John 16
16
1Au gu tala adu mee nei gi goodou gi dee aahe dua ai goodou. 2Dangada e hai naa goodou gi dee ulu i olaadeu synagogue, gai e dae mai naa donu de masavaa a tangada e daia goodou ga maakau, e maanadu ai bolo ia e hai lodo o de Maadua. 3Gai gilaadeu e hai mee nei i hiidinga gilaadeu e dee iloo dogu Damana, gilaadeu e dee iloo hogi au. 4Au gu tala adu de mee nei gi goodou, gi manadua ai e goodou i de dae mai de masavaa laa, bolo au gu tala adu mee nei gi goodou. Au tee tala adu de mee nei i taamada age, go hiidinga au goi noho huu i oodou daha.
Hegau a de Hagasaalunga Dabu
5“Iainei gai au gu dai ahe gi daho de ia ne haia ngau gi humai. Gai tigi ai donu se goodou ne siilia mai, ‘Koe ga hano naa gi hee?’ 6Goodou gu hinangalosaa oodou lodo, i hiidinga dagu tala adu muna nei gi goodou. 7Gai au e tala adu gi goodou de muna abodonu: e haigamaiana adu donu gi goodou dogu hano gee mai i oodou daha. Noo au e dee hano gee, gai de Ia Bale e dee humai gi oodou daha; aagai noo au e hano gee, gai au e hai naa ia gi humai gi oodou daha. 8Gai de masavaa naa huu oona e humai ai, gai ia ga hai gi iloo e henua i lalo dagodo o de haisala, ma de heohi aama de hagamodu muna: 9dagodo o de haisala, i hiidinga gilaadeu e dee hagadonu au; 10dagodo o de heohi, i hiidinga au e hano gi daho dogu Damana, gai goodou e dee gidee naa ngau; 11dagodo o de hagamodu muna, i hiidinga tagi o henua i lalo nei gu lava donu i de hagamodu ono muna.
12E lagolago ange donu agu mee e lodo e tala adu gi goodou, aagai goodou tigi maua i de kave. 13Aagai de masavaa naa huu o de Hagasaalunga o de mee abodonu e humai ai, gai ia ga dagi ange goodou i de mee abodonu alodahi. Gai ia e dee basa i dono sauaa donu huu, gai ia e tala ana mee alodahi gu langona, gai ia ga tala adu ai gi goodou mee gu dai loomai. 14Ia e hagamahamaha naa donu au, ma de tala adu gi goodou ana mee ne kave mai i ogu daha. 15Mee alodahi a Tamana niiagu. Aanei hiidinga aagu e tala adu ai nei, bolo de Hagasaalunga Dabu e hagaago adu naa gi goodou ana mee gu kave mai i ogu daha.
De hinangalosaa e sui naa ga se malangilangi
16“E dee mmule naa donu gai goodou gu dee gidee au, gai e dee mmule naa hogi gai goodou gu gidee ange hogi au.”
17Hanu ana dangada agoago ne hagadau ssili, ga hagataba, “Dee hee de hagadoonunga o ana muna e tala mai nei, ‘E dee mmule naa donu gai goodou gu dee gidee au, gai e dee mmule naa hogi gai goodou gu gidee ange hogi au,’ gai ‘Go hiidinga au e hano gi daho dogu Damana’?” 18Gai gilaadeu ne duudagi de ssili, “Dee hee de hagadoonunga o muna, ‘e dee mmule naa donu’? Gimaadeu e dee tonu ange gi ana muna e tala.”
19Gai Iesu gu iloo e ia bolo gilaadeu e llodo e ssili ange gi de ia dagodo o de mee laa, gai ia ga hai ange gi gilaadeu, “Goodou e hagadau ssili be dee hee de hagadoonunga o agu muna i dagu hai adu, ‘E dee mmule naa donu gai goodou gu dee gidee au, gai e dee mmule naa hogi gai goodou gu gidee ange hogi au’? 20Ni muna abodonu, ni muna abodonu aagu e hai adu nei gi goodou, goodou e tangi naa, gai henua i lalo e malangilangi. Goodou e hinangalosaa naa, gai doodou hinangalosaa e sui naa ga se malangilangi. 21De hine e hai ono hagalangona e daemaha, i hiidinga gu dae mai dono aoaa e haanau ai; gai de masavaa naa huu e haanau ai dana gaagaa, gai ia gu dee manavasaa, gai gu malangilangi i hiidinga o dana dama gu haanau mai laa gi henua i lalo. 22Gai e bei ai hogi oodou dagodo iainei: goodou gu hinangalosaa iainei, gai goodou e malangilangi naa i de masavaa oodou e gide ai au, gai e deai donu se dangada e maua i de kave gee doodou malangilangi. 23De laangi laa gai goodou e dee dangidangi mai naa gi de au i dahi mee. Ni muna abodonu, ni muna abodonu aagu e hai adu gi goodou, be ni aha naa huu oodou e dangidangi ange ai gi Tamana i ogu hiidinga, gai ia e gaavadu naa donu gi goodou. 24Goodou tigi dangidangi donu i dahi mee i dogu ingoo ga dae mai ai gi iainei. Dangidangi, gi maua ai oodou mee, gai gi honu abodonu ai doodou malangilangi.
De kii i henua i lalo
25“Au gu tala hagasengasenga adu mee nei gi goodou iainei. Gai e dae mai naa donu de masavaa aagu e dee basa hagasengasenga adu ai gi goodou, aagai e tala hagasoe adu donu gi goodou dagodo o Tamana. 26De laangi laa gai goodou e dangidangi naa i dogu ingoo; au e dee hai adu bolo au e dangidangi ange naa gi Tamana i oodou hiidinga; 27e deai, Tamana e aloha donu i goodou, i hiidinga goodou ne aaloha i de au, ma de hagadonusia bolo au ne humai donu i daho de Maadua. 28Au ne hano iho gi henua i lalo mai i daho Tamana. Gai iainei au ga hano gee nei i henua i lalo ga ahe gi daho Tamana.”
29Gai ana dangada agoago ne hai ange gi de ia, “Iainei gai koe gu basa hagasoe mai donu huu gi gimaadeu, koe gu dee basa hagasengasenga mai! 30Iainei gimaadeu gu iloo bolo koe e iloo mee alodahi, gai gu deai donu muna ssili a dangada. Deenei ai, gimaadeu e hagadonusia bolo koe ne humai donu i daho de Maadua.”
31Iesu ne ssili ange gi gilaadeu, “Goodou gu hagadonusia naa iainei? 32E dae mai naa de aoaa, gai gu dae mai donu, de masavaa laa gai goodou e mavaevae saele naa, dahi ma dahi e ahe naa gi dono hale gai ga tili au. Gai au e dee daudahi donu, go hiidinga Tamana e noho madali au.
33Au gu tala adu mee nei gi goodou, gi dagodo ai dogu baba i oodou lodo. Goodou e hagaduasala ina naa donu i henua i lalo, gai goodou gi llodo mmahi, au gu kii i henua i lalo!”
Àwon tá yàn lọ́wọ́lọ́wọ́ báyìí:
John 16: DBD
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2022, Wycliffe Bible Translators, Inc. All rights reserved.
