ẽllẽẽmĩth ꞌThakaria maaꞌnyĩ loholeeco hẽddẽẽbak eet thõõth cĩ Nyekuci ꞌcĩ hatĩ aku edeeꞌnyia horumwa. Baa nẽ õthõõth nẽẽ ĩĩ,
68“Aꞌnyĩĩk hĩdĩhĩthĩ Makayyioohiti Nyekuci cĩ Ĩꞌthĩraẽlĩ,
hĩnĩngĩtĩ ikia ũrũgũtha nẽẽ eet cĩgĩnnĩg.
69Aaꞌnyeet nẽẽ ngagĩĩt Ellioohit ꞌcĩ attiran gẽrrẽẽt,
ꞌcĩ aku habuccieetaa cĩ Daavide dticciannioohit cĩnnĩ,
70hĩ baa aduha põrõvẽtaaꞌnya#1:70 Põrõvẽtaac: Ĩĩn põrõvẽtaacĩ eet ꞌcĩ athĩkna nyeemuut hĩ Nyekuc nẽ ikia uduhaak eeta. baag ẽllẽẽmĩth baarkit aĩ,
71ẽẽlanneet hatĩ nẽẽ ngagĩĩt athĩnĩĩ cĩg mĩrõk cĩggaac
hĩ ĩcĩg eet ꞌcĩg aaburreekeet ngagĩĩta.
72Nẽ ẽtẽrẽtha tamaati baa aduhaak nẽẽ hĩbaangĩ cĩggaac
nẽ ummuhunõõthĩ lõhõt baa nĩnnĩ ẽllẽẽmĩth,
73hĩ baa abũtaneek nẽẽ nyakangaan cĩnaac Abũrahaamõ anneek,
74ẽẽlanneet hatĩ nẽẽ ngagĩĩt athĩnĩĩ cĩg mĩrõk cĩggaac,
nẽ aaꞌnyeet hidticattoothĩk ĩnõõnnõ lõꞌngõõc,
75ꞌlẽẽmĩtha hĩ bũnnaiitta muumaa cĩnnĩ waathinnioohĩĩ cĩggaac vẽlẽk.
76Nẽẽthĩ, niina loholeec caannĩ ho, auyyi hatĩ eeta anneeki põrõvẽtaac cĩ Nyekuc ꞌcĩ ĩllõõan vẽlẽk,
hĩnĩngĩtĩ uwwattẽẽkĩ hatĩ nii Makayyioohit õkõ akũmanẽẽkĩ ĩnõõnnõ ꞌgõõla.
77Nganiit hatĩ ꞌcĩ allimaneehi eet ꞌgõõl
ꞌcĩ hatĩ aku ẽẽlanĩ Makayyioohiti ĩhõõggõ ꞌthẽccanẽẽtĩĩ cĩggĩĩng,
78hĩnĩngĩtĩ tamaati cobbi cĩ Nyekuc cĩnaac ꞌcĩ abũnnaa,
ꞌcĩ hatĩ aku uppwannakeet kõrra ngagĩĩt hẽẽtahujjieen,
79hikia hũttũhũla eet ꞌcĩg aattĩg muguratõõ,
hĩ ꞌcĩg aattĩg ꞌriiyyia cĩ daahĩthõõ
nẽ eteretheheet ngagĩĩt ꞌgõõl ꞌcĩ haattiyyi lõꞌngõõc.”
80Nĩngĩtĩ alĩꞌthaanĩ loholeec ĩꞌthõng hikia hittiran lorii cĩnnẽẽnĩ, nẽ ũũk aau horrwaa ꞌcĩ õdõhõhĩĩ kak, ĩꞌthõng hũttũbattoothĩk waathinniooha ꞌcĩg aku irrioonĩkĩ nẽẽ eet cĩg Ĩꞌthĩraẽlĩ.
© 2017, Wycliffe Bible Translators, Inc., All rights reserved.