Marko 7
7
Mirighido ya wana ake
(Matayo 15:1-9)
1Nao ikakala Wafarisayo na walimu wamoju wa Sheria wafumile Jerusalemu wakamkoghanikila Jesu, 2wakawaona wairimi wake wamoju wekelya na mikonu ilue, siyeoghesho. 3(Kwa kukala Wafarisayo na Wayahudi wose siweluo wekelya hambiri siweoghile mikonu, wekeirima ada za waghosi; 4hata ngelo wafuma sokoni siweluo wekelya hambiri siwekuelese. Na sena koluo na ada nzima weluo wekeziirima sa kuwoghesha vikombe, nyungu na vombo va shaba.)
5Wafarisayo na walimu wa Sheria wakamkotela Jesu, “Kudani wairimi wako siweirimagha ada za waghosi, ela walya na mikonu ilue?” 6Naye Jesu kawatumbulila, “Isaya satondole kirani ighulu yenyu inyo wandu wa ngolo mbili, selyi iwandiko:
‘Wandu awa wanihawa ishima milomuni, waghora Mlungu,
ela ngolo zawe zio kulele nemi.
7Wanitasa bule,
kwa kukala wafundisa mafundiso gha wadamu sa kuzo ni sheria zangu!’
8Mwasigha kuirima milomu ya Mlungu na kuirima ada za wadamu.”
9Naye kawauza, “Muo na ngila ya uya yelegha milomu ya Mlungu eri muirime ada zenyu. 10Kwa kukala Musa wanaghorire, ‘Mhawe ishima tatio na meo,’ na, ‘Uwo wose eghoragha laghelaghe ighulu ya tatie na mee ni suti afwe;’ 11ela inyo mwaghora, ‘Ilyi mundu amuza tatie ango mee, ichi oluo upatagha kwangu ni Korobani (kutambula kwake, chahawo Mlungu), 12aho wafwilo waya kuwawarura tatie na mee;’ 13kwa hung'u mwaghalula ilagho lya Mlungu eri mwirime ada zenyu mwahawana. Na malagho mengi sa agha mwaghadea.”
Vindu vimluwisagha mundu
(Matayo 15:10-20)
14Nao Jesu kawapang'a wandu na kuwauza, “Nisikizileni inyose na mtambukilo. 15Sikwesi kindu chingi shighati ya mundu chimngilagha na kumluwisa; ela ivi vindu vimfumagha mundu nivo vimluwisagha. [ 16Ngera mndungi ewo na masikilo ghesikila asikile.]”
17Naye Jesu aghenda asigha makoghano na kungila nyumba, wairimi wake wakamkotela chausa cha ikataniso. 18Naye kawauza, “Ado nanyose simtambukilogho? Simumanyagha kamba ichi chimngilagha mundu kufuma shighati sichidimagha kumluwisa; 19kwani sivingilagha ngoloni kungi, ela kifu na kufuma.” (Kwa hung'u kaelesa vindu vose.)
20Nao kaghora, “Icho chimfumagha mundu nicho chimluwisagha mundu. 21Kwani amweni kele ngolo ya mundu ghafuma maririkanyo ghawase, kuzinga, uting'a, kuulagha, kulaka, 22choyo, ulaghelaghe, ndimi, iziso, kutukana, kukukasa na uzimu. 23Agha ghose ghawase ghafuma komweni, nagho ghamluwisa mundu.”
Idumusi lya muke
(Matayo 15:21-28)
24Nao Jesu kafuma aho kaghenda isanga lya Tiro na Sidoni. Kangila nyumba eri wandu siwamumanye andu ewo, ela sadimile kuvisika. 25Nao muke mumoju eluo na mchana mchache ewo na pepo, kasikila uvoro ghwake Jesu, naye keja kamgwila maghuluni. 26Uyu muke oluo ni Mgiriki wa mbari ya Msirofoinike. Kamvoya amfunye mwana wake pepo. 27Ela Jesu kamtumbulila, “Jako sigha wana walye, kwani si kirani kungi kuusa chakulya cha wana na kuchikumbila chuchu.” 28Ela iye kamtumbulila, “Ni fulo Bwana, ela ima hata chuchu zanashowagha misusure ya wana ipotokagha mezeni naisi.” 29Nao Jesu kamuza, “Kwa undu ghwa ghore iyi gala, pepo yamfuma mwana wako.” 30Nao kagala, kamdoka mwana wake atungure ulilini na pepo yamfuma.
Jesu kuboesa mundu sesikilagha na seghoragha
31Nao Jesu kauya kufuma Tiro kemarira Sidoni, hata kafika bahari ya Galilaya keitila ngila ya Dekapoli. 32Nao wakamletela mundu afwile masikilo na sedimagha kughora kirani, wakamlomba amwikilile mikonu. 33Naye kamghenza mbali na wandu, kamngiza vala kele masikilo, kachila mate na kumwata lumi lwake; 34kalola mlunguni, kasorea ngolo, kamuza ulya mundu, “Efatha.” Kutambula kwake, “Funguka.” 35Nao masikilo ghake ghakafunguka, na lumi lwake lukafunguka, kaghora kirani. 36Naye Jesu kawauza siwamghorere mndungi, ela ngelo awauzile siwaghorere mndungi, niko wajuzile kueresa uvoro ughu. 37Nawo wakashinika na ndighi, wakaghora, “Wadea vindu vose kirani; hata awa siwesikilagha wasikila, na awa siweghoragha waghora.”
Àwon tá yàn lọ́wọ́lọ́wọ́ báyìí:
Marko 7: SAGALLANT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
(C) The Bible Society of Kenya, 1993
