San Juan 13
13
1Uperamo oico mboyve pe pascua areté ára Jesús oicuaa voí ôguajêmaja jiára ova jaguâ co ybyari gui ojo jaguâ pe Tuva rendape. Ojayjú vaecue umi Jeseguape oi vaecue ybyari ja upeicha ojayjú ichupecuera ipajápeve. 2Uperamo pe mbaepochy oñatôima racae pe Judas Iscariote Simon raŷ pyapype oyapyjyucá jaguâ Ichupe. 3Ja pe pyjare ocaru yave, Jae oicuaa pôrâ ramo yepe pe Túva omeê jague opambae ipope ja Jae osê jague Tûpâ Ñandeyára gui ja oyeby vaerâ jagûa pe Tûpâ Ñandeyára rendape, 4upeicharamo yepe, Jesús opuâ pe carujágui, ja omboí iyao, ja oipyjy peteî ao oñemocâjá ja oyecúacuá ipype. 5Upei catu omoî ŷ peteî ñaembe guasupe ja oñypyrú oyojei ipy umi jemimboe cuerape, ja omocâ ichupecuera pe ao oyecúacuá jaguepe. 6Upegui ôguajê ramo Simon Pedro rendape, jae jei Ichupe: Che Yara, ¿reyojeitapa cheve che py? 7Ja Jesús jei ichupe: Co coanga che ayapova ndeve nde reicuaai gueteri, coangarirente reicuaane. 8Upei catu Pedro jei Ichupe: Máramo Nde reyojeichene cheve che py. Ja Jesús jei ichupe: Che royojei ŷ ramo ndeve na nde yai chene Chendive. 9Upei catu Simon Pedro jei Ichupe: Aiporamo, che Yara, eyojei catu nda che py añoi, che po ja che âcâ avei. 10Ja Jesús jei ichupe: Pe oyajú ramôva noicôtevêvéima oyeyojei, ipy añonte, ipôtímbáma voí. Ja peê pene pôtíma peina: upeicha ramo yepe nda opavavei yepe pene pôtí. 11Jae oicuaa voí pe oyapyjŷucájarâ Ichupe, upeareje jei: Nda opavavei peê penepôtí.
12Upegui oyojéipáma ramo ipy ichupecuera oñemonde yeby iyao, ja oguapy yeby carujápe. Upei catu jei ichupecuera: ¿Peicuaapa peê mbaépa jeise co ayapo vaecue pende reje? 13Peê Che renôi Cheve Ore mboejára ja Ore Yára ja upeicha peye pôrâ. Che voí jae upeva. 14Upeicharamo, Che jae ramo pene mboejára ja pende yára ja ayojei ramo peême pendepŷ, peê avei peyoyojei vaerâ pendepy oyoupe. 15Che voí ajechaucama peême Che reco icatu jaguâ co Che ayapo jaicha peême upeicha avei peê peyapo. 16Añete Che jae peême catuetei pe tembiguai nda tuvichavéijá iyára gui ja pe temimbou nda tuvichavéijá pe imboujárégui. 17Ja peicuaa pôrâmba ramo umimbae, pende reco orŷete vaerâ peyapo ramo jecópe. 18Upeicha ramo yepe, ndaei âmbae opavave peêcuerava gui. Che aicuaa voí umi aiporavó vaecuepe ja upeicha voí vaerâ, oyeyapo jaguâ jecópe oyee jagueicha Santa Escriturape. Upe joúva mbuyape Chendive, upéva catu pe opyvoíva Che reje. 19Anga guive oime mbae amombeu vaerâ peême oico mboyve voí, icatu jaguâ oico ramo guârâ catuetei peê perovia Che jaéjá. 20Añete Che jae peême catuetei upe oguerojorŷva pe Che remimboúpe, Che rerojory Cheve avei, ja upe Che rerojorŷva Cheve oguerojory avei pe Che mboujarépe.
21Upei catu Jesús jeipáma ramo umimbae ipojyi Ichupe ipyápe ja oyepyapy eterei, ja oicuaauca ichupecuera jeivo: Añete Che jae peême oimejá peteîva peêcuerava Che yapyjyucá vaerâ Cheve. 22Upei catu umi jemimboe cuera oñomaê oyueje, ndoicuaai máva jaecuéravaguipa Jae oñeê raé. 23Oime voí uperamo peteî jemimboe, Jesús ojayjúvé voí vaecue, oyecóva jina Jesús pytia reje. 24Aipóramo Simon Pedro oñeê cuâ ñembovavápe ichupe, ja jei ichupe: Ere catu mavaité-gui-pa Jae jei rae upea? 25Upei catu, pe oyecóva jina Jesús pytia reje jei Ichupe: ¿Carai, mávapa jae? 26Ja Jesús jei ichupe: Upe Che ameêja co mbuyape akŷ, upéva catu jae. Upei catu oipyjy pe mbuyape ja omoakŷ ja omeê pe Judás Iscariote, Simon raŷpe, 27ja upéva oipyjy rire pe mbuyape oike ipyápe pe mbaepochy. Upei catu Jesús jei ichupe: Upe reyapo vaerâ nde pyae eyapo. 28Uperamo voí ndipori avave umi ocaru vaecue jina oicuaava maerâpa jei rae ichupe upea. 29Oime voí oimoâ vaecue oñongatújá gui Judás pe mbae repy ryru Jesús jei jague ichupe: Eyoguante pe ñaicôtevê vaerâ co arete ramo guârâ terâ omeê jaguâ tûpâmbae umi mboriajúvape cuera. 30Upei catu Jae oipyjy pe mbuyape ja upevove osê ocape, ja pyjaréma voínte.
31Upei catu osêma ramo jae, Jesús jei: Anga catu oñembuetéucáma co Caraí Raŷ, ja Tûpâ Ñandeyára oñembuetéucáma avei ipype. 32Upeicha avei Tûpâ Ñandeyára ombuetene Ichupe oyejegui voi, ja voíeté catu avei ombuetene Ichupe. 33Peé Che raŷcuera, sapya minte gueteri aime penendive. Peê Che recane Cheve, ja jae jagueicha umi Judiope: Che ajajápe peê ndicatui pejupitŷ, upeicha avei Che jae peême. 34Oime peteî Che rembiapoucapy ipyajúva pomboesejá peême, peyojayju jaguâ oyoapytepe, Che pojayju jagueicha peême, upeicha avei peê peyojayju jaguâ oyoapytepe. 35Upepe opava ojechacuaane peê Che remimboejá, peyojayju ramo oyoapytepe.
36Upei catu Simon Pedro jei Ichupe: Caraí! ¿Mamópa rejo? Ja Jesús jei ichupe: Pe Che aja jaguâme ndicatui nde reyu coanga Che rapycueri. Aremi rire mante reyune Che rapycueri. 37Upei catu Pedro jei Ichupe: Carai, ¿mbaeguipa ndicatui coanga aja Nde rapycueri? Ameêne che recové voí yepe Nde rejejape. 38Upei catu jei ichupe Jesús: ¿Añete pico? ¿Remeêpane nde recove Che rejejápe? Añete Che jae ndeve pe ryguasu ndo sapucaichene nde Che momârâ mboyve mbojapy yeby.
Àwon tá yàn lọ́wọ́lọ́wọ́ báyìí:
San Juan 13: GRN1913
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© British and Foreign Bible Society 1913, 2013
Mọ̀ Sí Nípa Tûpâ Ñandeyára 1913