Luk 15

'Bhlabhlɛa ‑ɛ mlɔ 'lɛ 'nyɩ ma 'lɩ 'lɛ na

(Mat 18.12-14)

1‑Lapooclanyaa ɩya nyinyinʋnyaa, maa 'fɩan ya Zozii cɩmɛ le ma 'kɔɔ 'nyukwliinpo. 2Na, Falizɩɛnnyaa* ɩya ‑jlɩmaazienyaa* 'ŋuŋua 'nyɩ ma claa lebhe: «Nclɔɔ ‑naa kla nyinyinʋnyaa 'nanɩ 'nyɩ ɔya maasɔ lili dabhlo!»

3Na, Zozii ya ‑nyandlaa ‑naa bu 'nyɩ ɔ ya maa 'cla lebhe: 4«Anyɩ sidiin, ‑anɔsaa ‑ɔ ‑kaa 'lɛ 'bhlabhlɩ ‑gwlɩɩ ‑ngbi ‑ka 'nyɩ gbazɩ bhlo ‑ka 'lɛ mlɔ, ‑ɔ te 'taa 'lɛ ‑danaanɩa ‑gwlɩɩ ‑nmɔɔnaa ɩya 'kʋgba ‑nvɔɔnaa 'pʋpʋa nɩkplaan 'nyɩ ɔ mʋ 'ta 'lɛ ɛmɛa ‑ɛ mlɔ 'lɛ na, 'matɩkan ‑aan ɩya ɔ 'kɛɛ 'lɛ 'lɩ bha? 5'Nyɩ daa ɔ yɛɛ 'lɛ 'lɩ na, ɔ gbɛɛ pɔlɛkʋmɛnɔ nɩkplaan ɔla ‑papoa 'kʋ 6'nyɩ ɔ ‑ka 'sleen cɔlɔ na, ɔ 'wlalɩ 'lɛ 'ɔ 'nagwɩɛcɩ ɩya ɔla cɩkʋkʋlʋnyaa 'wlu 'nyɩ ɔ cla maa lebhe ‑a nʋ ‑pɔpʋɛ, sa 'na 'bhlabhlɛa ‑ɛ mlɔa 'lɛ na, n yɛɛ 'lɩ. 7Na, n solu anyɩ, 'sɛtɛɛ bhlogbɩɩ, pɔlɛkʋmɛnɔ cɩ 'ka 'lɛ ‑laagɔɔn kʋ, nyinyinʋnyɔ bhlogbɩɩa ‑ɔ cala 'lɛ kwla na, 'la gbʋ ɩya ɩ 'ka 'lɛ 'kʋnylugolunya gwlɩɩ ‑nmɔɔnaa ɩya 'kʋgba ‑nvɔɔnaa, ‑ɔ 'matɩ 'ta 'lɛ kwlacalalɩɛ na 'kʋzi!

'Dalaa ‑a mlɔ 'lɛ 'nyɩ ma 'lɩ 'lɛ na

8‑Aana ŋlʋsaa ‑ɔ ‑kaa 'lɛ 'pɔɔnkʋgba ‑ka 'nyɩ gbazɩ 'pɔɔcie ‑kaa 'lɛ mlɔ, 'ɔ ŋama 'taa 'lɛ ‑kanie, nylupu 'taa 'lɛ ‑palʋa ‑zɔn 'nyɩ ‑ɔ 'matɩ 'tɛɛ 'lɛ 'nanɩ ‑aan ‑ɔ ‑kɛɛ 'lɩ bha? 9'Nyɩ daa ɔ yɛɛ 'lɛ 'lɩ na, ɔ 'wlalɩ 'lɛ ɔ 'nagwɩɛcɩ ɩya ɔla cɩkʋŋlɛa 'wlu, 'nyɩ ɔ cla 'lɛ maa lebhe ‑a nʋ ‑pɔpʋɛ, sa 'na 'dalaa ‑a mlɔa 'lɛ na, n yaa 'lɩ!› 10Na, n solu anyɩ le 'sɛtɛɛ bhlogbɩɩ, pɔlɛkʋmɛnɔ cɩ 'ka 'lɛ Laagɔ 'la 'bhlaandleecɩa* sidiin kʋ, nyinyinʋnyɔ bhlogbɩɩa ‑ɔ cɩ ‑ka 'lɛ kwlacala na, ɔla gbʋ.»

