Mata 10
10
Yɛsu Hyanǝba Ndzǝ Kumkapu Sǝɗǝ ni
(Mar 3:13-19; Luk 6:12-16)
1Yɛsu kǝga ndzǝr nuwurni kum kapu sǝɗɛ adzǝni dzǝ ka la dar wada ka dar kǝdlǝba mambǝl nam kulɗa yarɛ ba ka dar mbǝti kǝlara kasuwa aka kura kalangkur yarɛ.
2Ndza thlǝma ndzǝr hya yarɛ nam kum kapu sǝɗǝ ni: tangkǝma Simaun (nam tǝ ndǝ ada kǝga aka Bitrusu) ba zǝrangǝri Andǝrawusu; Yakubu madar Zabadi, ba zǝrangǝri Yawhana; 3Filibusu aka Barthlalaumisu, Tauma aka Mata nam ndǝr dlu tsǝmɛ; Yakubu zǝr Halfa aka Thladiyus; 4Simaun Zailaut aka Yahuda Iskaryauti, nam tara ɓǝlai Yɛsu.
5Yɛsu ka hyanǝba ndzi kum kapu sǝɗɛ yarni, ba dzǝ ka tsau ala dar apǝri: “Ta gǝri ta mwari akwa ntsa ndzǝ kura Yahudi wala lǝkwa duku akwa ntsa mǝlmǝr Samariya yarni. 6Kudzǝ ka gǝri mwari adzǝ tǝmar Izǝraila yarɛ nam tara sa. 7Sakatǝ gǝri ada mwari, ka gǝri nkǝrnta labar ni apǝri, ‘Kuhyikur nam atahyal ni kǝ 'ya kudzǝghɛ.’ 8Ka gǝri mbǝti ndzǝ nam kura kalang, ka gǝri hyanti ndzǝ nam ntǝnti, ka gǝri kǝtsǝnta kasuwar dǝlima yarɛ, ba ka gǝri kǝdlǝba mambǝl kulɗa yarɛ. Apanda tǝ gǝri dlutsi, antǝ ka gǝri la ndzi apanda. 9Ta gǝri ta kǝl dinar wala lipǝla wala kwapa mwapu ata dzá gǝri; 10#1Kwa 9:14; 1Tim 5:18gǝri adi ata kǝl ngǝrkǝr ka buraburá wɛ, wala lǝkutu damwa, wala ɓǝɓai, wala zuwa wɛ; akuya ndǝr kǝthlǝr kǝ mǝzi ka dzǝ ɓui sǝr sǝm kal-kal.
11“Kǝlara di nam ngga wala mǝlmɛ nam nkyiɗu tǝ gǝri lǝkwa, ka gǝri bara ndǝ nam tara mǝzi akwanda ka gǝri ndzai aharni tar vǝr tǝrar gǝri. 12Sakatǝ gǝri livi akwa kǝi ni, ka gǝri thlawar tǝ dar. 13Ma kǝi ni kǝ dlutsi tǝ gǝri, ngyar ka lapiyakur ni ndzai ata kǝrari; ma kǝi ni ta dlu tǝ gǝri wɛ, ngyar ka lapiyakur ni ɓakta si adzǝ gǝri. 14#'YaSu 13:51Ma kǝlara ndɛ ta dlu tǝ gǝri wɛ wala sǝthlǝmɛ ala ndǝrǝr gǝri wɛ, ka gǝri ɓunta bǝr-bǝr nam ata hǝi thlǝla gǝri sakatǝ gǝri ata tǝra ka ngyar kǝi ndari wala di ndari. 15#Mat 11:24; Bad 19:24-28#Luk 10:4-12Yi ada gha ala gǝri dzǝri, Hyal ata 'ya kǝtǝrdzi ala ndzǝr Saudaum aka Gwamara ata vǝr haka ta ndzǝr di nda. 16#Luk 10:3Yi ada hyanǝ tǝ gǝri alǝba apa tǝma yarɛ akwa ntsa kǝyar ntaku yarɛ. Kadǝbar ka gǝri ndzai bǝrkawa apa pwapu yarɛ ba tsuwɛ ka gǝri ndzai aka kǝlamkur apa adlakukyala yarɛ.
17 #
Mar 13:9-11; Luk 12:11,12; 21:12-15 “Tsuwɛ ka gǝri 'ya hankal aka ndzi; dar ata la tǝ gǝri ala bǝlama yarɛ ka dar tasǝ tǝ gǝri akwa fǝr vǝkǝr sǝlaiyir dar. 18Ata nyarna ndǝ ata si aka gǝri akǝma gumna yarɛ ba kuhyi yarɛ apa sakǝida ala dar ba ala ndzǝ kura Yahudi. 19Ama sakatǝ dar ngǝti tǝ gǝri, ta gǝri ta damitsǝnidzi ata kǝra sǝ nam tǝ gǝri ata nkǝrɛ wala whal nam tǝ gǝri ata ndǝrɛ. Ata saka ǝnda ndǝ ata la gǝri sǝ nam tǝ gǝri ata nkǝrɛ, 20akuya adi gǝri ani ata ndǝr wɛ, ama Mambǝlǝr Tada gǝri ani ata ndǝrɛ ata vuiya gǝri.
21 #
Mar 13:12; Luk 21:16 “Zǝr mama ata ɓǝlai zǝr mama ka tsi tǝni ba tada yɛ ala zǝrǝrni; madausai ata siya muli ata kǝra ndzǝr yar dar har ma ba hamnta ka ndǝ tsi tǝ dar. 22#Mat 24:9; Mar 13:13; Luk 21:17; Mat 24:13; Mar 13:13Sanga ndzi ata siya ngǝla tǝ gǝri ata nyarna, ama ndǝ nam tara ɓati ka la dǝnta dzǝ ata ɓui mbatǝdzi. 23Sakatǝ ndǝ la gǝri bwanai akwa vui pathlu, whuiyamɛ atǝra akwa vui damwa. Yi ada gha ala gǝri dzǝri, ma gǝri ata dlǝti sanga diyir Izǝraila ni Zǝr Ndɛ ata si.
