Mat 7
7
Yaa lwetsuundisa bambaasi ko
(Luk 6.37-38, 41-42)
1«Yaa lwetsuundisa ko, mpisi luhele kuba batsuundusu; 2bukuri mutsuundu wu lutsuundisa beenu, wunu nde se batsuundisila beenu; na kiteesu ki luteesele beenu kinikyo se baluteesele. 3Buri ye wutala kisesengu kiri mu diisu dya mpaangi yaaku, ngo kasi ye wahele kumono mubaangu wuri mu diisu dyaaku? 4Bunu pe buri ye wutsiitsa kuleele kuri mpaangi yaaku ti: "Hemese me nyisila kisesengu kiri mu diisu dya ye", kuri ye-meene wuri na mubaangu mu diisu dyaaku; 5ngaa-bumpitu-bumpyoongo, tekesele kuyusula mubaangu wuri mu diisu dyaaku, tumi yemono na kyensekelee bwa kuyisikila kisesengu kiri mu diisu dya mpaangi yaaku.»
6«Yaa luha byangisi kuri bambwa ko, yaa lulooso misaanga myeenu kuri bangulu ko, mu kubata kuri ti bakwiisa kumidzabata mu miilu myaaku, na balutsyetikilaana, balukaakiri.»
Kuloombo, kusaka na kukomboto
(Luk 11.9-13)
7«Loombeenu na sa baluha, sakeenu na sa lwadzuukila, komboteenu na sa baludzubukila; 8bukuri mpisi wunde wuloombo, lo taamburi, wusaka, lo dzuukiri, na kuri wukomboto, sa bamudzibukila. 9Nkya muutu mu beenu wuri mwaana kamuloombaa mpa, nde kumuha tari? 10Bunu pe, kamuloombaana nsu, nde kumuha nyoko? 11Ngo mbuti, beenu bangaa-bubi, luyaari kuha bikabu byabibwete kuri baala beenu, lo Taayi dya beenu dya ku yulu, buri kahele kuha bitotolo bibvuriri bubwete kuri babo bamuloombo.»
12«Ngo, myominso mi lutiiri ti baatu balurikila, yirikeenu bumosi kuri bo, bukuri mamo ngo mangisi na babikiri.»
Mweelu wasweeteme
(Luk 13.24)
13«Koteenu mu mweelu wasweeteme, bukuri mweelu wamunene na nzila yasaalila binataa ku nzimbukulu, na balaka bari mu kweendaa mu yo. 14Nkati mweelu wasweeteme na nzila se yasweeteme yinataa ku bumwooyo, na baatu bantele badzuukila yo.»
Babikiri bampya
(Luk 6.43-44)
15«Seenee madyeele mu babikiri ba mampya, bo bari mu kwiisa kuri beenu kuri balwaata mikaanda mya bimeeme, ngo kunsa-kati bango-mbulu bansisi. 16Beenu sa lwabayaabila mu bimbutu byaaku. Buri lo bakaburi biburi mu mpaanga bunu pe ngenge mu munsensende? 17Hango, mpisi muti wamubwete kubutaa bimbutu byabibwete; ngo kasi muti wamubi, kubutaa bimbutu byabibi. 18Muti wamubwete kari kubutula bimbutu byabibi ko; bwobumosi seenee mu muti wamubi, kari kubutula bimbutu byabibwete ko. 19Mpisi muti wahele kubuta bimbutu byabibwete, lo wa kukwaanga na wa kutuba ku mbaawu. 20Hango, beenu sa lwabayaabila mu bimbutu bya bo.»
Kudzoonso na kuyirika
(Luk 13.25-27)
21«Kari mpisi wuleelaa kuri me ko ti: "Mfumu, Mfumu", wukoto mu Kimfumu kya mayulu; ngo wunde wuyirikaa kutya kwa Taayi dya me diri ku mayulu. 22Baatu balaka sa baleele kuri me mu kiluumbu kikyo ti: "Mfumu, Mfumu, beetu twabikiri mu nkuumbu ye, twabingisiri mampeeve mamabi mu nkuumbu ye, na twayirikiri bimaangu byalaka mu nkuumbu ye." 23Haho, me sa nyaleele kuri bo ti: "Me nyahele kuluyaaba ti mu ntaangu mosi! Sasikeenu ha teke me, beenu bangaa-bubayi!"»
Nkuma ya manzo moolo
(Luk 6.47-49)
24«Mpisi muutu wuyuka maampu ma me mamama, na wumasariri, lo sa bamufwanikisa na muutu walubuka, watuunga nzo yaandi ha yulu tari. 25Mvula yanoko, manyari mabuukila, biteembu byateleme na byanyingisa nzo yiyo, ngo yahele kubwa, bukuri yatuungu ha yulu tari. 26Ngo mpisi wuyuka maampu ma me mamama, ngo wahele kumasalila, lo sa bamufwanikisa na muutu wakiwulu, watuunga nzo ha yulu munyeenge. 27Mvula yanoko, manyari mabuukila, biteembu byateleme na byanyingisa nzo yiyo. Nzo yabwa na yawa kutsamukina.»
Yesu wukweyikisila mu lutumu
28Yesu kamana kuleele mamo, mampuumbu ma baatu makimuka mu nyikusulu dzaandi; 29bukuri nde waba bayikisilaa bunu wunde wuri na lutumu, nkani ka bunu batini ba mangisi ba bo ko.
Àwon tá yàn lọ́wọ́lọ́wọ́ báyìí:
Mat 7: MW2013
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Nouveau Testament Beembe © Bible Society of the Republic of Congo, 2013.
