Lucas 12
12
Xi tk'o'n Jesús xnak'tzbil cye xjal tu'n tten cycwent cyi'j te cyxmletz'il parisey
Matey 10.26-27
1Baj cychmon cyib ela' mil xjal, baj cylamon cyib cyxolx. Ex tnejel oc ten Jesús k'malte cye t-xnak'tzben:
—Ten cycwente cyi'je teju t-samel pan cye parisey, aju cyxmletz'il. 2Porque tcyakilju ewan, c'elel tuj k'ancha'l; ex tcyakilju at tuj ewaj, oc cybi' xjal. 3Cyja'tzun, aju ma cymaye tuj klolj, cbinjtzel tuj tkan k'ij; ex tcyakilju ma cymaye tuj ewaj tujxi ja, ctzajel k'ma'n twi ja ex oc cybi' cycyakil xjal.
Alcye tu'n kxob twitz
Matey 10.28-31
4Cxel nma'ne cyeye akeye wuc'ile: Mi'n che xobe cywitz keju in cub cybyo'n t-ximlal xjal ex minti' mastl jacu bant cyu'n. 5Cxel nma'ne cyeye alcye tu'n cyxobe twitz: Che xobe twitzju at tipumal tu'n tcyim xjal tu'n ex at tipumal tu'n t-xi k'o'n xjal tuj infierni tcyimlenxi xjal; cyja'tzun in xi nma'ne cyeye, che xobe twitz.
6¿Minti'pe in che c'ayinjtz jwe' tal chyu'j tu'n cabe sentav? Pero mi jun cye nnic' tna'l tu'n Dios. 7Tcyakil ttzmal cywi'ye ajla'maj tu'n Dios. Cyja'tzun mi'n che xobe; akeye mas ma' cyxilene cywitz nimcu tal chyu'j.
Cxel kma'n cye xjal ka ax toc ocslal ko' ti'j Jesucrist
Matey 10.32-33; 12.32; 10.19-20
8Cxel nma'ne cyeye, alcyeju minti' in cub tewan ex in tma'n cye xjal ka ax toc ocslal wi'je, ax icxtzun weye mlay cub wewane, cxel nma'ne cywitz t-anjel Dios ka ax toc ocslal wi'je, akine sc'o'maj kine tu'n Dios tu'n ntene cyuc'il xjal. 9Pero alcye ma cub tewan cywitz xjal ka minti' ojtzki'n kine tu'n, ax icx weye cbel wewane cywitz t-anjel Dios ka minti' ojtzki'n wu'ne.
10Ex alcye jun xjal ma k'mante jun yol mya ba'n wi'je, akine sc'o'maj kine tu'n Dios tu'n ntene cyuc'il xjal, jacu najset til; pero alcye ma yolin mya ba'n ti'j Xewbaj Xjan, mlay najset til.
11Ex oc cyxi k'i'ne tuj ja te c'ulbil, ex cywitz jwes ex cywitz aj sanjelal, mi'n baj cyc'u'je tza'n tten tu'n t-xi cytzak'we'ne ex alcye yol tu'n t-xi cyma'ne; 12porque jurat ctzajel tma'n Xewbaj Xjan cyeye alcye yol tu'n t-xi cyma'ne.
Aju xobajil tu'n k'inumabl
13At jun xinak cyxol xjal xi tma'n te Jesús:
—Xnak'tzal, k'manxa te ntzique tu'n tcub tmij ketzbile.
14Atzunte Jesús xi tma'n te:
—¿Alcye ma tz'oc k'onte weye te jwes cyibaje ex tu'n tcub tmij cyetzbile wu'ne?
15Ex tmatl Jesús cye:
—Atx cyna'ne ti'j, ex ten cycwente cyi'je tu'n mi'n tpon cyc'u'je ti'j k'inumabl; porque mya toc tchwinklal jun xjal ti'j nimcu at te.
16Ax icx xi tma'n Jesús jun techal cye:
—At jun xjal k'inun, nim twitz awal o chmet tuj ttx'otx'. 17Cubtzun t-ximan k'inun ex tma: ¿Ti oc nbincha'ye? Porque minti' jatum tu'n tocx nc'u'ne twitz wawale. 18Pero ba'n wu'ne alcye oc nbincha'ye. Che bel nxitune ntx'utx'e, ex che jawil nbincha'ne mas matijtl ke, ex atzun c'oquex nc'u'ne tcyakil twitz wawale ex tcyakilju at weye. 19Entons cxel nma'ne te wanmiye: Wanmi, nimcu at teya c'u'n ke te nimcu abk'i; tz'ojlana, wa'na, c'ana, ex tzalajxa, chi k'inun. 20Pero xi tma'n Dios te xjal: Minti' tnabla, teju konic'an ja'lo cymela; ex tcyakilju ma baj tc'u'na, ¿alcye cyjel tajwil? 21Cyja'tzun tten aju xjal in baj tchmo'n tk'inumabl te tex, pero tuj twitz Dios meba te xjal lu.
