Zan 3
3
Zozii ɩya Nikodɛmʋ 'la dɩzʋlɩɛ
1Nclɔɔ bhlo ‑kʋa, ma laa 'mɔɔ Nikodɛmʋ. Ɔ ‑glɩa Falizɩɛnnyɔ* ɩya Zifʋnyaa* tocɩa 'la nɩkplaan bhlo. 2Ɔ ya dobhesa ci, ɔ ya Zozii ŋeni 'nyɩ ɔ yɔɔ 'cla lebhe: «Canyɔ, ‑a ‑ci sɛɛ lebhe ‑n ‑glɩ canyɔa Laagɔ ya 'lɛ lobhu na, sa nclɔɔ bhlogbɩɩ 'cɩ 'ta mino ɩya ɔ 'ka 'ciinzizielɩlobholia ‑n nʋ 'lɛ na nʋ, ɩ ‑ka ‑kʋ le Laagɔ 'tɔɔ leen ‑kʋ na.» 3Zozii yɔɔ 'cla lebhe: «N soluo, ‑ɩ ‑glɩ ‑nʋawlɛ. Nclɔɔ bhlogbɩɩ cɩ 'ta Laagɔ 'la Nyɩbhɛlɩdua* 'ciinlɩ, ɩ ‑ka ‑kʋ le ɔ 'ta ka ‑mɔsɔ ‑mɔsɔ ‑valɩɔ na.» 4Nikodɛmʋ yɔɔ 'cla lebhe: «'Nsasa nclɔɔa ‑ɔ ya 'lɛ ‑glɛɛ na, ma cɩ 'kɔɔ 'lɛ valɩlɩɛ mino bha? Ɔ cɩ ‑mɔsɔda ɔ 'nɔ nɩkplaan blelɩɛ mino 'nyɩ ɔ cɩ ‑awlɛ ‑valɩɔ bha?» 5Zozii yɔɔ ŋeennonu lebhe: «N soluo ‑nʋawlɛ: Ɩ ‑ka ‑kʋ le ‑n 'ta 'nyu ɩya 'Wugoa na, nclɔɔ bhlogbɩɩ cɩ 'ta ‑mɔsɔ ‑mɔsɔ ‑valɩlɩɔ ɩya ɔ 'ka mino, ɔ 'ka Laagɔ 'la Nyɩbhɛlɩdua nɩkplaan ble. 6Ɩmɩa 'nyɛkɛ valɩ 'lɛ na, ɩ ‑glɩ 'nyɛkɛ 'nyɩ ɩmɩa 'Wugoa valɩ 'lɛ na, ɩ ‑glɩ 'lɛ 'wugo. 7N -kɔɔ 'cla lebhe: Ɩ ‑fata lebhe a ‑valɩlɩɔ ‑mɔsɔ ‑mɔsɔ#3.7 Zienya ‑anʋa cla lebhe: A ‑valɩlɩɔ ‑laagɔɔn. na, ɩ 'la ‑slɔɔ nikpoo. 8‑Pupolu pulu daa ʋ ‑wa 'lɛ na, 'nyɩ ‑n nu ʋla pulɩɛa, ‑ma ‑n 'ta daa ʋ 'wlʋlʋ 'lɛ, ‑aana daa ‑ʋ mʋnʋ 'lɛ na -ci. 'Sɛtɛɛ bhlogbɩɩ, nclɔɔa ‑ɔ ‑valɩlɩɔ 'lɛ 'Wugo na, 'la gbɩa ‑kʋ 'lɛ.» 9Nikodɛmʋ yɔɔ neencla lebhe: «'Nsasa ɩmɩ ‑naa cɩ 'kaa 'lɛ ‑nʋnʋnʋɔ bha?» 10Zozii yɔɔ 'cla lebhe: «‑Mɔa ‑ɔ ‑glɩ 'lɛ Izlayɛlɩbhlɩa* 'kʋ 'la canyɔ 'kadie na, ‑n 'ta wɔlɩ ‑naa ‑ci bha? 11N soluo ‑nʋawlɛ: Ɩmɩa ‑a ‑ci 'lɛ na ɩmɩ ‑a nyɩtɛ 'lɛ, ɩmɩa ‑ala 'ci 'lɩ 'lɛ na, ɩla ‑danʋfʋɛ ‑a li 'lɛ, ‑sakɛ 'bhlɩmɔɔn a la 'ta ‑ala ‑danʋfʋɛliliea ‑nʋawlɛ. 12N solu 'lɛ anyɩ ‑dʋdʋ 'kʋ 'la wɔlɩ 'nyɩ 'a la 'tɩɩ 'lɛ ‑nʋawlɛ na, 'nyɩ n ‑kanɩ anyɩ ‑laagɔɔn 'la wɔlɩ solu na, 'nsasa a cɩ 'kɩɩ 'lɛ ‑nʋawlɛ lalalɩ bha? 13Nclɔɔ bhlogbɩɩ 'ta ka ‑azla ‑laagɔɔn ‑gblaa ɩ ‑ka ‑kʋ le n 'ta Nclɔɔa 'Cʋa* ‑ɔ 'wlʋlʋ 'lɛ ‑laagɔɔn 'nyɩ ‑ɔ ya 'lɛ kwli na.
