Zan 10
10
Mlakpanyɔa 'la ‑nyandla
1«N solu anyɩ, ɩ ‑glɩ ‑nʋawlɛ: Ɔmɔa ‑ɔ 'plɩlɩ 'ta 'lɛ gbinea neen ɩya ɔ 'ka 'bhlabhlɩgbangboa nɩkplaan ble 'nyɩ ‑ɔ 'mɩanɩ 'lɛ ‑gbudu 'wlu na, 'dɛ -naanɔa ‑glɩ 'winyɔ. 2‑Ma ɔmɔa ‑ɔ bleli 'lɛ gbinea neen na, ɔmɔ -ɔ ‑glɩ 'lɛ 'bhlabhlɩa 'la kpanyɔa. 3Gbinibɛnyɔa kalɩɔ gbine 'nyɩ 'bhlabhlɩa ‑ci ɔla ‑blɩɩzɔan. 'Nyɩ 'bhlabhlɩa ‑ɩ ‑glɩ 'lɛ ɔ 'nɩ na, ɔ lalɩ 'lɛ 'bhlabhlɛ 'bhlabhlɛ ɛla 'ŋlɩa 'kʋ 'nyɩ ɔ famʋɩ 'lɛ ‑jlukuun. 4Daa ɔ ya 'lɛ 'ɩ 'fɩan ‑zɔnwlaa na, ɔ plɩɩ 'kʋklʋʋn 'nyɩ ɩ gɩlɩɔ 'lɛ, sa ɩ ‑ci ɔla ‑blɩɩzɔan na. 5Ɩ cɩ 'ta 'pʋpʋkʋ lowlunyɔ gɩlɩ. ‑Ma kɩɩ cɩ 'kɔɔ 'lɛ 'gulu ‑ofi lebhe ɩ 'ta ɔla ‑blɩɩzɔan ‑ci.» 6Na, Zozii ya maa ‑nyandlaa ‑naa nɩkplaan solulu, ‑ma ma 'taa ɩmɩa ɔ nyɩtɛa 'lɛ na, 'la ‑zɔn 'nu.
Zozii ‑glɩ 'lɛ gbinea
7Zozii ya ‑awlɛ 'cla lebhe: «N solu anyɩ, ɩ ‑glɩ ‑nʋawlɛ lebhe: ‑Amʋ ‑glɩ 'lɛ 'bhlabhlɩa 'la gbinea. 8Maa 'fɩan ‑ɔ cili 'lɛ ‑bɛɛ 'fɩɔn 'nyɩ n ya 'lɛ ci na, ‑glɩ 'winya ɩya ncaabhlanya, 'nyɩ 'bhlabhlɩa 'ta maa 'nyukwliinpo. 9‑Amʋ -ɔ ‑glɩ 'lɛ gbinea. Ɔmɔa ‑ɔ bleliin 'lɛ neen na, ɔ cɩ 'ka gbʋʋnsalɩɛ 'lɩ, ɔ cɩ ble, ɔ cɩ ‑zɔnwlʋ 'nyɩ ɔ cɩ nyɩ 'lɩ ɔ cɩ li. 10Ka 'winyɔ ci 'lɛ le ɔ 'ka ghli, ɔ 'ka 'bhla ɩya ɔ 'ka nyumo bhlobhlo. ‑Ma ‑amʋ, ka n ci 'lɛ le ncɛlɩ 'ka jabhʋa 'lɩ ɩya ma 'kʋʋ nikadie 'lɩlɩ.
