LUKA 14
14
O Jesu ki hagakomaga na mane i maeha
1Igê ta na Tangiana ni Mamaroha o Jesu ki râ ki ngê i pasina ta na maneraha i pasita na Pariseo, ma na enoni ka bore rapurapu renia. 2Ma ta na mane, i pipi na êgana ma na rimana, ki râ me tanga o Jesu. 3Mo Jesu ki tamasi, ma ki hagatera na mane ni hagesuringa ni Rotu ma na Pariseo, ki vi: “Na Ramata i na Buka Apuna ka hagamarumungenigia ma vari, vi ga hagakomagara na enoni igê na Tangiana ni Mamaroha, se mareha?” 4Ma ngaira ka muni ma. O Jesu ki têa na mane, ki hagakomaga, ma ki hagatorangenia vê ki râ. 5Ma ngaia ki vi tangara, ki vi: “Manga igamu, na anima na hitangimi, ma kamu nahunia o karena se na puruka, ma ngaia ki vota i rarona na vekaru igê na Tangiana ni Mamaroha, ki hega, mu okeokê râ nga igê na Tangiana ni Mamaroha, se i mareha?” 6Ma ngekana ngaira ki bara tangara ge aramia na hagatenga iana.
Na avanu ni ngêra ma na enoni i guhira
7O Jesu ki bâsira, vi manga i he tani na enoni, i guhira, ka ategi na atohata na maneraha ma ka oga so igê. Tahema ngaia ki tamasi maramaraveta vikê tangara ngaira hato, ki vi: 8“Manga ta na enoni, ma ki guhigamu tanga na ngêra na hagataku, siana kamu gâga so igê na atohata na maneraha, renia i era ma na avanu ni ngêra ki bani guhia ta na enoni, i raha teharigamu. 9Ma na avanu ni ngêra, i guhigamu tagenami, ki arâ me ma ki vi tangagamu, ki vivi, ‘Mu aharaga tarana na maneraha.’ Ma ngekana igamu kamu maki renia, ma kamu gâga so ma igê na atohata na enoni purua. 10Manga na matena i guhigamu, mu arâ ma kamu gâga so hete igê na atohata na enoni purua, na avanu ni ngêra ki page arâ tangagamu, ma ki vivi, ‘Bamane, mu râ me, ma kamu oga so igê na atohata na enoni raha.’ Na tarana ngekê ki hagarahasigamu i maata na enoni getera hato, i guhira. 11Suria na enoni, i kasia akê marena, ka page kasia so; ma na enoni, i kasia so marena, ka page kasia akê.”
12Ma o Jesu ki vi tanga na avanu ni ngêra, i guhia, ki vi: “Manga go guhira na enoni tanga na kere ngêra, igê na ritovagana se igê na manurahi, siana ko guhira na tamamu, se vi na goamu, se vi na kariamu, se vi na enoni ruruguha, suria vi ngaira ka page guhigo nogata, ma igê na tarana ngekana igamu kamu page hebarubaru. 13Ma ki manga go magoto, go guhira hete na enoni matareha, na enoni ga abogo, na enoni ga meapeape, ma na enoni i guru na maata. 14Ngekana igo ko page hagâvo renia, suria i bara tangara, vi ge rugugi aporo tangago. Ma God ki page vurigo, matena ga mauri aporo na enoni koro.”
Na maramaraveta renia na magotoha raha
(Mt 22.1-10)
15Ta na hitangita na mane, ga bêrihu, ki rongo vikê, ma ki vi tanga o Jesu, ki vi: “Ga babarisi ngavê na enoni, ga page ngêngê haku i pasina God na Araha!”
