Marcos 8
8
Jesús rga'we bunach zian
(Mt 15:32-39)
1Tu dza kati guludzaage yubl bunach zian len tibi de la'we, Jesús bliidze bënni useed kie' len gudxe leke:
2—Ruduli'ik'da'ne bunach ni, koma chi guk tson dza nakua'leene neda len tibi de la'we. 3Ati xhki ti tau'de len yusë'la'ka'ne liidx'ke naadxi layu'u'beide na' dzë'ë'ke nëëz, koma la'ke za'ke zitu.
4Bënni useed kie' gulubi'e diidza:
—¿Nakxh gak jgaaguk'ru'ne latj ni, ga nutunu nakua'?
5Jesús bnaab'de leke:
—¿Balxh yët'xhtiil de kieeli?
—Gaadx —Gulubi'ke diidza.
6Na' gnabe'i'de ki bunach'a labë'ke lyu, gde'le'e lu ne'e gaadx yët'xhtiil'a len buudx be'e yëla dexhken Dios, bxhuuxhje ley len gzulau'e rnëëdzje len bënni useed kie' naar lagis'ke kieke bunach'a, ati ka gluune. 7Lekz'ka' de'ba kieke chop tson'ba bël'du; Jesús ben'la'aye'ba len lekz'ka' gnabe'i'de lagis'ke'ba. 8Yugute'ke gla'we tzka glëëlj'de, len tzka le buga'an gaadx bdë'ë guladza'. 9Bënni gla'we nak'ke ka tap mil bunach. Chi nak ka buse'e leke, 10greene lu barku len bënni useed kie' len ziije gia'a yeego ki Dalmanuta.
Bënni fariseo tunaabe le runn'be' yëla wak xhën
(Mt 16:1-4; Lc 12:54-56)
11Guladxiine bënni fariseo len gulazulau'ke tadil'e diidza len Jesús, ati gle'en'de lurixhe' Le' lena'a gulunaabe tu yëla wak xhën le runn'be' ki Le' ze'e ulaaz kie' Dios. 12Jesús gnetzka'laadxe'e len gne':
—¿Bixhkia' bunach ni tunaabe le runn'be' yëla wak xhën? Le nak'te rea' lbi'ili, ki ti glui'kda'ne le gunn'be' yëla wak xhën.
13Na' pka'ane leke len bubeene lu barku zuwëëje tzala'a nis.
Le rzaaxh leke bënni fariseo
(Mt 16:5-12)
14Glal'laadxi'ke lua'ke le la'we len tu'te yët'xhtiil de kieke lu barku. 15Jesús gudxe leke:
—Gulun'chi'i kuin'li ki le rzaaxh leke bënni fariseo len ki le rzaaxh le' Herodes.
16Bënni useed kie' tui'leen diidza lza'a'ke ki tibi yët'xhtiil de kieke.
17Jesús guk'be'i'de len gudxe leke:
—¿Bixhkia' rnaali ki ti de kieeli yët'xhtiil? ¿Naru ti rajni'i'li len ti rak'be'i'li? ¿Naru ni nayeyj'tzka yëla nayajni'i kieeli? 18¿Dzë'ë lau'li san ti rle'i'li, zua' naag'li san ti ryëëni'li? ¿Naru ti rajnei'li? 19Kati gdisia' ga'yu' yët'xhtiil kieke ga'yu' mil'ke bënni, ¿Balxh bdë'ë guladza' ki le buzi'li?
Leke gulubi'ke diidza:
—Chin'nu.
20—Ati kati gdisia' gaadx yët'xhtiil kieke tap mil'ke bënni, ¿balxh bdë'ë nadza'ra buzi'li?
Gulubi'ke diidza:
—Gaadx.
21Na' gudxe leke:
—¿Naru ti rajni'i'li?
Jesús ru'uune bënni lau'chul lu yëdz Betsaida
22Gdëëd'a guladxiine Betsaida, len guluche'e lau'e Jesús tue' bënni lau'chul len glatayui'de Le' kaane le'. 23Jesús gde'le'e ne'e bënni lau'chul'a len gliije le' ra yëdz'a. Buspise lau'e len xhëëna, pxua'ne'e le' len bnaab'de le' xhki ba rle'i'de. 24Bënni ni gzulau'e rle'i'de len gne':
—Rle'i'da bunach tana' ka yaag le taza'.
25Jesús yubl pxua'ne'e lau'e len na'a bënni ni bule'i'ti'de dxia'a'tit len bueake. Yugute' ble'i'de dxia'a'du. 26Na' Jesús busë'le'e le' liidxe len gudxe le':
—Ti tzajdëëdu lu yëdz'a.
Pedro gne' ki Jesús nake Cristo
(Mt 16:13-20; Lc 9:18-21)
27Gdëëd le ni, Jesús len bënni useed kie' yajake yëdz nakua' gia'a yeego ki Cesarea ki Filipo. Tzal dzë'ë'ke nëëz Jesús bnaab'de bënni useed kie':
—¿Bixh taná bunach nuxh naka neda?
28Leke gulubi'ke diidza:
—La'ke tanáke naku Juan bënni pkiile nis bunach, ye la'ke tanáke naku Elías, len ye la'ke tanáke ki naku tue' bënni'a be'e diidza ulaaz kie' Dios.
29—Jesús bnaab'de leke: —Ati lbi'ili, ¿Bixh rnaali nuxh naka neda?.
Pedro bubi'e diidza:
—Li' naku Le' Cristo kie' Dios.
30Ati Jesús gnabe'i'de leke ki nutunu lagixhji'de le ni.
Jesús rgixhjë'e ki yëla gut kie'
(Mt 16:21-28; Lc 9:22-27)
31Jesús gzulau'e rseed'de leke ki Le' Xi'ine Bënni rala ktzaag'tzke, len ti layaazlaadxi'ke Le' bënni guul tuzeajni'i'de bënni Judea, bënni tunabe'i'de pxuuz len bënni useed xhba kie' Dios. Gudxe leke ki uludëëd'de Le', san na' gak tson dza ubaane lu yëla gut. 32Le ni gudxe leke dxia'a'tit. Na' Pedro pche'e le' ga yubl len gzulau'e rdil'leene Le'. 33Ati Jesús bueikje, byue' bënni useed kie' len gdil'leene Pedro, gudxe le':
—¡Bënni Xëwi gyaj kiu'! Li' ti ryaazlaadxu'u le nak kie' Dios, ryaazlaadxu'u le te'en'de bunach.
34Chi nak ka Jesús bliidze bënni useed kie' len bunach, ati gne':
—Xhki nu bënni re'en'de gake bënni useed kia', gzal'laadxe'e le ryaazlaadxe'e le', gue'e yaag kruuz kie' len giid'leene neda. 35Koma bënni re'en'de usle' yëla naban kie', unitie' ley; san bënni gatie' nia'a kia' len nia'a ki le rzi'e diidza kub dxia'a, usle' yëla naban kie'. 36Gaxhkz de gun kie' bënni gaki kie' gdu yëdz'lyu xhki gnitie' yëla naban kie' 37Lekz'ka', tibi gunn'kz kiixhje bënni ki usle' yëla naban kie' 38Xhki nu rutui'i neda len rutui'i xhtiidza'a lau'ke bënni la'rzi'ye' len bënni dula ni, lekz'ka' Le' Xi'ine Bënni utui'i'de le' kati wëëde len yëla ba kie' Xuuze len dzaage bënni gbaaz la'ay kie' Dios.
Àwon tá yàn lọ́wọ́lọ́wọ́ báyìí:
Marcos 8: PZD
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© Sociedad Biblica de México AC
