GENESIS 1
1
1Ana thafali lana si do ki tha God e thauwai nia thalo lo ma fanua ne i iano. 2Ma fanua ne i iano kera faafunuia ka gwa’u; ma maerodo ka to bana i maana matakwa ne kukuruu: ma Spirit tha God ka isuisu i maana amali. 3Ma tha God ka una eri, Kai laa: ma sui lalaa la ka laa bana. 4Ma tha God e rikia lalaa la eri ka lea: ma tha God e alua lalaa la eri ka to eeta faisia maerodo. 5Ma tha God e alaṉia thatana lalaa la eri ana Fa Thato, ma maerodo eri e alaṉia ana Fa Rodo. Ma fanua ka rodo, sui ka dani, etana fa boṉi neri.
6Ma tha God ka una eri, Si kula ne rerebaa faamau kai to bana imaalutana kafo eki, kai alua tei kafo kai to eeta faisia oretana kafo. 7Ma tha God e thauwai nia si kula eri ne rerebaa faamau, ka adea kafo eki na ka to ifara si kula eri kai to eeta faisia kafo eki na ka to ifafona si kula eri: ma to lana e una eri bonaa. 8Ma si kula eri ne rerebaa faamau tha God e alaṉia thatana ana Thalo Lo. Ma fanua ka rodo, sui ka dani; ruana fa boṉi neri.
9Ma tha God ka una eri, Kafo eki na ka to ifara thalo lo kai figu ana tee si kula, ma fanua raraṉea kai to fatai bana: ma to lana e una eri bonaa. 10Ma tha God e alaṉia thatana fanua raraṉea eri ana Theegano; ma figu lana kafo nia ka alaṉia ana Amali eki: ma tha God e rikia ka lea bana. 11Ma tha God ka una eri, Theegano kai fuṉu asi lolo, kaala lolo na kai fuṉu ana foee do ki, ma’ai ki na kai fuṉu ana foee do ki kali fo ni laala, ne eeta kwailiu fafia theegano: ma to lana e una eri bonaa. 12Ma theegano eri e funu asi lolo, ma kaala lolo ne fuṉu ana foee do ki ne eeta kwailiu, ma ’ai eki ne fuṉu ana foee do ki migee do ki ni laala ne eeta kwailiu: ma tha God e rikia ka lea bana. 13Ma fanua ka rodo, sui ka dani; ula fa boṉi neri.
14Ma tha God ka una eri, Laafa ki kai to bana asi kula eri ne rerebaa faamau, na ṉa thalo lo, kai adea fa thato ki kai to eeta faisia fa rodo ki: ma do eki ifana baala si do ki, ma si maṉa ki, ma fa boṉi ki, ma fa ṉali ki: 15Ma do eki na ṉa laafa ki asi kula eri ne rerebaa faamau, thalo lo neri, kai laafia fanua ne i iano; ma to lana e una eri bonaa. 16Ma tha God ka thauwai nia ro laafa babaita ka baita ki; laafa eri ne baita ka tatha fasi kai ana afa thato, ma laafa eri ne baita si tatha fasi kai ana afa rodo: e thauwai nia fa bubulu lo ki lau boo. 17Ma tha God e alua do eki asi kula eri ne rerebaa faamau, na ṉa thalo lo, fasi kai laafia fanua ne i iano, 18Ma fasi do eki kai ana afa thato mafa rodo, kai alua lalaa la kai to eeta faisia maerodo: ma tha God e rikia ka lea bana. 19Ma fanua ka rodo, sui ka dani; faina fa boṉi neri.
20Ma tha God ka una eri, Kafo eki kai fuṉu ana do oro maruki‐ki na keki isu; ma thaaro ki keki lofo iaa faisia fanua na i iano i maana si kula eri ne rerebaa, na thalo lo neri. 21Ma tha God e thauwai nia gwa thasu baita ki, ma do maruki eki sui bana na keki isu i la kafo, ne fuṉu ana do oro na kera eeta kwailiu, ma thaaro eki sui bana na kera eeta kwailiu na keka lofo ana kukubada: ma tha God e rikia ka lea bana. 22Ma tha God e alua lea la ka to fafida, ka una eri, Kwalafamulua keki oro faamau ka lae alaa, ma keki fuṉu i la kafo eki la amali eki, ma thaaro eki keki oro faamau ka lae alaa i la fanua na i iano. 23Ma fanua ka rodo, sui ka dani; limana fa boṉi neri.
24Ma tha God ka una eri, Fanua na i iano kai fuṉu ana do oro maruki‐ki na keki eeta kwailiu, katele ki, ma do keki aṉo, ma do keki isu, na keki eeta kwailiu i fanua na i iano: ma to lada e una eri bonaa. 25Ma tha God e thauwai nia do kera isu na keka eeta kwailiu i fanua na i iano, ma katele ki na keka eeta kwailiu, ma do eki sui bana na kera aṉo, na keka eeta kwailiu fafia fanua ne i iano: ma tha God e rikia do eki ka lea bana. 26Ma tha God ka una eri, Kulu thauwai nia imole sulia nuukulua i talaakulua, riki lana kai ’uri kulu: ma keki inoto fafia gwa i’a na i amali ki, ma fafia thaaro i mamatalea ki, ma fafia katele ki, ma fafia fanua na i iano ka sui bana, ma fafia do eki sui bana na keka aṉo ifafona fanua na i iano. 27Mania tha God e thauwai nia imole sulia nuuna italaana, sulia nuuna tha God e thauwai nia neri; e thauwanidaroa wane ma kini. 28Ma tha God e alua lea la ka to fafidaroa, ma tha God ka una eri isadaroa, Kwalafamaroa keki oro faamau ka lae alaa, ma muki fuṉu i fanua na i iano, muki alua kai roo suli kamulua: muki inoto fafia gwa i’a eki la amali, ma fafia thaaro i mamatalea ki, ma fafia do maruki eki sui boo na keki isu ifafona fanua na i iano. 29Ma tha God ka una eri, Rikia fasi, Nau ku falea naa kaala lolo na kai fuṉu ana foee do ki ifamaroa na ka to i maana fanua na i iano ni sui bana, ma ’ai eki sui bana na ka fuṉu ana foee do ki migee do ki ni lala; faṉa fani kamaroa moki ania neri. 30Ma ni nau ku falea naa kaala lolo katha ki ifana do maruki eki sui boo na keka isu i fanua na i iano, ma ifana thaaro eki sui boo i mamatalea, ma ifana do eki sui bana na keka aṉo ifafona fanua na i iano, faṉa kera ni bonaa neri: ma to lana e una eri bonaa. 31Ma tha God e rikia si do ki sui bana ne thauwanida, ma rikia fasi, ka lea faamau. Ma fanua ka rodo, sui ka dani; ona fa boṉi neri.
Àwon tá yàn lọ́wọ́lọ́wọ́ báyìí:
GENESIS 1: MLU1949
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
British and Foreign Bible Society 1949, 1951