Mateo 4
4
Zeso uimasiri inananiuarrine Tocorime-Tamine nattome inaraha rrehe narrararrari
Maraco 1.12-13; Roca 4.1-13
1Zouao Zeso passo dopaniza niqui izanaha rricazapa Deo Corime Zeso iaqquemorarrari, zama uamoni ssono carri, siba carri taniuarri iaccarrari. Nauiuarri poua iaccarraripa uimasiri totonanade Tocorime-Taminepa Zeso nattome inauiuarrine. Tocorime-Taminepa Zeso uimasiri inananiuarrine damera tarrari. 2Nazama Zesopa uamoniuarri madizapa rriperaui uada 40 naha madizanaporrari. Poua rripa-rrarauicca ssiuarra 40, zome 40 nazapa pemibote torrarrari. 3Nazapa Tocorime-Tamine Zeso icamaizauiuarrine pouaza bacco tarrari. Tocorime-Tamine attipa: —Deo Bedi tirrezape, rrari, tirripaniuarrine arrirraro siba pao torrauiuarrine uati tinarri −narrari. 4Naraha manaco Zeso Tocorime-Tamineza uati tarrari: —Deo Atti dozo nanizape arrima narraro: “Zamatapazara imadini orrari-rrerani. Abi Deo uati taui imittarrarocca ibodiza torrezape pina irriparrarossa narraro. Narrarorrinena idacorani nezape imadirraro” nani Deo Atti dozo nanipe −narrari Zeso.
5Naui zotode uimasiri totonanade Tocorime-Taminepa Zeso oza panani bicabote Zerozareuarri iaccarrari. Nanicca Deoza dada toqquima tetepiuarri inanarrari. 6Nauiza Tocorime-Tamine Zesoza uati tapomarrari: —Rrari, Deo Bedi tirrezape ticarroppacossarri, namiuarri tissona-rreranitoui −narrari. —Arri Deo Atti dozo nanizape arrima narraro:
“Deopa pocca zozosse tabaqqui memeuarriccaza uati tauitoui, tia ecauemananiuarrine. Pouadeni birriza tia dama irrizemanezape temori naqui sibaza cauatidi-rreranitoui” nani Deo Atti dozo nanipe
−narrari Tocorime-Tamine Zesoza. 7Naraha manaco Zeso uati tapomarrari: —Rrehe, Deo Atti dozo nani nema neraha Poua Atti dozo nani onihipe arrima narraro: “Tia Zozossede Deo nattome tarrararro. Tettiza: ‘Deo oua nattome’ terrerarri” nani Deo Attipe −narrari Zeso.
8Naui zotode Tocorime-Taminepa ssono imeni uarri taniuarri Zeso iaqquemorarrari. Nauiuarri bacco toquenaza Tocorime-Taminerrine zama bazima Zesoza auato inanarizarraro. Zama uapima bica tanicca, oza panani bazima bica tanicca Zeso zopi icanarizarrari Tocorime-Taminepa. 9Nazapa Tocorime-Tamine Zesoza uati tapomarrari: —Qqui tanerre! Arrirraro zama bazimape tiaza da onaniuarrine. Rrehe, obaccouarri tipitoza titteza ouaza tetizeza: “Occa tamine” tarri. Ouaza nema tezape arrirraro bazimape ticca torraniuarrine, onarraro −narrari Tocorime-Tamine atti. 10Naraha manaco Zeso Tocorime-Tamineza uati tarrari: —Tocorime-Tamine, arricca ticcanirri! Peperriua. Ouape tiaza ouatizena onerrerani. Deo Atti dozo nanizape arrima narraro: “Ia Zozossede Deo Pouazara tetizemanani orrari zanaporri. Poua Attizara iboraqquiri tiquenarri” nani Deo Attipe −narrari Zeso.
11Nazapa Tocorime-Tamine toccanirrari. Nanarra Deocca zozosse tabaqquipa memeuarricca narroremanaporra naza Zeso acco icanemanauiuarrine rrauironarrari.
Zesopa Carireauarri maride torraporrari
Maraco 1.14-15; Roca 4.14-15
12Zotode Zesopa —Zouao Batista toponi cocoroza coro izimemanaui −quenaui uima mittazapa zama arobeni onini Carireauarri toccanirrari. 13Naraha Zesopa oza panani Nazaretiza tomadinipoma-rrararrari. Oza panani Capenaouarrina madiuiuarrine toccarrari, naui Carireacca coriza inidiuarri. Zesopa nauiuarri madiuiuarrine toccazapa Izarraeo bedi Zaborona potemauidenicca zamaboteza ccariza, Izarraeo bedi Natari potemauidenicca zamaboteza naco ccariza narrari. 14Zeso nauiuarri madiuiuarrinecca uimape maittaccazama Deo Atti cacomerabote Izaia dozo inaporraro. Poua attipa:
15—Zaborona potemauidenicca zamaboteuarri, Natari potemauidenicca zamaboteuarri naqui uima bicani carrini.