'Cileea ‑ɔ mlɔ 'lɛ 'nyɩ ma 'lɩa 'lɛ na

11Zozii ya ‑awlɛ 'cla lebhe: «Nclɔɔ bhlo ‑kaa 'cuo ‑mɔsɔ. 12Leennanɔa ya ɔ to 'cla lebhe: To, ‑ajaa 'nyɩ 'na daa. Na, toa ya maa ɔla kalɩkalɩlɩɩa ɩya ɔladaa ɔ ‑sa 'lɛ ɔcɩ na 'nanɩa poli. 13Clɩɩ ‑zlʋsaasa 'plɩ 'lɛ na, lennanɔa 'wlalɩ 'lɛ ɔla 'nanɩa ‑tɛtɛa 'wlu na, ɔ ya 'plɩ, ɔ ya 'koonkoon bhlɩ 'kʋ lowluun mʋ 'nyɩ ɔ ya 'yɛpɩ ɔla 'dalaa 'fɩan nyumonu ‑badaaglulilie nɩkplaan. 14Daa ɔ nyumo 'lɛ 'dalaa 'fɩan na, ŋɔmʋ 'kadie ya bhlɩ ‑naa 'kʋ pla 'nyɩ ɔ ya ‑mielɩɛ bhɔ. 15Ɔ ya 'kʋbho 'nyɩ ɔ ya bhlɩ ‑naa 'kʋ 'la nclɔɔ bhlo 'la ‑gbɔglɛ likan mʋ. Nclɔɔ ‑naa yɔɔ 'la 'kwlaa nɩkplaan fa le ɔ 'ka ɔla bhuzia 'klʋlɩ. 16Ɔ yaa ‑wabha le ɔ cɩa bhuzia 'la nyɩa li, ‑ma nclɔɔ bhlogbɩɩ 'nyɩ 'taa 'mɔɔ mɩ. 17Na, ɔ ya ɔcɩɩn mʋ 'nyɩ ɔ ya ɔcɩ 'cla lebhe n to 'la lobholinʋnyaa, ‑zlɔsaa li 'taa 'lɛ ɩya nyɩ 'ka ‑to 'nyɩ ‑amʋ n ‑kʋ 'lɛ ‑wɔlʋ 'nyɩ n 'kulu 'lɛ ŋɔmʋʋn bha! 18N cɩ 'ka n to 'bhlɩ mʋ ɩya n 'kɔɔ 'cla lebhe to, n ya Laagɔ nyinyi cɩ nʋ, 'nyɩ n yɔɔ 'lɛ nyinyi cɩ nʋ. 19N 'tanɩ 'kʋ 'kɔsɔ le ‑n laan ‑naa 'cʋ, ‑ma 'maa 'manɩɩn le ‑naa lobholinʋnyaa bhlo 'bhisa.

20Na, ɔ ya 'plɩ ɔ ya ɔ to 'bhlɩ mʋ. Daa ɔ ‑kʋ 'kaa 'lɛ 'koonkoon na, ɔ to yɔɔ 'lɩ 'nyɩ 'ŋaazɩ yɔɔ pla, ɔ ya sɔmɩ fa, ɔ yɔɔ ‑blɩɩn bhlili 'nyɩ ɔ yɔɔ ‑kpacɩ cɩ ŋʋŋɔnʋ. 21Na, 'cileea yɔɔ 'cla lebhe: To, n ya ‑n ‑ya Laagɔ nyinyi cɩ nʋ. N 'tanɩ 'kʋ 'kɔsɔ le ‑n laan ‑n ‑yowli. 22‑Ma toa ya ɔla lobhocuoa 'cla lebhe: A ‑lamʋ 'faanfan lokua nɩkplaan ‑anɛnaa ‑ɛ ‑nanɩnɛna ɩya a bibieo. A zʋɔ ‑kpatlʋwacie ‑wlɩcien ɩya a zʋɔ ‑gbanbʋ. 23A ‑lamʋ nʋanʋa bhliicoa, a 'bhlɛɛ, ‑a li ɩya ‑a nʋ ‑pɔpʋɛ, 24sa, n ‑yowlia ‑ɔ ‑kʋ 'lɛ ‑da na, ɔ yaa 'ku 'nyɩ ɔ ya 'lɛ 'kwɩɩnkʋbho, ɔ yaa mlɔ 'nyɩ ɔ ya 'lɛ ‑lɩɔ. 'Nyɩ ma ya ‑pɔpʋɛ nʋlɩɛ bhɔ.

25'Dɛ la daa, 'cikpasaa ‑kʋa 'kwlaan. Daa ɔ ci 'lɛ 'nyɩ ɔ mɛ 'lɛ 'slea cɩ na, ɔ ya 'lʋ 'nu. 26Ɔ ya lobhoco bhlo la 'nyɩ ɔ yɔɔ ɩmɩa ‑ɩ plɩa 'lɛ na neencla. 27Lobhocoa yɔɔ 'cla lebhe: ‑N bholi ci 'lɛ 'nyɩ ‑n to ya 'lɛ nʋanʋa bhliicoa 'bhla, sa ɔ ya 'lɩ le ɔla ‑jajanaanɔ cɔlɔ 'lɛ na. 28Na, 'cikpasaa ya dɔgbɛ 'ma 'nyɩ ɔ 'taa ‑wa le ɔ 'ka 'sleen ble. Ɔ to ya ‑zɔnwlʋ le ɔ 'kɔɔ bhibhie le ɔ ble 'sleen. 29‑Ma ɔ ya ɔ to 'cla lebhe: 'Lɩka liowli ‑bhutukpa n lobhoo 'lɛ 'nyɩ n 'ta 'ka ‑azla ‑naa niwɔlɩa 'bɩsa. ‑Ma ‑amʋ ‑n 'ta 'ka ‑azlaan wliilɛɛ 'bhebhe 'nyɩ le n ya n 'nagwɩɛcɩ 'ka 'fɛtlɩ li. 30‑Ma daa ‑naa 'cilee ‑naa ci 'lɛ na, ɔmɔa ‑ɔ ya 'ŋwlɛ ya 'lɛ ‑naa 'nanɩa li na, n ya ɔmɔ 'wluku nʋanʋa bhliicoa 'bhla. 31Na toa yɔɔ 'cla lebhe: 'Na 'cʋ, ‑mɔɔ, n ‑yɔɔsɔ ‑kʋ 'lɛ ‑da clɩɩa 'fɩan, 'nyɩ ‑tɛtɛa 'fɩan n nɩnɩ 'lɛ na, ɩ ‑glɩ ‑nanɩ. 32Na, ɩ ‑fata lebhe ‑a lia 'fɛtlɩ ɩya ‑a nʋa ‑pɔpʋɛ, sa ‑n bholia ‑n ‑jlɛ 'lɛ ‑da na, ɔ yaa 'ku 'nyɩ ɔ ‑janɩ 'lɛ, ɔ yaa mlɔ 'nyɩ ɔ ya 'lɛ ‑lɩɔ.»

Àwon tá yàn lọ́wọ́lọ́wọ́ báyìí:

Luk 15: NTLD13

Ìsàmì-sí

Pín

Daako