John 14
14
Iesu go de haiava e hulo ai gi Tamana
1“Goodou gi dee manavasaa oodou lodo; gai goodou hagadonusia de Maadua, gai gi hagadonusia hogi au. 2E lagolago mommee noho i de hale o dogu Damana; gai noo e deai, gai au gu tala adu gi goodou, bolo au e hano e hagadabena dahi mommee moodou. 3Gai noo au e hano e hagadabena dahi mommee moodou, gai au e ahe mai naa e kave goodou gi nnoho madali au, gai goodou ga nnoho ai hogi i dogu mommee iai. 4Gai goodou e iloo donu de haiava e hulo ai gi de mommee oogu ga hano nei aagena.”
5 Thomas ne hai ange gi de ia, “Tagi Maolunga, gimaadeu e dee iloo be go hee oou ga hano naa aagena, gai dee hee demaadeu hai e iloo ai de haiava?”
6Iesu ne hai ange gi de ia, “Go au donu de haiava, ma de muna abodonu, aama de mouli. E deai donu se dangada e maua i de humai gi Tamana, noo ia e duu i mua i de au. 7Noo goodou gu iloo au, gai goodou gu iloo donu hogi dogu Damana. Dua iainei gai goodou gu iloo donu ma de gidee ia.”
8 Philip ne hai ange gi de ia, “Tagi Maolunga, hagaagona mai gi gimaadeu Tamana, deenei donu huu demaadeu mee e llodo ai.”
9Iesu ne hai ange gi de ia, “Philip, gu daulooloa dogu noho i oodou daha, aagai koe tigi iloo naa donu be au goai? Be goai e gidee au, gai ia gu gidee donu Tamana, gai dee hee dau hai e hai mai ai naa, ‘Hagaagona mai gi gimaadeu Tamana’? 10Koe e dee hagadonusia bolo au e noho i lodo o Tamana, gai Tamana e noho i ogu lodo? Au e dee tala adu muna nei i dogu sauaa donu huu, aagai go Tamana e noho laa i ogu lodo e hai hegau i ogu daha. 11Koe gi hagadonusia bolo au e noho i lodo o Tamana, gai Tamana e noho i ogu lodo, aabe gi hagadonusia denga hegau hagalele mouli laa. 12Ni muna abodonu, ni muna abodonu, aagu e hai adu nei gi goodou, tangada e hagadonusia ogu dagodo, e hai naa hogi hegau aagu gu hai nei; gai ana hegau e hai e kii ange naa donu de hagalele mouli i mee nei, i hiidinga au ga ahe nei gi daho Tamana. 13Gai be se aha naa huu oodou e dangidangi ai i dogu ingoo, gai au e hai naa donu gi bei, gai Tama ga hagamahamaha ai Tamana. 14Noo goodou e dangidangi mai i dahi mee i dogu ingoo, gai au e hai naa donu gi bei.
De hagatoo donu de humai o de Hagasaalunga Dabu
15“Noo goodou e aaloha i de au, gai goodou ga daudali i agu hainga. 16Gai au ga dangidangi ange naa gi Tamana, gai ia ga gaavadu ange gi goodou dahi Ia Bale gi noho i oodou daha ga hano ai, 17go de Hagasaalunga o de muna abodonu. Gai de gau henua i lalo e dee maua i de kave ia gi olaadeu lodo, go hiidinga gilaadeu e dee gidee aabe e iloo ia. Gai goodou gu iloo ia, go hiidinga ia e noho madali goodou ma de noho i oodou lodo.
18Au e dee tili naa donu goodou bei dagodo o denga gauligi e deai olaadeu maadua; au e humai naa donu gi oodou daha. 19E dee mmule naa donu, gai de gau henua i lalo gu dee gidee au, aagai goodou e gidee au; go hiidinga au e mouli gai goodou e mouli naa hogi. 20De laangi laa gai goodou e tonu ange naa bolo au i lodo o dogu Damana, gai goodou i ogu lodo, gai au i oodou lodo. 21Be goai e daohia agu muna ga daudali ai, go ia donu e aloha i de au. Gai be goai e aloha i de au gai dogu Damana e aloha hogi i de ia, gai au e aloha hogi i de ia ma de hagaago ange au gi de ia.”
22 Judas (e dee go Judas Iscariot) ne ssili ange gi de ia, “Tagi Maolunga, gu aha gu hagaago mai ai donu huu goe oo dagodo gi gimaadeu, gai e dee hagaago ange gi henua i lalo?”
23Iesu ne basa ange, ga hai ange gi de ia, “Tangada e aloha i de au e daudali i agu muna. Gai dogu Damana e aloha i de ia, gai gimaau e loomai naa ga nnoho madali ia. 24Tangada e dee aloha i de au, e dee daudali i agu muna. Oodou muna gu langona mai i ogu daha e dee niiagu donu, gai ni muna donu nii Tamana ne haia nei au gi humai.
25Au gu tala adu mee nei gi goodou, i de masavaa oogu e noho ai i oodou daha. 26Gai de Ia Bale, go de Hagasaalunga Dabu, go de ia a Tamana e hai gi humai i dogu ingoo, e agoago adu goodou i mee alodahi, ma de hagamaanadu adu gi goodou mee alodahi, aagu gu lava i de tala adu gi goodou. 27Au e gaavadu gi goodou de baba; gai de baba aagu e gaavadu gi goodou, e dee bei de baba a henua i lalo e gaavadu gi goodou. Goodou aude manavasaa oodou lodo aabe gi maatagu.
28Goodou gu langona dagu tala adu gi goodou, ‘Au ga hano gee nei mai i oodou daha, gai au e ahe mai naa donu gi goodou.’ Noo goodou e aaloha i de au, gai goodou e malangilangi donu i dogu ahe e hano gi daho Tamana, go hiidinga Tamana e maolunga ange i de au. 29Au e tala adu mee nei gi goodou iainei i mua de hai, gi hagadonusia ai e goodou i de masavaa e hai ai. 30Dua iainei gai au e dee tala adu naa donu gi goodou hanu mee lagolago; go hiidinga tagi o henua i lalo nei gu dai humai. Gai ia e deai donu sono sauaa e daohi ai au, 31aagai de gau i henua i lalo gi iloo bolo au e aloha i Tamana, gai au e hai donu gi bei mee a dogu Damana gu tala mai gi de au.
Goodou hiihidi age, gidaadeu ga hulo.
Àwon tá yàn lọ́wọ́lọ́wọ́ báyìí:
John 14: DBD
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2022, Wycliffe Bible Translators, Inc. All rights reserved.
