ꞌLuuka 2
2
ꞌTirriaanĩt cĩ Yeesu
(Tigiil Maatteeo 1:18-25)
1Ma waathinniook nicciag, ikia uduhaak habuui cobbi cĩ ꞌRooma#2:1 Habu cobbi cĩ ꞌRooma: Baa aggam habuui cobbi cĩ ꞌRooma habuẽẽt cĩg loonyin mẽẽlĩg, nẽ aggam eet cĩg ꞌJudeei ꞌcĩg aattĩg ꞌJudeea hĩ ꞌcĩg aattĩg ꞌGalileea buúk. Eetinii cĩg ꞌRooma, avvĩ eeta habu cobbi anneek ꞌCẽẽthẽrẽ. ꞌcĩ haĩ Agguutto eet looccaa cĩ ꞌRooma hũtũrũũr hõõt hitigiilli. 2Baa ĩĩn ciee tigiilẽnĩt ꞌcĩ oou, baa irkiꞌnyia ꞌcĩg ĩĩnnĩ Kwiriino makayyioohit cĩ looc cĩ Thiiria. 3Nĩngĩtĩ ĩꞌthanõthõõthĩkĩ eeta vẽlẽk ꞌtaaũnniook cĩggĩĩng cũũmõ cũũmõ.
4Baa nẽ ĩtĩnga Yothebo buúk ꞌtaaũnaa cĩ Naaꞌtharẽtĩ looccaa cĩ ꞌGalileea nẽ ũũk ĩꞌthõng Bẽtẽlẽm looccaa cĩ ꞌJudeea ꞌtaaũnaa cĩ Daavide, hĩnĩngĩtĩ baa ĩĩn nẽẽ eet cĩ hattũũg cĩ Daavide. 5Baa õõkõr nẽẽ hĩ Maria, bũhẽẽc baa adiim nẽẽ hatĩ hĩĩ ngaa cĩnnĩ. Ammũdeek hinnia baa ĩdĩddĩng Maria waathinniook tĩko gẽrrẽẽt. 6Ma baa õdõlanit nẽẽg Bẽtẽlẽm, iita ũttũbattoothĩk Maria waathinniooha cĩg tũhũyyiaattak, 7nĩngĩtĩ ũũkcanĩ nẽẽ ngeerĩnĩ ꞌcĩ oou nẽ ũmũmmũũran cẽrẽma nẽ aaꞌnyĩk hatangu haahũlaa ꞌcĩ aarĩkĩ eeta cĩg ꞌJudeei arteenit ꞌcĩ ẽgĩ hẽlẽggĩ, hĩnĩngĩtĩ baa ummuddioothĩk nẽẽg ĩbbĩt nĩngĩtĩ ꞌcĩ gõõng adũman heerinniooha nẽ atagguuꞌthi.
Uppwaannak aajĩlõ tũhayyiook
8Nẽ baa aattĩg tũhayyiooha ũgẽẽgĩ ꞌcĩg õbõhõõ hĩ nyadaharĩt nĩngaata, ꞌcĩg ẽbẽk hẽlẽggĩ cĩggĩĩng baalin niccia. 9Ma baalin niccia, uppwaannak aajĩlõ cĩ Makayyiookto ĩhõõggõ nẽ aara bulẽẽnĩtĩ cĩ Makayyiookto hũttũhũl ĩhõõggõ, nĩngĩtĩ itieelini nẽẽg gẽrrẽẽt. 10Ma nĩngaata, ĩĩnnĩk aajĩlõ nicciee ĩhõõggõ, “Ma hiteelinnu, haꞌnyahaakuung naa ngagiit nyeemuut ꞌcĩ abũnnaa gẽrrẽẽt, ꞌcĩ hatĩ aaꞌnyahaak eet vẽlẽk taliinit cobbi gẽrrẽẽt. 11Ittirria Ellioohiti cunuung iyyieni ꞌtaaũnaa cĩ Daavide, ĩnõõnnõ Krĩstõ#2:11 Krĩstõ: ꞌThaara ꞌcĩg haĩ Krĩstõ ho, aĩ ẽbẽra Nyekuci eet hĩĩ habu. Makayyioohiti. 12ꞌGõõl ꞌcĩ hatĩ õõ agayyu niig ĩnõõnnõ cieeni, ammũdoothiku hatĩ oongi haahũlatõõ cĩ heleggeennu nẽ ũmũmmũũranĩ ceremwaanĩ.”
