SAN MATEO 12
12
Tej cyakꞌ ke t-xnakꞌatzxin piẍcꞌulbilte twitz triwa tuj kꞌij te ajlabl
(Mr. 2:23-28; Lc. 6:1-5)
1Te jun kꞌij te ajlabl, ex bet Jesús tuj triwa cyuya t-xnakꞌatzxin. Oc takꞌ weyaj cye t-xnakꞌatzxin, bix akꞌkexin piẍcꞌulbilte twitz triwa, bix e xiꞌ cywaaꞌnxin. 2Pero tej toc cycyeꞌyen kej aj fariseo jlu, e xiꞌ cykbaꞌn te Jesús:
—Tzin tkbaꞌn ley yaaꞌn tumel tuꞌn kakꞌanan tuj kꞌij te ajlabl, pero kej tey t-xnakꞌatza, ma tzꞌel cyiiꞌn twitz triwa―tz̈ikexin.
3Pero e xiꞌ tkbaꞌn Jesús cyexin:
—¿Bajxpatzen txaꞌ cycyeꞌyena tuj tyol Dios ti e baj te jxin kiyꞌjil David cyuya ke tuyaxin tej toc nim takꞌ weyaj cyexin jun maj? 4Ocx David tuj nin tja Dios, bix e xiꞌ twaaꞌn jpan kꞌoꞌn te Dios. Amale tzint tkbaꞌn ley ja xjan pan lu oꞌcx te cyej xin pala baꞌn t-xiꞌ cywaaꞌnxin, pero e xiꞌ cywaaꞌn David. 5Bix at juntl. ¿Bajxpa txaꞌ cycyeꞌyena tuj ley ke pala tuj tja Dios nchi akꞌanan tuj kꞌij te ajlabl bix mintiiꞌ cyil tiꞌj? 6Cxeꞌl nkbaꞌna cyey, mas nintzaj inayena twitz tja Dios. Bix yaaꞌn tjakꞌ ley te ajlabl tja Dios. 7Tzin tkbaꞌn tyol Dios cyjulu: “Waja tuꞌn tkꞌakꞌen cycꞌuꞌja cyiꞌ cabtl, yaaꞌn nuk oꞌcx cyoybila weya,” tz̈i Dios tuj tyol. Nuket tzꞌel cyniꞌya tiꞌj ti japenina ja yol lu, mintle e tzaj cykꞌoja cyiꞌj nxnakꞌatza mintiiꞌ cyil. 8Inayena, jaj xjal Smaꞌn tuꞌn Dios tuꞌn ntena cyuya xjal, kbalte ti cbinel tuj jkꞌij te ajlabl―tz̈i Jesús cye fariseo.
Junxin xjal otk tzꞌel tanem tkꞌabxin
(Mr. 3:1-6; Lc. 6:6-11)
9Iyꞌtzen Jesús tuj ja lugar lu, bix tuj tzunj kꞌij te ajlabl ocxxin tuj jun camon jaaꞌ xnakꞌtzbil tyol Dios. 10Bix at junxin xjal otk tzꞌel tanem tkꞌabxin. Bix eteꞌc xsunj xjal fariseo tuj camon jaaꞌ, bix e xiꞌ cykanenxin te Jesús:
—¿Kꞌoꞌnpa tuꞌn ley tuꞌn tcub tkꞌanj jun xjal tuj kꞌij te ajlabl?―tz̈ikexin. E xiꞌ cykanenxin texin juꞌwa tuꞌn tcub tzꞌakxin tuj cyexin cyley.
11Bix e xiꞌ ttzakꞌbeꞌnxin cyexin:
—Ka ma cuꞌx tzꞌak jun carnel tuj jun jul tuj kꞌij te ajlabl, ¿alcye jun cyey mlaypale tjatz tiiꞌn, amale nuket jun carnel? 12Yajtzen jun xjal, ¿yaaꞌmpale mas tajbel twitz jun carnel? Juꞌ tzunj, kꞌoꞌn tuꞌn ley tuꞌn tcub nkꞌanena jun xjal tuj kꞌij te ajlabl―tz̈i Jesús cye fariseo.
13Tej tbaj yolen Jesús juꞌwa, e xiꞌ tkbaꞌnxin tej xin min yucchtl tkꞌab:
—Nukpinx tkꞌaba.
Bix e xiꞌ tnukpiꞌnxin tkꞌabxin, bix ul tnaabl tkꞌabxin tisen juntl tkꞌabxin.
