Luk 17
17
Zozii ca ɔla gɩlɩnyaa dɩgalɩ
(Mat 18.6-7; Mak 9.42)
1Zozii ya ɔla gɩlɩnyaa* 'cla lebhe: «'Ma cɩ 'ta mino ɩya ma 'ka wɔlɩa ‑ɩ fa 'lɛ nclɔɔ nyinyi na 'nylugolu. ‑Ma ‑munzue bho ɔmɔa ‑anɔa 'dɛ 'la wɔlɩa cɩ 'ka 'lɛ 'kʋ 'plɩlɩ na. 2Ɩ nanɩa ɔla da le ma gʋalɩa 'mɔɔ cokwie 'kadie ‑blɩɩn ɩya ma 'pɔɔ 'nyiin, daa ɔ 'ta ka 'lɛ cuo ‑naa, bhlo nyinyiin fa na. 3Na, a zʋlʋ acɩ pɔlɛ 'kʋ. Gbazɩ ‑n bholi ‑kɔɔ wɔlɩ cɩ nʋ na, ‑sɔɔ 'bɩ ɩya ɔ ‑ka cibhlili le ɔ 'ta 'nanɩ nʋ na, 'maa vɔɔ. 4'Nyɩ gbazɩ ‑n bholi ‑kɔɔ wɔlɩ cɩ nʋ dɩ ‑ngbɔɔsɔ zezezeliin, 'nyɩ ɔ ‑kɔɔ dɩ ‑ngbɔɔsɔ 'bɩɩn cili, 'nyɩ ɔ ‑kɔɔ 'cla lebhe n 'ta 'nanɩ nʋ na, 'maa vɔɔ.»
Pɔɔtɛtɛ
(Mat 17.19-20)
5Na, Zozii 'la lobhulobhunyaa* ya ‑Kwlenyɔa 'cla lebhe: «Zʋlʋ ‑ala pɔɔtɛtɛ 'kʋ.» 6‑Kwlenyɔa ya 'cla lebhe: «Ɩ ‑ka ‑kʋ le a ‑kaa pɔɔtɛtɛ ‑ka 'nyɩ ɛ ‑ka ‑kʋ le ‑mutadɩsucie lɛɛ 'bhebhe na, a cɩ su ‑naa 'cla lebhe: 'Wlʋ ‑gluu ɩya 'nylugolu ncɩ gea nɩkplaan, ʋ cɩ 'ka sɛɛ nʋ.»
Lobhocuo 'kpɔɔ a ‑glɩ 'lɛ
7«Anyɩ sidiin, ‑anɔsaa ‑ɔ ‑kaa 'lɛ lobhocoa ɔ golo 'lɛ ɔla 'kwla, ‑aana ɔ kpa 'lɛ ɔla mla na ‑ka, 'nyɩ ɔ ‑kaa 'lɛ 'kwlaan 'wlʋ, ɔ cɩ 'kɔɔ 'lɛ 'cla lebhe: Ci 'faanfan ɩya ‑n ka li bha? 8‑Ma ka ɔ ‑cɩ 'tɔɔ 'lɛ 'cla lebhe: Mʋ ɩya n piin nyɩ, kaci ‑naa lokua ɩya n ‑ka lida ‑kʋ 'nyɩ n ‑ka 'mlada ‑kʋ na, lʋʋ n ‑ka 'matɩ na, ‑n kaan mʋ 'nyɩ, ɩya ɩla leen, ‑mɔɔ ‑ma ‑n ka li ɩya ‑n ka 'mla bha? 9A gugu lebhe ɔ cɩ lobhoco ‑kpaacɛ 'pa, ‑ofi le ɔ ya ɩmɩa ɔ 'clalɩɔ 'lɛ na, nʋ bha? ‑Wɔɔ n gugu 'ta sɛɛ. 10Na, 'sɛtɛɛ bhlogbɩɩ, anyɩ ‑ma, daa a cɩ ka 'lɛ ɩmɩa 'fɩan ma 'clalɩ 'lɛ anyɩ na nʋ na, a 'cla lebhe: Lobhocuo 'kpɔɔ na, maa ‑a ‑glɩ 'lɛ. Ɩmɩa ‑a ‑cɩ kaa 'lɛ nʋ na, ɩmɩ ‑tɛɛ ‑a ya 'lɛ nʋ.»
