متّی 5
5
پہاڑی اُتے وعظ
1یسُوع اِیں بِھیڑ کُوں ڈیکھ تے پہاڑ اُتے چڑھ گِیا تے جِیں ویلے بہہ گِیا تاں اُوندے شاگرد اُوندے کولھ آئے 2تے او اُنہاں کُوں اِینویں تعلیم ڈیوݨ لگا:
مُبارک حالی
3”مُبارک ہِن او جیہڑے دل دے غریب#5:3 یعنی خُدا دا خوف رکھنڑ آلے تے اُوندی رحمت دے مُتھاج۔ ہِن،
کیوں جو اسمان دی بادشاہی اُونہی دی ہے۔
4مُبارک ہِن او جیہڑے ڈُکھی ہِن،
کیوں جو او تسلی پیسن۔
5مُبارک ہِن او جیہڑے حلیم ہِن،
کیوں جو او زمین دے وارث ہوسن۔
6مُبارک ہِن او جیہڑے راستبازی دے بُکھے تے ترِسّے ہِن،
کیوں جو او رَج سِن۔
7مُبارک ہِن او جیہڑے رحم دل ہِن،
کیوں جو اُنہاں اُتے رحم کیتا ویسی۔
8مُبارک ہِن او جیہڑے پاک دل ہِن،
کیوں جو او خُدا کُوں ڈیکھسن۔
9مُبارک ہِن او جیہڑے صُلح کرویندے ہِن،
کیوں جو او خُدا دے پوتر اکھویسن۔
10مُبارک ہِن او جیہڑے راستبازی دے سببّوں ستائے گئے ہِن،
کیوں جو اسمان دی بادشاہی اُونہی دی ہے۔
11مُبارک ہوسو تُساں جِیں ویلے لوک تُہاکُوں میڈے سببّوں لعن طعن کریسن تے طرحاں طرحاں دے بُرے گالھیں تُہاڈے بارے ءچ نا حق اکھیسن۔ 12خوش تھیوائے تے جشن منائے کیوں جو اسمان اُتے تُہاکُوں وڈا اجر مِلسی، اِیں واسطے جو لوکاں تُہاڈے تُوں پہلے نبیاں کُوں وی اِینویں ای ستایا ہا۔
نمک تے نُور
13تُساں زمین دے نمک#5:13 یعنی مسیح دے پیروکاراں دا معاشرے ءچ چنگا اثر ہووے۔ ہیوے، پر جے نمک دا مزہ ویندا راہوے تاں او کیہڑی چیز نال نمکین کیتا ویسی؟ وَل او کہیں کم دا نئیں سوائے اِیندے جو باہر سَٹ ڈِتا ونجے تے لوکاں دے پیراں تلے لتاڑیا ونجے۔
14تُساں دُنیا دا نُور ہیوے۔ جیہڑا شہر پہاڑ اُتے وسیا ہے او لُک نئیں سگدا۔ 15تے ڈیوا بال تے تھاں دے تلے نئیں بلکہ ڈیواٹ اُتے رکھیندے ہِن، تاں اُوندے تُوں گھر دے سبھ لوکاں کُوں روشنی پُجدی ہے۔ 16اِیں طرحاں تُہاڈی روشنی لوکاں دے سامنڑے چمکے تاں جو او تُہاڈے نیک کماں کُوں ڈیکھ تے تُہاڈے اسمانی باپ دی تمجید کرݨ۔
توریت دے بارے ءچ تعلیم
17ایہ نہ سمجھو جو مَیں توریت یا نبیاں دے صحیفیاں کُوں منسوخ کرݨ آیا ہاں۔ منسوخ کرݨ نئیں بلکہ پُورا کرݨ آیا ہاں۔ 18کیوں جو مَیں تُہاکُوں سچ آدھا ہاں جو جئیں تئیں اسمان تے زمین ٹَل نہ ونجنڑ ہِک نقطہ یا ہِک شوشہ توریت ءچوں ہرگز نہ ٹَل سی جئیں تئیں سبھ کُجھ پُورا نہ تھی ونجے۔ 19بس جیہڑا کوئی اِنہاں چھوٹے تُوں چھوٹے حُکماں ءچوں کہیں کُوں توڑیسی تے ڈُوجھیاں کُوں وی اِینویں کرݨ سکھیسی او اسمان دی بادشاہی ءچ سبھ تُوں چھوٹا اکھویسی۔ پر جیہڑا اُنہاں اُتے عمل کریسی تے اُنہاں دی تعلیم ڈیسی او اسمان دی بادشاہی ءچ وڈا اکھویسی۔ 20کیوں جو مَیں تُہاکُوں سچ آدھا ہاں جو جے تُہاڈا نیک چال چلنڑ شریعت دے عالماں تے فریسیاں تُوں زیادہ نہ ہوسی تاں تُساں اسمان دی بادشاہی ءچ اصلُوں نہ وَنج سگسو۔