14Pero yaltzen cye fariseo, etzkexin, bix e yolenkexin cyxolxxin tuꞌn ti tten tuꞌn tcub cybyoꞌnxin ja Jesús.
Tej tyole Isaías tiꞌj Jesús ka ja tscyꞌoꞌn tuꞌn Dios
15El tniyꞌ Jesús tiꞌj ti e cub cynincꞌuꞌn fariseo tiꞌj, bix el lkꞌexin tuj ja lugar lu. Nim xjal oc lpe tiꞌjxin, bix e cub tkꞌaꞌnexin cykilca yaab cyxol. 16Pero e tkbaxin cye xjal tuꞌn miꞌn txiꞌ cykꞌumen ka otk chi kꞌanj. 17E tkꞌanexin ke xjal tuꞌntzen tbint tisenj e tkba Dios te tyolel Isaías jatxe ootxa. Tz̈i Dios cyjulu: 18“Lu jxjal ma nsicyꞌa tuꞌn tajben weya. A wanema tiꞌj, bix nim nchin tzalaja tiꞌj. Cwel nkꞌoꞌna jweya Espíritu tibajxin. Bix cxeꞌl tkꞌumenxin cyej xjal te cykil tnom ti tten tuꞌn cyten jiquen nwitza. 19Miꞌn jaw kꞌojlxin cyiꞌ xjal bix miꞌn jaw s̈-inxin cye xjal. Miꞌn kꞌajt-xin cyiw tuꞌn cyoc lpe xjal tiꞌjxin. 20Jun xjal yaaꞌn cyiw tisen jun ptzꞌunt ncub toket, cxeꞌl tyeecꞌanxin tkꞌakꞌbil tcꞌuꞌjxin te. Bix jun xjal yaaꞌn nimxix tocslabl, tisen oj chꞌitk tcub yubtzꞌaj jun tken cantil, cxeꞌl tyeecꞌanxin tpasensyaxin tiꞌj. Juꞌ cbinel tuꞌnxin ojxe tcamanxin tiꞌj cykil kaꞌ. 21Tiꞌjxin cꞌoquel ke cycꞌuꞌj xjal te cykil tnom,” tz̈i Dios tuj tyol tuꞌn Isaías.
Tej cykbante fariseo ja taaw il kꞌol tipemal Jesús
(Mr. 3:20-30; Lc. 11:14-23)
22Yajcꞌatltzen, bix e xiꞌ kꞌiꞌn twitz Jesús junxin xjal toc ten jun biman tiꞌj. Mos̈xin, bix min e bintl tyolenxin. Pero tej tel tlojoꞌn Jesús biman tiꞌjxin, nbintltzen tyolen xinak bix nbintl tuꞌnxin tuꞌn tcyeꞌyenxin. 23Bix e jaw kleeꞌ cykilca xjal, bix e xiꞌ cykbaꞌnxin:
—¿Japatzen loj ja xjal lu Tcwal David at tuꞌn tul te cawel?
24Pero cye fariseo, tej cybinte ti toc cyuꞌn xjal, e xiꞌ cykbaꞌnxin:
—Min. Nuk tuꞌnj tipemal kꞌoꞌn te tuꞌn Beelzebú, cawel cyibaj biman, baꞌn tuꞌn tel tlojoꞌn ja xjal lu biman cyiꞌ xjal―tz̈i ke fariseo.
25Pero el tniyꞌ Jesús tiꞌj ti iyꞌ tuj cycꞌuꞌjxin, bix e xiꞌ tkbaꞌnxin cyexin:
—Tzin cykbaꞌna nchin akꞌanana te taaw il, Satanás. ¿Pero ti tten juꞌwa? Cytzkiꞌntla ka ma tzꞌel tpaꞌn tiib jun tnom bix pjel cykꞌojlen cyiib xjal, mlay cyaj tnom baꞌn. Jax juꞌx ke te jun jaaꞌ, ka ma chi jaw kꞌoj, biꞌx cxeꞌl cynajleꞌn tuj il. 26Juꞌtzen tten tuya taaw il. Ka ma tzꞌel tlojoꞌn Satanás kej biman eteꞌ tjakꞌ tcawbil, nkꞌojl tzunxin tiꞌjxxin, bix tuꞌn t-xiꞌ tcawbilxin tuj il. 27Oj tel cyiiꞌn ke cyxnakꞌatza biman, min txiꞌ cykbaꞌna tuꞌn tipemal Beelzebú nbint cyuꞌn. Juꞌ tzunj, miꞌn txiꞌ cyyolena n-el wiiꞌna biman tuꞌn tipemal Beelzebú, cuma cytzkiꞌntla mi nuk cyuꞌn bix mi nuk wuꞌna bixet tzꞌel biman tuꞌn tipemal Beelzebú. 28Juꞌ tzunj, tuꞌnx tipemal Espíritu Santo te Dios n-el wiiꞌna biman. Bix cuma tuꞌn tipemal Dios, qꞌueleltzen cyniꞌya tiꞌj tuꞌnj wul-lena o tzul tcawbil Dios cyibaja.