Zozii ya kokobhebhlanya 'kʋgba jabha
11Zozii ‑kʋa 'lɛ Zolizalɛmʋ mʋda na, ɔ ya Samalii ɩya Galileebhlɩa 'kʋ 'plɩlɩ. 12Daa ɔ ‑kʋa 'lɛ 'du bhlo nɩkplaan bleda na, kokobhebhlanya 'kʋgba yɔɔ ‑gugwie 'kʋ cili. Ma ya 'vʋʋn 'nylugo 13'nyɩ ma yaan ‑gaa 'nyɩ ma yɔɔ 'cla lebhe: «Canyɔ Zozii, 'lɩ ‑anyɩ ŋaazɩɩn!» 14Zozii 'lɩ 'lɛ maa na, ɔ ya maa 'cla lebhe: «A mʋ, a pala acɩ ‑teyiyinyaa.» 'Nyɩ daa ma ‑kʋa 'lɛ mʋda na, ma ya jabha. 15Maa sidiin 'la bhlo, daa ɔ 'lɩ 'lɛ le ɔ ya jabha na, ɔ ya cɔlɔ 'nyɩ ɔ nyɩa Laagɔ 'klʋagba nikadieen. 16Ɔ ya Zozii ‑deliin ‑kukoonkplii sasla, ɔ ya 'klʋ ‑dʋdʋ ‑la 'nyɩ ɔ yɔɔ bhɔlʋ. Nclɔɔ ‑naa, ɔ ‑glɩa Samaliinyɔ. 17Zozii ɔ ya 'cla lebhe: «‑N 'ta maa 'kʋgbaa ‑tɛtɛa ‑ɔ 'ta 'lɛ jabha bha? 'Nyɩ ‑danaanʋaa ‑nvɔɔnaa, 'nda ma ‑kʋa 'lɛ bha? 18Bhlogbɩɩ 'ta maa sidiin 'wlʋ, ɔ ka cɔlɔ ɩya ɔ 'ka Laagɔ bhɔlʋ, ‑n 'ta le lowlunyɔ ‑naa ‑tɛɛ na!» 19Na, Zozii ya Samaliinyɔa 'cla lebhe: «‑Bho 'kʋ, mʋ. ‑Naa pɔɔtɛtɛa ɛ yɔɔ gbʋʋnsa.»
Laagɔ 'la Nyɩbhɛlɩdua ‑kʋ anyɩ sidiin
20Falizɩɛnnyaa* ya Zozii neencla lebhe: «Clɩɩ saa 'kʋ Laagɔ 'la Nyɩbhɛlɩdua* cɩ 'kaa 'lɛ ci bha?» Ɔ ya maa 'cla lebhe: «Laagɔ 'la Nyɩbhɛlɩdua, ʋ ci 'ta le nʋnʋgbɩa nclɔɔ 'la 'ci 'lɩ 'lɛ na 'bhisa. 21Na, 'ma cɩ 'ta 'cla lebhe: 'Lɩkʋʋ ‑da ‑aana 'lɩkʋʋ 'yɛpɩ. ‑Masa Laagɔ 'la Nyɩbhɛlɩdua ‑kʋ anyɩ sidiin na.»
Nclɔɔa 'Cʋa 'la ciclɩɩa
(Mat 24.26-27; Mak 13.21-22)
22Na, Zozii ya gɩlɩnyaa* 'cla lebhe: «Clɩɩ ‑anɩ cɩ 'ka ŋeni ɩya a 'ka wabha le a 'ka Nclɔɔa 'Cʋa* clɩɩ bhlogbɩɩ 'titi ‑tɛɛ 'ciinlɩ ‑ma 'a cɩ 'tɔɔ 'lɩ. 23Ma cɩ 'ka anyɩ 'cla lebhe: Ɔ ‑kʋ 'yɛpɩa ‑wɔlʋ, ‑aana ɔ ‑kʋ ‑da. A 'la mʋa, a 'la faa sɔmɩ ɩya a 'la mʋa 'yɛpɩ. 24‑Ofi lebhe, saa ‑laagɔɔn ‑ka 'lɛ 'wɛtɩa 'nyɩ ɩla 'wɛtɩalɩ 'cɩlɩ 'lɛ ‑laagɔzɔan 'kʋ na, sɛɛ Nclɔɔa 'Cʋa cɩ 'ka 'lɛ ɔla ciclɩɩa 'kʋ kʋ. 25‑Ma ɩ ‑fata le 'kwlɩ bhɩɔ ‑bhutukpa ɩya ‑pɔtɔnʋ 'la ncɛlɩa, ma ‑blɔɔ 'fɩɔn.
