Matayo 21

Jesu kungila Jerusalemu na izumo

(Marko 11:1-11; Luka 19:28-40; Johana 12:12-19)

1Nao Jesu na wairimi wake wafika avui na Jerusalemu, na wafika Bethfage kele mghondi ghwa Mizeituni, Jesu katuma waili na wairimi wake, 2kewauza, “Ghendeni kele muzi ghuo hambiri yenyu na aoenyi mjeona punda afungilo na mwana wa punda, mfunguleni muniletele. 3Na ilyi mundungi amukotela, muzeni, ‘Bwana wanawashaile,’ naye ujemusigha muwalete.” 4Agha ghanadeike eri ghakatile malagho ghaghoriro ni tondolo:

5“Wauzeni wandu wa Zioni,

Loleni mzuri wenyu odemujila!

Ni wa mbole na wajoka ighulu ya punda

na ighulu ya mwana wa punda.”

6Nao walye wairimi wakaghenda wakadea selyi wauzilo ni Jesu. 7Wakamleta punda na mwana wa punda, wakawala nguo zawe ighulu yake, naye kajoka kakala ighulu yake.

8Makoghano mabwaa wakawala nguo zawe ngileni na wamoju wakatema manyasi gha miti wakawala ngileni. 9Nao walye makoghano wekayaye na walye weluo wekeirima nyuma wakakema, “Hosana Mwana wa Daudi! Wabarikio uyu ekujagha kwa izina lya Bwana, Hosana ya ighulu!”

10Nao Jesu angila Jerusalemu, muzi ghose ghukanyavurika wekeghora, “Nani uyu?” 11Makoghano wakaghora, “Uyu ni tondolo Jesu kufuma Nazareti ya Galilaya.”

Jesu kungila Hekaluni

(Marko 11:15-19; Luka 19:45-48; Johana 2:13-22)

12Nao Jesu kangila kele Hekalu ya Mlungu na kuwagusa wandu weluo weketagha na kughula vindu Hekaluni. Kaghalula meza za waghaluli pesa na vifumbi va wataghi maringo. 13Kawauza, “Yanawandiko, ‘Nyumba yangu ijeito nyumba yelomba;’ ela inyo mwaidea kukala mbanga ya wavekuri.”

14Nao vifondo na washoghori wakamjila Hekaluni, naye kawaboesa. 15Ela wakohani wabwaa na Walimu wa Sheria waghenda waona selyi eluo kedea mwakilimbita na wanake wekekema Hekaluni, “Hosana Mwana wa Daudi!” Wakawasilo. 16Wakamuza Jesu, “Sena usikilagha selyi weghoragha?” Naye Jesu kawatumbulila, “Ee, nasikila, Ado simushomile agha mawandiko? ‘Kwa milomu ya wanake na awa wemamagha wadea niliko putu.’”

17Nao kafuma kaghenda shighati ya muzi hata Bethania, kalala alye.

Jesu kughuwanyiza mtini

(Marko 11:12-14,20-24)

18Na ilyo ikesho ilyi Jesu eluo keuya kele muzi, oshahilo ni njala. 19Naye aona mwiti ghuitogho mtini kavui na ngila kaghughendela, naye sadokile kindu chingi sala manyasi ghenyi. Kaghuuza, “Swavale mavalo ghengi lyingi sena!” Nao iyo ngelo yenyi mtini ghukaoma. 20Wairimi waghenda waona, wakashinika, wakaghora, “Kudani mtini ghwaoma iyo shwa yenyi?” 21Jesu kawatumbulila, “Fulo namuza, ikakala muo na idumusi na simweo na ngera, mudeagha, si selyi kwadeo kwa mtini tu, ela hata mukaghuuza ughu mghondi, ‘Kuka na ukumbike baharini,’ ghukukagha. 22Na icho chose mulombagha mjepata mukakala na idumusi.”

