Luk 22

Mamfuundu mu Yesu

(Mat 26.1-5; Mal 14.1-2; Yow 11.45-53)

1Munkeembu wa mampa mahele lufunusu wubateelaa ti Paaka waba weki bele. 2Bakuutu ba bangaanga-nzaambi, na batini ba mangisi basaka bwa kudzusila Yesu, ngo babata baatu.

Yuda wasaka bwa kuyekele Yesu mu myooko mya bamfumu

(Mat 26.14-16; Mal 14.10-11)

3Satana wakoto mu Yuda wubateelaa ti Iskaryote, waba mu lutaangu lwa bo kuumi na boolo. 4Yuda wayende kweyukusuna na bakuutu ba bangaanga-nzaambi, na bakuutu ba bakebi ba Nzo-nzaambi, dyaburi nde kasa mu kumuyekele kuri bo. 5Bo bamono kiminu, na bayukisina mu mboongo dza kumuha. 6Nde wataambula, na wasaka mpwaani yayibwete, mu kumuyekele kuri bo, kuri mpuumbu yo pe.

Yesu wayirikisa ndiilu ya Paaka

(Mat 26.17-25; Mal 14.12-21; Yow 13.21-30)

7Kiluumbu kyatubuka kya mampa mahele lufunusu, ki bakekaa kibulu kya Paaka. 8Yesu waheeke Petelo na Yowane, wabaleele ti: «Yendeenu lwelutuyirikila Paaka mpisi tudidyeeneenu.» 9Bo bafuula kuri nde ti: «Kuri ye tiiri ti beetu twetuyirika?» 10Nde waleele kuri bo: «Luyuka, bu lukoto kunsa bvula, sa lwabwaana muutu mosi wukwenata yuku dya maampa; munameenu natee ku nzo yi kakweekoto; 11na leelee kuri ngaa-nzo ti: "Muyikisi bu kaleeriri kuri ye ti: kihekiri ki nyidiila me Paaka na bayiki baami, kuri kiri?" 12Na nde sa kalusoongo kihekiri kya ku yulu kyakinene kyabweeyese; seenee nyirikulu haho.» 13Bu bayende, bo bamono misamu bunu bu kaba baleele, na bo basa nyirikulu Paaka.

Ndiilu yangisi

(Mat 26.26-30; Mal 14.22-26; 1 Kol 11.23-25)

14Kilookolo bu kyatubuka, nde wadzakala mu kudya kintwaari na bayiki baandi. 15Waleele kuri bo ti: «Me nyabee na musoongo walaka, mu kudya Paaka dimadi, kintwaari na beenu, tekesele me nyimono mpasi; 16bukuri me nyiluleele ti: Me ka nyibweese kudya Paaka ko, natee ku diyirimini mu Kimfumu kya Nzaambi.» 17Bu kaholo basa, wabvutula matoondo, na waleele ti: «Holee yo, na kabulee beenu na beenu; 18bukuri me nyiluleele ti: Me ka nyibweese kunwa malu ma bviinya ko, natee Kimfumu kya Nzaambi kiisiri.» 19Tumi bu kaholo mpa, wabvutula matoondo, wabukuna yo, wabaha, na wabaleele ti: «Yimayi ngo nyutu yaami, yaha mu beenu. Seenee bumabu mu kubambukila me mwooyo.» 20Wasa bunubwo se mu mbasa, bu kamana kudya, waleele ti: «Mbasa yimayi, ngo lulelusunu lwamoono mu makila maami, matsaamuka mu beenu. 21Ngo kasi mono, kooko kwa wunde wunyekele, kuri kintwaari na me ha taabala. 22Bukuri Mwaama muutu wuri mu kweende bunu bu diri dyakaangu; kasi kyaari kuri muutu wunde wumuyekele.» 23Bo babaandika mu kusa nkalikisi bo na bo, mu nzala kuyaaba kari na mu bo wuyirika ma bubwo.

Na bvuriri bukuutu?

