Lobh 10
10
Laagɔ 'la 'bhlaandlee ya Kɔlʋnɛyɩ 'ciin futolu
1Nclɔɔ bhlo ‑kʋa 'dua ma la 'lɛ Sezalee na 'kʋ, ma laa 'mɔɔ Kɔlʋnɛyɩ. Ɔ ‑glɩa Wlɔmʋnyaa 'la tavʋkandea ma la 'lɛ Italii na a to. 2Ɔ gɩlɩa Laagɔ, 'nyɩ ɔya ɔla 'slinyaa ‑tɛtɛa ‑kaa ɔla zʋlɩɛ. Ɔ klalɩa Zɩfunyaa* 'la ŋaazɩnya ‑bhutukpa 'nyɩ ɔ bhibhiea Laagɔ clɩɩa 'fɩan. 3Na clɩɩ bhlo, 'plɩplɩylʋʋn 'la 'ŋwacɩ ‑mɔta 'la 'klia nɩkplaan, Laagɔ 'la 'bhlaandlee* yɔɔ 'ciinfutolu. Ɔ ‑jlɛa 'mɔɔ wɩaan, 'bhlaandleea ya ɔ 'bhisleen ble 'nyɩ ɔ yɔɔ la: «Kɔlʋnɛyɩ!» 4Kɔlʋnɛyɩ yɔɔ 'ciinkope 'cɩɩ, ŋanɔ yɔɔ pla, 'nyɩ ɔ yɔɔ 'cla lebhe: «‑Kwlenyɔ, wɔɔsaa ‑ɩ ‑kʋa 'lɛ bha?» Na, 'bhlaandleea yɔɔ 'cla lebhe: «‑Naa bhibhielia 'fɩan ɩya lɩɩa ‑n va 'lɛ ŋaazɩnyaa na, ɩ ya Laagɔ cɩ ŋeni 'nyɩ ɔ yɔɔ luoli. 5Na, 'maa lobhu ‑pɔtɔnʋ ncɛlɩ 'dua ma la 'lɛ Zafaa na 'kʋ, ɩya ma 'ka nclɔɔa ma la 'lɛ Simɔɔn 'nyɩ ma pa 'lɛ 'ŋlɩ 'kʋ, ma la 'lɛ Pɩɛlɩ na ‑lamʋ. 6Ɔ ‑pla nclɔɔ bhlo 'kʋ, ɔmɔ ‑ma ma lɔɔ Simɔɔn. Ɔ ‑glɩ mlakubhutinyɔ, 'nyɩ ɔla 'slea ‑kʋ 'lɛ gea cɩ.» 7Daa 'bhlaandleea bhɩalɩɔ 'lɛ solulɩɛ na, ɔ yɔɔ 'ciinmlɔnʋ. 'Kplookʋ, Kɔlʋnɛyɩ ya ɔla lobhocuo ‑mɔsɔ la, maya 'sojanyɔ bhlo, ɔ ‑glɩa ɔla ‑bɛnyɔ ɩya ‑laagɔgɩlɩnyɔ. 8Ɔ ya maa ɩmɩa ‑tɛtɛa ‑ɩ 'plɩlɩɔ 'lɛ 'kʋ na 'dɩkʋsalɩ, 'nyɩ ɔ ya maa Zafaa lobhu.