کاوڑ دے بارے ءچ تعلیم
21تُساں سُنڑ گِھدا ہے جو پُرانڑے زمانے دے لوکاں کُوں آکھیا گِیا ہا جو ’خون نہ کرائے#خرُوج 20:13۔، تے جیہڑا خون کریسی او عدالت دی سزا دا حقدار ہوسی۔‘ 22پر مَیں تُہاکُوں ایہ آدھا ہاں جو جیہڑا آپنڑے بِھرا اُتے کوڑیندے، او عدالت دی سزا دا حقدار ہوسی تے جیہڑا آپنڑے بِھرا کُوں پاگل اکھیسی او وڈی عدالت دی سزا دا حقدار ہوسی۔ تے جیہڑا اُونکُوں احمق اکھیسی او دوزخ دی بھاہ دا سزاوار بنڑسی۔ 23بس جے قُربان گاہ اُتے نذرانہ پیش کریندے ویلے تیکُوں یاد آوے جو تیڈے بِھرا کُوں تَیں تُوں شکایت ہے، 24تاں تُوں آپنڑا نذرانہ اُتھائیں قُربان گاہ دے اگُوں چھوڑ ڈے تے وَنج تے آپنڑے بِھرا نال صُلح کر گِھن۔ وَل آ تے آپنڑا نذرانہ پیش کر۔
25جئیں تئیں تُوں آپنڑے مُدعی نال راہ ءچ ہیں تُوں اُوندے نال جلدی صُلح کر گِھن، کِتھائیں اِینویں نہ تھیوے جو او تیکُوں مُنصف دے حوالے کر ڈیوے، تے مُنصف تیکُوں سپاہی دے حوالے کر ڈیوے، تے تیکُوں قید خانے ءچ سَٹ ڈِتا ونجے۔ 26مَیں تیکُوں سچ آدھا ہاں جو تُوں جئیں تئیں پائی پائی ادا نہ کریسیں اُتھوں کڈھائیں نہ چُھٹسیں۔
زِنا دے بارے ءچ تعلیم
27تُساں سُنڑ گِھدا ہے جو آکھیا گِیا ہا جو ’زِنا نہ کرائے#خرُوج 20:14۔۔‘ 28پر مَیں تُہاکُوں ایہ آدھا ہاں جو جئیں کہیں عورت کُوں بُری نِگاہ نال ڈِٹھا تاں اُوں آپنڑے دل ءچ اُوندے نال زِنا کر گِھدا۔ 29بس جے تیڈی سجی اکھ تَیں کنُوں گُناہ کراوے تاں اُونکُوں کڈھ تے سَٹ#5:29 ایہ محاورتاً اِستعمال تھئے تے اِیندا مطلب ایہ ہے جو گُناہ تُوں بچنڑ دی ہر طرحاں کوشش کیتی ونجے۔ ڈے۔ کیوں جو تیڈے کیتے اِیہو چنگا ہے جو تیڈے بدن دے انگاں ءچوں ہِک اَنگ ویندا راہوے بجائے اِیندے جو تیڈا سارا بدن دوزخ ءچ سَٹ ڈِتا ونجے۔ 30تے جے تیڈا سجا ہتھ تَیں کنُوں گُناہ کراوے تاں اُونکُوں کپ سَٹ۔ کیوں جو تیڈے کیتے اِیہو چنگا ہے جو تیڈے سارے انگاں ءچوں ہِک اَنگ ویندا راہوے بجائے اِیندے جو تیڈا سارا بدن دوزخ ءچ سَٹ ڈِتا ونجے۔
طلاق دے بارے ءچ تعلیم
31ایہ وی آکھیا گِیا ہا جو ’جیہڑا کوئی آپنڑی ذال کُوں چھوڑے تاں اُونکُوں طلاق لِکھ ڈیوے#اِستِثنا 24:1۔۔‘ 32پر مَیں تُہاکُوں ایہ آدھا ہاں جو جیہڑا کوئی آپنڑی ذال کُوں بدکاری دے سِوا کہیں بئی وجہ کنُوں طلاق ڈیندے اوہ اُوندے تُوں زِنا کرویندے، تے جیہڑا کوئی اُوں طلاق شدہ عورت نال شادی کریندے او زِنا کریندے۔