29¿Baꞌmpa tocx jun alakꞌ tuj tja jun xjal cyiw te kꞌilbetz tkꞌinemal ka min ma cub tẍpoꞌn alakꞌ taaw jaaꞌ nejl? Min. Pero ka ma cub tẍpoꞌn, baꞌntzen tetz talkꞌaꞌn tkꞌinemal. Weya, at wipemala tuꞌn tel wiiꞌna j-at tuj tkꞌab taaw il. 30Ejeeꞌy, ka min ma tzꞌoc cykꞌon cyiiba wuyena, nchi kꞌoj tzuna wiꞌja. Kej xjal min cyakꞌ cyiib wuyena tuꞌn cyclet xjal tuj tkꞌab Satanás, juꞌtzen chi onen tiꞌ Satanás tuꞌnx cyxiꞌ xjal tuj il. 31Juꞌ tzunj, cxeꞌl nkbaꞌna cyey, baꞌn tcub tnajsaꞌn te Dios tixja ilel bix tixja xmucchabl yol wiꞌja. Pero kej xjal tzin cykbaꞌn ka junx Espíritu Santo tuya taaw il, mlay najset cyil. 32Kej xjal yaaꞌn ocslal wiꞌja, ka ma chi yolen kaꞌ wiꞌja, inayena, jxjal Smaꞌn tuꞌn Dios tuꞌn ntena cyuya xjal, baꞌn tnajset cyil. Pero kej xjal tzin cykbaꞌn jnbint tuꞌn tipemal Espíritu Santo, tuꞌn tipemal Satanás, mlay najset cyil, yaaꞌn nuk tuj ja tyem lu, sino jax juꞌx tuj jtyem tzul.
33Tuꞌnj tbinchben jun xjal qꞌuelel cyniꞌya tiꞌj ti tten tnaabl jun xjal. Jun tzeeꞌ baꞌn miꞌn takꞌ twitz kaꞌ, bix jun tzeeꞌ kꞌeynen mlay takꞌ twitz baꞌn. Juꞌ tzunj, miꞌn txiꞌ cykbaꞌna ka baꞌn nbinchbena pero kaꞌ nnaabla. 34Ejeeꞌy, tisen lbajkey, cuma nuk kaꞌ n-el tuj cytziy. Kej xjal kaꞌ, chi yolel kaꞌ, cuma tiꞌ tyol jun xjal tzin tyeecꞌan ti tten tuj tanem. 35Kej xjal baꞌn nchi yolen baꞌn, cuma tuj cyanem taꞌ baꞌn. Pero kej xjal yaaꞌn baꞌn, nchi yolen kaꞌ, cuma tuj cyanem taꞌ kaꞌ. 36Cxeꞌl nkbaꞌna cyey, jaca yol min tzꞌajben nxiꞌ tkbaꞌn jun xjal, cxeꞌl tkꞌoꞌntzen tcwent te Dios oj tul kꞌij te xkelbil twitz Dios. 37Cyyola te jaꞌlewe kbalte ti pjel cyey tuj tzunj kꞌij tzul, cuma ka baꞌn yol n-etz tuj cytziy jaꞌlewe, cchicꞌajaxeltzen ka baꞌnkey twitz Dios. Pero ka kaꞌ yol n-etz tuj, cweltzen cytziy tkꞌoꞌn Dios cycastiwiya―tz̈i Jesús cye fariseo.
Kej xjal kaꞌ tzin cykana tuꞌn tbintl jun techel
(Lc. 11:29-32)
38Bix e xiꞌ cykbaꞌn juun txꞌolbal ley bix juun fariseo texin:
—Xnakꞌtzal, kaja tuꞌn ttzaj tyeecꞌana jun yecꞌbil jawnex keya tuꞌntzen tchicꞌajax ka juꞌ otk tzaja tuya Dios―tz̈ikexin.