13Ma hĩdĩĩkoothong, uppwaanna lothippiti cobbi gẽrrẽẽt cĩ aajĩleetu ummuddiaak aa oou nẽ ĩdĩhĩthĩt Nyekuc nĩngaata hõdẽĩ ĩĩtõ,
14“Bulẽẽnĩt hĩ Nyekuc hẽẽtkujjieen,
nẽ ganõn hĩ eet ꞌcĩg accamana Nyekuci loota nĩnga.”
15Ma baa oboddioothĩ aajĩlẽẽta#2:15 Aajĩlẽẽt: Ĩĩn aajĩlẽẽta loriẽẽt ꞌcĩg arũmĩ hĩ Nyekuc hẽẽtahujjieen. Ĩꞌthõõa Nyekuci ĩhõõggõ korrioohĩĩ ũgẽẽgĩ hiita loota, haꞌnyaktaak eet nyeemuꞌnya cĩg Nyekuci. niccieeg hẽẽtahujjieen, utuhanit tũhayyiooha thõõth ĩĩtõ, “Hõõt da Bẽtẽlẽma, hátĩ hĩcĩnĩt thõõth ꞌcĩ adĩmanni ꞌcĩ aduhaakeet Makayyioohiti ho.”
16Nĩngĩtĩ aꞌthũkcĩ ĩꞌthõng hõõt hummudioothĩk Maria hĩ Yothebo nẽ udtuukta ĩdõlĩ ngaatĩ oongiyyi haahũlatõõ cĩ heleggeennu. 17Ma baa ĩcĩnĩt nẽẽg ĩdõlĩ ẽlẽk, iita oboddioothĩ nẽẽg õõt ĩꞌthaattĩk eet nyeemuut baa aduhaak aajĩlõ ĩhõõggõ. 18Baa abulan nyeemuut ꞌcĩ aduha tũhayyiooha ho eet gẽrrẽẽt. 19Nẽẽthĩ, baa aꞌthũũnnĩ Maria thooꞌthiok iccig vẽlẽk nẽ ummuk ꞌthĩnĩtatõõ cĩnnĩ. 20Nĩngĩtĩ õbõdõõꞌthĩ tũhayyiooha ĩĩcĩ horggu adĩkthoothi nẽ ubuluꞌthiõõthĩ Nyekuc ꞌgõõla, hĩnĩngĩtĩ thooꞌthiok ꞌcĩg athĩhĩ nẽẽg nẽ ĩcĩnĩt hẽbẽrẽẽnnĩĩ cĩggĩĩng ko. Baa acĩn nẽẽg aaĩ thõõth ciee hĩ baa aduhaak aajĩlõ ĩhõõggõ dẽẽdẽ.
Aaꞌnyĩhoothĩk Yeesu Nyekuc
21Ma baa õdõlanit waathinniooha ĩĩtõ turkiyyio, ikia ẽttẽẽdĩ ĩdõlĩ ẽlẽ nẽ akattioothĩk ꞌthaara ꞌcĩg haĩ Yeesu, ꞌThaar baag akanneek aajĩlõ ĩnõõnnõ baa nga haꞌnyahĩ hẽẽngatõõ.