24 #
Luk 6:40;
Yaw 13:16; 15:20 “Zǝr makǝranta adi ata ngǝmba malǝmǝr ni wɛ, wala zǝr kǝi ka dzǝ ngǝmba thlakǝr kǝiyirni wɛ. 25#Mat 9:34; 12:24; Mar 3:22; Luk 11:15Ata ndzai kal-kal ala zǝr makǝranta ka dzǝ ndzai apa malǝmǝr ni, ba zǝr kǝi ka dzǝ ndzai apa thlakǝr kǝiyirni. Ma dar kǝ kǝga thlakǝr kǝi apǝri Bɛlzǝbul, mǝmi tǝm tǝ dar ata kǝga ndzǝr kuta kǝiyirni?
26 #
Mar 4:22; Luk 8:17 “Ani ta gǝri ta hyivǝr tǝ dar. Akuya sǝ adi nam harhari kura ata siya mburntadzi wɛ, wala sǝ ɗǝwa-ɗǝwa nam kura ndǝ awa siya zǝndi wɛ. 27Sǝ nam tǝ Yi gha ala gǝri akwa kuthlɛ, nkǝrba mɛ akwa paraku; sǝ nam tǝ gǝri ngati aka thlǝma gǝri nkǝrnta mɛ ati akwa tsǝgwara fǝr. 28Ta gǝri ta hyivǝr ndzǝ nam ata tsai dzǝ ni, ama dar adi ata mǝzi ka tsai sangura wɛ; ama ka gǝri hyivǝr Hyal dzǝ nam ata mǝzi ka santa dzɛ gyapu aka sangura akwa u'u kura kuri. 29Ndǝ adi ada ɗǝlnta madar ika sǝɗɛ ka kwapa duku wɛ? Ama wala apani duku akwa ntsa dar adi ata ɗǝghǝl ata dai kura aka yiɗǝr Tada gǝri wɛ. 30Wala sǝsǝr kǝra gǝri ma sanga tsǝtsi. 31Ani ta gǝri ta hyivǝr; akuya sǝlaiyir gǝri kǝ kwatsǝni madar ika yarɛ nam hang.
32“Kǝlara ndzǝ nam tara nkǝrnta tǝra akǝma ndzi, Yi ma Yi ata nkǝrnta tǝni akǝma Bana nam atahyal. 33#2Tim 2:12Ama kǝlara ndǝ nam tara ɓwalnyar zǝndi tǝra akǝma ndzi, Yi tsuwɛ Yi ata ɓwalnyar zǝndi tǝni akǝma Bana nam atahyal.
34“Ta gǝri ta kǝtǝ apǝri Yi si aka ndzaiyir lapiyakur akwa dunya. Yi ta si aka ndzaiyir lapiyakur wɛ, ama katsakar. 35#Mai 7:6Akuya Yi si ka Yi tsutsukuti
“ ‘ndɛ aka atǝgǝri,
zǝr nkwa aka angǝri,
mwala zǝr aka angǝra salǝrni—
36dǝgunmar ndɛ tsuwɛ ata ndzai ndzǝr kuta kǝiyirni ni.’
37“Kǝlara ndǝ nam tara yiɗɛ atǝgǝri wala angǝri ɓwalta yɛ dzǝ ta mǝzi ndǝr nuwurna wɛ; kǝlara ndǝ nam tara yiɗɛ zǝrǝrni wala nkwarni ɓwalta yɛ dzǝ ta mǝzi ndǝr nuwurna wɛ; 38#Mat 16:24; Mar 8:34; Luk 9:23ba kǝlara ndǝ nam kura ta kǝtǝ undzum kadlǝkadlǝrni ka nu tǝra, dzǝ ta mǝzi ndǝr nuwurna wɛ. 39#Mat 16:25; Mar 8:35; Luk 9:24; 17:33; Yaw 12:25Kǝlara ndǝ nam tara bara tsǝlpi mpikari dzǝ ata nai tari, ba kǝlara ndǝ nam tara ngǝla mpikari ata nyarna dzǝ ata ɓui tǝni.
40 #
Luk 10:16; Yaw 13:20;
Mar 9:37; Luk 9:48 “Kǝlara ndǝ nam tara dlu tǝ gǝri dzǝ dlutsi tǝra, ba kǝlara ndǝ nam tara dlu tǝra dzǝ dlutsi ndǝ nam tara hyanǝba tǝra. 41Kǝlara ndǝ nam tara dlu nabi kadǝbar tǝ dzǝ nabi dzǝ ata dlutsi wadzǝɓar nabi, ba kǝlara ndǝ nam tara dlutsi ndǝ nam kal-kal kadǝbar tǝ dzǝ ndǝ nam kal-kal dzǝ ata dlutsi wadzǝɓar ndǝ nam kal-kal. 42Ma kǝlara ndǝ nam tara la yimi ntathla wala kapu pathlu ala duku akwa ntsa ndzǝ nam nkyiɗu yarni kadǝbar tǝ dar ndzǝr nuwurna, Yi ada gha ala gǝri dzǝri dzǝ adi ata nai ta wadzǝɓarni wɛ.”
Àwon tá yàn lọ́wọ́lọ́wọ́ báyìí:
Mata 10: CKL
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©2023 Seed Company in collaboration with Language Developers and Bible Translators Association