Ikotelo ighulu ya ndighi za Jesu

(Marko 11:27-33; Luka 20:1-8)

23Nao Jesu angila Hekaluni, wakohani wabwaa na waghosi wa wandu wakamjila ngelo eluo kefundisa, wakamuza. “Ni kwa ndighi muni udeagha malagho agho? Nani akuhawile hachi ii.” 24Jesu kawatumbulila, “Namose nimukotelagha ikotelo; na ilyi mwanitumbulila, namose nijemtumbulila ni kwa ndighi muni nideagha malagho agha. 25Ubatizo gha Johana ghwanafumile hiyo? Kwa Mlungu ango kwa wandu?” Nao wakahelea wenyi na wenyi, “Tikaghora, ‘Ghwanafumile kwa Mlungu.’ Utiuzagha ‘Kudani simodumuse?’ 26Ela ilyi taghora, ‘Ghwanafumile kwa wandu,’ tioghagha makoghano kwani wose wanadumuse kamba Johana oluo tondolo.” 27Nao wakamtumbulila Jesu, “Sitimanyile.” Naye kawauza, “Namose simughoreragha ni kwa hachi muni nadea agha.

Ikataniso lya wana waili

28“Ndamu muonagha ije? Mundu mumoju woluo na wana waili; kamghendela mwana wa hambiri kamuza, ‘Mwanwangu, ghenda udee kazi kele mbuwa ya mizabibu lelo.’ 29Naye kamuza, ‘Nalegha’, ela konyuma kariha kaghenda. 30Nao tatie kamghendela mwana wa kaili, kamuza sa ulya wa hambiri, naye kamtumbulila, ‘Ee, aba nighendagha,’ ela saghendile. 31Nani kele walye waili adeile mashayo gha tatie?” Wakatumbulila, “Wa hambiri.” Jesu kawauza “Fulo ndemuza, wafunyi kodi na vijimbo wengilagha kele Uzuri ghwa Mlungu hambiri yenyu. 32Kwani Johana wanamjilile kwa ngila ya hachi na simudumuse, ela wafunyi kodi na vijimbo wakamudumusa. Hata mughenda muona hung'u simurihire na kumdumusa.”

Ikataniso lya walimi mbuwa ya mizabibu

(Marko 12:1-12; Luka 20:9-19)

33Nao Jesu kaghora, “Sikizileni ikataniso izima. Mundu mumoju wa mbuwa owandile mbuwa ya mizabibu, kairigha isanzu yose. Na kakota kina chekama divei na kuwaghala ulingo. Nao kaihawana kwa walimi, katamba. 34Nao ngelo ya mavalo ifika, katuma watumishi wake kwa walimi kuusa ifungu lyake lya mavalo. 35Walye walimi wakawawata walye watumishi, wakamkwita mumoju, wakamulagha mzima na mumoju wakamlasa na mawe. 36Nao sena katuma watumishi wazima wengi kuchumba walye wa hambiri, na walye walimi wakawadea ukwenyi. 37Nao kudua kamtuma mwana wake kwawe, keghamba, ‘Wemhawagha ishima mwana wangu.’ 38Ela walimi waghenda wamona mwana wake wakaghora wenyi na wenyi, ‘Uyu niye mundu wa ufwa. Ndokoni timuulaghe ufwa ghukale ghwetu.’ 39Kwa hung'u wakamwata wakamfunya shighati ya mbuwa ya mizabibu, wakamulagha. 40Ndamu ilyi ulya mundu wa mbuwa ya mizabibu eja uwadeagha ije walye walimi?” 41Nawo wakamtumbulila, “Ujewaulagha walye walimi walaghelaghe na awahawe walimi wazima ilya mbuwa ya mizabibu wedimagha kumuhawa mavalo gha mizabibu kwa vilimo vake.”

42Jesu kawauza, “Ado simushomile Mawandiko gha Kuela gheghoragha:

‘Iwe lyileghilo ni wawaghali

Lyakala iwe ibwaa lya msingi.

Agha ghadeo ni Bwana,

Nagho ghakala gha mashiniko mesoni kwetu.’

43“Kwa hung'u nendemuza, Uzuri ghwa Mlungu ghufunyogho kwenyu ghuhawo mbari nzima zivalagha mavalo. [ 44Naye egwilagha iwe ilyo ujevunjika vindi vindi; na lyikamgwila mundungi lyijemkindihisa.]”

45Nao wakohani wabwaa na Wafarisayo waghenda wasikila makataniso ghake wakamanya kamba woluo keghora ighulu yawe. 46Kwa hung'u wakahada ngila ya kumwata, ela wakawaogha makoghano, kwa kukala wemumanyile kamba ni tondolo.

Àwon tá yàn lọ́wọ́lọ́wọ́ báyìí:

Matayo 21: SAGALLANT

Ìsàmì-sí

Pín

Daako