Zozii ‑glɩ 'lɛ mlakpanyɔ 'nanɔa
11‑Amʋ ‑ɔ ‑glɩ 'lɛ mlakpanyɔ 'nanɔa. Mlakpanyɔ 'nanɔa, ka ɔ ŋonu lebhe ɔ cɩ ɔla 'bhlabhlɩa 'la gbʋ 'ku. 12‑Ma ɔmɔa ‑ɔ kpa 'lɛ 'bhlabhlɩa le ma 'kɔɔ dluplʋ na, 'ta ɩla kpanyɔa 'titi ‑glɩ 'nyɩ 'bhlabhlɩa 'ta ɔ nɩ ‑glɩ. Na, daa ɔ 'lɩ 'lɛ mlanyinye 'nyɩ ɛ ci 'lɛ 'bhlabhlɩa 'bhlakan na, ka ɔ 'wlʋlʋɩ 'lɛ cɩɩn 'nyɩ ɔ gu 'lɛ. 'Nyɩ mlanyinyea bhla 'lɛ ‑anɩ 'nyɩ 'bhlabhlɩkpaa dlolu 'lɛ, 13sa nclɔɔ ‑naa, 'dala 'la gbʋ ‑tɛɛ, ɔ kpa 'lɛ 'bhlabhlɩa, ‑ma ɩla wɔlɩ ‑ylɛylɛ 'tɔɔ cɩɩn kalɩ. 14‑Ma ‑amʋ -ɔ ‑glɩ 'lɛ mlakpanyɔ 'nanɔa. N ‑ci 'na 'bhlabhlɩa 'nyɩ 'na 'bhlabhlɩa ‑ciin 'lɛ, 15le saa Toa ‑ciin 'lɛ 'nyɩ n ‑ci 'lɛ Toa na. 'Nyɩ n ŋonu le n cɩ 'na 'bhlabhlɩa 'la gbʋ 'ku. 16N ‑ka ‑awlɛ 'bhlabhlɩ ‑anɩ ‑ɩ 'ta 'lɛ ‑gbangbo ‑naa nɩkplaan ‑kʋmʋ na. Ɩ ‑fata lebhe n kpamʋɩ, ɩ 'ka 'na ‑blɩɩzɔan cibhlilimʋ, ɩ 'kanɩ 'bhlabhlɩkpa bhlo 'plɩ ɩya ɩ 'ka kpanyɔ bhlo kalɩ.
17Ɩla gbʋ Toa ‑waan 'lɛ, ‑ofi lebhe n ya ŋonu le n cɩ 'ku ɩya n 'ka ‑awlɛ 'na jabhʋa 'lɩ. 18Nclɔɔ bhlogbɩɩ cɩ 'taan 'bhlalɩɛ mino, ‑ma ‑amʋ 'titi ‑ɔ ŋonu 'lɛ le n cɩ 'ku. N ‑ka ‑jioli ɩya n 'ka 'na jabhʋa sɔkʋsa, 'nyɩ n ‑ka 'lɛ ‑jioli ɩya n 'ka ‑awlɛʋ 'ma. 'Lɩka ɩmɩa n To zʋ 'lɛ wlɩɩn na.»
19Wɔɔnyɩtʋ ‑naa ya Zifʋnyaa* nɩkplaan 'dɩ. 20Maa sidiin ncaabhutukpa claa lebhe: «'Wugo ‑nyunyu ‑kʋɔ nɩkplaan, 'wluun yɔɔ nyumo, 'lɩsaa 'la gbʋ a poo 'lɛ 'nyukwliin bha?» 21‑Ma ‑anʋa claa lebhe: «‑N 'ta 'wugonyunyunyɔ 'la wɔɔnyɩtʋ 'ta 'lɛ ‑da ‑kʋ. 'Wugo ‑nyunyu cɩ 'citutunya 'cigbokalɩlɩɛ mino bha?»
Zifʋnyaa 'taa Zozii 'la wɔlɩa 'ma
22Gude yaanɩa ŋeni, 'nyɩ ma lianɩa Laagɔpaakadiea* la nesaclɩɩa 'la 'fɛtlɩa 'yɛpɩ Zolizalɛmʋ. 23Laagɔpaakadie nɩkplaan, Zozii cɔcɔlʋa 'kʋ, gbinea ma zʋ 'lɛ Salomɔɔn 'ŋlɩ na 'kʋ. 24Na, Zifʋnyaa* yɔɔ didio 'nyɩ ma yɔɔ neencla lebhe: «Bhlaasaan ‑n cɩ 'ka 'lɛ anyɩ ‑daandaan nɩkplaan zʋ bha? Ɩ ‑ka ‑kʋ lebhe ‑mɔ ‑ka Laagɔ 'la ‑Sasanyɔa* ‑glɩ na, solu sɛɛ ‑anyɩ 'kpataa!» 25Zozii ya maa neenŋonu lebhe: «N yɩɩ anyɩ tooto solu, ‑ma a la 'ta 'na wɔlɩa ‑nʋawlɛ. Lobholia n nʋnʋ 'lɛ n To 'la 'ŋlɩa nɩkplaan na, ɩ li 'na ‑danʋfʋɛ, 26‑ma a la 'ta ‑nʋawlɛ, ‑ofi lebhe a 'ta 'na 'bhlabhlɩa nɩkplaan ‑kʋmʋ. 27'Na 'bhlabhlɩa ‑ci 'na ‑blɩɩzɔan, 'nyɩ ‑amʋ ‑ma n ‑cii 'nyɩ ɩ gɩlɩɩn 'lɛ. 28'Nyɩ ‑amʋ, n 'nyɩɩ jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na. Ɩ cɩ 'tanɩ 'ku 'nyɩ nclɔɔ bhlogbɩɩ cɩ 'ta mino ɩya ɔ 'kaan mɩ wlɩɩn ‑sa. 29N Toa ‑ɔ 'nyɩɩn 'lɛ mɩ na, ɔ zi ‑tɛtɛa 'fɩan 'kʋ 'nyɩ nclɔɔ bhlogbɩɩ cɩ 'ta mino ɩya ɔ 'ka Toa lʋʋ wlɩɩn ‑sa. 30‑Amʋ ɩya Toa, ‑a ‑glɩ bhlo.»