22Ma baa edeccia waathinniooha cĩg tũũnyẽnĩt#2:22 Waathinniook cĩg tũũnyẽttaak: Aduha nyattalĩ cĩ Mũũꞌtha aĩ, ĩĩn ngaa ꞌriiring waathinniook hẽẽn ꞌwec urutaa ꞌcĩ ũtũhũaaĩ loholeec. Tigiil Levitiko 12:1-4. ꞌcĩ adiim nyattalĩ cĩ Mũũꞌtha,#2:22 Mũũꞌtha: Urutaa cĩ daahĩth cĩ Yothebo, iita ĩĩtõ lohollia cĩg Ĩꞌthĩraẽlĩ appahacaaꞌnya Ijjiba irkiꞌnyia ꞌmiiaꞌnya ꞌwec. Baa adticaniini Nyekuci Mũũꞌtha hõõgaĩ eet cĩg Ĩꞌthĩraẽlĩ appahacẽẽꞌthĩta. Baa aaꞌnyĩk Nyekuci lõhõlĩ cĩg Ĩꞌthĩraẽlĩ nyattal, hĩnĩngĩtĩ Mũũꞌtha. Ĩnõõ ꞌcĩ haĩnnĩ nyattal icci nyattal cĩ Mũũꞌtha ho. Baa arũgĩ Mũũꞌtha irkiꞌnyia aalib hõdẽĩ hĩ ꞌmiiaꞌnya ꞌwec, baa nga hittirria Yeesu. Tigiil thõõth cĩnnĩ ꞌBuuhaa cĩ Luugithõõ 2-24. ootti Maria hĩ Yothebo ĩdõlĩ ꞌJeruꞌthalẽma, hũũk haaꞌnyĩhoothĩk Makayyioohit ꞌCieethaa cĩ Nyekuci, 23nẽ hĩcĩ aduha nyattalĩ cĩ Makayyiookto aĩ, “Aanytĩk hatĩ gõõng loholeec ꞌcĩ maacĩ ꞌcĩ arrittiaa ĩĩcĩ oou haaꞌnyĩhoothĩk Makayyioohit.”#Tigiil ꞌBuuk cĩ Luugithõõ 13:2, 12 24Nẽ itiktaau ꞌbaaninit haau hĩcĩ aduha nyattalĩ cĩ Makayyiookto aĩ, “Aanytĩk hatĩ gõõng maajihi ĩdõleetu hitikta ngabuuthiꞌnya ꞌramma hode bollooꞌnya ꞌramma ꞌcĩg nga hĩdĩcĩg.”#Tigiil ꞌBuuk cĩ Luugithõõ 12:8 Nĩngĩtĩ adĩmanĩ Maria hĩ Yothebo buúk noho.
Aduha ꞌThimiõõnẽ thõõth cĩ horumwa
25Baa ammũdeek aaĩ ẽẽtĩ umwaa ꞌcĩ haĩ ꞌThimiõõnẽ ꞌJeruꞌthalẽma, ꞌcĩ baa itieelli Nyekuc nẽ ala ĩnõõnnõ gẽrrẽẽt ũdũt. Baa ẽrẽ nẽẽ Ellioohit hikia hẽẽla eet cĩg Ĩꞌthĩraẽlĩ, nẽ baa aaĩ Lorii ꞌcĩ Ẽllẽẽmĩth hĩ ĩnõõnnõ. 26Baa aduhaak Lorii ꞌcĩ Ẽllẽẽmĩth ĩnõõnnõ anneek, aitiõõ hatĩ nẽẽ hõllõngaa adaahĩ nga hĩcĩn Krĩstõ cĩ Makayyiookto. 27Ma baa õõ adĩmaneek Maria hĩ Yothebo ĩdõlĩ Yeesu nyattal cĩ Mũũꞌtha ho, ikia aaꞌnyĩk Lorii ꞌcĩ Ẽllẽẽmĩth ꞌThimiõõnẽ hũũk ꞌCieethaa cĩ Nyekuci.
28Ma nĩngaata, õdõng ꞌThimiõõnẽ ĩdõlĩ noho nẽ ĩdĩhĩth Nyekuc ĩĩ,
29“Nyekuc Makayyioohit, aꞌnyaa nganĩĩt dticciannioohit cunni
hadaak lõꞌngõõc hĩ baa aduha niina,
30hĩnĩngĩtĩ hĩcĩna elliaanĩt cunni hẽbẽrẽẽnnĩĩ cĩgannĩg dẽẽdẽ.
31Elliaanĩt ꞌcĩ akũmanẽẽkĩ nii eet vẽlẽk.
