KU̧U̧NAŊMƆ 3
3
Dee ŋgazu ko bíí
1 #
Tɔ̧ɔ̧ Hu̧ 12.9; 20.2 Gɔ́k duka so nɛ́ saɗi nɛ a̧a̧ nɛ gɔna-kɔ̧-zaŋ mgbara o saɗi sɛn kpɛɛfɔ nɛ GASA WAN Sɔ̧ dea. A̧ tɔ̧a̧ ha̧ okoo: «Sɔ̧ tɔ̧a̧‘e k’ɛ́nɛ́ nyɔŋ ŋma waya-te sɛn kpɛɛfɔ'ɛ na nɛ mbetɛ?»
2Okoo kifa nú ha̧ gɔ́k: «Ɛ́ɛ́ nyɛma mɛ́ nyɔŋ o waya-te sɛn kpɛɛfɔ'ɛ, 3ɓɛɛ war ko waya-te nɛ a̧a̧ sɛn see fɔ‘i, Sɔ̧ tɔ̧a̧, k’ɛ́ɛ́ nyɔŋ na, k’ɛ́ɛ́ fo na mbɛt, wen k’ɛ́ɛ́ tɛɛ fe.»
4Gɔ́k tɔ̧ɔ̧ ha̧ okoo: «Weyaa, ɛ́nɛ́ beka fe na! 5Sɔ̧ iŋa'e wese n’ɛnɛ tɛ́ nyɔŋ, yí‘nɛ́ tɛ́ hì̧ì̧, ɛ́nɛ́ tɛ́ ya hee Sɔ̧ ga, ɓɛɛ ɛ́nɛ́ tɛ́ iŋ mgbara demɔ in ɗaŋmɔ.»
6Okoo zɔka'e te'i ɔ dee wen nyɔŋa-a; tɛ̀ zɔka-a, a̧ taa'e te'i nyɛma mɛ́ ha̧ haya taamɔ, ɓɛɛ a̧ ba waya-te'i nyɔŋ; a̧ ha̧a̧ ŋma ha̧ wíì kɔ̧-a̧ nɛ duka in a̧, ɓɛɛ wíì kɔ̧-a̧ nyɔŋ mbɛt. 7Wa yiitoo lɛŋ yí-wa hu̧i̧a̧, ɓɛɛ wa iŋ kinii nde, wi ya nɛ̀ mgbii; mɛ̀ nɛ́ hegɔ wa sika wa̧a̧ mbɔra wen kpea-a nɛ tɛ-wa.
8Mɛ́ ga̧a̧mɔ, GASA WAN Sɔ̧ yara kpɛɛfɔ, ɓɛɛ hee mɔ'ɔ nɛ wa zia tiger-a ga, wiwii in okoo hu̧sa̧ tɛ-wa ti GASA WAN Sɔ̧ sɛn mgbara te kpɛɛfɔ. 9GASA WAN Sɔ̧ saa wiwii, ɓɛɛ ak a̧: «Mɛ́ a̧a̧ dee?»
10A̧ kifa nú: «Mi zia tiger'nɛ́ sɛn kpɛɛfɔ, kíì dea'm wen mi duk nɛ̀ mgbii, ɓɛɛ sa'm hu̧si.»
11GASA WAN tɔ̧ɔ̧ woyo: «Nɛ́ o'o tɔ̧ɔ̧ ha̧ mɛ ndé, mɛ́ duk nɛ mgbii o? Mɛ́ nyɔŋa nɛ́ waya-te n'am tɔ̧ɔ̧ ha̧ mɛ‘e ká mɛ nyɔŋ na’ɛ gɔ?» 12Ɓɛɛ wiwii kifi nú: «Mɛ̀ nɛ́ okoo n’ɛnɛ ea sɛn katɛ‘m a̧ ha̧a̧ waya-te'i ha̧‘m, ɓɛɛ sa'm nyɔŋ.»