14'Nyɩ saa Moyizi ‑bhoa 'lɛ tlɛa 'kʋ 'pʋpʋa nɩkplaan na, 'sɛtɛɛ bhlogbɩɩ ɩ ‑fata 'lɛ lebhe ma ‑bho Nclɔɔa 'Cʋa 'kʋ 15ɩya ncaatʋtʋʋntʋa ‑ɔ ‑ka 'lɛ ɔla pɔɔtɛtɛ na, ɔ 'ka jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na 'lɩ. 16‑Masa, Laagɔ ya tete ɔ ya ‑laagɔzɔan wabha, ɩla gbʋ na ɔ ya ɔla 'Cʋa bhlogbɩɩa ‑sa le ncaatʋtʋʋntʋa ‑ɔ -cɩ ka 'lɛ ɔla pɔɔtɛtɛ kalɩ na, ɔ 'la ka 'ku, ‑ma ɔ 'ka jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na 'lɩ. 17Sa Laagɔ 'ta ɔla 'Cʋa ‑laagɔzɔan lobhu le ɔ 'ka ‑laagɔzɔan 'tɩtɩpla, ‑ma ɔ 'ka ‑laagɔzɔan gbʋʋnsa. 18Ɔmɔa ‑ɔ ‑ka 'lɛ ɔla pɔɔtɛtɛ na, ma cɩ 'tɔɔ 'tɩtɩpla. ‑Ma ɔmɔa ‑ɔ 'ta 'lɛ ɔla pɔɔtɛtɛ ‑ka na, ɔla 'tɩtɩa ya tooto ‑plɔɔ, ‑ofi lebhe ɔ 'ta Laagɔ 'la 'Cʋa bhloa 'la 'ŋlɩa ‑delikʋtɛbhalɩ. 19'Nyɩ 'lɩka 'tɩtɩplalɩɛa: Zezezelia ya ‑laagɔzɔan ci, ‑masa ncɛlɩ 'la nʋnʋgbɩa ‑nyu 'lɛ na, ma ya 'tutua wabha 'nyɩ ma ya zezezelia 'kʋzi. 20Sa, ncaatʋtʋʋntʋa ‑ɔ nʋ 'lɛ nyinyi na, ka ɔ ‑zɔɔ 'lɛ zezezeli 'nyɩ ɔ ci 'ta zezezeli nɩkplaan, ɔla nʋnʋgbɩa 'la 'kasɛ ‑zɔnwlʋ. 21‑Ma ɔmɔa ‑ɔ nʋ 'lɛ ‑nʋawlɛgbɩ na, 'ka ɔ ci 'lɛ zezezelia nɩkplaan ɩya ma 'ka ɔla nʋnʋgbɩa 'lɩ, ɩmɩa ɔ nʋnʋ 'lɛ Laagɔ 'la 'ŋlɩa nɩkplaan na.»
'Nyuwluzʋnyɔ Zaan li Zozii 'la ‑danʋfʋɛ
22Ɩmɩ ‑naa 'la leen, Zozii ɩya ɔla gɩlɩnyaa* ya Zudeebhlɩa 'kʋ mʋ. Ɔya maasɔ ‑kʋa 'yɛpɩ 'nyɩ ɔ zʋa ncɛlɩ 'nyu 'wlu. 23Zaan ‑ma ‑kʋa Enɔnʋ, Salimʋdua cɩ 'nyɩ ɔ zʋa ncɛlɩ 'nyu 'wlu, sa 'nyu ‑zua dɩpɩa na. Ncɛlɩ mʋa 'yɛpɩ le ɔ 'ka maa 'nyu 'wlu zʋ. 24'Dɛ 'la daa ma 'ta ka kaa Zaan ‑palʋʋn 'pa.