32Ĩĩn nẽẽ lanyit ꞌcĩ eterꞌtheek loonyin vẽlẽk thõõth cunni,
nẽ aꞌnyahaak hatĩ eet cugunnig Ĩꞌthĩraẽl bulẽẽnĩt.”
33Baa abulan thõõth ꞌcĩ adukiaa hĩnĩngĩtĩ loholeec cĩ Maria hĩ Yothebo ho eet gẽrrẽẽt. 34Nĩngĩtĩ aggatanĩ ꞌThimiõõnẽ ĩhõõggõ nẽ ĩĩnnĩk ꞌcĩ ĩĩn Maria aattĩ loholeeco, “Aꞌnyahaak hatĩ loholeec ciee eet ũgĩ bathi nẽ aꞌnyahaak ũgĩ bũnnai Ĩꞌthĩraẽla. Ĩꞌthõõa hatĩ Nyekuci ĩnõõnnõ hĩĩ terethiinit, nẽẽthĩ, mẽẽlĩg hatĩ eeta ꞌcĩg abũrĩ ĩnõõnnõ gẽrrẽẽt, 35hátĩ hedeeꞌnyia muhẽẽnĩtĩ cĩ ꞌthinneeti ꞌcĩg mẽẽlĩg. Nẽ acuhan hatĩ nyetuboot ꞌthĩnĩt cunni buúk.”
36Nẽ baa aaĩ ngaa umwaa ꞌcĩ ĩĩn põrõvẽtaac ꞌcĩ haĩ Anna, ꞌcĩ baa ĩĩn tĩnaatĩ eet ꞌcĩ haĩ Pannuẽlẽ, cĩ habuccieet cĩ Aathẽrĩ. Baa atahaany nẽẽ gẽrrẽẽt nẽ nganĩngĩtĩ aꞌthũwaniini, arũmĩ hĩ maac cĩnnĩ irkiꞌnyia tũkĩramma haaga nĩngĩtĩ adaaknĩ maac. 37Ma baa adaak maac cĩnnẽẽnĩ, ikia ĩĩ ngaatĩbõyyĩ ĩꞌthõng hõdõlanit irkiꞌnyia cĩgĩnnĩg hĩĩtõ hẽẽn turkiyyio hĩ ꞌwec. Aalla alayyi nẽẽ ꞌCieethaa cĩ Nyekuci baalin hĩ waathĩn nẽ ẽdẽta#2:37 Ẽdẽta ẽlẽ ꞌgẽẽna: Baa gõõng ẽdẽta eeta cĩg ꞌJudeei eleeti ꞌgẽẽna waathinnioohĩ ũgẽẽgĩ, halayyiõõĩ eleeti cĩggĩĩng hĩ Nyekuc. ẽlẽ ꞌgẽẽna waathinniook ũgĩ. 38Ma kõr niccia, ikia ũmmũdaak nẽẽ buúk Yothebo hĩ Maria nẽ atal Nyekuc, nĩngĩtĩ ahĩkĩĩmanaakĩ eet ꞌcĩg baag ẽrẽ elliaanĩt cĩ ꞌJeruꞌthalẽmĩ thõõth cĩ ĩdolo.
39Ma baa edecciaak Yothebo hĩ Maria authet ꞌcĩ adiim nyattalĩ cĩ Makayyiookto hĩdĩmanĩ ho, iita oboddioothĩ ꞌtaaũnaa cĩnĩĩng Naaꞌtharẽta looccaa cĩ ꞌGalileea. 40Nĩngĩtĩ alĩꞌthĩ loholeec hĩĩ maka. Nẽ baa aꞌnyak nẽẽ ꞌgẽẽnyĩth hĩ bũnnai cĩ Nyekuci.