16O Jesu ki vi tanga, ki vi: “Ta na mane i magoto, ma ki guhira rako na enoni. 17Matena i nanê na ngêra, ngaia ki hagatorangenia na kariana, ki râ ki heharo, ki vi, ‘Mu râ me, na ara ni marâ ki nanê!’ 18Ma ngaira hato na enoni ka vi, viga bara, vi ge râ. Tani ki vi, ‘Inê kê vuria na mako, vi gê arâ kê bâsia. Hetaki, inê kê pe arâ vê.’ 19Ma tani ki vi, ‘Inê kê vurira na haritama gi rima na puruka, ma kê arâ noga kê uhungira, hanana tagara. Hetaki, inê kê pe arâ vê.’ 20Ma tani nikâ ki vi, ‘Inê kê kahu êragi haoru. Tahema i asa, vi ve râ vê.’ 21“Na kariana ki aporo ma ki hagarongoa na araha iana renigi na tarani hato ngegana. Na avanuna na magotoha ki mangariaga baraha, ma ki vi tanga na kariana, ki vi, ‘Gu râ rêrê igê na mahera ma igê na tara ni hinua, ma ko merarâ me na enoni ga matareha, na enoni ga abogo, na enoni i guru na maata, ma na enoni ga meapeape.’ 22Ma hemuri na kariana ki vi, ‘Araha, na tagaraha, go visia, ki bani hato, ma na ruma ki baguru mênga ta agua.’ 23Vikana ma na araha ki vi tanga na kariana, ki vi, ‘Gu râ nikâ igê na tara i bemu ma igê na tara sisite, ma ko bonasira na enoni, ka bêbanu me, hanana i vunuvunu na ruma iaku. 24Be vi tangagamu hato: na enoni, gê guhira i nago ma ka pe râ me, ngaira ki asa iata vi ge page ngêa na hinaga iaku.’”
Nga ko hanana i marisina na kariana o Jesu
(Mt 10.37-38)
25Na hakuta raha na enoni ka takua o Jesu. Ngaia ki aharira, ma ki vi tangara, ki vi: 26“Na enoni, i arâ me i pasiku, ma ki takuira bâraha ma o vaemana, ma kenana, ma na gete iana, ma na karena, ma na goana, ma ngaia so marena tehariê inê, ngaia ki asa, vi na kariaku. 27Na enoni, i mumuriê, ma ki pe torea na kuruse iana marena, ngaia ki asa, vi na kariaku.
28“Manga ta na hitangimi, ma ki kato, vi torea na bebetehe na he, ngaia ki tuguhia, ki goga so noga, hanana i tarahugi i hagenago na meni na marâ, hanana i girara, vi na haga iana ki araria, vi hatungia na tagaraha renia se i mareha. 29Manga i pe arari na haga, ma ngaia ki haganega ki tagarahia na hunana na bebetehe na hê, ngaia ki asa iana, vi ge hatungia. Ma na enoni hato, ga bâsia, ka page rurusia. 30Ngaira ka page vivi, ‘E bâ, ngaia ki bani haganega ki torea na bebetehe ma ki hagarisua!’
31“Manga na maneraha, ma ki merarâ na rehagaro tangahuru na mane ni me iana, hanana vi ga meheariha na maneraha getea, i merarâ me na rehagaro tangahuru gi rua na mane ni me, ngaia ki gâga so, ma ki hagakita i hagenago manga vi ngaia ma ki girara i teharia na maneraha ngekana se i mareha. 32Manga i mareha, i koro, ki hagatorangenira na mane tora tamasinga, hanana ga metamasi na maneraha ngekana, matena i hagatê mênga me tenia, hanana ga hagatea vi manga i he ka na takotako iana, hanana vi ge hato na henahuita.” 33Mo Jesu ki vi: “Manga ngekana ki asa na hitangimi, vi ge vora na kariaku, manga vi ngaia ma ki pe panigi na ara ni marâ hato iana.
Na solo i era
(Mt 5.13; Mk 9.50)
34“Na solo ki na marâ koro, ma ki manga i pe marasiga, ngaia ki mareha rârâ ta na tarana, vi ge page hagakoroa aporo renia. 35Ngaia ki pe arari tanga na mako i mu, se vi tanga na bê ni roro ni hasinga. Na enoni ka kasia râ ma. Mu rongo, manga hanana mu rongorongo.”
Àwon tá yàn lọ́wọ́lọ́wọ́ báyìí:
LUKA 14: KCB
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2011 Bible Society of the South Pacific
