Mat 15

Zozii nyɩtɛ Zifʋnyaa 'la ‑jlɩmaa 'la wɔlɩ

(Mak 7.1-13)

1Zolizalɛmʋdua 'kʋ 'la Falizɩɛnnya* ɩya ‑jlɩmaazienya* ya Zozii ŋeni 'nyɩ ma yɔɔ 'cla lebhe: 2«'Lɩsaa 'la gbʋ ‑naa gɩlɩnyaa* 'plɩlɩ 'ta 'lɛ ‑a tokadɔcɩ 'la nʋnʋgbɩa 'kʋ bha? Maa wɔlʋ 'ta wlɩ saa ɩ ‑fata 'lɛ na 'fɩɔn ɩya ma 'ka li.» 3Ɔ ya maa 'cla lebhe: «'Nyɩ anyɩ, 'lɩsaa 'la gbʋ ala ‑jlɩmaa 'la gbʋ, 'a zʋ 'taa 'lɛ Laagɔ 'la ‑jlɩmaa bha? 4‑Masa Laagɔ nabhe: Zʋ ‑n 'nɔ ɩya ‑n to. Ɔ ya ‑awlɛ 'cla lebhe: Ɔmɔa ‑ɔ ‑cɩ ka 'lɛ ɔ to ‑aana ɔ 'nɔ vla na, ɩ ‑fata lebhe ma 'bhlɔɔ. 5‑Ma anyɩ a cla lebhe: Ncaatʋtʋʋntʋa ‑ɔ cla 'lɛ ɔ to ‑aana ɔ 'nɔ lebhe lʋʋa ‑n cɩ 'kaa 'lɛ 'ma ɩya n 'kaa ‑mɔ 'lɛ klalɩ na, n yʋʋ Laagɔ va na, 6'dɛ ‑naanɔa 'tanɩ ɔ to 'la 'klʋnyɩlɩɛ ‑ka. 'Lɩka ‑sa, ala ‑jlɩmaa 'la gbʋ, a ‑sa 'lɛ 'dɛ Laagɔ 'la wɔɔnyɩtʋa. 7Yooyo ncɛlɩnyɩ! Laagɔnekʋnyɩtɛnyɔ* Izayii ‑kaa 'ge, daa ɔ 'cla 'lɛ lebhe:

8 'Lɔlʋʋ ‑naa, nimli 'kʋ ʋ kaanvʋlʋʋn 'lɛ,

‑ma ʋla pɔlɛa tlʋʋn cɩ da.

9 'Kpɔkpɔ 'titi ma gʋgwlaan 'lɛ,

sa, mala wɔlɩa ma ca 'lɛ na,

ncɛlɩ 'la ‑jlɩmaa a ‑glɩ 'lɛ.»

Lɩɩa ‑ɩ ple 'lɛ nclɔɔ nyinyinʋnyɔ na

(Mak 7.14-23)

10Na, Zozii ya ‑alawleea la 'nyɩ ɔ yaa 'cla lebhe: «A poo 'nyukwliin ɩya a 'nu! 11Ɩmɩa ‑ɩ mʋ 'lɛ nclɔɔ neen na, ‑n 'ta ɩmɩ ‑ɩ nyumo 'tɔɔ 'lɛ, ‑ma ɩmɩa ‑ɩ 'wlʋlʋɔ 'lɛ neen na, ɩmɩ ‑ɩ nyumoo 'lɛ.» 12Gɩlɩnyaa* yɔɔ cɩmɛ 'nyɩ ma yɔɔ neencla lebhe: «‑N ‑ci sɛɛ lebhe ‑naa wɔɔnyɩtʋa ya Falizɩɛnnyaa* 'dɩdɔ bha?» 13Ɔ ya 'cla lebhe: «Su 'tʋtʋʋntʋa, n Toa ‑ɔ ‑kʋ 'lɛ ‑laagɔɔn na, ɔ 'ta 'lɛ golo na, ma cɩʋ ‑gluu ‑sa. 14A 'talɩ maa 'ciin! 'Citutunya ma ‑glɩ 'lɛ 'nyɩ ma ‑pʋʋ 'lɛ 'citutunya 'kʋklʋʋn. 'Nyɩ 'citutunyɔ ‑ka citutunyɔ 'kʋklʋʋn ‑pʋʋ na, ka maa ‑mɔsɔa cɩ 'ka 'lɛ 'bhukuun bhlili!»