24Nkalikisi dzabwa ha kakati dya bayiki, mu nzala kuyaaba kari na mu bo, na bvuriri bukuutu. 25Nde wabaleele ti: «Bambyaasi ba mansi bakoomatumaa, na babo bari na lutumu ha yulu mo, bakoobateelaa ti "bangaa-mamabwe." 26Ngo kari bubwo mu beenu ko. Kasi wubvuriri bukuutu ha kakati dya beenu, kaba bunu wubvuriri bulesi, na mutwaalisi kaba bunu kisari. 27Mukwongo, na bvuriri bukuutu, ha kakati dya wunde walaambula miilu mu kudya, na wunde wuri mu kusala? Buri kari wunde walaambula miilu mu kudya ko? Ngo ha kakati dya beenu, me nyiri bunu wunde wuri mu kusala. 28Ngo kasi beenu ngo lwanamitini kuba na me kunsa mpasi dzaami; 29na me nyalususukila Kimfumu, bunu bwa nsusukila se Taata kyo, 30mpisi heki beenu ludya, na lunwa ha taabala dya me, mu Kimfumu kyaami, na beenu sa lwadzakala ha yulu mamboloko mu kutsuundisa makaanda kuumi na moolo ma Isaheli.»

Yesu wayaabisa ti Petelo sa kamutuna

(Mat 26.31-35; Mal 14.27-31; Yow 13.36-38)

31«Simoni, Simoni, mono, Satana waluloombiri mu kuluyengese, bunu bu basaanaa mankono. 32Ngo me nsambirye mu ye, mpisi heki kanyi dya ye dihele kubwa; ngo ye bu wubweese kubvutuka, lo kumisa bampaangi baaku.» 33Petelo wamuleele ti: «Mfumu, me nyayirima mu kweende na ye ti mu boroko, ti ku lufwa.» 34Yesu waleele ti: «Me nyikuleele, Petelo, lolo di, tekesele mulumi nsusu kakookolo, lo ye mwaatuna me mbala tatu.»

Kimpokoro kya mboongo, nkangala na mbeesi yayila

35Tumi Yesu waleele kuri bo ti: «Mu ntaangu yi nyabee luheeke kyahele kimpokoro kya mboongo, nkangala na masapaatu, buri lwaheriri kitotolo ti kimosi?» Bo babvutula: «Ti kimosi pe.» 36Nde waleele kuri bo ti: «Kasi mu lumalu, wunde wuri na kimpokoro kya mboongo kakiholo, bunubwo se kuri wuri na nkangala; na wunde wahele na mbeesi yayila, kayarika kiyuungu kyaandi mpisi kasuumba yo. 37Bukuri me nyiluleele ti, mimyo matinu miyelemini kuyirima mu me: "Bamusuusa mu lutaangu lumosi na bahele na mangisi." Mukwongo, mimyo mitariri me bwee miyirimini.» 38Bo baleele ti: «Mfumu, mambeesi moolo mamala moma.» Nde waleele kuri bo ti: «Bukukiri.»

Yesu wasaambila ku mulaandu wa Mi-olive

(Mat 26.36-46; Mal 14.32-42)

39Bu kapala, wayende bunu bwaba kifu kyaandi, ku mulaandu wa Mi-olive. Bayiki baandi se bamunama. 40Bu katubuka ha kibeendu kikyo, nde waleele kuri bo ti: «Saambileenu, mpisi luhele kukoto mu nsindukulu.» 41Tumi nde wayende mwaa kibeensi, kiri lo kampe bunu kimpeelu kya tari, na bu katsuka maboongo ha nsi, wasaambila, 42waleele ti: «Taata, mbuti ye tiiri, tatula mbasa yimayi la na me; ngo kari kutya kwa me ko, kasi kwa ye kuyirima.» [43Haho, mbasi ya ku yulu yamumonokono, mu kumusyaamisa. 44Wabwilikila kinkuuka na wasyaama mu kusaambila; tukutu twaandi twaba tweki bunu mabete ma makila, mari mu kubwa ha nsi.]

45Bu kamana kusaambila, wateleme, na bu kayende kuri bayiki, wabamono babwa tolo mu ntoono ngebe. 46Nde wabaleele ti: «Ha nki! Luri tolo? Telemee lusaambila mpisi luhele kukoto mu nsindukulu.»