Ia Idinide nauiuarri madimanarrarideniza bacco tarrari, pina ssiuarranissa narrari.
Nauiuarripa zodeo querrena-rrararrarideni carri taui.
Coriza uapicca zama, ueni Zorodao marri toccauiuarricca zama onini Carireazapa Deoza ssamoqquiri naha madimanarrari.
16Ziziniza madimanazapa zoqquehe noppineni cappinemanaraha ssiuarrani zati pouadeniza tossiuarrarizezape
Deorrine madirra tocassiuauerauiuarrine tauimarini auato inananitoui
−napoui nade Deo Atti Izaiarrine dozo naniza.
17Nauiuarri Zeso bacco tazana Deo Atti maride taide torraporrari. Madirra mari mari ihicanabaqqui naza poua attipa: —Ticcadeni uima Deoza tecomeremaneza ticcadeni uimasiri tinebomanarri. Deotouira tizanapomanarri. Deocca cacauehepe iaza bacco narronabote nani −nanariza narrari Zeso.
Zesopa aba cocorodedeni 4 quenaha ua inabaqquirrari
Maraco 1.16-20; Roca 5.1-11
18Zeso Carireacca coriza inidi toccabacossaza madirra pamaha qqui inabaqquirrari: Simao poua oni ouaha Pedoro, poua ouaha Adere tezerre. Pouadenipa aba cocorodedeni. Aba corode toquerrenaraha Zeso bacco narronarrari. 19Pouadeniza uati tarrari: —Rrina, ouaza ticadarizarri, ouatimade tiquerrenezape tiadeni onauattabaqquiniuarrine. Taidepe abaza tizepedeni irrimanaporaha rridapanape madirra ouaza toquerrenauiuarrinena tizepedeni irrimananitoui, onarraro −naui nade Zeso. 20Narraro uima mittemananarra poccadeni tarrapa iquenebomaneza Zesoza touedarrari.
21Nazapa denima rraui torrabacossanarra Zesopa madirra ouaha poua imecote tezerre qqui inabaqquirrari. Narraridenipa Zebedeo bedideni Tiaco, Zouao quenarrari. Poccadeni abi quenaza darroniza rrassi zarrari. Tarrapa ssequinimade toquerrenaraha Tiaco, Zouao tezerre Zeso ua inabaqquirrari. 22Narrarideni naco amazati poccadeni darroni iquenebomana, poccadeni abi inebomana naza Zesoza touedarrari.
Zesopa madirra uapi taha mari icanabaqquirrari
23Zesopa Carireauarri ccariza ccariza narizarrari. Nani Izarraeo potemaui zodeodenicca Deo Atti mamari onihi onihi narizaniuarri mari mari nanariza narrari. Pouapa Deocca cacauehecca uima bicani ehecomerariza narraro. Comaqquiri narrarideni naco comani onihi, onihi carririzemanaraha bazima ihinanomi-rizabaqqui narrari. 24Pocca uimape zama Siria nemaneheuarri madirizemanarrarideni naco mittarizemanazapa poccadeni zama uarri teraha comaqquiri narrarideni eheccarrona-baqquimana narrari. Zamacoma carrimanarrarideni, isso sirideni, birri sirideni, comani onihi onihi carrimanarrarideni eheccarrona-baqquimana naza bazima Zeso ihinanomi-rizabaqqui narrari. Madirra bodideniza Tocorime-Taminecca zozosse tabaqqui tocorimedeni madizemanarrarideni, arra uatianirri comani carrimanarrarideni, arra madirra idedeni tone biqueraza issodeni siri toquerrenarrarideni naco eheccarrona-baqquimana naza Zeso ihinanomibaqqui narrari. 25Nani Carireauarricca madirizemanarrarideni mota, zama arobeni onini Decaporiuarricca madirizemanarrarideni mota, oza panani Zerozarecca madimanarrarideni mota, zama arobeni onini Zodeauarricca madirizemanarrarideni mota, ueni Zorodao marri ccarronauiuarri madirizemanarrarideni mota naco bazima Zesotoui dameraqquiri naza rrauirronana canarrari.
Àwon tá yàn lọ́wọ́lọ́wọ́ báyìí:
Mateo 4: KBNT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
2020 Impresso na Graafica da Biblia
