LUKA 4
4
Satana ki uhungia o Jesu
(Mt 4.1-11; Mk 1.12-13)
1O Jesu ki aporo tenia na ve i Jotano, ma na Higona Apu ki angaria. Na Higona Apu ki merâ igê na manihê. 2Ma i ngekana Satana ki uhungia igê surigi na tangiani tangahuru ge he. O Jesu ki pe ngê rârâ surigi na tangiani ngegana. Tahema i murini na tangiani ngegana ngaia ki magê.
3Satana ki vi tanga o Jesu, ki vi: “Manga vi igo ki no Karena God, hoi, gu vi tanga na hê ikê, ke vora renia na bereti.” 4O Jesu ki arami, ki vi: “Na Buka Apuna ki bani vi, vi na enoni ki pe mauri renia ma na ngêra.”
5Hemuri Satana ki metagere igê na agua i kerekê aha ma igê na kere matena sisite era ngaia ki hatani hagabâsia renigi na arahanga igê na agua hato i maveta. 6Ma ngaia Satana ki vi tanga, ki vi: “Inê be vatego renigi na arahanga hato ngegana ma na ruruguha hato ngegana. Na aniku ngegana, ma inê kê girara gê mahatangenigi renigi tanga na anima na enoni, gê obania. 7Hoita, na marâ hato ngegana ko page nahunigi, manga vi go susure ma ko bêtuhiê.” 8Mo Jesu ki arami, ki vi: “Na Buka Apuna ki bani vi, vi ngaia getea ma na Araha God iamu kanigo rahesia ma ko bêtuhia.”
9Ma hemuri Satana ki merâ o Jesu i Jerusaleme, ma ki hagêrasia i kere kê ngavê i gerina na Ruma ni Rotu, ma ki vi tanga, ki vi: “Manga o Karena God kani igo, hoi, gu reke so ku vato i ano. 10Suria na Buka Apuna ki bani vi, vi God ki page bonasira na angelo iana ka bâbâ surigo bâkoro. 11Ma na Buka Apuna ki vi nikâ, ‘Ngaira ka page torego i rimata, hanana siana ko tapasu igê na hê.’” 12O Jesu ki arami, ki vi: “Na Buka Apuna ki bani vi, vi siana ko uhungia na Araha God iamu.”
13Matena Satana ki uhungia hato vikê o Jesu igê na ara ni tarani, ngaia ki naka so noga, ma ki râ vê pania.
O Jesu ki haganega na tagaraha iana i Galilea
14Ma hemuri o Jesu ki aporo i Galilea, ma na Higona Apu ki angaria ma ki hagaramonia. Ma na rongoha renia ki râhigi na hinua hato i ngekana. 15Ngaia ki hagesurira na enoni i ruma ni sukuru iata, ma na enoni hato ka visia koro.
Na enoni i Nasarete ka usitenia o Jesu
(Mt 13.53-58; Mk 6.1-6)
16Mo Jesu ki râ i pasina i Nasarete, ma igê na Tangiana ni Mamaroha ngaia ki râ i ruma ni sukuru, manga bani hanana i arâ. Ngaia ki aharaga, hanana i tomatoma tenia na Buka Apuna. 17Ma ngaia ki tavoa na buka, i segea o Isaia na poropete. Ngaia ki gasia na buka, ma ki gari ki tarahua igê na segesegeha, i vi:
18“Na Higona Apu iana na Araha God ki angariê.
Ngaia ki bani ateê, hanana gê ateate
renia na Taroha Koro tangara na enoni matareha.
Ngaia ki bani hagatorê, kê tokorenia na taroha,
hanana ga aharupa na enoni rakuraku,
ma hanana na enoni, ga guru, ka marava aporo na maata,
ma hanana gê rupasira na enoni,
ga hatamigi na mamasiaganiha,
19ma hanana gê hagarongora na enoni
renia i sugi râ me noga na harisi,
na Araha ki page hagatahira igê na kariana!”
20O Jesu ki buhia na buka, ma ki vatea aporo tanga na mane, i bâsuria na ruma ni sukuru, ma ki oga so. Na enoni hato i ruma ni sukuru ka boretenia. 21Ma ngaia ki haganega ki tamasi tangara, ki vi: “Na tomatomaha ngekê tenia na Buka Apuna ki kahu vora me monari noga, i ngekê, igê nga na matena mu rongoa.” 22Ngaira hato ka tamasi koro era renia, ma ka konekone renigi na tamasinga bâkoro iana, i visigi. Ngaira ka vi: “Ngaia ki no karena o Josepo, iê?”
