Marko 3
3
Mundu eluo na mkonu ghukelemele
(Matayo 12:9-14; Luka 6:6-11)
1Jesu angila sena kele sinagogi, koluo mundu ewo na mkonu ghukelemele. 2Nawo wandu wamoju wakamlolila ngera umuboesagha kele ijua lya Sabato, eri wapate kumshitaki. 3Jesu kamuza ulya mundu eluo na mkonu ghukelemele, “Njuu aha.” 4Nao kawakotela, “Ije, ni hachi kudea ghaloli ijua lya Sabato ango kudea laghelaghe; kukiza ango kuulagha?” Ela wo wakanyamala chwi. 5Nao kawazighana kwa hare, kewasilo kwa undu ghwa ngolo zawe kukala zikulile kuona makosa ghawe, kamuza ulya mundu, “Ghorora mkonu ghwako.” Naye kaghughorora mkonu ghwake, ghukabowa. 6Nao Wafarisayo wakafuma wakadea njama na Waherode selyi wedimagha kumuulagha.
Makoghano mbalimbali ya bahari
7Jesu kafuma na wairimi wake wakaghenda baharini, na wandu wengi wakamwirima. Nawo wefumile Galilaya, Judea, 8Jerusalemu, Idumea na chambuko cha Jordani, na avui na Tiro na Sidoni. Wandu wengi wejile kwa Jesu kwa kukala wanasikile selyi adeile. 9Naye kawauza wairimi wake wamwikile ishua avui, eri andu wandu ni wengi siwamlatile. 10Oboese wakongo wengi na kwa hung'o wose weluo na makongo weluo wekedurana eri wamwate. 11Nao kila ngelo awa weluo na pepo wamwona, wakagwa hambiri yake na kukema, “Uwe ni Mwana wa Mlungu.” 12Naye Jesu kazikanyila na ndighi sizamumanyise kwa wandu.
Jesu kusaghula watumo ikumi na waili
(Matayo 10:1-4; Luka 6:12-16)
13Nao Jesu kajoka mghondini na kuwapang'a awa ewashaile, nawo wakamghendela. 14Naye kasaghula wandu ikumi na waili wakalanye naye, kawaita “Watumo,” eri awatume kuchila, 15na wakale na ndighi zefunya pepo. 16Jesu kamwita Simoni, Petro; 17Jakobo mwana wa Zebedayo na Johana wakwawe kawaita Bonegi, kutambula kwake wana wa mrurumo. 18Andrea, Filipo, Bartholomayo, Matayo, Thoma, Jakobo mwana wa Alfayo, Thadayo, Simoni Mkanaani, 19na Juda Iskariote, uyu amfunyile Jesu.
Jesu na Beelzebuli
(Matayo 12:22-32; Luka 11:14-23; 12:10)
20Nao Jesu kagala. Nao wandu wengi wakamtindirira sena, hata Jesu na wairimi wake wakasowa ulalo ghwelya. 21Nao wandu wa nyumba mnzawe waghenda wasikila agha, wekeja wamwate, kwani wandu weluo wekeghora, “Waghaluko ni akili.”
22Nao walimu wa sheria kufuma Jerusalemu wakaghamba, “Uwo na Beelzebuli, na kwa ndighi za uyu mubwaa wa pepo wagusa pepo.” 23Nao Jesu kawapang'a walye wandu kawaghorera makataniso, “Idimikagha ije Shetani kumgusa Shetani? 24Ikakala uzuri ghwasarikana ghwenyi, ugho uzuri sighudimagha ghumange. 25Na hata wandu wa nyumba wakasarikana, nyumba yawe siikalagha. 26Ni hung'u kwenyi naye Shetani kakughaluka mwenyi na kusarika, semangagha, sala ondedua.
27“Sikwesi mndungi edimagha kungila nyumba ya mundu wa ndighi, na kuusa vindu vake hambiri semfungile, nao ima angile na kuusa vilambo vake.
28“Fulo namuza, wandu wejefwilo waya kaung'a zose, hata zeghora laghelaghe; 29ela awa weghoragha laghelaghe ighulu ya Roho wa Kuela, siwefwilogho waya kungi, kwani ni kaung'a ya kutula.” 30Jesu oghorire hung'u kwa kukala weghorire, “Iye uwo na pepo.”
Mee Jesu na wana wakwawe
(Matayo 12:46-50; Luka 8:19-21)
31Nao mee Jesu na wana wakwawe wekeja, wakakala shighati wakatumana apang'o. 32Na makoghano wekalile kitembo kumumara Jesu. Nao wakamuza, “Meo na wana wakwenyu weo shighati wanakushaile.” 33Naye kawatumbulila, “Nani mawe na wana wakwetu ni wana ani?” 34Naye aghenda azighana walye wandu wekalile kitembo kumumara, kaghora, “Awa niwo mawe na wana wakwetu wa walume. 35Uwo wose edeagha mashayo gha Mlungu ni wakwetu wa walume, wakwetu wa wake na mawe.”
Àwon tá yàn lọ́wọ́lọ́wọ́ báyìí:
Marko 3: SAGALLANT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
(C) The Bible Society of Kenya, 1993
