SALMOS 38
38
1X̱ana' Dios, bi tiḻo' neda' ḻo yeḻa' ẕža'a chio'.
Bi wsako'o neda' ḻo yeḻa' snia chio',
2dan' yag ntóche'do' chio' ka' wyázgaken neda',
na' ḻen no'o bsaka' zi'o neda'.
3Bi zoa chawe' beḻa' žen chia' dan' ẕžo'o neda',
na' žit yoa'a bi zej zoan chawe' dan' bena' doḻa'.
4Da' ẕinnj ka' da' bena' ẕbága'gaken yichj ḻáẕda'wa'.
Zej naken chia' ka to ywa' zí'iḻe'e.
5Žia we' dot da' naka', na' ẕlaḻe'en, na' nóžwgak we' chia' ka'.
Žaken chia' ki dan' bena' da' ẕinnj.
6Ẕda' ẕwia' ḻo yole, dan' žedoe'ela',
na' ẕbeže nyacha'a dot ža, na' yele,
7dan' dot da' naka' ẕláḻe'en,
na' bi zoa chawe' beḻa' žen chia'.
8Nat ni'a na'a, na' žekla' zej nžoẕjen žit yoa'a.
Ẕbeže ḻaža'a dan' že' zedle yichj ḻáẕda'wa'.
9X̱ana' Dios, da' ẕdan ḻaža'a zóaḻenen Le',
na' da' ẕbeže ḻaža'a ẕḻé'ekzlo' Le'.
10Žat ḻáẕda'wa', na' ba bedó ḻaža'a,
na' biž ẕḻe'ela' chawe'.
11Žebíga'gak lježa' ka' zíto'le ni'a che yižwé' chia',
na' benne' ẕjo'o ḻi'a chia' ka' ba bkwásgake'.
12Benne' ka' žénegekle' gótgake' neda' ẕzáḻa'gake' do yeḻj nich senen neda',
na' benne' ka' žénegekle' góngake' neda' ẕia ẕnnégake' chia',
na' ẕnnágake' kwia yi'a,
na' zóatezegake' wsáka'gake' neda',
13san neda' bi ženla', kan žak che to benne' kwežw,
na' naka' ka to benne' bi žak nne', benne' bi žsaljwe' žoe'e.
14Naka' ka to benne' bi be ženle',
bennen' bi žechebe',
15dan' žx̱en ḻaža'a Le', X̱ana' Dios.
Le' yechebo' ḻo wlaza' neda'.
16Bi go'o latje yebégekle' ni'a che da' žaken chia'.
Kate' chejchegwa', bi go'o ḻégake' latje wká'n ẕen kwíngake' dan' žak nyache' ḻaža'a,
17san za' chejchegwa', na' ẕláteze dot da' naka'.
18Che ḻen yex̱óalapa' da' bi nak chawe' da' bena',
na' gak nyache' ḻaža'a ni'a che doḻa' da' nbaga'a.
19Benne' ka' bi ẕḻé'egekle' neda' chawe' zej zoakze' chawe', na' zej nake' waḻe.
Zej nyanḻe'e benne' ka' bi ẕḻé'egekle' neda' chawe', na' bi be ẕia bena' ḻégake'.
20Benne' ka' žóngake' benne' chawe' ka' ẕia.
Zej nake' benne' ka' bi ẕḻé'egekle' neda' chawe' dan' žónteza' da' naken chawe'.
21Bi kwej yichjo' neda', X̱ana' Dios.
Dios chia', bi so' zi'to' gan zoa'.
22Ben byene gákḻeno' neda', X̱ana' Dios.
Nakkzo' Le' Benne' Weslá chia'.
Àwon tá yàn lọ́wọ́lọ́wọ́ báyìí:
SALMOS 38: zty
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2002, Wycliffe Bible Translators, Inc. All rights reserved.