15Pɩɛlɩ ya nesa 'nyɩ ɔ yɔɔ 'cla lebhe: «‑Sa ‑anyɩ ‑nyandla ‑naa ‑zɔn.» 16‑Ma Zozii ya 'cla lebhe: «Na anyɩ ‑ma sɛɛ, ka ala wɔɔgugwiea 'ta ka ‑azla 'lɛ 'gbo kalɩ bha? 17A 'ta sɛɛ ‑ci lebhe ‑tɛtɛa 'fɩan ‑ɩ mʋ 'lɛ nclɔɔ neen na, ka ɩ 'plɩlɩɔ 'lɛ nɩkplaan 'nyɩ ɩ wlʋ 'lɛ ‑zɔn bha? 18‑Ma ɩmɩa ‑ɩ 'wlʋlʋ 'lɛ nclɔɔ neen na, pɔlɛ 'ciin ɩ 'wlʋlʋɔ 'lɛ 'nyɩ ɩmɩ ‑ɩ nyumoo 'lɛ Laagɔ 'ci 'kʋ. 19‑Masa pɔlɛ 'ciin, 'yɛpɩ wɔɔgugwɩenyinye, ncaabhlalɩɛ, ŋlʋmatɩɛ, ‑badaaglu, 'wi, ‑kplakpladanʋfʋɛlilie ɩya ncaavlalɩɛ, ɩ 'wlʋlʋ 'lɛ. 20'Lɩka ɩmɩa ‑ɩ nyumo 'lɛ nclɔɔ na. ‑Ma nclɔɔ 'ta wlɩ wɔlʋ 'nyɩ ɔ ‑ka li na, 'ɩ nyumoo 'tɔɔ Laagɔ 'ci 'kʋ.»

Lowluŋlɔ bhlo ya ɔla pɔɔtɛtɛa Zozii 'kʋ zʋ

(Mak 7.24-30)

21Zozii ya 'dɛ 'wlʋ 'nyɩ ɔ ya Tili ɩya Sidɔɔnbhlɩa 'kʋ mʋ. 22'Yɛpɩ, Kanaaŋlɔ bhlo yɔɔ 'bhlɩ ci, ɔ yaan ‑gaa 'nyɩ ɔ ya 'cla lebhe: «‑Kwlenyɔ, Daviti 'la 'Cʋ, 'lɩɩn ŋaazɩɩn! ‑Ma 'na ŋlʋcʋkwlaa 'wugo ‑nyunyu bhɩɔ 'kwlɩ ‑gbɔɔn.» 23‑Ma, ɔ 'tɔɔ nesalɩ. Ɔla gɩlɩnyaa* yɔɔ cɩmɛ 'nyɩ ma yɔɔ 'cla lebhe: «'Tlio ‑anyɩ leen, ‑ma ɔla 'kasɛa ‑zu ‑gbɔɔn.» 24Zozii ya nesa 'nyɩ ɔ ya 'ŋlɔa 'cla lebhe: «Izlayɛlɩlɔlʋa* 'la 'bhlabhlɩa ‑ɩ ‑mlɔ 'lɛ na, ɩla gbʋ ‑tɛɛ n ci 'lɛ.» 25‑Ma 'ŋlɔa ya ci, ɔ ya Zozii ‑deliin ‑kukoonkplii sasla 'nyɩ ɔ yɔɔ 'cla lebhe: «‑Kwlenyɔ, ciin 'kʋ!» 26‑Ma ɔ yɔɔ 'cla lebhe: «Ɩ 'ta nanɩ lebhe ma 'ma 'cuoa 'la 'flawoa ɩya ma 'pʋʋ goye.» 27'Ŋlɔa yɔɔ 'cla lebhe: «‑Kwlenyɔ, wɔlɩa ‑n nyɩtɛ 'lɛ na, ɩ ‑glɩ ‑nʋawlɛ. ‑Ma 'bhlɩmɔɔn, ka goyea li 'klia ‑ɩ wlʋ 'lɛ ɩ tocɩa 'la 'tlɔnblɩa 'kʋ 'nyɩ ‑ɩ bhli 'lɛ ‑dʋdʋ 'kʋ na.» 28Na, Zozii yɔɔ 'cla lebhe: «'Ŋlɔ, ‑naa pɔɔtɛtɛa 'ghli! Na, saa ‑n 'matɩ 'lɛ na, 'naa ɩ 'plɩ sɛɛ!» Dɩpɩa bhlogbɩɩ, ɔla 'cileea ya jabha.