25Na, saa ma 'lɩlɩlɩ 'lɛ ‑kplɔlɩɛ na ɩla wɔɔtʋtʋɛ ya Zaan 'la gɩlɩnyaa* ɩya Zifʋnyɔ* bhlo ‑gbaaglɩɩn bhli. 26Ma ya Zaan ŋeni 'nyɩ ma yɔɔ 'cla lebhe: «Canyɔ, ɔmɔa ‑n ‑yɔɔsɔ ‑kʋa 'lɛ 'yɛpɩ Zludɛɛnnyidɔlʋa leen na, ɔmɔa 'la ‑danʋfʋɛa ‑n lia 'lɛ na, 'lɩka ɔ zʋnɩ ncɛlɩ 'nyu 'wlu 'nyɩ ncɛlɩa 'fɩan mʋɔ 'bhlɩ.» 27Zaan ya maa 'cla lebhe: «Nclɔɔ cɩ 'ta mino ɩya ɔ 'ka lʋʋa Laagɔ 'ta kɔɔ 'lɛ 'nyɩ na, 'lɩ. 28Anyɩ 'titi a ‑lio 'na ‑danʋfʋɛ lebhe n ya 'cla lebhe: ‑N 'ta ‑amʋ ‑ɔ 'ta 'lɛ Laagɔ 'la ‑Sasanyɔa* ‑glɩ, ‑ma n ‑glɩ ɔmɔa ma lobhuo 'lɛ 'kʋklʋʋn na. 29Ɔmɔa ‑ɔ ‑ka 'lɛ 'ŋlɔa na, ɔmɔ ‑ɔ ‑glɩ 'lɛ 'ŋlɔa ‑ŋuto. ‑Ma 'ŋlɔa ‑ŋuto 'nagɔa ‑ɔ ‑kʋ 'lɛ 'dɛ 'nyɩ ‑ɔ poo 'lɛ 'nyukwliin na, ɔ 'nagɔa 'la ‑blɩɩzɔan ‑yelio pɔlɛkʋmɛnɔ. 'Sɛ 'na pɔlɛkʋmɛnɔa ‑kʋ 'lɛ, ʋ ya 'kʋglalɩ. 30Ɩ ‑fata lebhe ɔmɔ, ɔ zi 'kʋ ɩya ‑amʋ, n ‑salɩ 'kʋ.
Ɔmɔa ‑ɔ 'wlʋlʋ 'lɛ ‑laagɔɔn na
31Ɔmɔa ‑ɔ 'wlʋlʋ 'lɛ ‑laagɔɔn na, ɔ ‑zilo ‑tɛtɛa 'fɩan 'kʋ. Ɔmɔa ‑ɔ ‑glɩ 'lɛ ‑dʋdʋa 'kʋ ‑naanɔ na, ‑blaanyɛkɛ ɔ ‑glɩ 'lɛ, 'nyɩ ɔ nyɩtɛ 'lɛ ‑dʋdʋa 'kʋ 'la ncɛlɩa 'bhisa. Ɔmɔa ‑ɔ 'wlʋlʋ 'lɛ ‑laagɔɔn na, 32ɩmɩa ɔla 'ci 'lɩ 'lɛ 'nyɩ ɔla 'nyukwli 'nu 'lɛ na, ɩmɩ ɔ nyɩtɛ 'lɛ, ‑ma nclɔɔ bhlogbɩɩ la 'ta ɔla ‑danʋfʋliliea ‑nʋawlɛ. 33Ɔmɔa ‑ɔ la 'lɛ ɔla ‑danʋfʋɛliliea -nʋawlɛ na, ɔ li ‑danʋfʋɛ lebhe Laagɔ ‑glɩ ‑nʋawlɛ. 34‑Masa ɔmɔa Laagɔ lobhu 'lɛ na, Laagɔ ne 'kʋ ɔ nyɩtɛ 'lɛ 'nyɩ Laagɔ nyɩɔ ɔla 'Wugoa 'kadieda. 35Toa ‑wa 'Cʋa 'nyɩ ɔ yɔɔ ‑tɛtɛa 'fɩan wlɩɩn zʋ. 36Ɔmɔa ‑ɔ ‑ka 'lɛ 'Cʋa 'la pɔɔtɛtɛ na, ɔ ‑ka jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na. Ɔmɔa ‑ɔ zʋ 'ta 'lɛ 'Cʋa na, ɔ cɩ 'ta jabhʋa 'lɩ, ‑ma Laagɔ 'la dɔgbɛa ‑kʋɔ 'kʋ.»
Àwon tá yàn lọ́wọ́lọ́wọ́ báyìí:
Zan 3: NTLD13
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Dida New Testament © Bible Society of Côte d'Ivoire, 2013.