Yesu bamukaanga

(Mat 26.47-56; Mal 14.43-50; Yow 18.3-11)

47Bu kaba wakiri mu kudzoonso, mono, mpuumbu baatu yayisa, mosi mu bo kuumi na boolo, wuri nkuumbu Yuda, waba ku mankula ma bo, nde wakokosolo bebele na Yesu mu kumunyumutuna. 48Ngo Yesu wamuleele ti: «Yuda, mu nyumutunu ye yekiri Mwaana muutu?» 49Baba bamudyengekele bamonaa maba meki yirima, baleele ti: «Mfumu, buri tulata mbeesi yayila?» 50Mosi mu bo, walata kisari kya mukuutu bangaa-nzaambi, na wamutabula kutu dya lubakala. 51Ngo Yesu waleele: «Hemesee bayirika mamo.» Bu kabelemene kutu wamutsinikisa. 52Tumi Yesu waleele kuri bakuutu ba bangaanga-nzaambi, na kuri bakuutu ba bakebi ba Nzo-nzaambi, na kuri bakulu ba babakala, bayisiri mu kumukaanga ti: «Beenu lo lukwiisa na mambeesi mamala, na mboto, bunu ti me ngaa-bumfuna nyiri? 53Mpisi kiluumbu me nyabee kwebaanaa na beenu mu Nzo-nzaambi, ngo kasi lwasii kaanga me ko. Ngo kimaki kyeki kilookolo kya beenu, na kya lutumu lwa mampimbisi.»

Petelo watuna Yesu

(Mat 26.57-58, 69-75; Mal 14.53-54, 66-72; Yow 18.12-18, 25-27)

54Bo basiimba Yesu, na bamukotoso mu nzo mukuutu bangaanga-nzaambi. Petelo waba kwenamaana kila-kila. 55Bo banamuka mbaawu ha kakati dya mbasi, na badzakala mu kintwaari. Petelo waba wadzakala ha kakati dya bo. 56Kisari kimosi kya mukyeetu, bu kamumono kuri wadzakala ha buungi, wamusungumina kisoosi waleele ti: «Wumawu se beeri kintwaari na nde.» 57Ngo Petelo watuna, waleele ti: «Mukyeetu, me nyahele kumuyaaba.» 58Mwaa-kidzika kyantele, muutu mukimi se bu kamumono, waleele ti: «Ye se wuri mosi mu bo.» Ngo Petelo waleele ti: «Muutu, me nyiri ko.» 59Kilookolo kampe kimosi bu kyaluta, muutu mukimi wabweese kusika ti: «Mu ngwanwa wumawu se beeri kintwaari na nde, bukuri wa ku Ngalili, bunu Yesu.» 60Ngo Petelo wabvutula ti: «Muutu, me nyaari mi wuri mu kuleele ye mimyo ko.» Na hanaho, bu kaba wakiri mu kudzoonso, mulumi nsusu wakookolo. 61Mfumu bu kasyeeteke, wasungumina Petelo kisoosi. Haho, Petelo kabaambuka mwooyo mu maba muleele Mfumu ti: «Lolo di tekesele mulumi nsusu kakookolo, ye sa tuna me mbala tatu.» 62Bu kapala ku mbasi, wadila mu ngebe.

Yesu bamutuka ma bamulata

(Mat 26.67-68; Mal 14.65)

63Baatu baba kebaana Yesu, bamusiila munsiku na bamulata. 64Bu bamufuka nsaanda ku busu, bamufuula, baleele ti: «Bikula, leele na wukuleti?» 65Bo bamutuka mu mikimi myalaka myamibi.

Yesu ha busu bwa mfuundu ya kikuutu

(Mat 26.59-66; Mal 14.55-64; Yow 18.19-24)

66Bwiisi bukyaanaa, mfuundu ya bakulu ba babakala, bakuutu ba bangaanga-nzaambi, na batini ba mangisi bakutukina, bamunata ha busu bwa mfuundu bo ya kikuutu, 67na bamufuula ti: «Mbuti ye ngo Kiristo, tuleele.» Nde wabaleele ti: «Mbuti me nyiluleeriri lo ka lunsiila kanyi ko; 68na mbuti me nyiluheeri kifuuri lo ka luri mpeele mvutu ko. 69Ngo kuholosono mu lumalu, Mwaana muutu sa kadzakala ha lubakala lwa Nzaambi-Mpuungu.» 70Haho, bo baleele ti: «Buri ye ngo Mwaana Nzaambi?» Nde wabaleele ti: «Beenu-meene luleeriri ti me nyiri nde.» 71Bo baleele ti: «Tusiiri kwaandi ti na nzala kimbaangi ko, bukuri beetu-meene tuyukiri mu munwa wa nde-meene.»

Àwon tá yàn lọ́wọ́lọ́wọ́ báyìí:

Luk 22: MW2013

Ìsàmì-sí

Pín

Daako