Fagsigadan 21
21
Yawi nu Gfagurungan at Fatuyanan sas Abrayam Daduwa
1Bandi ataw, Yawi nafagurungan wa fiya ebi at nafatuyanan sas Sara. 2Sara gfafiyon wa fiya. Ay gfasalug wa fiya at unga, sis Yawi nafatuyanan fag lungud banwa fiya fiya. Ay nu katanya, Abrayam ay Sara dewa dawdaw magurang, inke unga yay sik ama. 3Ay Abrayam nafangayan at unga te, Isaak. 4Ay nu ndasug sis fawaluk menit, Abrayam nafaning Yawi at suguwan anya. Natuli at unga. 5Ay ginanya, Abrayam at banwa, 100 wan.
6Ay Isaak nu nsalug wan, Sara glong te, “Katsi long, kadkasean kwa dawdaw, katvngvdan nu guseganan aw, teway Yawi nafauseganan angku. Ay anggan ban fagayu at dumungug te, inke unga akwan, kanya sigon, kase yangay ban dawdaw guseganan, kata angku.”
7Ay Sara glong yay te, “Sadaw long ro ebi, wa long ban e lumong sa ku mangama te, ‘Katsi long am mangena e unga wan.’ Ay roro katsi, e unga wami. Dewa ami dawdaw magurang, inke unga yay ami.”
Ismael Dewa Inyayu at Tama, Diyus Igfatvngvdun tuwa
8Isaak nu gbiya wan, intuwas wan nu gsusu. Ay ginanya fag menit, Abrayam fag fulan guseganan dawdaw. Gfatama sik ngay fakonun. Kanya fagayu gfangon. 9Ay roro ginanya, Sara nalag Ismael nu gfalingun Isaak. Ismael, Abrayam unga sit fanuguwan Agar.
10Ay Sara nu nalag katanya, nalong at mangama te, “Faloi wan ta fanuguwan Agar, anggan ay unga. Ay lag ban e fon ta fagmabalanun sanya fag unga. Nu gfon ban o fagayu ta fagmabalanun, sai tuwa ta unga Isaak.”
11Ay Abrayam nu nadungug at mangena fagetun, kabalu wa dawdaw, teway kafanyu at unga Ismael. 12Ay roro Diyus nalong yay anya te, “Abrayam, lag dawdaw kabalu sanya fag talanak baliwa. Faningi wa am mangena longan. Faloi wa ngatu. Teway nu gfagurungan ban aw ku ngay fatuyanan sa emu ebi ginan, sa tuwa ay baguwama Isaak at fufu sat dagat daga. Wa sas Ismael at fufu. 13Ay dewa katanya, igfatvngvdun kyangay Ismael, teway kanya am unga yangay, kata Isaak. Anggan ban anya at fufu sat dagat daga, igfaayu kyangay ban ayuwayu, anggan wa umsik fulan taw madaragang.” Katanya wan Diyus nu gfabitsug Abrayam amatanganan.
14Nu katanya, Abrayam nafaning wan at mangena longan. Balabag di sad surip, kanya nabul wa sik ngay fakonun, ay anggan sik baringan, mapnu mamam. Ay naurug wa sas Agar lafi kanya fag ngay fakonun ay fag mamam. Ay nafalo wa long talanak.
Ay talanak glodloan way gugat sanya sangaba talun yud e taw, sas Beerseba fag lungud.#21:14 Sanya fag talun fagyudun e taw, wa bangan e mamam. 15Ay nu glugo wan kanya nu glodloan, namin wan at ba mamam. Ay at baguwama kadanum wa dawdaw. Ay at tina fagbulun, naubun wan at baguwama sa sik daga funfun. 16Kanya nalo yay sat dayu. Manga 80k dufa yay at buknga. Gamatanganan te, “Kwa kaumsig glag ku baguwama nu kate.” Ay Agar nu sanya wa gugat malunggung, nauyway wa dawdaw.
17Ay roro sat dayu, at baguwama guyway yangay. Ay nu guyway wa gugat, Diyus nadungug. Ay siginans banwa, Diyus tagbukngan nauro Agar. Glong te, “Agar! Taw o sanya am faguywayun? Nadungug kwan am baguwama nu guyway. Ay tumarabang kwa ayu. Nu katanya, lag gafanawa. 18Loi wan. Nanlag way o am baguwama. Ay fabitsugi at amatanganan. Teway gfaayu ban aw at ngay fufu sat dagat daga. Sik fulan taw ban madaragang, am baguwama at ngay fufu.”
