Mata 3
3
Yawhana Ndǝr 'Ya Bamtizǝma Dzǝkuti Whal ni
(Mar 1:18; Luk 3:1-18; Yaw 1:19-28)
1Akwa saka ǝnda yarni Yawhana ka ndǝlaba, tǝ dzǝ ada 'ya bamtizǝma akwa ntakǝr Yahudiya ba nkǝr ndǝrǝr Hyal nǝr bamtizǝmar tubi akuya ka kyifǝnta biku yarɛ, 2#Mat 4:17; Mar 1:15ka nkǝrɛ, “Tubiyamɛ, akuya kuhyikur nam atahyal kǝ 'ya kudzǝghɛ.” 3#Isa 40:3Akuya Yawhana dzǝ ani ndǝ nam tǝ nabi Isaya tara ndǝrɛ ata kǝrari ka nkǝrɛ apǝri:
“Kuɗaha ndɛ ada kǝga akwa ntakǝr i'ya,
‘Ɗǝmhamɛ whalɛ ala Thlaku ni;
mǝrtamɛ whal yarni daɗu alari.’ ”
4 #
2Kuh 1:8
Kariyir Yawhana ndǝ 'ya aka sǝsǝr dlugwam, dzǝ mbwai kusarari aka kutsi tǝ ndǝ ntaba. Sǝr sǝmǝr ni ani ntsǝwha ba mǝmǝr ntaku. 5Ndzǝ ada lǝba adzǝni akwa Ursalima ba sanga diyir Yahudiya ba sanga diyir Urdun. 6Dar ada nkǝrba bikǝr dar, dzǝ ada 'ya ala dar bamtizǝma akwa Kyaghar Urdun.
7 #
Mat 12:34; 23:33 Ama sakatǝ Yawhana tara wula ndzǝr Farisi, ba ndzǝr Saduki yarɛ hang ada si adzǝni akwa vui nam tǝ dzǝ ada 'ya bamtizǝma, dzǝ ka nkǝrɛ ala dar: “Gǝri nam madar kyikǝhyɛ yarɛ! Wa gala tǝ gǝri ka gǝri whui ta hakar Hyal nam aghǝli ada si ni? 8Ka gǝri ya munya nam ata tsanti tubiyir gǝri. 9#Yaw 8:33Ba tá gǝri tá ɗǝnga apǝri gǝri ata nkǝrɛ ala kǝr gǝri, ‘Yar aka Ibrahim apa tada yar.’ Yi ada gha ala gǝri apǝri Hyal ata mǝzi mǝrti madar ala Ibrahim aka paya yarni. 10#Mat 7:19Ndǝ kǝ kurta vǝdzɛ hyira dalma ala kugiva fu yarɛ, kǝlara fwɛ nam kura ada ya madar nam ɗaku ndǝ ata dlǝnta ka ndǝ ɗalu tǝni akwa u'u.
11“Yi ada 'ya ala gǝri bamtizǝma aka yimi ka gǝri tubi. Ama aghǝlawai ndǝ laka ata si nam tara kwatsǝni tǝra aka nggakur, nam tǝ ɓǝɓaiyirni yarɛ ma Yi ta mǝzi kǝtǝ wɛ. Dzǝ ata 'ya ala gǝri bamtizǝma aka Mambǝl Kartǝ ba aka u'u. 12Dzǝ aka sǝr puhǝrni akwa tsiyari, ba ka dzǝ puhǝba munyari, ka dzǝ tsaɓtsǝni lǝkamarni ka pu akwa bi ba dzǝ ata mbanta tsatsangari aka u'u nam kura ada tsidzi.”
Bamtizǝmar Yɛsu ni
(Mar 1:9-11; Luk 3:21-22)
13Antǝ Yɛsu ka hyati akwa Galili ka si adzǝ Kyaghar Urdun ka Yawhana 'ya alari bamtizǝma. 14Ama Yawhana ada bara kanti alari, ka nkǝrɛ, “Yi nam ada bara ka gǝ 'ya alai bamtizǝma, ama gǝ ada si adzǝra?”
15Yɛsu kalaktsǝni alari, “Ngyar ka dzǝ ndzai apani kulini; kǝ 'ya kal-kal ala muri ka ndǝ 'ya ǝni ka ghǝiyaba sanga kalkalkur.” Antǝ Yawhana ka yiɗɛ.
16Tǝkǝma sakatǝ ndǝ 'ya bamtizǝma ala Yɛsu, dzǝ ka sǝba ta yimi ni. Akwa saka ǝnda atahyal ka mburntadzi, ani dzǝ ka wula Mambǝlǝr Hyal sǝgǝl ka pwɛ aka paraku ata kǝrari apa adlakukyala. 17#Bad 22:2; Zab 2:7; Isa 42:1; Mat 12:18; 17:5; Mar 1:11; Luk 9:35Ba kuɗahu tara hyati atahyal ka nkǝrɛ, “Əni ani Zǝrna, nam tǝ yiɗɛ; tǝ Yi ada nga sǝɗa aka dza.”
Àwon tá yàn lọ́wọ́lọ́wọ́ báyìí:
Mata 3: CKL
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©2023 Seed Company in collaboration with Language Developers and Bible Translators Association