Wɔlɩ ya Pɩɛlɩ 'ciinfutolu
(Lobh 11.5-17)
9Daa ‑zeli ze 'lɛ na, ncɛlɩa Kɔlʋnɛyɩ lobhua 'lɛ na, ‑kʋ kaa ‑gugwie 'kʋ, 'nyɩ ma mɛanɩa 'dua cɩ. Pɩɛlɩ ya ‑palʋa 'la ‑gwlɛlɩdaa ‑ɩ ‑kʋ 'lɛ 'wlua 'kʋ na ‑gblaa le ɔ 'kaa bhibhie, dɩdɩ yaanɩa slo. 10Na, ŋɔmʋ yɔɔ kla 'nyɩ ɔ ya wabha le ɔ 'kaa li. Daa ma ‑kʋɔ 'lɛ nyɩa pida na, wɔlɩ yɔɔ 'ciinfutolu. 11Ɔ ‑jlɛa ‑laagɔɔn ‑ɩ ‑kalɩɔa 'gbo 'nyɩ lʋʋ bhlo ya 'yɛpɩ 'wlʋlʋ, ʋ ya kwli. Ʋ ‑kʋa le lokuklikadiea ma ‑ka 'lɛ ɛla nimlia ‑mɔnaa wlɩɩn na, 12'nyɩ ‑dʋdʋa 'kʋ 'la mlaa, ɩmɩa ‑ɩ ‑ka 'lɛ 'blɩ ‑nmɔɔna, ɩmɩa ‑ɩ blɛ 'lɛ ɩya libhli, ‑kʋa 'mɛ 'lɛ nɩkplaan. 13Na, ‑blɩɩzɔn bhlo yɔɔ 'cla lebhe: «Pɩɛlɩ, ‑bhokʋ ɩya -n 'bhla ‑n li!» 14‑Ma Pɩɛlɩ ya nesa 'nyɩ ɔ ya 'cla lebhe: «‑Wɔɔ, ‑Kwlenyɔ. N 'ta ka ‑azla 'pʋpʋ 'kʋ, ‑sa 'la lɩɩ li.» 15‑Ma ‑blɩɩzɔan ya ‑awlɛɔ 'cla lebhe: «Lʋʋa Laagɔ ya 'lɛ 'cla lebhe ʋ ‑kplɔ na, ‑mɔ ‑n cɩ 'ta 'cla lebhe ʋ 'ta ‑kplɔ bha?» 16Wɔlɩ ‑naa ya 'kʋgɩgɩlɩ ‑aan dɩmɔta, 'nyɩ ɩla leen, lokwia ya 'lɛ ‑laagɔɔn ‑gblaa.
17Pɩɛlɩ 'matɩa le ɔ 'kaa wɔlɩa ‑ɩ futoluo 'lɛ 'ciin na, ɩla ‑zɔn 'nu. Na, daa ɔ ‑kʋa 'mɩ 'lɛ 'kʋ guguluda na, ncɛlɩa Kɔlʋnɛyɩ lobhua 'lɛ na, ya Simɔɔn 'la 'slea bɩ 'kʋ 'cla 'nyɩ ma ‑kʋanɩa ala gbinea 'kʋ. 18Ma ya wɔlɩ 'pa 'nyɩ ma ya neencla le ma 'ka cibhlili ɩ ‑ka ‑kʋ le dɩpɩa Simɔɔn, ma pa 'lɛ 'ŋlɩ 'kʋ 'nyɩ ma la 'lɛ Pɩɛlɩ na, ‑pla 'lɛ 'kʋ na. 19Pɩɛlɩ ‑kʋ kaa ɩmɩa ‑ɩ futolua 'mɔɔ 'lɛ 'ciin na guguda, 'nyɩ Laagɔ 'la 'Wugoa yɔɔ 'cla 'lɛ lebhe: «'Lɩka, ncɛlɩ ‑mɔta ‑kʋ ‑da, ma 'matɩɔ. 20Na, 'maa kwli, ɩya ‑n ‑ya maasɔ 'ma ‑pɔtɔnʋ ‑gugwie. ‑Naa 'claa ncɩ wɔlɩ ‑ylɛylɛ neen, sa ‑amʋ ‑ɔ lobhu 'lɛ maa na.» 21Pɩɛlɩ ya kwli, ɔ ya ncɛlɩa ŋeni 'nyɩ ɔ ya maa 'cla lebhe: «‑Amʋ ‑glɩ 'lɛ nclɔɔa a 'matɩ 'lɛ na. Wɔɔsaa 'la gbʋ a cia 'lɛ bha?» 22Ma yɔɔ neenŋonu lebhe: «'Sojaa ‑gwlɩɩ ‑ngbi toa, ma la 'lɛ Kɔlʋnɛyɩ na, ɔmɔ ‑ɔ lobhu 'lɛ ‑anyɩ. Ɔ ‑glɩ nclɔɔa ‑ɔ 'nylugolu 'lɛ 'kʋ, ‑ɔ ‑ka 'lɛ Laagɔ 'la zʋlɩɛ, 'nyɩ Zifʋnyaa* 'fɩan nyɩtɛ 'lɛ ɔla wɔɔnanɩ na. Laagɔ 'la 'bhlaandlee* yɔɔ 'ciinfutolu 'nyɩ ɔ yɔɔ 'cla lebhe ɔ gba ɩya ‑n ci 'ɔ 'bhisleen ɩya ɔ 'ka wɔlɩa ‑n ‑cɩ kɔɔ 'lɛ solu na 'nyukwliinpo.»