Ke tc'wa'l Dios cwentin ke tu'n
Matey 6.25-34
22Xitzun tma'n Jesús cye t-xnak'tzben:
—Cyja'tzun cxel nma'ne cyeye: Mi'n baj cyc'u'je ti'j cychwinklale, ti cxel cywa'ne; ex mi'n baj cyc'u'je ti'j cyximlale, ti c'oquel cyk'o'ne cyi'je. 23Aju cychwinklale mas ma' t-xilen twitz wabj, ex aju cyximlale mas ma' t-xilen twitz xbalun. 24Cyque'yinxe ke joj, minti' in che awan ex minti' in che chmon twitz awal; minti' jun ja te c'ubl cywa ex minti' cytx'utx', pero ax Dios in c'a'chan cye. ¿Yajtzun cyeye, myapelo mas ma' cyxilene cywitz ke joj? 25¿Ex alcyetzun jun cyxole jacu bant tu'n tu'n toc tk'o'n juntl k'ij tchwinklal*fn* tu'nju nimxix in baj tc'u'j ti'j? 26Ka mlayx bant aju ch'in cyu'ne, ¿tiku'ntzun in baj cyc'u'je ti'j txkantl?
27Che ximane cyi'j bech tuj c'ul tza'n tten in che ch'iy, minti' in che ak'nan ex minti' in che chkon; pero cxel nma'ne cyeye ti'j rey Salomón, masque tbanilxix t-xbalun oc tk'o'n, pero minti' pon jun t-xbalun ic tza'n cye tal bech lu. 28Katzun ic in t-xbalumi'n Dios tal c'ul tuj cojbil at ja'lo ex nchi'j tz'ocx k'o'n tuj k'ak', ¿yajtzunlo cyeye, mlaypelo che xbaluminjtze tu'n, akeye xinak ch'in cyocslable? 29Cyja'tzun, mi'n baj cyc'u'je ti'j cywaye ex ti'j cyc'aye, ex mi'n che bisune ti'j. 30Porque ke txkantl xjal tuj tcyakil twitz tx'otx' in che jyon ti'j tcyakil jlu; atzun cyeye at jun Cymane ojtzki'n tu'n ka at tajben tcyakil jlu cyeye. 31Cynimanxe tnejelxix aju tcawbil Dios, tcyakiltzun jlu ctzajel k'o'n cyeye.
Aju k'inumabl tuj cya'j
Matey 6.19-21
32Mi'n che xobe akeye nẍne'le, ichak nic'xi cybete, porque ate Cymane ba'n ela tuj twitz tu'n t-xi tk'o'n aju cawbil te cyeye. 33Tcyakilju at cyeye, cyc'ayinxe ex cyk'onxe cye meba; cybinchame cych'u'ẍe aju mlay baj, cychmome cyk'inumable tuj cya'j aju mlay baj, jatum mlay pon lak'e' elek' ex mlay naj tu'n poc'. 34Porque jatum ta' cyk'inumable, axtzun ctel cyanmiye.
Cybincham cytene
35Cyc'alomtzun cyc'u'je wen, ex cytxako'nc cycandile. 36Che ocxe ic tza'n ke majen in che ayon ti'j cypatrón oc tajtz tuj mejeble'n, tu'ntzun tjaket naj ttzi ja cyu'n oc tul, ex oc toc tk'ajtza'n ttzi ja. 37At tzalajbil cye keju majen lu oc tul cypatrón in che ayon ti'j; ax toc cxel nma'ne cyeye, ate patrón c'oquel tc'alo'n tc'u'j ex cxel tma'n cye tmajen tu'n cycub ke' ti'j mes, ex c'oquel ten sipal cywa. 38Ichak ka ma tzul tmij ak'bil ex ka ch'ixtok kskix, ka in che itz'len majen ti'j oc tul, at tzalajbil cye keju majen lu. 39Pero tz'elx cynic'e ti'j jlu, nokwit bi'n tu'n tajaw ja alcye or tu'n tul elek', jaculo cub ten xk'ukil, ex mlaylo tz'ocx elek' elk'al tuj tja. 40Icxtzun cyeye, nok banin cytene, porque alcye or minti' in che ximane ti'j, atzun or chin ule, akine sc'o'maj kine tu'n Dios tu'n ntene cyuc'il xjal.