13GASA WAN Sɔ̧ tɔ̧ɔ̧ ha̧ okoo: «Nɛ́ ge a̧ mɛ dea’ɛ ge?» Ɓɛɛ okoo kifi nú: «Nɛ́ gɔ́k a̧ ɔra'm sa'm nyɔŋ waya-te'i.»#2 Kɔr 11.3; 1 Tim 2.14
Gɔna-kita ko Sɔ̧
14Ɓɛɛ GASA WAN Sɔ̧ tɔ̧ ha̧ gɔ́k: «Hee mɔ'ɔ nɛ mɛ dee mɔ hegɔ ga, mgbara o be saɗi in o saɗi-zaŋbɛɛ lɛŋ, fom a̧ ba mɛ; mɛ́ tɛ́ gbur zaŋ-mɛ nɛ nù wese lɛŋ, ɓɛɛ mɛ́ tɛ́ nyɔŋ nɛ́ fuunu ŋgimbi duka-a kɔ-mɛ zaŋnu. 15Mi tɛ e sɛnmɔ mgbara mɛ in okoo, mgbara o bezaŋ-mɛ in bezaŋ-aa; a̧ tɛ hɔ̧n zu-mɛ ɓɛɛ mɛ tɛ nyɔŋ dukui-naŋ-a.»#Tɔ̧ɔ̧ Hu̧ 12.17
16A̧ tɔ̧ɔ̧ ha̧ okoo: «Mɛ tɛ ba zaŋ, ɓɛɛ mɛ tɛ duk tɛ gasa bɔnɛ; nɛ́ tɛ gɔfamɔ a̧ mɛ tɛ ko nɛ bem; mɛ tɛ kɔ̧ wíì kɔ-mɛ nyɛmna, ɓɛɛ a̧ tɛ ɔ wan zu mɛ.»
17A̧ tɔ̧ɔ̧ ha̧ Adam: «Hee mɛ zia nɛ wen ko kóò kɔ-mɛ, ɓɛɛ mɛ nyɔŋ waya-te n'am tɔ̧ɔ̧ ha̧ mɛ‘e ká mɛ nyɔŋ na ga, mi tɛ fom nù wen zu mɛ. Nɛ́ bɔnɛ-bɔnɛ a̧ mɛ tɛ kpa nɛ̀ nyɔŋmɔ tɛ duka-a kɔ-mɛ wese lɛŋ.#Heb 6.8 18Nù tɛ dɛm nɛ tɛn in o tɛn-dara ha̧ mɛ; mɛ tɛ nyɔŋ nɛ o nyɔnɔ kpɛɛfɔ. 19Sɛn tɛ sɔbɛɛ sɔnti-mɛ a̧ mɛ tɛ kpa nɛ nyɔŋmɔ kɔ-mɛ, hegɔ hɔ wese nɛ mɛ tɛ si nɛ ɗoŋ tɛ nù, wen nɛ́ hi̧i̧ a̧ mɛ gboo nɛnɛ. Nɛ́ kpasawen, mɛ tɛɛ nɛ tɛ fuunu, mɛ tɛ si ɗoŋ tɛ fuunu.»
20Wiwii saa nin kóò kɔ̧-a̧‘e Ɛvɛ; wen a̧ duka nɛ nàà ko bíí lɛŋ. 21GASA WAN Sɔ̧ dee laa ndàrá ha̧ Adam in kóò, ɓɛɛ pi̧ tɛ-wa.
GASA WAN ndaka Adam in Ɛvɛ yinɛ sɛn kpɛɛfɔ Edɛn
22GASA WAN Sɔ̧ tɔ̧a̧: «Kinii, bíí duk hee ŋma kpɔk mgbara ɛ́ɛ́ ga sɛn tɛ iŋa mgbara demɔ in ɗaŋmɔ. Ɓɛɛ kinii a̧ beka ɓi waya-te duka-kpasa wen nyɔŋa-a ɓɔna, wen ká a̧ tɛɛ duk kpoo nɛ kpoo.»#Tɔ̧ɔ̧ Hu̧ 22.14 23Ɓɛɛ GASA WAN Sɔ̧ ndak a̧ sɛn kpɛɛfɔ Edɛn yinɛ, ha̧ a̧ mɛ wa nù nɛ Sɔ̧ dee nɛ a̧. 24Ɗoŋ nɛ Sɔ̧ ndaka wi’ɛi yinɛ kaɗi, a̧ ee o betom nɛ‘i sa'e keribim sɛn nú fɔ Edɛn nɛ war daŋa-wese wen pɛma te duka-kpasa nɛ gba-paa nɛ tok tok hee leɓe-wee ga.
Àwon tá yàn lọ́wọ́lọ́wọ́ báyìí:
KU̧U̧NAŊMƆ 3: GB11
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.