23Na, Pɩɛlɩ ya gba ma ya 'slea nɩkplaan ble 'nyɩ ɔ ya maa pʋda zʋ. Daa ‑zeli ze 'lɛ na, ɔ ya maasɔ ya ‑gugwie 'ma. Zafaadua nɩkplaan 'la gɩlɩnya* ‑zlʋsaasa ya maa fa. 24Na, 'ylʋ bhli 'lɛ 'nyɩ ‑zeli ze 'lɛ na, ma ya Sezaleedua 'kʋ ŋeni. Kɔlʋnɛyɩ ‑bɛa maa, ɔya ɔla 'slinyaa ɩya ɔ 'nagwɩɛcɩa ɔ la 'lɛ na. 25Na, daa Pɩɛlɩ 'ka 'lɛ 'slea nɩkplaan ble na, Kɔlʋnɛyɩ yɔɔ 'bɩɩnmʋnʋ 'nyɩ ɔ yɔɔ ‑deliin ‑kukoonkplii sasla le ɔ 'kɔɔ ‑ayo 'pa. 26‑Ma Pɩɛlɩ yɔɔ 'cla lebhe: «‑Bho 'kʋ, ‑ma ‑amʋ ‑ma, nclɔɔ n ‑glɩ 'lɛ ‑mɔ 'bhisa.» Ɔ yɔɔ sɔ 'kʋbhli 'nyɩ ɔ yɔɔ 'kʋbho. 27Ɔ ‑yɔɔsɔ zʋa 'dɩ, 'nyɩ ma ya 'sleen ble. Pɩɛlɩ ya ncaabhutukpa 'slea nɩkplaan ŋeni. 28Ɔ ya maa 'cla lebhe: «Anyɩ 'titi, a ‑ci lebhe Zifʋnyɔ 'ta ‑jioli ‑ka ɩya ɔya lowlunyɔ 'ka namʋ ‑aana ɔ 'kɔɔ cɩ mʋ. ‑Ma ‑amʋ, Laagɔ yaan ‑pɔtɔnʋ pala lebhe 'na kopea nclɔɔ bhlogbɩɩ 'ciin le nclɔɔa ɩ 'ta 'lɛ ‑fata le ma mʋ cɩ ‑aana nclɔɔa ‑ɔ 'ta 'lɛ ‑kplɔ na. 29Wɔlɩ ‑naa 'la gbʋ, dɛ ‑n laan 'lɛ na 'nyɩ n 'ta 'lɛ didleli. Na, ‑amʋ -ma, n ‑wanɩ lebhe n 'ka wɔlɩa 'la gbʋa ‑n gba 'nyɩ ma ya 'lɛ 'makan mʋ na cibhlili.» 30Kɔlʋnɛyɩ yɔɔ neenŋonu lebhe: «'Ŋwacɩ ‑naa bhlogbɩɩ 'kʋ, 'plɩplɩylʋʋn 'la 'ŋwacɩ ‑mɔta, n ‑kʋa 'na ‑palʋa ‑zɔn 'nyɩ n bhibhiea. Daa n na n 'ka 'lɛ kope na, 'lɩka nclɔɔ, ɔ 'nylugoon 'kʋklʋʋn, ɔ ‑plaa leleloku nɩkplaan. Wɔlɩ ‑naa ‑kaan 'lɛ 'kʋ 'plɩlɩ na, ɩla ‑mɔta ‑zeli ‑kʋ ‑da. 31Ɔ yaan 'cla lebhe: Kɔlʋnɛyɩ, Laagɔ ya -naa bhibhielia 'nu 'nyɩ ɔ ya lɩɩa n va 'lɛ ŋaazɩnyaa na luoli. 