Aju majen in bant tak'un tu'n ex aju majen minti' in bant tak'un
Matey 24.45-51
41Xitzun tma'n Pedro te Jesús:
—Tat, ¿o'cxpe keye in tma'na aju techal lu, ex ka cye cycyakil?
42Xitzun tma'n Kajaw cye:
—Aju mayordom in japunxix tak'un tu'n ex at tnabl, ctzajel tma'n tpatrón te tu'n cyoc tcwentin keju ate' tuj tja, ex tu'n t-xi k'ot cywa oc tpon or. 43At-xix tzalajbil teju majen ka in tbincha'n alcyeju tak'un oc tul tpatrón. 44Ax toc cxel nma'ne cyeye, c'oquel k'o'n ju majen lu tu'n tpatrón te cwentil tcyakilju at te tpatrón. 45Pero ka ma cub t-ximan ju majen tuj tanmi: Yajxi tzulwe npatrón, ka chi, ex ka ma tz'oc ten c'ixbisal cye mastl majen xinak ex majen xu'j, ex ka ma tz'oc ten wa'l ex c'al, ex ka ma tz'oc ten c'al k'e'n, 46tzultzun tpatrón majen lu tuj k'ij minti' in ayon ti'j, ex tuj or minti' bi'n tu'n; cbel k'o'n nim tcastiw ex cxel tk'o'n cyxol keju mya ba'n.
47Aju majen ojtzki'n tu'n alcye tajbil tpatrón ex mya banin tten, ex minti' in bant tu'n aju tajbil tpatrón, cc'ixbisetel ela' maj tu'n asyal. 48Atzunju majen na'nxtok tlonte tajbil tpatrón ex ka ma tbincha jun mya ba'n, nok ch'in cc'ixbisetel; porque jun xjal ka nim ma txi k'o'n tuj tcwent, ax nim cxel kanin te ti'j ju tak'unben; ex jun xjal ka ma txi okxenit nim te, ax nim cxel kanit te.
Tu'n tlaj Jesús in tzaj pabl tib cyxol xjal
Matey 10.34-36
49Akine ma chin ule k'ol k'ak' twitz tx'otx', ex cuchiwt mawt jaw c'ant. 50Il ti'j tu'n wic'e tuj nim c'ixc'oj, ex nim in chin bisune ocxi tjapun baj tcyakil. 51¿Maj in che ximane ti'j ka ma chin ule twitz tx'otx' tu'n cyten xjal tuj tzalajbil? Cxel nma'ne cyeye: Mi'n, o'cx tu'n tten pabl tib cyxol. 52Porque texju ja'lo, jwe' xjal tuj jun ja cbel ten pabl tib cyxol, cbel ten k'oj cyxol ox cyuc'il cabetl, ax icx cyxol cabe cyuc'il oxtl. 53Ctel k'oj cyxol mambaj tuc'il tc'wa'l, icx te c'wa'lbaj tuc'il tman; ctel k'oj cyxol txuybaj tuc'il tal, icx te txin tuc'il ttxu'; ctel k'oj cyxol xu'j alibaj tuc'il txin alibaj, icx te txin alibaj tuc'il xu'j alibaj.
Ke techal ti'j tk'ijlalil
Matey 16.1-4; Marcos 8.11-13
54Ax icx xi tma'n Jesús cye xjal:
—Oc in xi cyque'yine muj in jaw tuj telex k'ij, jurat in cyma'ne: Tzul jbal ex in tzajtzun, 55ex oc in tzaj cyk'ik' elni, in cyma'ne: Tzul cyak ex in tzajtzun. 56Xmletz' keye. Nne'l cynic'e ti'j alcye ctzajel tu'nju techal in cyque'yine twitz cya'j ex twitz tx'otx'; ¿tza'ntzun tten minti' nne'l cynic'e ti'j alcye ctzajel tuj tk'ijlalil lu tu'nju techal in cyque'yine?
Bincham ttena tuc'il aj k'oj ti'ja
Matey 5.25-26
57¿Ex tiku'n minti' in cub cyximane cyu'nxe alcyeju tz'aklxix? 58Ka ma txi k'i'na twitz jwes tu'n aj k'oj ti'ja, tz'oc tililx tu'na tu'n t-xi cybincha'ne ti'j tuj be, tu'ntzun mi'n tpon k'i'na twitz jwes tu'n, ex tu'n mi'n t-xi k'o'na te polisiy tu'n jwes, ex tu'n mi'n tocx k'o'na tuj pres tu'n polisiy. 59Cxel nma'ne teya, mlay tz'etza tuj pres ka mya cabal tmulta c'oquex tchjo'na.
Àwon tá yàn lọ́wọ́lọ́wọ́ báyìí:
Lucas 12: MAMH
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Mam del Norte © Sociedades Bíblicas Unidas 1993
