Fagsigadan 4
4
Taw nu Kaugat nu Kamabo Diyus at Longan
1Sayginan, Adan nasa at mangena. Ay at mangena gfafiyon wan. Ay bandi at mangena gfasalug wa at ngenge. Ay at ngenge sik ama. Ay at tina guseganan, glong te, “Fadi, Diyus gtarabang tuwa angku. Igfon tuwa angku ku ngenge sik ama.” Ay nafangayan at ngenge te, Kain. 2Ay bandi, Adan mangena gfafiyon yay fiya. Ay nu gfasalug wan, sik ama yangay at ngenge. At ngayan, Abel. Ay bandi, kanya fag dugsay igbiya wan. Ay e fagbulun wa mandi. At kaka at fagbulun, tagfantanuman. Ay at ariyan, tagfagut kambing ay tupa.
3Ay nu katanya wan, bandi, kanya fag dugsay nanfon wa at famanyun sas Yawi. Kain igfon sik ngay buwadan. 4Ay roro Abel, igfili tuwa at ngay balan riyangan at turungana, ay igfon at taba sas Diyus. Ay Diyus kaumsig glag Abel. Anggan at famanyun, kaumsig yangay glag. 5Ay roro Diyus wa kaumsig glag Kain, anggan at famanyun. Ay Kain nu nasaful katanya, kadotama dawdaw. Ay madotaman wa dawdaw nu kalag at mata.
6Ay nu katanya, Diyus naelongan sas Kain. Glong te, “Sek, lag nangus kadotama. Ay lag nangus katanya am mata. 7Amatangani way emu mandi. Teway am ugali nu masine di, kaumsig aktuwa glag emu. Ay roro nu gfatunglus way o gfagbulun mauri, asalanan mabo wemu, teway asalanan kata sik mangimut mela. Kanya gbalabag emu sim day sakbawan, gfanya nu glaklo o. Ay yumugfu wa daw emu. Roro dangay galabawan asalanan. Baboi tuwa.” Katanya Diyus at longan sas Kain.
8Ay Diyus dewa nalong katanya, bandi daw sik menit, Kain glong at ariyan te, “Katsi ro nangayayag way ta sas day fulan.” Ay at ariyan nangalo wa fiya. Ay nu sanya wan, at kaka nafate wa daw at ariyan.
9Ay Abel nu nkate wan, Yawi nainto sas Kain. Glong te, “Dada wan am ariyan?”
Ay Kain igbalus te, “E, safulun. Taw ro fagsaun angku nu ginto o? Sangay aw wan tagfatvngvdun ku ariyan?”
10Ay Diyus glong te, “E, mauri wa dawdaw am nafagbulun. Wo mafasuksuk angku, teway glag kyadi am ariyan taguk nu mabusbusan sis wa daga. Ay nu glinggat kwa gugat am ariyan taguk, kata aw e dungganan guro. Glong te, ‘Faurii at nabusbus kanya fag taguk.’ 11-12Ay nu katanya, katsi gfauri kwemu. Nu gbanwan o, wa ban manabayan, dewa bans nganday nu lumo o. Faggugat ban glodloan way o sa sangaba talun. Wo e fagbanwanan fiya fiya. Ay dewo tumanum, wo ban e nabul takaon siginans daga. Teway nafabusbus way o ay sas daga am ariyan taguk.” Katanya wan Diyus at longan.
13Ay Kain nabalus te, “Sek, namabiyat wan kanya am faurianan sa angku. Kwa ban maasungatan. 14Dewas nganday ban aw, kwa ban manabayan. Ay kwa ban maafoli stiye sam daga salubangan. Sik taglodloan kway ban gugat gugat sa sangaba talun, yud e fagbanwanan glugo. Ay famamut ya, nus nga sinu ban at lumag angku fate wa long ban angku.”
