Fagsigadan 7
7
Diyus nu Gfalino sas Fagdaul Daga
1Bandi ataw, Yawi glong wa sas Nuwe te, “Katsi makbang wan nu gfamin aw fagayu tagleleg istes wa daga, teway at ngay taw mauri wan. Ku nalag at masine, o way sesadi. Nu katanya, iglong aw emu te, ani wa sakboi sa ay naawat fag balutu. Tabani wa sanya am mangena, anggan am baguwama fag tulu, anggan am nugang fag tulu. 2-3Anggan fagayu mangimut ay fagayu manuk, ani tuwa tabani sasad balutu, laman ban kanya fagayu di mkate, ay antuwa ban kaayu. Nu gfasakbo o at ngay mangimut, fagayu at masine fanfon angku, fitui tuwak daduwa. Ay at yud masine fanfon angku, sadik daduwa yakman. Ay fagayu manuk nu ginbalian, fitui yangayk daduwa am fagfasakboun. 4Fakatanyaun ku longan emu, te sakboi wan, teway makbang wa dawdaw nu gfamoyan aw sas fagdaul daga. Nu nlangfe wa ban fituk menit, fasigad kwan. Ay at kadugayan ban nu gfamoyan aw, 40k menit, ay 40k yabi, laman ban umlino wa dawdaw sas fagdaul daga. Ay fagayu ku naawat tagengasan umkate wan.” Katanya Diyus at suguwan sas Nuwe.
5-6Ay gina Diyus igsugu katanya, Nuwe at banwa 600 wan. Ay Nuwe nu nadungug Diyus at suguwan, igfaning tuwa. 7-9Nafasakbo wa fiya at mangena sa at naawat fag balutu daul, anggan at ngay baguwama, anggan at ngay nugang. Ay kanya sigon nasakbo tuwa. Ay fagayu mangimut at masine fanfon sas Diyus ay fagayu manuk nu ginbalian, Nuwe nafasakbo tuwa fituk daduwa. Ay fagayu mangimut at yud masine fanfon sas Diyus, Nuwe nafasakbo tuwa sadik daduwa. Kanya wa mandi fag ngay mangimut ay fag ngay manuk takadasug sas balutu. Nu katanya, in-gurungan wa fiya kata ebi Diyus at longan sas Nuwe.
10-13Siginan Diyus nasugu Nuwe te, “Sakboi sasad balutu,” sat dayu inlangfe yay fituk menit. Ay nu nlangfe wa fituk menit, Nuwe anggan at ngay ufud fagayu masakboan wa sasad balutu. Ay kanya fagayu nu masakboan wan, rodi ataw, Diyus fasigad wa fiya gfamoyan sas fagdaul daga. Ginanya, Nuwe kadugayan, 600k banwa, sit dayu, sik magdanun ay 17k menit. Ginanya fag menit, Diyus at fagbulun, nafatulbu way sigad mamam dawdaw siginan sad daga. Ay siginans banwa baliwa, Diyus nafabusbus way sigad mamam dawdaw, kata wa nangus nasulbung banwa. Ay siginan ginanya, nu gmoyan, wa batang kasiwang, 40k menit ay 40k yabi.
Ay kadugenya, Nuwe fag talmanugangan masakayan wa gugat sad balutu. Sanya wa gugat sad balutu Nuwe, ay at mangena, ay at baguwama fag tulu, Sem, Kam ay Afet. Ay anggan at mangena fag tulu, sanya yangay. 14-16Ay anggan fagayu mangimut nu ginbalian, ay fagayu manuk nu ginbalian, sanya yangay sad balutu, teway ebi ataw, kanya fagayu nafangadasugan tuwa sas Nuwe balutu, kata Diyus at longan. Ay fagayu mangimut ay manuk nu kadasug sas balutu, sik ngay daduwa tuwa. Kanya fagayu sanya wa sad balutu. Ay at sakbawan balutu madingdingan tuwa, teway Yawi wan at nadingding.
17Ay kaduge igmoyan gugat gugat 40k menit ay 40k yabi, kalino wan sas fagdaul daga. Ay at lino nu kaabat gugat gugat, at balutu sigon kaurug tuwa. 18-20Ay at lino gtunglus yadi nu kaabat, anggan wa te, fagayu bugsul sa sangaba daga infalyu wan. At lino at kabasadan, sat taglabi nu ngabat fag bugsul, lima yak dufa sat tungud. Ay at balutu ginkurayoan tuwa sa sangaba lino. 21Ay kadugenya, fagayu fagayu tagengasan, inkate wan. Dewa taw, dewa mangimut, dewa manuk, fagayu at ke engasan mandi inkate wa sasad lino. 22Inkate wan kanya fagayu. 23Diyus nafamin wan tagleleg sis tungud daga, dasday Nuwe fag fulan. Kayu way tagsisad balutu at yud inkate.
24Ay at kadugayan nu malino sas fagdaul daga, 150k menit.
Àwon tá yàn lọ́wọ́lọ́wọ́ báyìí:
Fagsigadan 7: TAWEAST
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Copyright © 2023 by OMF International, Philippines