32Na, lobhu nclɔɔ 'dua ma la 'lɛ Zafaa na 'kʋ ɩya ɔ la nclɔɔa ma la 'lɛ Simɔɔn 'nyɩ ma pa 'lɛ 'ŋlɩ 'kʋ ma la 'lɛ Pɩɛlɩ na ɩya ɔ ci ‑da. Ɔ ‑pla Simɔɔan ‑ɔ nʋ 'lɛ mlakubhutilobholia na 'kʋ, 'nyɩ 'dɛ 'la nclɔɔa 'la 'slea ‑kʋ 'lɛ gea cɩ. 33Dɛ 'ŋwacɩa bhlogbɩɩ 'kʋ, n lobhu 'lɛ ncɛlɩ le ma mʋɔ 'makan, 'nyɩ ‑mɔɔ ‑ma, ‑n ya 'lɛ ŋonu 'nyɩ ‑n ya 'lɛ ci. Na, 'lɩka ‑anyɩ, ka ‑anyɩa 'fɩan ‑kʋnɩɔ ‑deliin ɩya ‑a ka ɩmɩa ‑tɛtɛa ‑Kwlenyɔa zʋɔ 'lɛ wlɩɩn lebhe ‑n solu ‑anyɩ na, 'nyukwliinpo.»
Pɩɛlɩ ya wɔɔnyɩtʋ 'ma
34Na, Pɩɛlɩ ya wɔɔnyɩtʋ 'ma 'nyɩ ɔ ya 'cla lebhe: «N ‑cinɩ sɛɛ ‑zaagbʋsa lebhe Laagɔ gbazlɩlɩ 'ta nɩkplaan, 35'nyɩ 'lɔlɩa ‑tɛtɛa nɩkplaan, ncaatʋtʋʋntʋa ‑ɔ zʋɔ 'lɛ 'nyɩ ‑ɔ ‑glɩ 'lɛ 'kʋnylugolunyɔ na, ɔ ‑kɔɔ 'tʋ. 36Ɔ ya Zozi Klisi, ‑ɔ ‑glɩ 'lɛ ncɛlɩa 'fɩan 'la ‑Kwlenyɔ na, 'kʋ 'plɩlɩ 'nyɩ ɔ ya 'lɛ Izlayɛlɩcuoa* pupue 'la Dɩnanɩa* 'la wɔlɩa solu. 37Anyɩ 'titi a ‑ci sɛɛ lebhe Galileebhlɩa 'kʋ wɔlɩ ‑naa bhɔlʋ 'lɛ, daa Zaan plicia 'lɛ 'nyɩ ɔ zʋa 'lɛ ncɛlɩa 'nyuwlu na, 'nyɩ ɩ ya 'lɛ Zudeebhlɩa ‑tɛtɛa 'kʋ ŋeni. 38'Nyɩ a ‑ci ‑awlɛ 'lɛ saa ‑Kplɔkplɔ ‑Wugoa* 'la 'tɛtɩa Laagɔ 'nyɩ 'lɛ Nazalɛtɩnyɔ Zozii na, ɩ ‑kʋkʋlʋ 'lɛ na. Ɔ ya daa ‑tɛtɛa 'plɩlɩ, ɔ ya ncɛlɩ 'nanɩ nʋ 'nyɩ ɔ ya 'lɛ maa 'fɩan ‑ɔ ‑kʋa 'lɛ gɔzɛ 'la ‑kwleliea ‑zɔn na jabha, ‑ofi lebhe Laagɔ ‑kʋa 'mɔɔ cɩ. 39'Nyɩ ɔmɔ ‑naa, ma 'bhlalɩ 'lɛ dabhlalɩsua 'ciin na, ‑anyɩ ‑naa, ‑a lio ɔla lobholia ‑tɛtɛa ɔ nʋnʋ 'lɛ Zifʋnya 'la 'bhlɩa ‑tɛtɛa 'kʋ ɩya Zolizalɛmʋdua nɩkplaan na, ɩla ‑danʋfʋɛ. 40‑Ma, ɩla ‑mɔta ‑zelia, Laagɔ yɔɔ 'kwɩɩnkʋbho. 