Marko 2
2
Jesu kumuboesa mundu wa kupooza
(Matayo 9:1-8; Luka 5:17-26)
1Nyuma ya majua machache, Jesu kauya sena Kapernaumu, nao wandu wakapata uvoro kamba uwo nyumba. 2Nawo wandu wakakoghanika wakajula, ulalo ghukasoweka hata mjangoni. Naye kawachilila Ilagho Lyaloli. 3Nao wandu wane wekeja wekemtuka mkongo wa kupooza kwa Jesu. 4Nawo waghenda wasowa ulalo ghomfikila kwa undu ghwa ungi ghwa wandu, wakafuchula nyumba naighulu, wakapola mwanya, wakamseleza na ulili etungurire. 5Nao Jesu aghenda aona idumusi lya wandu wamletile, kamuza mkongo wa kupooza, “Mwanwangu, kaung'a zako zafwilo waya.”
6Na walimu wa sheria weluo alye, wakakukotela wenyi ngoloni kwawe, 7“Kudani uyu mundu eghoragha hung'u! Wamtukana Mlungu! Nani edimagha kufwila waya wandu kaung'a zawe sala Mlungu mwenyi?” 8Naye Jesu kemanya ngoloni kwake selyi weluo wekeririkanya, kawauza, “Kudani Mwaririkanya hung'u ngoloni kwenyu? 9Ni lyio lyiwangue, kumuza mundu wa kupooza, ‘Kaung'a zako zafwilo waya’, ango kumuza, ‘Uka, uuse ulili ghwako, ughende’? 10Ela nanashaile mumanye kamba Mwana wa Mdamu uwo na nguma urumenguni kufwila wandu waya kaung'a.” Nao kamuza mundu wa kupooza, 11“Nakuza, uka, uuse ulili ghwako, ughende nyumba kwako.” 12Naye kauka, kausa ulili ghwake kaghenda. Wandu weluo alye wakamwona, wakashinika na kumkasa Mlungu wekeghamba, “Lyingi sitionile malagho sa agha!”
Jesu kumpang'a Lawi amwirime
(Matayo 9:9-13; Luka 5:27-32)
13Jesu kaghenda sena mbalimbali ya bahari ya Galilaya na wandu wose wakamtindirira, naye kawafundisa. 14Nao keita kamwona Lawi wa Alfayo kitembo forozeni, naye kamuza, “Niirime.” Naye kauka kamwirima.
15Nao Jesu ilyi eluo kelya chakulya kele nyumba ya Lawi, watozi ushuru wengi na wakaung'a wekezanye na Jesu na wairimi wake, kwa kukala wengi wemwirime. 16Nao walimu wa Sheria na Wafarisayo waghenda wamwona kelyanya na wakaung'a na watozi ushuru, wakawauza wairimi wake, “Kudani elyanyaa na watozi ushuru na wakaung'a?” 17Naye Jesu aghenda asikila, kawauza, “Awa weo banana siwashayagha mghanga ungi, ela awa weo wakongo. Sijile kwa awa weo wahachi, ela kwa wakaung'a.”
Ikotelo ighulu ya kufunga kulya
(Matayo 9:14-17; Luka 5:33-39)
18Nawo wairimi wa Johana na wa Wafarisayo weluo wekefunga kulya; nao wandu wakamjila Jesu, wakamuza, “Kudani wairimi wa Johana na wairimi wa Wafarisayo wafungagha kulya, ela wairimi wako mbai siwafungagha?” 19Naye Jesu kawatumbulila, “Ije wandu wakaribisho kuloleni, wadima kufunga kulya ngelo weo na musi muke? Ngelo yose weo na musi muke siwedimagha kufunga kulya. 20Ela ngelo ikujagha, musi muke efunyo kufuma kwawe, niko aho wejefunga kulya.
21“Sikwesi mndungi ashonagha kiraka kiishi kele nguo ya kale, kwani kiraka kiishi chideagha nguo ya kale irashuke, na ilanga lyijuzilike. 22Sena sikwesi mndungi angizagha divei mbishi kele viriba va kale; naye kangiza divei mbishi kele viriba va kale, viriba vendepaika na divei itike na kuhakila viriba; kwa hung'u divei mbishi yanafweni ingizo kele viriba viishi.”
Ikotelo ighulu ya Sabato
(Matayo 12:1-8; Luka 6:1-5)
23Nao ijua imoju lya Sabato, Jesu oluo keita ghati ya mbuwa za ngano, nawo wekeita, wairimi wake weluo weketema vanga va ngano. 24Niko Wafarisayo wakamuza, “Lola selyi wairimi wako wedeagha undu ghurighido kudeo ijua lya Sabato.” 25Naye kawatumbulila, “Ado lyingi simshomile selyi adeile Daudi ilyi iye na wandu wake weshahilo ni njala? 26Kangila kele nyumba ya Mlungu, ngelo ya mkohani mubwaa Abiazari; kalya mikate iikilo kwa Mlungu, na kawahawa walye ekezanye nawo. Ela yanarighidogho kulyigho ni mndungi sala wakohani wenyi.”
27Nao Jesu kajuzila kuwauza, “Sabato yanaikilo kwa undu ghwa mdamu, ela mdamu saumbilo kwa undu ghwa Sabato kungi. 28Kwa hung'u Mwana wa Mdamu ni Bwana wa Sabato nayose.”
Àwon tá yàn lọ́wọ́lọ́wọ́ báyìí:
Marko 2: SAGALLANT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
(C) The Bible Society of Kenya, 1993