23Ngaia ki vi tangara, ki vi: “Inê kê bani girara, igamu kamu obania, vi gamu visia tangê na tamasinga, i vikê, ‘Mane mangata, u rikigo maremu.’ Ma igamu kamu obania nikâ, vi gamu vi tangê, kamu vivi, ‘Gu tanugi i hinua iamu maremu na marâ, mi bani rongogi, go katogi i hinua i Kapenamu.’” 24Mo Jesu ki vi nikâ: “Inê be vi tangagamu: na poropete ngaia ki no vani, na enoni i hinua iana ga kitenia. 25Mu rongo! I monari, na matena iana o Elia ka rako na gete na nâ i Isiraele. Ma igê na matena ngekana ki na magêha raha igê na agua hagenani, renia i pe rangi rârâ surigi na harisi gi oru ma na hageha gi ono. 26Ma kamu bâ, God ki pe hagatorangenia o Elia tanga na hitangita na gete na nâ ni Isiraele. Ma ngaia ki hagatorangenia ma tanga na gete na nâ i Sarepata, i na apanena i Sitone. 27Ma na matena iana o Elisa na poropete ka rako na enoni asiahu i Isiraele. I mareha ngavê na ani gi tage ma, vi ge mavo, nga noga ma o Naamana, na mane ni Siria, kani mavo.”
28Matena na enoni i ruma ni sukuru ka rongogi na marâ ngegana, ngaira hato ka mangariaga ngavê. 29Ngaira ka aharaga, ma ka oke baba henia o Jesu, ka mehura tenia na hinua, ma ka metagere igê na tarohane i hinua ngekana, hanana vi ga purisia vato igê na tarihu. 30Ma o Jesu ki tara râ ma i guputa na hakuta na enoni, ma ki râ vê, ki râ.
Na mane i atataroga
(Mk 1.21-28)
31Ma hemuri o Jesu ki râ i Kapenamu, na hinua i Galilea. Ma i ngekana, igê na Tangiana ni Mamaroha, ngaia ki hagesurira na enoni. 32Ngaira hato ka konekone renia na tauhana, suria ngaia ki tamasi manga na maneraha, i ramata. 33Ma i ngekana i ruma ni sukuru ki oga igê na mane, i atataroga. Ngaia ki ngere raha, ki vi: 34“E, Jesu ni Nasarete, na ta kanigo katoa tangagami? Go râ me vari, vi go hagaerasigami? Inê kê girarago, vi o ti kani igo! Igo va ani God i hagatorangenigo!” 35O Jesu ki ramonia na ataro, ki vi: “Gu muni vê! Ma ku hura râ tenia na mane ikê!” Na ataro ki katoa na mane, ki apuri i maata na enoni hato, ma ki hura vê maninga ma tenia.
36Na enoni hato ka gasuga, ma ka hetamatamasi, ka vi: “Tanu hega kani tamasi vikana? Ngaia ki na maneraha, i girara i ramata, ma ki bonasira na ataro era, ma ngaira ka huhura ka arâ!” 37Ma na rongoha renia o Jesu ki râhigi na ara ni hinua i na apanena ngekana.
O Jesu ki rikira rako na enoni
(Mt 8.14-17; Mk 1.29-34)
38O Jesu ki pania na ruma ni sukuru, ma ki râ ki banu i ruma iana o Simone. Ka hungâna o Simone ki maeha, ki matoro bâraha, ma ngaira ka hagarongoa o Jesu renia. 39Ngaia ki râ ma ki ura hagarangia na bea iana, ma ki bonasia na matoroha ki hato. Ma ki avogea na matoroha ma ngaia ki aharaga nga ma ki hagamako tangara.
40Bevoana i bani su na arito, na ara ni enoni ka torera tanga o Jesu na tamata, ga maeha renigi na ani mavê na mera. Ngaia ki têbuhira na enoni hato, ga maeha, ma ki rikira hato. 41Na ataro era nikâ ka hura vê tenira rako na enoni, ma ngaira ka ngerengere, ka vivi: “Igo ki no Karena God!”
O Jesu ki hagapêpura ma ki pe hagamarumungenira, vi ge tamasi, renia ngaira ka bani girara, vi ngaia ki na Mesaia.
O Jesu ki ateate i Jutea
(Mk 1.35-39)
42Igê na mahogotana o Jesu ki pania na hinua, ma ki râ i bemu. Na enoni ka haganega ka garia, ma na matena ga tarahua, ngaira ka uhungia, vi siana ki arâ panira. 43Ma ngaia ki vi tangara, ki vi: “I tuguhiê, ve ateate renia na Taroha Koro renia na Arahanga iana God i hinua getigi nikâ, renia tahema God ki hagatorangeniê me.” 44Tahema ngaia ki ateate i ruma ni sukuru i Jutea.
Àwon tá yàn lọ́wọ́lọ́wọ́ báyìí:
LUKA 4: KCB
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2011 Bible Society of the South Pacific