15Ay Yawi gbalus te, “E yaya, nu katanya am nafanawan, we fate emu, teway nus nga sinu ban at fate emu, at fansali at nafatean, fitu ginan.” Ay Yawi nu nalong katanya, nafe fagtoglagan sis Kain, laman tibak taw nu nalag kanya fag fagtoglagan, di gfate Kain. 16Ay nu katanya wan, Kain nalo wan sanya ginan, siginan Yawi at daga salubangan. Naalin wa sa sik talun at ngayan Nud. Sik taw galay igsarap kanya fag talun, siginans talun Eden loi sas fakamenitan baliwa. Sanya wan Kain nu gbanwan.
Kain fag Fulan Taw
17Bandi, Kain nasa at mangena. Ay at mangena gfafiyon wan. Bandi gfasalug wa at ngenge, sik ama. Ay at magurang nafangayan anya Inuk. Ay ginanya fag lungud, Kain kawat sik ngay bale, at fagbanwanan. Ay sanya fag ngay bale, nafasafung tuwa sadik alad dawdaw. Ay Kain nafangayan at naawat fag ngay bale te, Inuk. Nafaning at unga ngayan.
18Ay Inuk nu ndaul wan, inke unga yangay, at ngayan Irad.
Ay Irad inke unga yangay, at ngayan Mikwel.
Ay Mikwel unga Metusel.
Ay Metusel unga Lamek.
19Ay Lamek inke mangena duwa. At ngayan Ada ay Sila. 20-21Ay Ada e baguwama duwa. At ngayan Abal ay Ubal. Ay kanya fag duwak baguwama, sik masafulan fag duwak taw, ay bandi baliwa at ngay taw kamaning at ngay fagbulun. Abal, masafulan igfagut balan. At fagbulun, igfaadgalinan gugat gugat at balan sat ke fagfasabsaban. Kayu ginan galin, kiklas yay at bale ay gubanan wan. Ay kawat yangay nus nganday at fagfasabsaban. Abal yay taguna at nasaful katanya fag faran nu gfagut balan. Ay at fadugsay Ubal, kanya yay taguna at nasaful igfaawang ngay famaawangan. At famaawangan, tulali ay at ke bakyang fag ngay famaawangan. Katanya wan Lamek baguwama at duwa at nasaful.
22Ay Lamek mangena at sadi, anyangay e unga duwa. At sadi, sik baguyna, at ngayan Naama. Ay at sadi, sik baguwama. At ngayan, Tubal-Kain. Ay kanya fag baguwama nasaful igfalafi bakal, kawat fagnuwan ayuwayu. Kanya wan at taguna tagsaful igfagbulun katanya, ay bandi baliwa at ngay taw kamaning wan.
23Ay sayginan, Lamek igfandaragang. Glong sat duwa mangena te, “Am ku mangena fagduwa, dungugani ku fagalongunun. Ebi, sik baguwama nafabarangyan angku. Nafalang angku. Ay aw, nafate kway sigad anya. 24Ebi ebi, gina yay tam fufuwama Kain, e longan tuwa te, nus nga sinu tagfate Kain, Diyus nu gfafoli sa anya, fitu ginan. Ay roro angku ayu yap fiya fiya. Nus nga sinu at nafabarangyan angku, at fansali, antuwa 77 ginan.”
Katanya wan at foyungan sas Kain fag fulan taw baliwa.
Set nu Kasalug
25Sayginan, Adan ay Eba inke ngenge yangay, sik ama. At mangena guseganan yangay sas Diyus te, “Fadi fadi sas Diyus, nafon yangay angku fantubus ku baguwama Abel, at fadugsay nafate.” Ay Eba nafangayan at ngenge te, Set, teway kanya fag ngayan at masuwad, “sik nafon”. 26Ay nu bandi wan, Set inke unga yangay, at ngayan Enus.
Ay siginan ginanya, bandi baliwa, at taw gfasigad wa gdarangin sas Yawi.
Àwon tá yàn lọ́wọ́lọ́wọ́ báyìí:
Fagsigadan 4: TAWEAST
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Copyright © 2023 by OMF International, Philippines