39Pero aj ttzakꞌbeꞌnxin cyexin:
—Key xjal judío te jaꞌlewe, kaꞌkey bix ma tzꞌel cypaꞌn cyiiba tiꞌ Dios. Min chin cyiikꞌa, sino nuk eteꞌcꞌa kanlte we mastl yecꞌbil. Pero jtechel tzin cykanena, mlay kꞌoj cyey. Oj tbaj wiꞌja tisenxj e baj tiꞌj tyolel Dios Jonás, jatzen cꞌajbel te yecꞌbil cyey. 40Tisenxj e ten Jonás oxe kꞌij bix oxe koniyan tuj tcꞌuꞌj jun tij quis̈ tuj mar, jaxse juꞌx chin temela oxe kꞌij bix oxe koniyan tuj txꞌotxꞌ. 41Oj tpon tumel tuꞌn cyoc cykil xjal tuj xkelbil tuꞌn Dios, ejeeꞌj aj Nínive chi jawel yolel cyiꞌj ejeeꞌy judío te jaꞌlewe, cuma tej t-xiꞌ tkꞌumen jxin tyolel Dios Jonás cye aj Nínive tuꞌn taajtz tiꞌ cyanem, aajtztzen tiꞌ cyanem. Pero cyey, amale nxiꞌt tkꞌumen jun xjal mas jawnex twitz Jonás cyey, pero min cynimey. 42Jax juꞌx cjawel yolel jxuj xuuj e cawen cyuj tnom te jawne jatxe ootxa cyiꞌja judío te jaꞌlewe tuj jkꞌij te xkelbil tzul. E xiꞌxuj nakch te ebilte tnaabl rey Salomón, bix oc tbiꞌnxuj bix e tnimanxuj. Pero cyey, n-oc cybiꞌna tyol jun xjal mas jawnex twitz Salomón, pero min txiꞌ cynimana.
Jun biman najtz meltzꞌaj
(Lc. 11:24-26)
43Oj tel lojoꞌn jun biman tiꞌ jun xjal, nbettzen biman tuj tzkij txꞌotxꞌ jaaꞌ min-al xjal. Njyon tuꞌn tajlan, pero min cnet jaaꞌ tuꞌn tweꞌban. 44Juꞌ tzunj, nxiꞌ tkbaꞌn: “Chin aal meltzꞌaja tuyaj xjal jaaꞌ ntiniya nejl,” tz̈i. Oj taj meltzꞌaj biman tuyaj xjal, oj toc tcyeꞌyen xjal, tisencꞌa jun jaaꞌ min-al xjal tuj, bix tzꞌisen tten tuj, bix binne tten. 45Oj toc tcyeꞌyen min-al xjal tuj, n-eltltzen biman jyolte mas tuya, bix cpomel meltzꞌaj tuya wuuktl biman mas kaꞌ twitz. Enteraxseke chi oquex tunwen tuꞌn cynajan, bix juꞌ tzunj yal tzunj xjal masxsen tuj il taꞌ twitz nejl. Juꞌtzen pjel cyiꞌja judío kaꞌ te jaꞌlewe―tz̈i Jesús.
Ttxu bix ke titzꞌen Jesús
(Mr. 3:31-35; Lc. 8:19-21)
46Mitknaꞌx tbaj yolen Jesús cye xjal tej tpon ttxuxin cyuyax ke titzꞌenxin. Waꞌlcꞌakexin peꞌn, bix e cyajbexin tuꞌn cyyolenxin tuyaxin. 47Bix at jun xjal e xiꞌ tkbaꞌn texin:
—Jeyꞌ, lu ttxuy cyuya ke titzꞌena waꞌlcꞌa peꞌn, bix cyaj tuꞌn cyyolen tuyey―tz̈i xjal te Jesús.
48Pero e xiꞌ tkbaꞌnxin tej xjal otk kꞌumen jlu:
—Tuj twitza, ¿al tzunj weya ntxu bix al tzunj weya witzꞌen?―tz̈ixin. 49Bix e xiꞌ tchꞌiquexin tkꞌabxin cye t-xnakꞌatzxin, bix e xiꞌ tkbaꞌnxin:
—Ejeeꞌ tzunj luwe weya ntxu bix weya witzꞌen. 50Aljxe xjal binchante tajbil Nmana tuj cyaꞌj, ejeeꞌ tzunja witzꞌena bix waneba bix ntxuya―tz̈i Jesús.
Àwon tá yàn lọ́wọ́lọ́wọ́ báyìí:
SAN MATEO 12: mamTS
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2000, Wycliffe Bible Translators, Inc. All rights reserved.
