Marcos 16

Jatz ank'in Jesús cyxol cyimni

Matey 28.1-10; Lucas 24.1-12; Juan 20.1-10

1Tbajlenxitzun ju k'ij te ojlabl, xi' Mariy aj Magdala, tuc'ix Mariy ttxu' Jacobo, tuc'ix Salomé; e je'x lak'olte tc'oc'jal t-sem tib tu'n cyxi' k'olte ti'j t-ximlal Jesús. 2Primxix cyxi' tuj tnejel k'ij te seman, e pon ttzi pantyón otok jawil k'ij. 3Ex in cyma'n cyxolx:

—¿Alcye c'elel k'inte ju abj ttzi pantyón tu'n kocx? Che chi.

4Pero tej cylonte, o cyil otok tz'el k'i'n ju abj ttzi pantyón, ex aju abj lu ma'xix. 5Tejtzun cyocx tuj pantyón, o cyil k'ukl jun cu'xun tuj bank'abaj, toc jun t-ẍjo'w sak; ex bi'x e jaw sec'paj xu'j. 6Atzunte cu'xun xi tma'n cye:

—Mi'n che jaw sec'paje; in che jyone ti'j Jesús aj Nazaret, aju jaw k'o'n twitz crus. Mi a'l tzalu, ma jaw ank'in. Cyque'yintze jatum cub k'o'n. 7Pero cyxi'ye, cymanxe cye t-xnak'tzben ex te Pedro, cxel nej Jesús cywitze tuj Galiley; atzun c'oquel cyque'yine ic tza'n xi tma'n cyeye.

8Atzun cye xu'j bi'x e je'tz ok tuj pantyón, porque otok che tzaj lu'lun tu'n tchi ex otok che sec'paj. Mi jun yol xi cyma'n cye xjal, porque in che xobtok.

Cub tyec'un tib Jesús twitz Mariy aj Magdala

Juan 20.11-18

[ 9Tejtzun tjaw ank'in Jesús primxix tuj tnejel k'ij te seman, tnejelxix cub tyec'un tib twitz Mariy aj Magdala, aju otok che etz wuk ju'ẍ tuj tanmi tu'n Jesús. 10Xi'tzun Mariy, xi tma'n cye keju otok che ten tuc'il Jesús, in che bisuntok ex in che ok'. 11Tejtzun cybinte ke jlu ka otok jaw ank'in Jesús ex ka otok til Mariy, minti' xi cyocsla'n tyol.

Cub tyec'un tib Jesús cywitz cabe t-xnak'tzben

Lucas 24.13-35

12Pero te yajxi ch'intl cub tyec'un tib Jesús tuj juntl tumel cywitz cabe t-xnak'tzben in che bettok, cyja' cyxi' tuj cojbil. 13E je'xtzun ke jlu, xi cyma'n cye txkantl; icx minti' xi cybi'n cyyol.

Xi tma'n Jesús cye apostl tu'n cyxi' pacbal

Matey 28.16-20; Lucas 24.36-49; Juan 20.19-23

14Te mancbilxitzun, cub tyec'un tib Jesús ax cywitz keju junlaj t-xnak'tzben in che wa'ntok ti'j mes; e baj ilin tu'n Jesús tu'nju minti' xi cyocsla'n ex tu'nju cyuwix cyanmi, ex tu'nju minti' xi cyocsla'n cyyol keju o que'yin te, ka otok jatz ank'in Jesús. 15Xi tma'n Jesús cye:

—Cyxi'ye tuj tcyakil twitz tx'otx', cypacbanxe tkanil colbil cye cycyakil xjal. 16Alcye ma tz'ocslan ex ma byan, oc cletel; atzun teju minti' ma tz'ocslan, cbel t-sentens. 17Ex akeju che ocslal, che bantel ke señ lu cyu'n: C'ajbel nbiye cyu'n tu'n cyetz ke ju'ẍ tuj cyanmi xjal; ex oc che yolil tuj junxitl yol; 18ka ma jaw cytzyu'n ke lobaj, ex ka ma txi cyc'a'n jun venen, minti' cbajel cyi'j; cbel cyk'o'n cyk'ab cyibaj yab, ex che banixel ke yab cyu'n.

Xi k'i'n Jesús tuj cya'j

Lucas 24.50-53

19Tbajlenxitzun yolin Kajaw Jesús cyuc'il, jax k'i'n tuj cya'j, ex cub ke' ttxlaj Dios tuj bank'abaj. 20Atzun cye t-xnak'tzben e je'x, xi cypacba'n tkanil colbil tuj tcyakil lugar; ax Kajaw onil cye, in tcyuwsa'nxix ju yol cyu'n ke señ in bant cyu'n. Icxwitju.]

Àwon tá yàn lọ́wọ́lọ́wọ́ báyìí:

Marcos 16: MAMH

Ìsàmì-sí

Pín

Daako