31Zifʋnyaa yaa ‑awlɛ cɔkʋ 'kʋbhli le ma 'kɔɔ mɩɩn 'bhla. 32‑Ma Zozii ya maa 'cla lebhe: «N ya anyɩ 'ci 'kʋ lobholi 'nanɩ ‑bhutukpa Toa 'la 'ŋlɩa nɩkplaan nʋnʋ. Na, lobholia ‑anɩsaa 'la gbʋ, a 'matɩa 'lɛ le a 'kaan cɔkʋ nɩkplaan 'bhla bha?» 33Zifʋnyaa yɔɔ neenŋonu lebhe: «‑N 'ta lobholi 'nanɩ 'la gbʋ ‑a 'ta 'lɛ ‑wa le ‑a kɔɔ 'bhla, ‑ma Laagɔ 'la vlalɩɛ 'la gbʋ, sa ‑mɔa ‑ɔ ‑glɩ 'lɛ nclɔɔ na, ‑n la ‑ncɩ Laagɔ na.» 34Zozii ya maa 'cla lebhe: «Ɩ 'ta ala ‑jlɩmaa nɩkplaan ‑zieo lebhe: N nabhe: A ‑glɩ ‑laagɔcɩ bha? 35‑A ‑ci sɛɛ lebhe nclɔɔ bhlogbɩɩ cɩ 'ta mino ɩya ɔ 'ka ɩmɩa Zieziewɔlɩa* bhli 'lɛ 'kʋ na 'dɛ ‑sa. 'Nyɩ Laagɔ ya maa ‑ɔ cɩ 'ka 'lɛ ɔla Wɔɔnyɩtʋa 'nu na, ‑laagɔcɩ la. 36'Bhlɩmɔɔn, ɔmɔa Laagɔ ya 'lɛ desla 'nyɩ ɔ ya 'lɛ ‑laagɔzɔan lobhu na, a clɔɔ lebhe: ‑N vla Laagɔ, sa n ya 'cla lebhe n ‑glɩ Laagɔ 'la 'Cʋa na. 37Ɩ ‑ka ‑kʋ lebhe, 'n nʋ 'ta n To 'la lobholia na, a 'la kalɩa 'na pɔɔtɛtɛ! 38‑Ma ɩ ‑ka ‑kʋ lebhe n ‑kɩɩ nʋ na, ka a 'ta 'na pɔɔtɛtɛ ‑ka 'titio na, a la lobholi ‑naa ‑nʋawlɛ ɩya a 'ka sɛɛ cibhlili ɩya a 'ka ŋonu lebhe Toa ‑kʋʋn nɩkplaan saa n ‑kʋɔ 'lɛ nɩkplaan na.»
39Na, ma ya ‑awlɛ 'matɩ le ma 'kaa 'mɔɔ 'kʋbhli, ‑ma ɔ ya maa wlɩɩn ‑dla 'nyɩ ɔ ya mʋ.
40Zozii ya Zludɛɛnnyidɔlʋa leen cɔlɔ, daa Zaan zʋlʋa 'lɛ ncɛlɩa 'nyu 'wlu na 'nyɩ ɔ ‑kʋa 'yɛpɩ. 41Ncaabhutukpa yɔɔ cili 'nyɩ ma claa lebhe: «Zaan 'taa 'ciinzizielɩlobholi bhlogbɩɩ nʋ, ‑ma Zozii 'la cɩa wɔlɩa ‑tɛtɛa ɔ nyɩtɛa 'lɛ na, ɩ ‑glɩ ‑nʋawlɛ.» 42Na, dɩpɩa ncaabhutukpa yɔɔ mala pɔɔtɛtɛa 'kʋ zʋ.
Àwon tá yàn lọ́wọ́lọ́wọ́ báyìí:
Zan 10: NTLD13
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Dida New Testament © Bible Society of Côte d'Ivoire, 2013.