'Nyɩ, ɔ yɔɔ ‑jioli 'nyɩ le ɔ pala ɔcɩ 41‑anyɩa Laagɔ sla 'lɛ de bhɔdaa tooto, le ‑a ka ɔla ‑danʋfʋlinya 'plɩ na, ‑anyɩa, daa Laagɔ ‑bhoo 'lɛ 'kwɩɩn 'kʋ, 'nyɩ ‑ayɔɔsɔ lili 'lɛ dabhlo 'nyɩ ‑a 'mlanɩ 'lɛ dabhlo na, ‑ma ‑n 'ta ncɛlɩa 'fɩan. 42Na, ɔ ya ‑anyɩ wlɩɩn lo le ‑a plici ncɛlɩa ɩya ‑a 'cla maa lebhe ɔmɔ Laagɔ sla 'lɛ de le ‑ɔ ka ‑jajanya ɩya 'kua 'tɩtɩpla. 43Ɔla wɔlɩ Laagɔnekʋnyɩtɛnyaa* 'fɩan nyɩtɛ 'lɛ lebhe ncaatʋtʋʋntʋa ‑ɔ zʋɔ 'lɛ ɔla pɔɔtɛtɛa 'kʋ na, ɔla 'ŋlɩa nɩkplaan, 'dɛ ‑naanɔa 'la nyinyia lɩ valɩɛ.»
‑Kplɔkplɔ ‑Wugoa ya ncɛlɩa ‑ɔ 'ta 'lɛ Zifʋnya ‑glɩ na 'kʋkwlili
44Na, daa Pɩɛlɩ ‑kʋ 'lɛ wɔlɩ ‑naa nyɩtɛda na, ‑Kplɔkplɔ ‑Wugoa* ya maa 'fɩan ‑ɔ ‑poa 'lɛ Wɔɔnyɩtʋa 'nyukwliin na 'kʋkwlili. 45Nikpoo ya Zifʋnyaa, ‑ɔ zʋ 'lɛ mala pɔɔtɛtɛa Zozii 'kʋ 'nyɩ ‑ɔ faa 'lɛ Pɩɛlɩ na sla. Sa ma lɩanɩa lebhe ‑Kplɔkplɔ ‑Wugoa* Laagɔ nyɩ 'lɛ na, kwlilinɩa ncɛlɩa ‑ɔ 'ta 'lɛ Zifʋnya ‑glɩ na 'kʋ. 46‑Masa, ma nua ncɛlɩa neen, ma nyɩtɛa 'bhlɩ 'bhlɩ 'kʋ 'la wɔlɩ 'nyɩ ma woa Laagɔ ‑evli. Pɩɛlɩ ya ‑awlɛ wɔɔyɩtʋ 'ma 'nyɩ ɔ ya 'cla lebhe: 47«Ncɛlɩ ‑naa ‑Kplɔkplɔ ‑Wugoa ya 'lɛ 'kʋ kwlili ‑anyɩ 'bhisa na, nclɔɔ cɩ ‑awlɛ 'cla lebhe ma 'la zʋa maa 'nyu 'wlu bha?» 48Na, ɔ ya ‑jioli 'nyɩ le ma zʋ maa 'nyu 'wlu, Zozi Klisi 'la 'ŋlɩa nɩkplaan. Ɩla leen, ma yɔɔ 'clalɩ le ɔ kʋ kaa ‑awlɛ maa cɩ clɩɩ ‑zlʋsaasa.
Àwon tá yàn lọ́wọ́lọ́wọ́ báyìí:
Lobh 10: NTLD13
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Dida New Testament © Bible Society of Côte d'Ivoire, 2013.