Zozii ya guzenya ‑bhutukpa jabha

(Mak 7.31-37)

29Zozii ya 'dɛ 'wlʋ 'nyɩ ɔ ya Galileenyia cɩ mʋ. Ɔ ya 'kike bhlo 'wlu ‑gblaa 'nyɩ ɔ ya sakʋ. 30Ncaabhutukpa yɔɔ 'bhlɩ ci, maya bhɩbhlinya, 'citutunya, 'bhlɛnya, ‑amunaanya ɩya guzenya ‑bhutukpa ‑anʋa, ma ya maa Zozii ‑deliin ‑la, 'nyɩ ɔ ya maa jabha. 31Na, ncaabhutukpaa ‑ɔ ‑kʋa 'lɛ 'dɛ na, daa ma lɩa 'lɛ ‑amunaanya 'nyɩ ma nyɩtɛa 'lɛ, 'bhlɛnya 'nyɩ ma jabhaa 'lɛ, bhɩbhlinya 'nyɩ ma namʋa 'lɛ 'nanɩ 'nyɩ 'cɩtutunya lɩanɩa 'lɛ sa wɩaan na, nikpoo ya maa sla. 'Nyɩ ma ya Izlayɛlɩ* 'la Laagɔa 'klʋgba!

Zozii ya ncaatabhli ‑nmɔɔna lililɩɩ 'nyɩ

(Mat 14.13-21; Mak 8.1-10)

32Zozii ya ɔla gɩlɩnyaa* ɔcɩ cɩ lalɩ 'nyɩ ɔ ya maa 'cla lebhe: «‑Alawlee ‑naa 'la gbɩa ‑kaan ŋaazɩ, sa daa tootoa ma ‑kaa ‑amʋa 'lɛ cɩ ci na, ɩla clɩɩ ‑mɔta ‑kʋnɩ 'lɛ ‑da 'nyɩ ma 'tanɩ lililʋʋ ‑ka. N 'ta ‑wa lebhe n 'ka maya 'mɩ kɔfɩa 'cintalɩ. 'Ci 'kʋ 'la kasɛ maa 'plɩ ‑gugwiea 'kʋ.» 33Gɩlɩnyaa yɔɔ 'cla lebhe: «‑Da ‑naa ‑ɩ ‑kʋ 'lɛ ɩcɩɩn na, 'ndagbazɩ 'dɛ 'la 'flawoa ‑ʋ -cɩ kaa 'lɛ ‑alawlee ‑naa lua na, 'wlʋlʋa 'lɛ bha?» 34Zozii ya maa neencla lebhe: «'Flawi ‑zlʋsaa a ‑kaa 'lɛ ‑da bha?» Ma nabhe: «‑A ‑ka ‑da 'flawi ‑ngbɔɔsɔ ɩya ‑zlii cʋ ‑zlʋsaasa.» 35Zozii ya ncɛlɩa 'cla lebhe ma kʋ ‑dʋdʋa 'kʋ sa. 36Ɔ ya 'flawia ‑ngbɔɔsɔa ɩya ‑zliia 'ma, ɔ ya Laagɔ bhɔlʋ, ɔ yɩɩ 'kliindɩdɩlɩ, ɔ yɩɩ ɔla gɩlɩnyaa 'nyɩnɩ 'nyɩ gɩlɩnyaa yɩɩ ncɛlɩa poli. 37Maa 'fɩan ya li, ma ya lo 'nyɩ ɩmɩa ‑ɩ ‑toa 'lɛ na, ma yɩɩ 'kubhli 'nyɩ ɩ ya ‑toku ‑ngbɔɔsɔ 'kʋ ye. 38Ncɛlɩa 'fɩan ‑ɔ lia 'lɛ 'flawia na, ma ‑glɩa ncaatabhliwli ‑nmɔɔna (4.000). Ma zɛlɩmʋ 'ta 'ŋwlɛa ɩya 'cuoa. 39Daa Zozii 'talɩ 'lɛ ncɛlɩa 'cin na, ɔ ya gɔlʋʋn 'tɔ 'nyɩ ɔ ya Magadaanbhlɩa 'kʋ mʋ.

Àwon tá yàn lọ́wọ́lọ́wọ́ báyìí:

Mat 15: NTLD13

Ìsàmì-sí

Pín

Daako