Yeesu ꞌCieethaa cĩ Nyekuci
41Irkiꞌnyiaannĩ vẽlẽk, baa gõõng õõ maaꞌnyĩ Yeesu hĩ aattĩnnĩ ꞌJeruꞌthalẽma Kõrraa cĩ Haangittõõ.#2:41 Kõr cĩ Haangittõõ: Ĩĩn ciee kõr ꞌcĩ ammuhaanĩ eeta cĩg ꞌJudeei kõr baa urwacanĩ nẽẽg hõdẽĩ hõdẽĩ, ngadihẽẽt cĩg hattũũgetu biyyiẽẽtĩĩ cĩg mĩꞌnyoonnu. Ĩnõõ baa aku ahaangĩ Makayyioohiti olooyyiok cĩggĩĩng looccaa cĩ Ijjibi baarkit nẽ tarĩ ummukta kõr baa aduhi nẽẽg ũbũnẽẽt ꞌcĩg aitiõõ abũũlana tõõ. Tigiil ꞌBuuk cĩ Luugithõõ 12:17-28. 42Ma baa ĩtĩlĩtha Yeesu ĩĩtõ irkiꞌnyia õmmõtõ hĩ ꞌramma, õõt nẽẽg kõrraa cobbi hĩ gõõng hõdõõkõthĩ. 43Ma baa edeccia karrama tĩho, oboddioothĩ Maria hĩ Yothebo ĩĩcĩ olu. Ĩko nẽẽ idionganniaa Yeesu ꞌJeruꞌthalẽma nẽ hõllõngaa aga nẽẽgĩ. 44Baa hinnia ammuk nẽẽg aĩ utuwattĩ moho Yeesu hĩ ꞌgõõnõgĩ. Ma baa ꞌjiaat, iita iiyyiellia nẽẽg ĩnõõnnõ, nĩngĩtĩ õõ adiimi ittioonniohĩ hĩ ꞌgoonoginni. 45Ma baa aꞌnyaman ngaatĩ ammũdaanĩ ĩnõõnnõ ho, oboddioothĩ õõt idiimto ꞌJeruꞌthalẽma.
46Ma urutaa cĩ waathinniook iyyio, õõ hinnia ammũda halangatõõ cĩ ꞌCieeth cĩ Nyekuci hõrggẽẽnaa cĩ ꞌlimmannioohu, ammũdoothĩk athĩhĩ ĩhõõggõ nẽ ijin thooꞌthiok ꞌcĩg õkõmĩ. 47Nẽ baa abulan ꞌgẽẽnyĩthĩ cĩnnĩ hĩ ꞌgõõl ꞌcĩ attacanĩ nẽẽ thooꞌthiok cĩg eet vẽlẽk ꞌcĩg athĩhĩ ĩnõõnnõ ho gẽrrẽẽt.
48Ma baa acĩn maaꞌnyia hĩ aattĩnnĩ ĩnõõnnõ ho, ikia anyamũũtana thõõth ciee ꞌthinneeti cĩggĩĩng gẽrrẽẽt, nĩngĩtĩ annẽẽkĩ ngaannia, “Adĩmanneet occa hoti inni Yeesu? Cĩĩn nõõ nganĩĩt hĩ maaꞌnyu ngaatĩ hommothiinna, hĩnĩngĩtĩ hadiimmi nganiita.”
49Ẽdẽcĩ hinnia nẽẽ ĩhõõggõ anneek, “Adiimmaangu inni? Hõllõngaa agayyu niig ngaatĩ adiim haayyi naa ꞌcieethaa cĩ Baaba?” 50Baa hinnia aitiõõ nẽẽg hõllõngaa aga thõõth ꞌcĩ aduhaak Yeesu ĩhõõggõ ho.
51Nĩngĩtĩ õbõdõõꞌthĩ nẽẽ hĩ ĩhõõggõ Naaꞌtharẽta nẽ ũũk aala ĩthĩk thõõth cĩnĩĩng. Baa aꞌthũũnnĩ ngaannia thooꞌthiok ꞌcĩg aduha nẽẽ ho vẽlẽk ꞌthĩnĩtaa cĩnnĩ nẽ hõllõngaa ataarrothi ũdũt. 52Ma nĩngaata, ĩtĩlĩtha Yeesu hĩĩ maka nẽ ẽggẽẽny gẽrrẽẽt. Baa ammĩnan eeta ĩnõõnnõ nẽ accamana Nyekuci buúk.
© 2017, Wycliffe Bible Translators, Inc., All rights reserved.