YOHAN 9
9
Nükpoker Ka Anebtsüba
1Pa oya alidang tenük poker asoba nisung ka ajuru. 2Pa nütsüngtemi pa dang asüngdang, “Tesayur, iba nisung tenük poker asotsüsa pai asü, pa tsüraburi asü, shibai temenen benshi?” 3Yisui langzü, “Iba nisungi mesüra pa tsüraburi temenen mebenshi, saka pa dak Tsüngremer mapatem jungkai adoktsü asoshi liasü. 4Anüngdang alidang ni tenyaba mapatemji asenoki inyaktsüla. Shingaia kecha meinyaktettsüsa ammang arudagi. 5#Mat. 5.14; Yoh. 8.12. Ni alima nung ali tashi ni alima tesangwa.” 6Pai yamaji jembir külen ali nung metzü metsü, aser metzü jagi lishi küma yanglu, aser 7lishiji pa tenük nung mezütsür, pa dang ashi, “Oang, Siloam (tetezü agi, yok) tzütu nung shidokang.” Anungji pa oa shidoker ngua meyipa aru. 8Anungji kiyongertem aser akhidang shiri pa meshimetsür ka ta angu, parnoki ashi, “Meshimetsüa amensang to pa masü no?” 9Kari ashi, “Hau”, Tangartemi ashi, “Masü, saka mesüktur.” Nisungba jagi ashi, “Paji ni lir.” 10Parnoki pa dang asüngdang, “Ajangla ne tenük kodaser lapok?” 11Pai langzü, “Yisu ta ajaba nisung kati lishi yanglua kü tenük nung mezütsü, aser kü dang ashi, ‘Siloami oang, aser shidokang.’ Anungji ni ao aser shidok aser ni ngua aküm.” 12Parnoki pa dang ashi, “Pa kong ali?” Pai ashi, “Ni memetet.”
Tanebtsüba Indang Farisitemi Bushir
13Tamasa tenük tapok aliba nisungji parnok Farisitem dangi anir aru. 14Yisui lishi yanglua pa tenük lapoktsüba anogoji Amungnü ka liasü. 15Anungji tana Farisitemia pai koda ngua aküm ta pa dang asüngdang. Pai parnok dang ashi, “Pai kü tenük nung lishi mezütsü aser ni shidok, aser ni ngua aküm.” 16Anungji Farisitem rongnungi kari ashi, “Iba nisung Tsüngrem nungi masü, kechiaser pai Amungnü mamshir.” Tangartemi ashi, “Temenen nisung kati koda sür ibala ama temaitsütem inyaktet?” Aser parnok rongnung telemsatep adoka liasü. 17Anungji parnoki tanaben nükpokba dangji ashi, “Pai ne tenük lapoktsüogo aji asünung naia pa indang kechi ashir?” Pai ashi, “Paji ainkar ka lir.”
18Saka pa tenük tapok liasü aser pai ngua aküm ta Yihuda nungertemi pa tsürabur jar parnok dang masüngdang tashi, pa indang mamang. 19Aser parnok dang asüngdang, “Tasodang nungi tenük tapok aso ta nenoki ashiba ibai ner chir südi? Ajangla tang pai koda angur?” 20Pa tsüraburi langzü, “Ya ozü chir aser pa tenük tapok aso ta onoki metet; 21saka tang pai koda angur, mesüra shibai pa tenük lapoktsü onoki memetet. Pa dang asüngdangang, pa nübu jungogo.” 22Yihuda nunger tsübu nung pa tsüraburi yamaji shia liasü kechiaser kari danga Yisuji Khrista ta nangzükra sinagog nungi jentoktsü ta Yihuda nunger bangjemer liasü. 23Anungji pa tsüraburi ashi, “Pa tain lir, pa dang asüngdangang.”
24Anungji parnoki tanaben nükpokbaji aja aser pa dang ashi, “Nai ochi shiang, ibai temenen nisunga ta onoki metet.” 25Pai langzü, “Paji temenen nisung asü masü ni memetet; ni nükpoker ka liasü, saka tangbo ni angur aji dang nibo metet.” 26Anungji parnoki pa dang ashi, “Pai ne dak kechi inyak? Pai ne tenük koda lapoktsü?” 27Pai parnok dang langzü, “Ni tangang shikato koda, saka nenoki manga, kechiba nenoki tanaben anganür? Nenoka pa nütsüng kümnür asü?” 28Aser parnoki pa atalaja ashi, “Na pa nütsüng; saka onokbo Mosa nütsüng lir. 29Tsüngremi Mosa den jembi ta onoki metet, saka iba nisungibo pa kong nungiar onoki memetet.” 30Nisung jagi parnok dang langzü, “Ajangla tesüngmangtsüji yangi lir, oda pa kong nungiar nenoki memetet, aji saka pai kü tenük lapoktsüogo. 31Tsüngremi temenen purtem dang mangar ta onoki metet, saka nisung ka Tsüngrem külemer lira, aser pai mulungba inyakra, pa dang Tsüngremi angar. 32Tenük poker asoba nisung ka, pa tenükji kari lapoktsü ta ali pokli nungi nisungi kodanga mangashika. 33Iba nisung Tsüngrem nungi masü asübo, pai kecha meinyaktetla.” 34Parnoki pa dang ashi, “Na khenyongi temenen nung aso, aser nai onok dang sayur ama?” Aser parnoki pa jentok.
Tanela Tenük Tapok
35Parnoki pa jentokogo ta Yisui angashi, aser kodang pai paji ajuru, pai pa dang ashi, “Nai Nisung Chir dak amanger asü?” 36Pai langzü, “Kibuba, ni pa dak amangtsüsa paji shiba?” 37Yisui pa dang ashi, “Nai pa nguogo, aser shibai ne den jembidagi, ibaji pa lir.” 38Pai ashi, “Kibuba ni amanger.” Aser pai Yisu madang apudak. 39Yisui ashi, “Shiri mangur, parnoki angutsüsa aser shiri angur parnok nükpok kümdaktsütsüsa o bendangtsü asoshi ni iba limai aru.”
40Farisitem shir pa den liasü parnoki item oji angashir pa dang ashi, “Onoka nükpok asü?” 41Yisui parnok dang ashi, “Nenok tenük tapok asübo, nenok dak temenen melila, saka tang nenoki ashi, ‘onoki angur;’ anungji nenok temenen maneni lir.”
Àwon tá yàn lọ́wọ́lọ́wọ́ báyìí:
YOHAN 9: ANSEBSI
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
The Bible Society of India
© 2023, Used by permission. All rights reserved. More