19Ay nu katanya, Diyus nafalag sas Agar te, roro mangaro sanya, e fagfanaguban tuwa. Ay Agar at fagbulun, nananbul mamam. Nauba at baringan. Ay nafapnu. Ay nafainum at baguwama.
20Ay Ismael sanya wan nu kadaul, sis talun at yud bangan e gbanwan taw. Ay kadugenya, Diyus gufud tuwa anya. Ay bandi nu gbiya wan, kanya sik taw masafulan igbusuy. 21Ay nu gbanwan, sanya yay gugat sis Paran, sangaba talun yud bangan e taw. Ay bandi, at tina nasarap wa at baguwama mangena siginans taw Iptu at baguyna.
Abrayam ay Abimilik nu Gfasine at Fagmasadiun
22Sayginan, Abimilik nanlag yay Abrayam. Gaygaluwan at fun sundalu, at ngayan Fikul.
Ay Abimilik nu sanya wan, glong sas Abrayam te, “Sama, e fagalongun ami sa emu. Katsi ngaro intuyan wami te, fagayu am ngay fagbulun, Diyus gtarabang tuwa emu. 23Ay em fagstiyeun, kaumsig ami nu mke fatuyanan o sa emi sam Diyus at daga salubangan, sik fatuyanan taglong te di ban o e suksukan emi. Anggan ban sa em ngay unga, ay sa em ngay fufu sat dagat daga, di ban o e suksukan. Fangkabat fatuyanani emi te, katsi ban masine tuwa am fagbulun sa emi fagayu ste si ku basad fagmagurangan. Angku ku fagbulun sa emu ebi ginan masine tuwa, ay emu am fagbulun sa emi, katanyai yangay. Katanya em fakaumsigun am fatuyanan.” Katanya Abimilik at longan sas Abrayam.
24Ay Abrayam gbalus Abimilik te, “Kin, kaumsig aw nu mke fatuyanan tam.” 25Ay Abrayam dewa naelongan katanya, glong yangay sas Abimilik te, “Laman katsi e nabiyatan kway sa ku amatanganan, teway ay ngay fanuguwan gfanbilug way emi em fagfanaguban.”
26Ay Abimilik gbalus Abrayam te, “E sek, teway katsi yay nu gdungug aw te, ku ngay fanuguwan gfanbilug way mangaro emu. Teway wo nafoyung angku ebi ginan. Ay famamut ya, kwa gsaful te, go sinu ka fag ngay fanuguwan tagfagbulun katanya.”
27Ay Abrayam nu nadungug Abimilik longan, nafon sik ngay tupa ay sik ngay baka. Ay siginan ginanya, duwama inke fatuyanan sat sadi te, “Katsi long ban, masadi tuwa ta.”
28Ay rodi ataw, Abrayam nafasaman fituk tupa tina. 29Ay at usama Abimilik ginto te, “Taw ro kanya am nafasaman fag ngay tupa?” 30Ay Abrayam gbalus te, “Kanya ku fon emu, ku famatvngvd ku elonganan aro te, kanya fag fagfanaguban ami wa fiya at naali. Ay ami wadi tagbilug.”
31-32Ay roro mangaro duwama nu gsulitanan, si was day fagfanaguban. Ay duwama nu ntabu wa nu kawat at fatuyanan, Abimilik nalo wan, nauli wa sas taw Filistiyu at talun, igfaygaluwan at fun sundalu. Ay bandi ataw at ngay taw nu gngayan sanya fag ke fagfanaguban, Beerseba, teway sanya Abrayam ay Abimilik nu kawat at fatuyanan.#21:31-32 Sis Fangebriyu, galay glong te, Beerseba, at masuwad, sanya fag ke fagfanaguban nu kawat at fatuyanan.
33Ay duwama nu nauli wan, Abrayam naguyanan yay sanyas Beerseba. Ay natanum sik kayu at ngayan tamarisku.#21:33 Tamarisku, sik kayu marabung. Ay Abrayam ro at fagnatanumun ka fag kayu, igfaamatang anya te, Diyus natarabang anya kaduge gbanwan sis Beerseba. Ay sanya nu gfauseganan Yawi, at yud e fakatabuwan fag Diyus. 34Ay Abrayam glugo tuwa nu gbanwan sis taw Filistiyu at talun.
Àwon tá yàn lọ́wọ́lọ́wọ́ báyìí:
Fagsigadan 21: TAWEAST
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Copyright © 2023 by OMF International, Philippines