YOHAN 3
3
Yisu Aser Nikodima
1Farisitem rongnungi Yihuda nunger yimsüsür ka tenüng agi Nikodima liasü. 2Pai Yisu dangi aonung aru aser pa dang ashi, “Tesayur, na Tsüngrem nungi aruba Tesayur ka ta onoki metet, kechiyong Tsüngrem medenra nai inyakba temaitsütemi shingaia meinyaktet.” 3Yisui pa dang ashi, “Atangji züngpong ni ne dang shidi, nisung kati tanaben mesora pai Tsüngrem Yimli angutsü makok.” 4Nikodimai pa dang ashi, “Nisung ka tambur kümer pa kechi koda asotsü? Pai pei tetsü poki tanaben tur ano asotsü no?” 5Yisui langzü, “Atangji züngpong ni ne dang shidi, nisung kati tzü aser Tanela nung mesora Tsüngrem Yimli-i aitsü makok. 6Shi nungi kechi sodir aji shi lir aser Tanela nungi kechi sodir aji Tanela lir. 7‘Nenoki tanaben asotsü tim’ ta ni nenok dang ashi nung tesüngmang. 8Mopungi koleni onnüdir, ilenji aoner aser nai iba olaji angashir, saka aji kolen nungi arur, aser koleni aor aji memetet. Tanela nungi asoba nisung shia yamaji lir.” 9Nikodimai pa dang langzü, “Itemi koda sütet?” 10Yisui pa dang ashi, “Na Israel nunger tesayur ka lir aser nai itemi memetet no? 11Atangji züngpong ni ne dang shidi, onoki kechi metet aji jembir, aser onoki kechi angu iba indangji kuli agütsür, saka nenoki onok kuli magir. 12Ni alima nung aliba indang otsü ashidang nenoki mamangra, kotak nung aliba indang otsü ashidang nenoki koda amangtsü? 13Kotak nungi shiba alu, oda Nisung Chir dak alema shinga kotaki matu.
14“Mosai azüngmeyakdak arem nung kechi koda per ajungket, yamaji Nisung Chir ajungkettsüla. 15Anungji dang pa dak amanger shiai teti takümji akatsü.
16“Kechiyong Tsüngremi alima odang meim nung pai pei ajaso Chir agütsü, anungji shirisa pa dak amangdir mesamatsü, saka teti taküm akatsü. 17Kechiaser meimchir obendangtsü asoshi masü, saka pa ajanga meimchir kümzüktsü asoshi Tsüngremi pei Chir alima dangi yok. 18Shibai pa dak amanger, pa maitsür; saka shibai pa dak mamanger, pa aijadokogo; kechiaser pai Tsüngrem ajaso Chir tenüng nung mamang. 19Saka taitsübaji ya: Tesangwaji alimai aru saka nisungtemi tesangwa masü ammang ang meim, kechiaser parnok mapatem majung liasü. 20Kechiaser shibai tamajung inyaker pai tesangwa sempar, aser pa mapa nung tai ngua lir ta pai tesangwa dangi marur. 21Saka shibai ochi mapa inyaker, pa mapa Tsüngrem dak inyak ta jungkai adokdaktsütsü asoshi, pai tesangwa dangi arur.”
Yisu Aser Yohan Baptitsüba
22Iba sülen Yisu aser pa nütsüngtem Yihuda limai aru, aser pai yangji parnok den ali aser pai baptija liasü. 23Yohania Salim anasa Aenon nung baptija liasü, kechiaser idakji tzü peria liasü; aser nisungtem arua pai baptitsü. 24#Mat. 14.3; Mar. 6.17; Luk. 3.19,20. Kechiaser Yohan ano tepuokdak mepuoki liasü. 25Anungji meshitettsüba indang Yihuda nunger kati#3.25: Akhi Laishiba kar nungbo “Yihuda nunger kar” ta angutsü. Yohan nütsüngtem den atittepa liasü. 26Aser parnok Yohan dangi arua pa dang ashi, “Tesayur, Yordan külen ne den shiba liasü, shiba indang nai kuli agütsü; ajiang, pai baptitsür aser nisung ajak pa dangi aor.” 27Yohani langzü “Kotak nungi nisung nem kechi agütsüdir, iba dak alema pai kecha angutsü makok. 28#Yoh. 1.20.Ni Khristaji masü, saka ni pa dang tama yokba, ta ni ashiba kü kuli nenok ang lir. 29Shiba asoshi kiyimla lir, pa kiyimsang; saka kiyimsang temba, shibai noktaker pa o angar, pai pa ola angashia kanga pelar; anungji kü tepela ya abensaogo. 30Pa ulutsüla saka nibo asotsüla.”
Shiba Kotak Nungi Aru
31Shiba temalen nungi arur, pa ajak dang temaba; shiba alima nungi lir, pa alima meyong; aser pai alima indang jembir, saka shiba kotak nungi arur, pa ajak dang temaba. 32Pai kechi angu aser angashi, iba indangji pai kuli agütsür, sakasa shingaia pa kuli magir. 33Shibai pa kuli agizüker, iba yagi Tsüngremji ochia ta pai kuli asür. 34Kechiaser shiba Tsüngrem nungi yok pai Tsüngrem o jembir; kechiaser pai Tanelaji odanga magütsür. 35#Mat. 11.27; Luk. 10.22. Tebui Techir meimer aser pa ket nung ajak bendanga agütsüogo. 36Shibai Techir dak amanger, pa teti taküm kar, saka shibai Techir dak mamanger pai taküm mangutsü, saka Tsüngrem terasaba pa madak lir.
Àwon tá yàn lọ́wọ́lọ́wọ́ báyìí:
YOHAN 3: ANSEBSI
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
The Bible Society of India
© 2023, Used by permission. All rights reserved. More