26Saa ɩ 'plɩa 'lɛ Nowee 'la 'bhlɛsʋa nɩkplaan na, ɩmɩ ‑sakasaka ‑ɩ ‑cɩ ka 'lɛ Nclɔɔa 'Cʋa 'la clɩɩa nɩkplaan 'plɩ. 27Ncɛlɩ lia, ma mlaa, ma 'cɩcɩlɩa, ‑aan 'nyɩ clɩɩa 'kʋa Nowee 'tɔ 'lɛ gɔlʋa nɩkplaan na ɩ ya 'lɛ ŋeni, 'nyɩ bhlabhlanyu 'kadiea ya 'lɛ ci 'nyɩ ʋ ya 'lɛ maa 'fɩan nua. 28‑Aana saa ɩ 'plɩa 'lɛ Lɔtʋ 'la 'bhlɛsʋa nɩkplaan na 'sɛtɛɛ bhlogbɩɩ ɩ cɩ 'ka 'lɛ kʋ: Ncɛlɩ lia, ma mlaa, ma pɩa, ma zʋa 'pɛlʋ, ma goloa, ma slaa ‑palɩ. 29‑Ma clɩɩa 'kʋa Lɔtʋ 'wlʋ 'lɛ Sodɔmʋ na, 'nyɩ ‑kosu ɩya pipi slo ya ‑laagɔɔn 'wlʋlʋ, ɩ ya maa 'wlu 'kɔsɔ le bhlabhlanyu 'nyɩ ɩ ya maa 'fɩan nua. 30Clɩɩa 'kʋa Nclɔɔa 'Cʋa cɩ 'ka 'lɛ ɔcɩ pala na, 'sɛtɛɛ bhlogbɩɩ ɩ cɩ 'ka 'lɛ 'plɩ.
31'Dɛ 'la clɩɩa 'kʋ, ɔmɔa ‑ɔ cɩ ka 'lɛ ‑palʋ 'wlu 'la ‑gwlɛlɩdaa ‑kʋ ɩya ‑ɔ ka 'lɛ ɔla lɩɩ ‑palʋa ‑zɔn kalɩ na, ɔ 'la kwlia, ɔ 'la 'mɩɩ. 'Nyɩ 'sɛtɛɛ bhlogbɩɩ, ɔmɔa ‑ɔ cɩ ka 'lɛ 'kwlaan kʋ na, ɔ 'la cɔlɔa. 32A luoli Lɔtʋ nʋŋlɔ 'la wɔlɩa. 33Ɔmɔa ‑ɔ ‑cɩ ka 'lɛ 'matɩ le ‑ɔ ka ɔla jabhʋa 'kʋtɩtɔlʋ na, ɔla jabhʋa cɩ mlɔ. 'Nyɩ ɔmɔa ɔla jabhʋa cɩ 'ka 'lɛ mlɔ na, ɔ cɩ 'kʋʋ gbʋʋnsa. 34N solu anyɩ, 'dɛ 'la dobhea, ncɛlɩ ‑mɔsɔ cɩ 'kusia bhlogbɩɩ 'kʋ pʋ: Ma cɩ 'ka bhlo 'ma ɩya ma 'ka bhlo te. 35'Ŋwlɛ ‑mɔsɔ cɩ 'ka lɩɩ bhutida ‑kʋ, ma cɩ 'ka bhlo 'ma ɩya ma 'ka bhlo te.» [ 36]#17.36 ‑Godogodofluwia ‑anɩ ya wɔɔke ‑naa Zieziewɔlɩa nɩkplaan ‑pla: «'Nyɩ ncɛlɩ ‑mɔsɔ cɩ 'ka 'kwlaan ‑kʋ, ma cɩ 'ka bhlo 'ma ɩya ma 'ka bhlo te.» 37Na, gɩlɩnyaa* ya Zozii neencla lebhe: «‑Kwlenyɔ, 'ndagbazɩ ɩmɩ ‑naa cɩ 'kaa 'lɛ 'plɩlɩ bha?» Ɔ ya maa 'cla lebhe: «Daa mlazʋ kʋ 'lɛ na, dɩpɩa ‑daabɔlɩ 'wlalɩ 'lɛ 'wlu.»
Àwon tá yàn lọ́wọ́lọ́wọ́ báyìí:
Luk 17: NTLD13
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Dida New Testament © Bible Society of Côte d'Ivoire, 2013.