قَسماں دے بارے ءچ تعلیم
33وَل تُساں سُنڑ چُکے ہیوے جو پُرانڑے زمانے دے لوکاں کُوں آکھیا گِیا ہا جو ’کوئی کُوڑی قَسم نہ چوائے بلکہ آپنڑیاں قَسماں رب کیتے پُوریاں کرائے#احبار 19:12۔ ۔‘ 34پر مَیں تُہاکُوں ایہ آدھا ہاں جو اصلُوں قَسم نہ چوائے۔ نہ اسمان دی کیوں جو او خُدا دا تخت ہے، 35نہ زمین دی کیوں جو او اُوندے پیراں دی چوکی ہے، نہ یروشلیم دی کیوں جو او وڈے بادشاہ دا شہر ہے، 36نہ آپنڑے سر دی قَسم چوائے کیوں جو تُوں آپنڑے ہِک وال کُوں وی چِٹا یا کالا نئیں کر سگدا۔ 37اِیں واسطے ہاں دی جاہ ’ہاں‘ تے نہ دی جاہ ’نہ‘ آکھو کیوں جو جیہڑا اِیں کنُوں زیادہ ہے او ابلیس کنُوں ہے۔
بدلے دے بارے ءچ تعلیم
38تُساں سُنڑ چُکے ہیوے جو آکھیا گِیا ہا جو ’اکھ دے بدلے اکھ تے ڈند دے بدلے ڈند#خرُوج 21:24۔ ۔‘ 39پر مَیں تُہاکُوں ایہ آدھا ہاں جو شریر دا مُقابلہ نہ کرائے بلکہ جیہڑا کوئی تیڈی سجی گَلھ اُتے چاٹ مارے تاں ڈُوجھی وی اُوندے پاسے کر گِھن۔ 40جے کوئی تَیں اُتے دعویٰ کر تے تیڈا چولا گِھننڑ چاہوے تاں جُبّہ وی اُوندے حوالے کر ڈے۔ 41تے جے کوئی تیکُوں وِنگار ءچ ہِک مِیل گِھن ونجنڑ چاہوے تاں اُوندے نال ڈُو مِیل لگا وَنج۔ 42جیہڑا کوئی تَیں تُوں منگے اُونکُوں ڈے تے جیہڑا تَیں تُوں قرض گِھننڑ چاہوے اُونکُوں اِنکار نہ کر۔
دُشمنڑاں نال محبت
43تُساں سُنڑ چُکے ہیوے جو آکھیا گِیا ہا جو ’آپنڑے ہمسائے نال محبت رکھ#احبار 19:18۔ تے دُشمنڑ نال وَیر۔‘ 44پر مَیں تُہاکُوں ایہ آدھا ہاں جو آپنڑے دُشمنڑاں نال محبت رکھو، تے جیہڑے تُہاکُوں سَتیندے ہِن اُنہاں کیتے دُعا کرو۔ 45تاں تُساں آپنڑے اسمانی باپ دے فرزند بنڑ سو۔ کیوں جو او آپنڑے سِجھ کُوں نیکاں تے بداں ڈوہائیں اُتے چمکیندے تے نیکاں تے گُنہگاراں ڈوہائیں اُتے مینہ وسیندے۔ 46کیوں جو جے تُساں صرف اُنہاں نال محبت رکھیندے ہیوے جیہڑے تُہاڈے نال محبت رکھیندے ہِن تاں تُہاکُوں کیا اجر مِلسی؟ کیا محصُول گِھننڑ آلے وی اِینویں نئیں کریندے؟ 47تے جے تُساں صرف آپنڑے ای بِھرانواں کُوں سلام کرو تاں کیہڑی وڈی گالھ کریندے ہیوے؟ کیا غیر قوماں دے لوک وی اِینویں نئیں کریندے؟ 48بس تُساں کامِل بنڑو جِینویں تُہاڈا اسمانی باپ کامِل ہے۔“
Àwon tá yàn lọ́wọ́lọ́wọ́ báyìí:
متّی 5: SKRV
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Modern Central Saraiki Bible © 2024 Strategic Resource Group
